Адӕмы исты баиу кӕндзӕн?

ЦӔУЫЛФӔНДЫ ма ӕууӕндай, уӕддӕр, ӕвӕццӕгӕн, сразы уыдзынӕ, алы дины дӕр кӕй ис, рӕстдзинад чи уарзы, ахӕм адӕймӕгтӕ. Раст цы у, уымӕн стыр аргъ чи кӕны ӕмӕ рӕстдзинад зӕрдиагӕй чи агуры, ахӕмты ссарӕн ис индустӕ, католиктӕ, дзуттӕгтӕ ӕмӕ ӕндӕр динты минӕвӕртты ’хсӕн. Фӕлӕ куыд зыны, афтӕмӕй дин адӕмы ӕрмӕстдӕр дихтӕ кӕны. Иуӕй-иутӕ та ма динӕй пайда кӕнынц сӕ фыдвӕндтӕ сӕххӕст кӕнынӕн дӕр. Цымӕ искуы ӕппӕт динтӕй дӕр, хорздзинад ӕмӕ рӕстдзинад чи уарзы, уыцы сыгъдӕгзӕрдӕ адӕймӕгтӕ баиу уыдзысты? Искуы сӕ иумӕйаг хъуыддаг бахъӕудзӕн кӕнын?

Куыд хъыг у, бонӕй-бонмӕ дины тыххӕй адӕм кӕрӕдзимӕ тынгдӕр кӕй фыдӕх кӕнынц, уый! Ӕркӕсӕм иу цалдӕр цӕвиттонмӕ. Шри-Ланкӕйы индустӕ хӕцынц буддистты ныхмӕ. Алыхуызон хӕстыты сӕ туг ныккалдтой протестанттӕ, католиктӕ ӕмӕ иудаисттӕ. Цӕцӕны, Индонези ӕмӕ Косовойы, йӕхи чырыстон чи хоны, уыдон хӕцынц пысылмӕттимӕ. Нигерийы та 2000 азы мартъийы, дины аххосӕй цы быцӕу рауад, уым дыууӕ бонмӕ фӕмарди 300 адӕймаджы. Дины бындурыл цы ӕнӕуынондзинад сӕвзӕрд, уый уыцы хӕстыты ӕбуалгъдзинад фӕуӕззаудӕр кодта.

Дины сӕраппонд цы ӕбуалгъы хъуыддӕгтӕ цӕуы, уыдон арӕх сыгъдӕгзӕрдӕ адӕмӕн ӕнцой нӕ фӕдӕттынц. Цӕвиттон, аргъуанмӕ цӕуджытӕй бирӕтӕ не ’мбарынц, сывӕллӕттӕн тыхми чи бакӕны, уыцы сауджынты иуӕй-иу аргъуанты куыд дарынц, уый. Иннӕ уырнджыты та мӕты тынг ӕфтауы, афтӕ хуыйнӕг чырыстон дины сектӕты гомосексуализм ӕмӕ аборты фарстатыл кӕй быцӕу кӕнынц, уый. Бӕрӕг у, дин адӕмы кӕй нӕ баиу кодта. Фӕлӕ дарддӕры цӕвиттонтӕ куыд ӕвдисынц, афтӕмӕй алыхуызон динты ис, ӕцӕгад зӕрдиагӕй чи уарзы, ахӕм адӕймӕгтӕ.

Уыдон бӕллыдысты ӕцӕгад ссарынмӕ

Фидели ӕппӕт зӕрдӕйӕ лӕггад кодта католикон аргъуаны, аргъуан Сан Франциско, Ла-Пасы (Боливи). Уым-иу йӕ зонгуытыл ӕрлӕууыд Мадымайрӕмы нывы раз ӕмӕ-иу дзуары раз ссыгъта, йӕ бон цы зынаргъдӕр цырӕгътӕ уыд балхӕнын, уыдон. Алы къуыри дӕр-иу бирӕ хӕринаг бахаста сауджынмӕ, цӕмӕй-иу ӕй мӕгуыртыл байуӕрстаид. Фӕлӕ Фиделийӕн йӕ фондз сывӕллоны амардысты, аргъуыд нӕ уыдысты, афтӕмӕй. Сауджын ын куы загъта, зӕгъгӕ, сӕ удтӕ сыгъдӕггӕнӕны хъизӕмар кӕнынц, уӕд Фидели ахъуыды кодта: ау, кӕд Хуыцау ахӕм хӕларзӕрдӕ у, уӕд афтӕ куыд хъуамӕ уа?

Тарӕйӕн, дохтырӕн Катмандуйӕ (Непал), йӕ ныййарджытӕ уыдысты индуисттӕ. Фыдӕлтыккон ӕгъдӕуттыл хӕцгӕйӕ, уый табу кодта йӕ хуыцӕуттӕн индусты кувӕндӕтты ӕмӕ йӕ хӕдзары дардта гуымирытӕ. Фӕлӕ Тарӕйӕн ӕнцой нӕ лӕвӕрдтой ахӕм фарстытӕ: цӕмӕн ис царды афтӕ бирӕ хъизӕмӕрттӕ? Адӕм цӕмӕн мӕлынц? Уыцы фарстытӕн йӕ дины бӕлвырд дзуаппытӕ не ссардта.

Панья схъомыл Бангкокы (Таиланд), йӕ ныййарджытӕ уыдысты буддисттӕ, йӕ хӕдзар уыд къанаугӕрон. Уый сахуыр кодтой, зӕгъгӕ, адӕймаг хъизӕмар кӕны, раздӕры царды тӕригъӕдтӕ кӕй арӕзта, уый тыххӕй, ӕмӕ хъизӕмӕрттӕй йӕ бон фервӕзын у, йӕ бӕллицтӕ иууылдӕр куы ныууадза, уӕд. Иннӕ сыгъдӕгзӕрдӕ  буддисттау уымӕн дӕр дзырдтой, кӕй хъӕуы аргъ кӕнын, алы райсом-иу бур дарӕсты адӕмыл мӕгуыргур цы моладзантӕ зылди, уыдоны зондджындзинадӕн. Уый кодта медитаци, аныгъуылди-иу йӕ хъуыдыты, ӕмӕ ӕмбырд кодта Буддӕйы гуымирытӕ, уымӕн ӕмӕ ӕууӕндыд, кӕй йӕ хъахъхъӕндзысты, ууыл. Иухатт Паньяйыл ӕрцыди стыр бӕллӕх, ӕмӕ уый фӕстӕ йӕ буар астӕуӕй дӕлӕмӕ нал куыста. Уый райдыдта буддистты моладзандӕттӕм цӕуын, уымӕн ӕмӕ йӕ ӕппӕт зӕрдӕйӕ уырныдта, диссаджы хуызы кӕй сдзӕбӕх уыдзӕн, уый. Фӕлӕ дзӕбӕх дӕр не сси, ӕмӕ йын йӕ уырнындзинад дӕр ницы бафидар кодта. Уый нӕ, фӕлӕ базонгӕ, фыдгӕнӕг тыхтимӕ чи уынаффӕ кодта, уыдонимӕ ӕмӕ йӕхӕдӕг дӕр спиритизмыл бафтыд.

Верджил райгуырди Америкӕйы Иугонд Штатты. Колледжы куы ахуыр кодта, уӕд сиу Сауцъар пысылмӕттимӕ. Уый сын зӕрдиагӕй парахат кодта сӕ литературӕ, цыран дзырдӕуыд, урсцъар адӕймаг Хӕйрӕг у, зӕгъгӕ. Уыдон ахӕм цӕстӕнгасыл хӕцыдысты, урсцъар адӕм сауцъар адӕмӕн ӕбуалгъы митӕ кӕй кодтой, уый тыххӕй. Кӕд Верджил уыдӕттыл сыгъдӕгзӕрдӕйӕ ӕууӕндыди, уӕддӕр хъуыды кодта: куыд хъуамӕ уой урсцъар адӕм иууылдӕр ӕвзӕр? Ӕмӕ аргъуаны фылдӕр ӕхцайыл цӕмӕн фӕдзурынц?

Чаро кӕд схъомыл, адӕм фылдӕр католиктӕ кӕм сты, уыцы Хуссар Америкӕйы, уӕддӕр фидарӕй хӕст уыд йӕ диныл — уыд протестант. Уый сӕрыстыр уыд, йӕ алыварсуӕвӕг адӕмау гуымирытӕн кӕй нӕ куывта, уымӕй. Алы хуыцаубон дӕр-иу Чаро цингӕнгӕ цыд аргъуанмӕ. Службӕйы рӕстӕджы-иу «Аллилуйӕ!» куы хъӕр кодта, уӕд-иу йӕ зӕрдӕ цинӕй байдзаг. Уый фӕстӕ кодтой дины зарджытӕ ӕмӕ кафыдысты. Чаройы зӕрдӕбынӕй уырныдта, йӕ тӕригъӕдтӕй кӕй ссыгъдӕг ӕмӕ ногӕй кӕй райгуырд, уый. Чызг йӕ ӕфтиаджы дӕсӕм хай лӕвӕрдта аргъуанмӕ, ӕмӕ йӕ уарзон динамонӕг, телеуынынады дины тыххӕй чи амыдта, уый куы загъта, Африкӕйы сывӕллӕттӕн баххуыс кӕнынӕн кӕй хъӕуы мысайнӕгтӕ сӕмбырд кӕнын, уӕд ӕм ӕхца арвыста. Фӕлӕ йӕ аргъуаны сауджыны куы бафарста, уарзондзинады Хуыцау удты зындоны цӕмӕн хъизӕмар кӕнын кӕны, уӕд бамбӕрста, сауджынӕн йӕ бон бӕлвырд дзуапп радтын кӕй нӕ уыди. Фӕстӕдӕр та ма базыдта, йӕ мысайнӕгтӕ Африкӕйы сывӕллӕттӕм кӕй нӕ фӕхӕццӕ сты, уый.

Ацы фондз адӕймаджы кӕд алыхуызон динтыл хӕст уыдысты, уӕддӕр сӕ иу кодта иу хъуыддаг. Уыдон уарзтой ӕцӕгад ӕмӕ сӕ фарстытӕн зӕрдиагӕй агуырдтой раст дзуаппытӕ. Фӕлӕ цымӕ сӕ бон уыд раст дины минӕвӕрттӕ суын? Ацы фарстӕн дзуапп дӕтты иннӕ статья.

[Ныв 4 фарсыл]

Уый гӕнӕн ис, ӕмӕ алы бӕстӕтӕй алыхуызон динтӕ ӕмӕ ӕгъдӕуттыл хӕст адӕм ӕцӕгӕйдӕр баиу уой?

[Ныв барлӕвӕрдӕй 3 фарсыл]

G.P.O., Jerusalem