Utuakibuot Akpanikọ Adian Mme Owo Ọtọkiet

OKPOSỤKEDI ido ukpono ke ofụri ofụri abaharede ubonowo, utuakibuot ata Abasi kierakiet enyene odudu ndidian mme owo ọtọkiet. Ke ini Israel ekedide edimek idụt Abasi, ediwak Gentile oro ẹkenyenede esịt akpanikọ ẹma ẹnyene udọn̄ ke utuakibuot akpanikọ. Ke uwụtn̄kpọ, Ruth ama ọkpọn̄ mme abasi Moab obio emana esie onyụn̄ ọdọhọ Naomi ete: “Orụk fo ẹyedi orụk mi, Abasi fo oyonyụn̄ edi Abasi mi.” (Ruth 1:16) Etisịm akpa isua ikie E.N., ediwak Gentile ẹma ẹkabade ẹdi mme andituak ibuot nnọ Abasi akpanikọ. (Utom 13:48; 17:4) Ke ukperedem ke ini mme apostle Jesus ẹketọn̄ọde ndida eti mbụk n̄ka nsannsan ebiet, mbon esịt akpanikọ efen ẹma ẹdiana kiet ke utuakibuot Abasi akpanikọ. Apostle Paul ekewet ete: ‘Mbufo ẹma ẹkpọn̄ ndem ẹwọn̄ọ ẹtiene Abasi, ẹte inam n̄kpọ inọ Ata Abasi [“Abasi akpanikọ,” NW] emi odude uwem.’ (1 Thessalonica 1:9) Nte utuakibuot Abasi akpanikọ enyene odudu oro adiande mme owo ntre mfịn?

Mbon eyịghe ẹsọn̄ọ ẹtịn̄ ẹte ke akwan̄a nditịn̄ mban̄a “mbon oro ẹtuakde ibuot ke akpanikọ” m̀mê “Abasi akpanikọ.” Ekeme ndidi mmọ ẹkere ntre koro mmọ mîfiọkke ebiet ekededi oro ẹkemede ndikụt akpanikọ. Edi mme andiyom akpanikọ oro ẹtode nsio nsio idaha ke uwem ẹfiọk ẹte ke utuakibuot ikọn̄ọke ke se owo amade ndituak ibuot nnọ. N̄kukụre owo oro odotde ndibọ utuakibuot nnyịn edi Andibot kpukpru n̄kpọ—Jehovah Abasi. (Ediyarade 4:10b) Enye edi Abasi akpanikọ, ndien enye enyene unen ndibiere nte ẹkpetuakde ibuot ẹnọ imọ.

Man an̄wam nnyịn itịm ifiọk se enye oyomde, Jehovah eneme nneme ye nnyịn ebe ke Ikọ esie, kpa Bible. Ekpere ndidi kpukpru owo ke isọn̄ mfịn ẹnyene ofụri Bible m̀mê ndusụk ikpehe esie. Akan oro, Eyen Abasi ama ọdọhọ ete: “Edieke mbufo ẹsọn̄ọde ẹda ke ikọ Mi, . . . mbufo ẹyefiọk akpanikọ.” (John 8:31, 32) Ke ntre, ẹkeme ndifiọk akpanikọ. Ndien ediwak miliọn mbon esịt akpanikọ oro ẹtode nsio nsio ido ukpono ke ẹnyịme akpanikọ emi uko uko ke ẹnyụn̄ ẹdiana kiet ke utuakibuot akpanikọ.—Matthew 28:19, 20; Ediyarade 7:9, 10.

Edidianakiet Ofụri Ererimbot ke Eyo Nnyịn!

N̄wọrọnda ntịn̄nnịm ikọ n̄wed Zephaniah eke Bible etịn̄ aban̄a mme owo ẹtode nsio nsio idaha ke uwem ndidiana ọtọkiet. Enye ọdọhọ ete: “Ke ini oro [ami Jehovah Abasi] nyanam mme idụt ẹkabade ẹsem edisana usem, man kpukpru mmọ ẹkot enyịn̄ Jehovah, man mmọ ẹnam n̄kpọ ẹnọ enye ke esịt kiet.” (Zephaniah 3:9, NW) Emi etịn̄ ediye ediye didie ntem aban̄a mme owo oro ẹma ẹkenam ukpụhọde oro ẹnamde n̄kpọ Abasi ke edidianakiet!

Ini ewe ke emi ekenyene nditịbe? Zephaniah 3:8 ọdọhọ ete: “Jehovah ọdọhọ, ete, Mbufo ẹbet mi ndien, tutu esịm ke usen eke ndidahade ke enyọn̄ nda mbụme. Koro mmaduak ndisop mme idụt, nnyụn̄ mbon mme obio ndidem, man n̄n̄wan̄a mmọ ifụtesịt mi ke idem, ofụri ikan̄ iyatesịt mi: koro ofụri ererimbot ayata ikan̄ ufụp mi.” Ih, ke ini oro Jehovah osopde mme idụt, edi mbemiso enye an̄wan̄ade mmọ ifụtesịt esie ke idem, enye ayanam sụn̄sụn̄ mbio isọn̄ ẹkabade ẹsem edisana usem. Ini oro edi emi, koro ke ẹsop kpukpru idụt ẹnọ ekọn̄ akwa usen Abasi, Andikara kpukpru n̄kpọ ke Armageddon.—Ediyarade 16:14, 16.

Man adian ikọt esie ọtọkiet, Jehovah ọnọ mmọ edisana usem. Obufa usem emi esịne nnennen ifiọk akpanikọ Bible oro aban̄ade Abasi ye mme uduak esie. Ndisem edisana usem oro abuana ndinịm se idide akpanikọ, ndida enye n̄kpep mbon en̄wen, ye ndidu uwem ke n̄kemuyo ye mme ibet ye edumbet Abasi. Enye oyom ifep mme ọtọ-ubahade mbre ukara inyụn̄ isio mme ibụk ibụk edu utọ nte usua eke orụk ye ufreidụt oro ọtọde ubahade emi ẹdade ẹdiọn̄ọ  ererimbot emi, ifep ke esịt. (John 17:14; Utom 10:34, 35) Kpukpru mbon esịt akpanikọ oro ẹmade akpanikọ ẹkeme ndikpep usem emi. Kere nte owo ition oro ẹketịn̄de ẹban̄a ke ibuotikọ oro ekebemde iso—oro ini kiet ko ẹkenyenede nsio nsio ekikere ido ukpono—ẹdianade kiet idahaemi ke utuakibuot n̄kukụre Abasi akpanikọ, Jehovah.

Mmọ Ediana Kiet ke Utuakibuot Akpanikọ

Ke ini Fidelia, enyene-ifịk owo Roman Catholic, ekedepde Bible man eyen esie an̄wan esida anam utomufọk oro ẹnọde ke ufọkn̄wed, enye ama ọdọhọ oku ete ada Bible oro anam an̄wan̄a se itịbede inọ nditọ imọ ition oro ẹkekpan̄ade. Enye ọdọhọ ete: “Nso edikpu ke emi ekedi ntem!” Ntre ke ini Mme Ntiense Jehovah ẹkewahade ẹkese enye, enye ama obụp mmọ ukem mbụme oro. Ke okotde akpanikọ aban̄ade idaha mme akpan̄kpa ke Bible esiemmọ, enye ama edifiọk nte ufọkabasi esie akabian̄ade enye. Enye ama ekpep nte ke mme akpan̄kpa ifiọkke baba n̄kpọ kiet ndien ke ntre mmọ ibọhọ ndutụhọ ke Limbo m̀mê ke ebiet efen ekededi. (Psalm 146:4; Ecclesiastes 9:5) Fidelia ama ọduọn̄ọ kpukpru ndisọi mbiet ido ukpono esie, ọkpọn̄ ufọkabasi oro, onyụn̄ ọtọn̄ọ ndikpep Bible. (1 John 5:21) Ke isua duop emi ẹkebede, enye okop inem ndikpep mbon en̄wen akpanikọ N̄wed Abasi.

Tara otode Kathmandu ama ọwọrọ aka idụt oro ibat ibat temple mbon Hindu ẹdude. Ke ntre enye ama aka ufọkabasi Methodist ye idotenyịn nte ke ẹyeyụhọ mme udọn̄ n̄kpọ eke spirit imọ. Edi owo ikọbọrọke mbụme esie aban̄ade ntak emi owo okụtde ndutụhọ. Ekem Mme Ntiense Jehovah ẹma ẹsobo ye enye ẹnyụn̄ ẹdọhọ ke mmimọ imọn̄ ikpep Bible ye enye. Tara ọdọhọ ete: “Mma ndifiọk nte ke Abasi ima ikemeke ndidi ntak kpukpru ndutụhọ ke ererimbot . . . Mma n̄kop idatesịt mban̄a idotenyịn obufa ererimbot oro emem ye edidianakiet ẹdidude.” (Ediyarade 21:3, 4) Tara ama ọduọn̄ọ ndisọi mbiet mbon Hindu, etre nditiene edinam ido ukpono obio emana esie, onyụn̄ enyene ata inemesịt ndin̄wam ke ndiyụhọ udọn̄ n̄kpọ eke spirit mbon en̄wen nte kiet ke otu Ntiense Jehovah.

Panya, owo Buddha oro, ekedi etịn̄ ini iso ke ini Mme Ntiense Jehovah ẹkewahade ẹkese enye ke akpa ini ke Bangkok, ntre mme ntịn̄nnịm ikọ Bible ẹma ẹdemede enye udọn̄. Panya obụk ete: “Ke ini n̄kekpepde ntak emi mme idaha emi ẹdude mfịn ẹkpụhọrede ye se Andibot ke akpa akaduakde ye nte enye anamde ndutịm ndisio ibak oro mbon oro ẹsịnde enye ye itie edikara esie ẹnamde mfep, eketie nte n̄kpọ eke ẹkefụhọrede n̄kpan̄ ke enyịn mi. Ofụri etop Bible ẹkedu ke ata n̄kemuyo. Mma ndima Jehovah nte ata owo; emi ama ọnọ mi odudu ndinam se n̄kọfiọkde nte edide nnennen. Mma nnyene ọkpọsọn̄ udọn̄ ndin̄wam mbon en̄wen ẹkụt ukpụhọde oro odude ke ufọt ifiọk owo ye ifiọk Abasi. Ata ifiọk enen̄ede okpụhọde uwem mi.”

Nte ini akakade, Virgil ama ọtọn̄ọ ndinyene ọkpọsọn̄ eyịghe mban̄a mme edinịm ke akpanikọ ido ukpono esie. Utu ke ndibọn̄ akam nnọ Abasi nyom usụn̄ ndin̄wam mbubịt owo ye se enye akabatde nte n̄ka uma orụk oro akanamde ẹsua mfiaowo, enye ọkọbọn̄ akam oyom akpanikọ, se ededi oro enye ekedide, ye ebiet ekededi oro enye okodude. Virgil eti ete: “Ke ndemerede idap ke ndan̄nsiere ke mma n̄kọbọn̄ akam nnọ Abasi ke ofụri esịt, mma n̄kụt magazine Enyọn̄-Ukpeme ke esịtufọk. . . . Anaedi ẹkenụk magazine emi ẹsịn ke idak usụn̄.” Ikebịghike-bịghi enye ke ekekpep Bible ifịk ifịk ye Mme Ntiense Jehovah. Enye aka iso etịn̄ ete: “Ke akpa ini ke uwem mi, mma n̄kop uyụhọ. . . . Mma ntọn̄ọ ndinyene idotenyịn.” Ikebịghike Virgil ama edidiana kiet ye mbon oro ẹsinọde mme owo n̄kukụre ata  idotenyịn nte ẹwụtde ke Ikọ Abasi, kpa Bible.

Charo emi otode Latin America ama okop inemesịt ke ini Ntiense oro ekerede Gladys okokụtde nte enye enyenede mfịna ye n̄kpri nditọ esie onyụn̄ ọtọn̄ọde ndin̄wam enye ebe ke ndisida enye n̄ka urua. Nte ini akakade, Charo ama enyịme se Gladys ọkọnọde enye—ukpepn̄kpọ Bible mfọn. Ke ini Charo ekekpepde oto Bible esiemmọ nte ke idịghe kpukpru nti owo ẹka heaven edi nte ke Jehovah ayanam mme owo ẹdu nsinsi uwem ke isọn̄ n̄ko, idem ama akpa enye. (Psalm 37:11, 29) Charo ke idemesie abuana idotenyịn emi ye mbon en̄wen ke isua 15 emi ẹbede.

Kere nte mbon esịt akpanikọ oro ẹdianade kiet ke utuakibuot Jehovah, n̄kukụre Abasi akpanikọ, ẹdụn̄de ẹyọhọ ofụri isọn̄! Emi idịghe mfụmmfụm ekikere. Enye edi un̄wọn̄ọ Jehovah. Ebede ke prọfet esie oro Zephaniah, Abasi ama atan̄a ete: “Nyonyụn̄ nsụhọ mbio unana ye nditọ ubuene ke ufọt mbufo, ndien mmọ ẹyebuọt idem ke enyịn̄ Jehovah. [Mmọ] idinamke ukwan̄-n̄kpọ, idinyụn̄ isụhu nsu: owo idinyụn̄ ikwe edeme abian̄a ke inua mmọ: . . . ndien baba owo kiet eke anamde mmọ ndịk ididụhe.” (Zephaniah 3:12, 13) Edieke afo amade un̄wọn̄ọ emi, nam item Bible emi: “Mbufo kpukpru sụn̄-sụn̄ mbio isọn̄ emi ẹnamde ikpe esie, ẹyom Jehovah; mbufo ẹyom edinen ido, ẹyom sụn̄-sụn̄ ido: m̀mê mbufo ẹyedịbe ke usen iyatesịt Jehovah.”—Zephaniah 2:3.