Ang Matuod nga Pagsimba Nagapahiusa sa mga Tawo

BISAN pa daw ginabahinbahin sang relihion sa kabilugan ang katawhan, ang pagsimba sa lamang matuod nga Dios may gahom sa pagpahiusa sa katawhan. Sang ang Israel amo ang pinili nga pungsod sang Dios, madamong sinsero nga Gentil ang naganyat sa matuod nga pagsimba. Halimbawa, gintalikdan ni Rut ang mga dios sang iya tumandok nga Moab kag nagsiling kay Noemi: “Ang imo katawhan mangin akon katawhan, kag ang imo Dios akon Dios.” (Rut 1:16) Sang una nga siglo C.⁠E., madamo nga Gentil ang nangin mga sumilimba sang matuod nga Dios. (Binuhatan 13:48; 17:4) Sang ulihi sang ang mga apostoles ni Jesus nagsugod sa paglakbay sa malayo nga mga duog nga dala ang maayong balita, ang iban pa sinsero nga mga tawo ginhiusa sa pagsimba sa matuod nga Dios. “Nagliso kamo sa Dios gikan sa inyo mga idolo agod magpaulipon sa isa ka buhi kag matuod nga Dios,” sulat ni apostol Pablo. (1 Tesalonica 1:9) Ang pagsimba bala sa matuod nga Dios may subong sini nga gahom sa pagpahiusa karon?

Ginapilit sang mga maduhaduhaon nga sayop ang maghambal tuhoy sa “matuod nga mga sumilimba” ukon “matuod nga Dios.” Ayhan amo sina ang ila ginabatyag bangod wala sila makahibalo kon diin matun-an ang kamatuoran. Apang ang mga tawo gikan sa nanuhaytuhay nga relihion nga nagapangita sing kamatuoran nakarealisar nga ang pagsimba wala ginabase sa kon ano ang luyag sang isa. Ang lamang nga takus simbahon amo ang Manunuga sang tanan nga butang​​—⁠si Jehova nga Dios. (Bugna 4:11) Sia ang matuod nga Dios, kag may kinamatarong sia sa pagpamat-od kon paano sia dapat simbahon.

Agod buligan kita sa paghantop kon ano ang iya mga ginapatuman, nagapaalinton sa aton si Jehova paagi sa iya Pulong, ang Biblia. Ang halos tanan sa duta karon sarang makabasa sang bug-os nga Biblia ukon sang mga bahin sini. Dugang pa, ang Anak sang Dios nagsiling: “Kon magpabilin kamo sa akon pulong, . . . mahibaluan ninyo ang kamatuoran.” (Juan 8:​31, 32) Busa, sarang mahibaluan ang kamatuoran. Kag minilyon sang bunayag sing tagipusuon nga mga tawo gikan sa nanuhaytuhay nga relihion ang maisugon nga nagabaton sining kamatuoran kag ginahiusa sa matuod nga pagsimba.​​—⁠Mateo 28:​19, 20; Bugna 7:​9, 10.

Bug-os Kalibutan nga Paghiusa sa Aton Tion!

Ang isa ka talalupangdon nga tagna sa tulun-an sang Sofonias sa Biblia nagahambal tuhoy sa pagtipon sang mga tawo gikan sa nanuhaytuhay nga ginhalinan. Ini nagasiling: “Kay sa amo nga tion ihatag ko [Jehova nga Dios] sa mga katawhan ang pagbag-o padulong sa isa ka putli nga hambal, agod sila tanan magtawag sa ngalan ni Jehova, agod mag-alagad sa iya sing abaga sa abaga.” (Sofonias 3:9) Matahom gid ini nga laragway sang nagbag-o nga mga katawhan nga nagaalagad sa Dios nga may paghiusa!

San-o ini mahanabo? Ang Sofonias 3:8 nagasiling: “ ‘Padayon kamo nga maghulat sa akon,’ siling ni Jehova, ‘tubtob sa adlaw sang akon pagtindog agod mang-agaw, kay ang akon hudisyal nga desisyon amo ang pagtipon sa mga pungsod, ang pagtingob ko sa mga ginharian, agod iula ko sa ila ang akon kaalipungot, ang akon bug-os nagadabdab nga kaakig; kay paagi sa kalayo sang akon kakugi ang bug-os nga duta pagalamunon.’ ” Huo, sa tion nga tipunon ni Jehova ang mga pungsod apang antes niya ibubo sa ila ang iya nagadabdab nga kaakig, ihatag niya sa mga mahagop sang duta ang pagbag-o padulong sa isa ka putli nga hambal. Ina nga tion amo na karon, kay nagsugod na ang pagtipon sa tanan nga pungsod padulong sa inaway sang dakung adlaw sang Dios nga Labing Gamhanan sa Armagedon.​​—⁠Bugna 16:​14, 16.

Agod mapahiusa ang iya katawhan, ginahatagan sila ni Jehova sing isa ka putli nga hambal. Ining bag-o nga hambal nagalakip sing nagakaigo nga paghangop sa kamatuoran sang Biblia tuhoy sa Dios kag sa iya mga katuyuan. Ang paghambal sing putli nga hambal nagadalahig sing pagpati sa kamatuoran, pagtudlo sini sa iban, kag pagkabuhi nahisanto sa mga kasuguan kag mga prinsipio sang Dios. Ginapatuman sini ang paglikaw  sa nagabahinbahin nga politika kag paggabot gikan sa tagipusuon sang makagod nga mga panimuot, subong sang rasismo kag nagabahinbahin nga nasyonalismo nga makita sa sining kalibutan. (Juan 17:14; Binuhatan 10:​34, 35) Ang tanan nga bunayag sing tagipusuon nga nagahigugma sa kamatuoran sarang makatuon sini nga hambal. Binagbinaga kon paano ang lima ka tawo nga ginsambit sa nauna nga artikulo​​—⁠nga sang una lainlain sing relihion​​—⁠nahiusa karon sa pagsimba sa isa kag lamang matuod nga Dios, si Jehova.

Nagahiusa Sila sa Matuod nga Pagsimba

Sang si Fidelia, ang debotado nga Romano Katoliko, nagbakal sing Biblia agod gamiton sang iya anak nga babayi sa eskwelahan, ginpangabay niya ang pari nga ipaathag pasad sa sini kon ano ang natabo sa iya lima ka patay na nga kabataan. “Nalugaw-an gid ako!” siling niya. Gani sang nagduaw ang mga Saksi ni Jehova, ginpamangkot niya ang amo man nga pamangkot. Sang mabasa niya sa iya mismo Biblia ang kamatuoran tuhoy sa kahimtangan sang mga patay, narealisar niya nga ginlimbungan sia sang simbahan. Natun-an niya nga ang mga patay wala sing pangalibutan kag busa wala nagaantos sa Limbo ukon bisan diin man. (Salmo 146:⁠4; Manugwali 9:5) Ginhaboy ni Fidelia ang tanan niya nga relihioso nga imahen, naghalin sia sa simbahan, kag nagsugod sa pagtuon sa Biblia. (1 Juan 5:21) Sa sulod sang nagligad nga napulo ka tuig, malipayon nga ginatudlo niya sa iban ang Makasulatanhon nga kamatuoran.

Si Tara nga taga-Kathmandu nagsaylo sa isa ka pungsod diin diutay lamang ang templo sang mga Hindu. Gani nagduaw sia sa isa ka simbahan sang mga Methodist nga nagalaum nga mahatag ang iya espirituwal nga mga kinahanglanon. Apang wala sia makatigayon sing sabat sa iya pamangkot tuhoy sa pag-antos sang tawo. Nian nakontak sia sang mga Saksi ni Jehova kag gintanyagan sing pagtuon sa Biblia. Si Tara nagsiling: “Narealisar ko nga indi mahimo nga ang Dios sang gugma amo ang may salabton sa tanan nga pag-antos sa kalibutan . . . Nalipay ako sa paglaum sa isa ka bag-ong kalibutan nga may paghidait kag paghiusa.” (Bugna 21:​3, 4) Ginhaboy ni Tara ang iya mga imahen sang Hindu, gin-untatan ang pagsunod sa relihioso nga mga kinabatasan sang iya tumandok nga pungsod, kag nakasapo sia sing matuod nga kalipay sa pagbulig nga ihatag ang espirituwal nga mga kinahanglanon sang iban subong isa sang mga Saksi ni Jehova.

Si Panya, nga Budhista, isa ka manugpakot sang kapalaran sang una sia nga makadtuan sang mga Saksi ni Jehova sa Bangkok, gani nangin interesado gid sia sa mga tagna sa Biblia. Si Panya nag-asoy: “Sang matun-an ko kon ngaa ang mga kahimtangan karon tuhay sa orihinal nga gintuyo sang Manunuga kag kon paano sia naghimo sing kahimusan agod dulaon ang halit nga gintuga sang mga nagsikway sa iya kag sa iya pagkasoberano, daw subong bala nga ginkuha ang tabon sa akon mga mata. Nagahisantuanay gid ang tanan nga mensahe sang Biblia. Natun-an ko nga higugmaon si Jehova subong isa ka persona; nagpahulag ini sa akon nga himuon ang nahibaluan ko nga husto. Nalangkag ako nga buligan man ang iban nga mahangpan ang kinatuhayan sa ulot sang kaalam sang tawo kag sang kaalam sang Dios. Ginbag-o gid sang matuod nga kaalam ang akon kabuhi.”

Sang ulihi, nagsugod si Virgil sa pagduhaduha tuhoy sa iya relihioso nga mga pagtuluuhan. Sa baylo nga mangamuyo sa Dios para sa isa ka paagi nga mabuligan ang mga itom kag para sa ginakabig niya nga isa ka rasista nga organisasyon nga daw nagapautwas sing dumot batok sa mga puti, nangamuyo sia para sa kamatuoran, kon ano man ini, kag kon diin man ini. “Pagmata ko sang madason nga adlaw sa tapos ako mangamuyo sing hugot sa Dios,” hinumdom ni Virgil, “nakakita ako sing Lalantawan nga magasin sa balay. . . . Mahimo gid nga ginliklik ini sa idalom sang puwertahan.” Wala madugay madurop nga nagtuon sia sing Biblia upod sa mga Saksi ni Jehova. Nagpadayon sia: “Sa una nga tion sa akon kabuhi, nagbatyag ako sing kaayawan. . . . Ang isa ka silak sang paglaum nagsugod sa pagsilak sa akon.” Wala madugayi nagbuylog si Virgil sa mga  nagatanyag sa katawhan sing lamang nga matuod nga paglaum nga yara sa Pulong sang Dios, ang Biblia.

Si Charo nga taga-Latin Amerika nagdayaw sang nakita sia sang isa ka Saksi nga si Gladys nga nagasaramihay sa iya magagmay nga kabataan kag ginbuligan sia sa pagkadto sa tiendahan. Sang ulihi, ginbaton ni Charo ang gintanyag ni Gladys​​—⁠isa ka walay bayad nga pagtuon sa Biblia sa puluy-an. Sang matun-an ni Charo gikan sa iya mismo Biblia nga indi tanan nga maayong mga tawo magakadto sa langit kundi pakamaayuhon man ni Jehova ang mga tawo sa duta sing kabuhi nga walay katapusan, nakibot sia. (Salmo 37:​11, 29) Ginapaambit ni Charo sa iban ining paglaum sa sulod sang nagligad nga 15 ka tuig.

Handurawa ang bug-os nga duta nga ginapuy-an sang sinsero nga katawhan nga nahiusa sa pagsimba kay Jehova, ang lamang matuod nga Dios! Indi ini pantasya. Amo ini ang ginsaad ni Jehova. Paagi sa iya manalagna nga si Sofonias, ang Dios nagsiling: “Magabilin ako sa tunga nimo sing isa ka katawhan nga mapainubuson kag mahagop, kag sila magadangop sa ngalan ni Jehova. . . . Indi sila maghimo sing kalautan, ni magpamulong sing kabutigan, ni may masapwan sa ila mga baba nga isa ka dila nga malimbungon; . . . kag wala gid sing magpakurog sa ila.” (Sofonias 3:​12, 13) Kon naluyagan mo ini nga saad, sunda gid ang laygay sang Biblia: “Pangitaa ninyo si Jehova, kamo tanan nga mga mahagop sang duta, nga nagahimo sang Iya hudisyal nga desisyon. Pangitaa ang pagkamatarong, pangitaa ang pagkahagop. Ayhan malipdan kamo sa adlaw sang kaakig ni Jehova.”​​—⁠Sofonias 2:3.