Ang Matuod nga Pagsimba Nakapahiusa sa mga Tawo

BISAN tuod ang relihiyon sa linangkob morag makapabahin sa katawhan, ang pagsimba sa bugtong matuod nga Diyos adunay gahom sa paghiusa sa mga tawo. Sa dihang ang Israel mao ang pinili nga nasod sa Diyos, daghang sinserong mga Hentil ang nadani sa matuod nga pagsimba. Pananglitan, gitalikdan ni Ruth ang mga diyos sa iyang yutang-natawhan nga Moab ug miingon kang Naomi: “Ang imong katawhan mahimong akong katawhan, ug ang imong Diyos akong Diyos.” (Ruth 1:16) Sa unang siglo K.P., daghang Hentil ang nahimong mga magsisimba sa matuod nga Diyos. (Buhat 13:48; 17:4) Sa ulahi sa dihang ang mga apostoles ni Jesus nagsugod pagpanaw ngadto sa lagyong mga dapit dala ang maayong balita, ang ubang sinserong mga tawo nahiusa sa pagsimba sa matuod nga Diyos. ‘Miliso kamo ngadto sa Diyos gikan sa inyong mga idolo aron magpaulipon sa buhi ug matuod nga Diyos,’ misulat si apostol Pablo. (1 Tesalonica 1:9) Ang pagsimba ba sa matuod nga Diyos aduna nianang makapahiusang gahom karon?

Ang mga maduhaduhaon miinsistir nga sayop ang pagsulti bahin sa “matuod nga mga magsisimba” o sa “matuod nga Diyos.” Mao tingali kanay ilang gibati tungod kay wala sila mahibalo kon asa nila makat-oni ang kamatuoran. Apan ang mga tigpangita sa kamatuoran gikan sa lainlaing kagikan nakaamgo nga ang pagsimba dili kay ipasukad lamang sa personal nga pagpili. Ang bugtong usa nga takos natong simbahon mao ang Maglalalang sa tanang butang—si Jehova nga Diyos. (Pinadayag 4:11) Siya mao ang matuod nga Diyos, ug siya adunay katungod sa paghukom kon sa unsang paagi siya pagasimbahon.

Aron matabangan kita sa pag-ila sa iyang mga kinahanglanon, si Jehova naghatag kanatog kahibalo pinaagi sa iyang Pulong, ang Bibliya. Halos ang tanan dinhi sa yuta karon makabaton sa enterong Bibliya o sa mga bahin niini. Dugang pa, ang Anak sa Diyos miingon: “Kon magpabilin kamo sa akong pulong, . . . kamo mahibalo sa kamatuoran.” (Juan 8:31, 32) Busa, ang kamatuoran mahimong mahibaloan. Ang milyonmilyong matinud-anog-kasingkasing nga mga tawo gikan sa lainlaing mga relihiyon maisogong midawat niining kamatuorana ug nahiusa sa matuod nga pagsimba.—Mateo 28:19, 20; Pinadayag 7:9, 10.

Tibuok-Kalibotang Panaghiusa sa Atong Panahon!

Usa ka talagsaong tagna sa basahon sa Bibliya sa Sofonias naghisgot bahin sa pagtigom sa mga tawo nga nagkadaiyag kagikan. Kini nag-ingon: “Nianang panahona ihatag ko [Jehova nga Diyos] sa mga katawhan ang kausaban ngadto sa putli nga pinulongan, aron silang tanan magatawag sa ngalan ni Jehova, aron magaalagad kaniya abaga sa abaga.” (Sofonias 3:9) Pagkaanindot nga paghulagway kini sa nabag-o nga mga tawo nga nahiusang nag-alagad sa Diyos!

Kanus-a kini mahitabo? Ang Sofonias 3:8 nag-ingon: “‘Magpadayon kamo sa paghulat kanako,’ mao ang giingon ni Jehova, ‘hangtod sa adlaw nga ako motindog alang sa mga inagaw, kay ang akong hudisyal nga hukom mao ang pagtigom sa kanasoran, aron tapokon ang mga gingharian, aron ibubo kanila ang akong mahukmanong pagsaway, ang tanan nakong nagasilaob nga kasuko; kay pinaagi sa kalayo sa akong kasibot ang tibuok nga yuta pagalamyon.’” Oo, sa panahon nga tigomon ni Jehova ang mga nasod apan sa dili pa niya ibubo kanila ang iyang nagsilaob nga kasuko, iyang ihatag sa mga maaghop sa yuta ang kausaban ngadto sa putli nga pinulongan. Kanang panahona mao karon, kay ang pagtigom sa tanang nasod ngadto sa gubat sa dakong adlaw sa Diyos nga Labing Gamhanan sa Armagedon nagkamulo na.—Pinadayag 16:14, 16.

Aron mahiusa ang iyang katawhan, gihatagan sila ni Jehova ug putli nga pinulongan. Kining bag-ong pinulongan naglakip sa hustong pagsabot sa kamatuoran sa Bibliya bahin sa Diyos ug sa iyang mga katuyoan. Ang pagsulti sa putling pinulongan naglakip sa pagtuo sa kamatuoran, pagtudlo niana ngadto sa uban, ug pagkinabuhi nga kaharmonya sa mga balaod ug mga prinsipyo sa Diyos. Nagkinahanglan kini ug pagsalikway sa makapabahin  nga politika ug pagwagtang sa hakog nga mga tinamdan sa kasingkasing, sama sa rasismo ug makapabahin nga nasyonalismo nga maoy timailhan niining kalibotana. (Juan 17:14; Buhat 10:34, 35) Ang tanang matinud-anog-kasingkasing nga adunay gugma sa kamatuoran makakat-on niining pinulongana. Tagda kon sa unsang paagi ang lima ka tawo nga gihisgotan sa nag-unang artikulo—kanhi magkalahi gayod ug relihiyon—sa pagkakaron nahiusa sa pagsimba sa usa ug bugtong matuod nga Diyos, si Jehova.

Sila Nahiusa Diha sa Matuod nga Pagsimba

Sa dihang si Fidelia, ang debotadong Romano Katoliko, mipalit ug Bibliya alang sa asaynment sa tunghaan sa iyang anak nga babaye, gihangyo niya ang pari nga ipatin-aw gikan niana kon unsay nahitabo sa iyang lima ka anak nga nangamatay. “Pagkadako sa akong kahigawad!” siya miingon. Busa sa dihang ang mga Saksi ni Jehova miduaw kaniya, gisukna niya kanila ang susamang pangutana. Sa pagkabasa niya diha sa iyang kaugalingong Bibliya sa kamatuoran bahin sa kahimtang sa mga patay, naamgohan niya nga gilimbongan gayod diay siya sa simbahan. Nakat-onan niya nga ang mga patay walay nahibaloan ug busa wala mag-antos sa Limbo o bisan diin. (Salmo 146:4; Ecclesiastes 9:5) Gilabay ni Fidelia ang tanan niyang relihiyosong mga imahen, mibiya sa simbahan, ug misugod pagtuon sa Bibliya. (1 Juan 5:21) Sa milabayng napulo ka tuig, nalipay siya sa pagtudlo sa Kasulatanhong kamatuoran ngadto sa uban.

Si Tara nga taga-Kathmandu mibalhin ngadto sa usa ka nasod diin diyutay ra ang mga templo sa Hindu. Busa miadto siya sa usa ka Metodistang simbahan sa paglaom nga matagbaw ang iyang espirituwal nga mga panginahanglan. Apan wala niya makaplagi ang tubag sa iyang pangutana bahin sa pag-antos sa tawo. Unya ang mga Saksi ni Jehova miduaw kaniya ug mitanyag nga magtuon sa Bibliya uban kaniya. Si Tara miingon: “Naamgohan nako nga ang usa ka Diyos sa gugma dili mahimong maoy responsable sa tanang pag-antos sa kalibotan . . . Nalipay ako sa palaaboton sa usa ka bag-ong kalibotan sa pakigdait ug panaghiusa.” (Pinadayag 21:3, 4) Giwagtang ni Tara ang iyang mga imahen sa Hindu, mihunong sa pagsunod sa relihiyosong mga kostumbre sa iyang yutang natawhan, ug nakakaplag ug tinuod nga kalipay sa pagtabang sa pagtagbaw sa espirituwal nga mga panginahanglan sa uban ingong usa ka Saksi ni Jehova.

Si Panya, ang Budhista, maoy usa ka mananag-an sa dihang ang mga Saksi ni Jehova unang miduaw kaniya sa Bangkok, busa naikag siya sa mga tagna sa Bibliya. Miingon si Panya: “Sa dihang nahibaloan nako kon nganong ang presenteng mga kahimtang lahi sa orihinal nga katuyoan sa Maglalalang ug kon giunsa niya paghikay nga matul-id ang kadaot nga gipahinabo niadtong nagsalikway kaniya ug sa iyang pagkasoberano, daw ang usa ka taptap gikuha sa akong mga mata. Ang tanan bahin sa mensahe sa Bibliya nagkahiusa gayod. Nakakat-on ako sa paghigugma kang Jehova ingong persona; nagpalihok kini kanako nga buhaton kon unsay akong nahibaloan nga matarong. Mahinamon akong motabang sa uban aron makita ang kalainan tali sa tawhanong kaalam ug sa diyosnong kaalam. Ang matuod nga kaalam nakapabag-o gayod sa akong kinabuhi.”

Ngadtongadto, si Virgil nagsugod pagkabaton ug ugdang nga mga pagduhaduha bahin sa iyang relihiyosong mga pagtuo. Inay mag-ampo sa Diyos alang sa paagi nga matabangan ang mga itom ug sa iyang giisip nga rasistang organisasyon nga morag nagpukawg pagdumot alang sa mga puti, siya nag-ampo alang sa kamatuoran, kon unsa man kana, bisan hain man kana. “Pagmata nako pagkasunod adlaw human sa akong kinasingkasing nga pag-ampo sa Diyos,” nahinumdom si Virgil, “akong nakita ang usa ka magasing Bantayanang Torre diha sa balay. . . . Lagmit gisalip-it kini sa ilawom sa pultahan.” Sa wala madugay mainiton siyang nagtuon sa Bibliya uban sa mga Saksi ni Jehova. Siya mipadayon: “Sa unang higayon sa akong kinabuhi, mibati akog katagbawan. . . . Usa ka bidlisiw sa paglaom ang misugod pagsidlak sa sulod nako.” Sa wala madugay si Virgil nahiusa niadtong nagtanyag  sa mga tawo sa bugtong matuod nga paglaom nga gihatag diha sa Pulong sa Diyos, ang Bibliya.

Si Charo nga taga-Latin Amerika nakadayeg sa dihang nakita sa usa ka Saksi nga ginganlag Gladys nga naglisod siya sa iyang gagmayng mga anak ug gitabangan siya pinaagi sa paghatod kaniya ngadto sa tiyanggihan. Ngadtongadto, si Charo midawat sa tanyag ni Gladys—usa ka libreng pagtuon sa Bibliya sa balay. Sa dihang nakat-onan ni Charo gikan sa iyang kaugalingong Bibliya nga dili tanang maayong tawo ang moadto sa langit kondili panalanginan usab ni Jehova ang mga tawo sa yuta ug kinabuhing walay kataposan, natingala siya. (Salmo 37:11, 29) Si Charo mismo nagpaambit niining paglaoma ngadto sa uban sulod na sa milabayng 15 ka tuig.

Handurawa ang tibuok yuta nga puy-an sa sinserong mga tawo nga nahiusa sa pagsimba kang Jehova, ang bugtong matuod nga Diyos! Dili kini hinanduraw lamang. Mao kini ang gisaad ni Jehova. Pinaagi sa iyang manalagnang si Sofonias, ang Diyos nagpahayag: “Ipabilin ko gayod sa imong taliwala ang usa ka katawhan nga mapainubsanon ug maaghop, ug sila modangop sa ngalan ni Jehova. . . . Sila dili magabuhat ug pagkadili-matarong, ni magasultig bakak, ni may makaplagan sa ilang baba nga usa ka dila nga malinglahon; . . . ug walay magpakurog kanila.” (Sofonias 3:12, 13) Kon nadani ka niining saara, isilsil sa kasingkasing ang tambag sa Bibliya: “Pangitaa ninyo si Jehova, kamong tanang maaghop sa yuta, nga nagbuhat sa Iyang hudisyal nga hukom. Pangitaa ang pagkamatarong, pangitaa ang pagkamaaghop. Tingali kamo pagatagoan sa adlaw sa kasuko ni Jehova.”—Sofonias 2:3.