Ka Rauka Ainei i Tetai Apinga i te Taokotai Tikai i te Tangata?

NOATU e eaa taau au irinaki anga, penei ka akatika koe e te vaira tetai aronga te inangaro ra i te tuatua mou vaitata rai i roto i te au akonoanga katoatoa. Ko te au tangata tei ariki oonu i te mea tika e te puareinga ra no te kimi i te reira ka kitea i roto i te au Hindu, te au Katorika, te au ngati Iuda, e tetai atu. Inara i te akaraanga kua akatakake te akonoanga i te au tangata ravarai. Kua taangaanga etai i te akonoanga ei akatupu i te akakoroanga kino. Ka rauka ainei e kia taokotaiia te au tangata ngakau tae mei te au akonoanga katoatoa te inangaro ra i te meitaki e te tika? Ka rauka ainei ratou i te akaputuputu kapitiia no tetai akakoroanga aiteite?

Mei teaa ra te manamanata i te akara atu e ko te akonoanga te tumu maata no te akatakake anga! Ka akamanako ana i etai o teia au maro anga. Kua tamaki te aronga Hindu i te aronga Buddha i Sri Lanka. Kua akamaringi toto te au Porotetani, te au Katorika, e te au ngati Iuda i roto i te au maro anga tuke tuke. Kua tamaki te “au Kerititiano” i te au Muslim i Chechnya, Indonesia, e Kosovo. E i roto ia Mati 2000, kua akaruke mai te taumaro anga e rua ra tei piri atu ki te akonoanga e 300 tangata Nigeria kia mate. E tikai, kua akatupu te tu makitakita i te akonoanga i te kino o teia au maro anga.

E putuputu te taime kua akaoripu uaia te au tangata ngakau tae e te au kino tei raveia i roto i te ingoa o te akonoanga. Ei akatauanga, e manganui te aronga aere pure kua poitirere e kua akatika uaia te au orometua tei takinokino i te tamariki i te pae ainga e tetai atu au ekaretia. Kua akama maata tetai atu aronga irinaki no te akatakake anga i roto i te pupu Kerititiano tutu ua e manganui no te au maro anga mei te tane e te tane e te titiri anga pepe. Te taka meitaki ra, kare i rauka i te akonoanga i te taokotai i te au tangata ravarai. Inara, te vaira te aronga inangaro tikai i te tuatua mou i roto i te au akarongo e manganui, mei ta te au tupuanga e aru maira i akaari mai.

Umuumu Ratou i te Tuatua Mou

E vaine akamori ngakau tae e te akono ua a Fidelia i roto i te Akonoanga Katorika o San Francisco i La Paz, Bolivia. E tupou ana aia uaorai ki mua i te tiki o Maria e kua tuku i te au kanara meitaki roa te ka rauka iaia i te oko ki mua i te tiki. I te epetoma tataki tai, kua oronga aia i te au kai maata tikai ki te orometua kia tua aere ki te aronga putaua. Inara, kua mate e rima a Fidelia pepe i mua ake ka papetitoiai ratou. I te akakite anga te orometua kiaia e te mamae ra ratou i roto i te poiri o Limbo, kua umere a Fidelia, ‘Me e meitaki oki te Atua, akapeea te reira i te tika anga?’

Kua maata mai a Tara, e taote rapakau, ei Hindu i Kathmandu, Nepal. I te aruanga i te au peu taito e au anere mataiti a tona ui tupuna, kua akamori aia i tona au atua i roto i te au iero Hindu e e au itoro tana i te kainga. Inara kua akaoripuia a Tara e te au ui anga mei teia: Eaa ra i maata ei te mamaeanga? Eaa ra te tangata i mate ei? Kare i kitea e ia te au pau anga merengoanga i roto i tana akonoanga.

I tetai tua, kua maata mai a Panya ei tangata irinaki ia Buddha i roto i tetai are i te pae ara vai i Bangkok, Thailand. Kua apiiia aia e kua tupu mai te mamaeanga mei te au angaanga tei raveia i roto i te au oraanga i mua ana e ka rauka te tu rangatira mei te  reira na te akakoreanga i tetai uaorai i te au anoano pouroa. Mei tetai atu aronga irinaki ia Buddha ma te ngakau tae, kua apiiia aia kia akangateitei oonu i te kite pakari o te au mongoka pereue rengarenga tei aere mai ki te kainga i te maiata tataki tai no te au apinga oronga ua. Kua rave aia i te akamaara anga e kua akatupu i te au tiki o Buddha i te irinaki anga e kua apai mai te reira i te paruru anga. I muri ake i te o anga ki roto i tetai tumatetenga kino tei akaruke mai e kia ngoru aia mei te ope ki raro, kua atoro atu a Panya i te au are mongoka Buddha, i te manakonakoanga ngakau tae e ka rapakau temeio ia. Kare i kitea ana e ia te rapakau anga me kare te akamarama anga i te pae vaerua. Mari ra, kua akamaeuia aia ki te angaanga purepure e kua akamata i te piri atu ki roto.

Kua anauia a Virgil i Marike e kua piri atu ki roto i te Muslim Kerekere i te kaoreti. Kua tua maroiroi aia i ta ratou puka, tei akakite e ko te tangata teatea te Tiaporo. No te reira, i manako ei ratou te tumu i rave ei te aronga teatea i te au kino e manganui ki te aronga kerekere. Noatu kua manako ngakau tae i tana au irinaki anga, kua manamanata a Virgil i te au ui anga: Akapeea i riro ei e kua kino pouroa te aronga teatea? E eaa oki i piri atu ei te moni ki roto i te tutuanga?

Noatu kua maata mai a Charo i Marike Apatonga te maata anga e Katorika, e Porotetani ngakau tae aia. Kua mareka aia e kare i kapiti atu ma tetai o te akamori anga itoro takapini iaia. E reka ana a Charo i te aere ki te pure i te au Tapati ravarai no te akamori anga tutakiia, i reira e ava ana aia “Aleluia!” e kua piri atu ki roto i te imeneanga e te uraanga tei aru mai. Kua irinaki ngakau tae a Charo e kua akaoraia aia e kua anau akaouia. Kua tutaki aia i te ngauru o tana tutaki anga ki te akonoanga, e i te pati anga mai tana tangata tutu evangeria reka i roto i te tivi i te au moni tauturu, kua tuku aia i te au moni no te tamariki i Aperika. Inara, i te ui anga aia ki tona orometua e eaa ra tetai Atua aroa ka tamamae ei i te au meta i era, kua kite mai aia e kare ana pau anga puapinga. I muri mai, kua kite katoa mai aia e kare tana moni tauturu i tukunaia kia tauturu i te tamariki i Aperika.

Noatu e tuke te ngai i aere mai ei, e tumu matau to rotopu i teia aronga e rima. Te inangaro ra ratou i te tuatua mou e te kimi ngakau tae ra i te au pau anga tuatua mou ki ta ratou au ui anga. Inara ka taokotaiia tikai ainei ratou i roto i te akamori anga mou? Ka pau mai te atikara ka aru mai i taua ui anga.

[Tutu i te kapi 4]

Ka rauka ainei e kia taokotaiia te au tangata tukeke te ngai i aere mai ei?

[Akameitakianga no te Tataanga i te kapi 3]

G.P.O., Jerusalem