Bulapeli Bwa Niti Bu Swalisanisa Batu

NIHAIKE kuli bulapeli ka nañungelele bu hanelela ku kauhanya batu, bulapeli bwa Mulimu a nosi wa niti bu na ni m’ata a ku ba swalisanisa. Isilaele ha ne i li sicaba sa Mulimu se si ketilwe, Balicaba ba bañata ba ba sepahala ne ba hohilwe ki bulapeli bwa niti. Ka mutala, Ruti n’a tuhezi milimu ya habo mwa Moabi ni ku bulelela Naomi kuli: “Sicaba sa hao ikaba sicaba sa ka, mi Mulimu wa hao ibe Yena Mulimu wa ka.” (Ruti 1:16) Lilimo za mwanda wa pili ha li to fita, palotuna ya Balicaba ne se ba bile balapeli ba Mulimu wa niti. (Likezo 13:48; 17:4) Hamulaho, baapositola ba Jesu ha ne ba kalisize ku yo kutaleza taba ye nde kwa libaka za kwahule, batu ba bañwi ba ba sepahala ne ba swalisanisizwe mwa bulapeli bwa Mulimu wa niti. Muapositola Paulusi n’a ñozi kuli: “Mu sikuluhezi ku Mulimu, mwa tuhela milimu ya maswaniso, kuli mu sebeleze Mulimu-Ya-Pila, wa niti.” (1 Matesalonika 1:9) Kana bulapeli bwa Mulimu wa niti bu na ni m’ata a ku swalisanisa cwalo kacenu?

Bahononi ba bulela kuli ku bulela ka za “bulapeli bwa niti” kamba “Mulimu wa niti” ki ku fosa. Ba kana ba ikutwa cwalo kakuli ha ba zibi ko kuñwi ko ba kona ku ituta niti. Kono ba ba bata niti ba ba zwa mwa lisimuluho ze ñata ba lemuhile kuli bulapeli haki nto yeo mutu a kona ku iketela ka mw’a latela. Mubupi wa linto kaufela, yena Jehova Mulimu, ki yena fela ye lu swanela ku lapela. (Sinulo 4:11) Ki yena Mulimu wa niti, mi u na ni tukelo ya ku keta mwa swanela ku lapelelwa.

Kuli a lu tuse ku ziba za tokwa, Jehova u lu zibisize zona ka Linzwi la hae, yona Bibele. Ibat’o ba mañi ni mañi mwa lifasi kacenu u na ni Bibele mukatumbi kamba kalulo ya yona. Ku tuha f’o, Mwan’a Mulimu n’a ize: “Ha mu tiiseza mwa linzwi la ka, . . . mu ka ziba niti.” (Joani 8:31, 32) Kacwalo, niti ya konwa ku zibwa. Mi bolule-lule ba batu ba ba sepahala ba ba zwa mwa bulapeli bo bu shutana-shutana ba sweli ku amuhela niti yeo mi ba sweli ku swalisaniswa mwa bulapeli bwa niti.—Mateu 28:19, 20; Sinulo 7:9, 10.

Buñwi mwa Lifasi Kaufela mwa Nako ya Cwale!

Bupolofita bwa Bibele bo bu makaza bo bu mwa buka ya Zefania bu bulela ka za ku kopana kwa batu ba lisimuluho ze shutana-shutana. Bu li: Jehova Mulimu “ka linako zeo [u] ka fa macaba milomo ye kenile, kuli a bize kaufela Libizo la [Muñ’a] Bupilo, a mu sebeleze ka pilu i li ñwi.” (Zefania 3:9) Ki poniso kwa bunde ya batu ba ba cincizwe ba ba sebeleza Mulimu ka buñwi!

Nto yeo n’e ka ezahala lili? Zefania 3:8 ili: “[Muñ’a] Bupilo u li: A mu ni libelele he, ku fitela lizazi le ni ka nanuha ku t’o hapa; kakuli ni lelile ku puta macaba, ni kopanye ba mibuso, ni ba sululele buhali bwa ka, ona mabifi a ka kaufela a’ babula. Kakuli lifasi kaufela li ka ca mulilo wa lifufa la ka.” Ee, Jehova u fa milomo ye kenile ku ba ba ishuwa mwa lifasi ka nako ya nz’a puta macaba, kono pili a si ka ba sululela kale buhali bwa hae bo bu babula. Nako yeo ki ya cwale, kakuli macaba kamukana s’a kalisize kale ku kubukanyezwa kwa ndwa ya lizazi le lituna la Mulimu Ya Mata Kaufela ya Armagedoni.—Sinulo 16:14, 16.

Kuli a swalisanise batu ba hae, Jehova u ba fa milomo ye kenile. Milomo ye minca yeo i kopanyeleza cwalo ni kutwisiso ye nde ya niti ya Bibele ka za Mulimu ni milelo ya hae. Ku bulela ka milomo ye kenile ku ama ku lumela niti,  ku i luta ba bañwi, ni ku pila ka ku lumelelana ni milao ni likuka za Mulimu. I tokwa ku ikambusa ku za bupolitiki ze kauhanya batu ni ku zwisa moya wa buitati mwa pilu, o cwale ka saluluti sa mubala ni lilato la naha ya habo mutu le li kauhanya ili nto ye atile mwa lifasi le. (Joani 17:14; Likezo 10:34, 35) Ba ba sepahala kaufela ili ba ba lata niti ba kona ku ituta ku ba ni milomo yeo. Mu nahane m’o batu baketalizoho ba ba bulezwi mwa taba ye felile, be ne ba li mwa bulapeli bo bu shutana-shutana pili, ba konezi ku swalisana mwa bulapeli bwa Mulimu a nosi wa niti, yena Jehova.

Ba Swalisani mwa Bulapeli Bwa Niti

Fidelia, yena ya n’a li mulapeli ya ineezi wa Katolika, ha n’a lekezi mwan’a hae Bibele ya ku yo itusisa kwa sikolo, n’a buzize muprisita wa hae kuli a mu bulelele se si ezahezi kwa bana ba hae ba ba shwile baketalizoho ka ku itusisa Bibele yeo. N’a ize: “Ki maswabisa luli!” Kacwalo Lipaki za Jehova ha ne ba mu potezi, a ba buza puzo ye swana. Ha s’a ipalezi mwa Bibele ya hae buniti ka za muinelo wa bafu, a lemuha kuli keleke ya hae n’e mu puma. N’a zibile kuli bafu ha ba na se ba ziba mi kacwalo ha ba nyandi mwa Limbo kamba ko kuñwi. (Samu 146:4; Muekelesia 9:5) Fidelia a yumba maswaniso a bulapeli bwa hae kaufela, a zwa mwa keleke yeo, mi a kalisa ku ituta Bibele. (1 Joani 5:21) Ka lilimo ze 10 ze felile, u konile ku luta ba bañwi niti ya mwa Mañolo.

Tara wa kwa Kathmandu n’a tutezi kwa naha ko ku na ni litempele ze nyinyani fela za Mahindu. Kacwalo a ya kwa keleke ya Methodist ka sepo ya ku yo fumana za n’a tokwa kwa moya. Kono n’a si ka fumana kalabo kwa puzo ya hae ka za manyando a batu. Cwale a potelwa ki Lipaki za Jehova mi ba kupa ku ituta Bibele ni yena. Tara u li: “Ne ni lemuhile kuli Mulimu ya lilato haki yena ya tahisize manyando kaufela mwa lifasi . . . Ne ni tabezi hahulu tibelelo ya lifasi le linca la kozo ni swalisano.” (Sinulo 21:3, 4) Tara a yumba maswaniso a hae a Sihindu, a tuhela ku latelela lizo za bulapeli bwa mwa naha ya habo, mi ka ku ba Paki ya Jehova a ba ni tabo ya niti ya ku tusa ba bañwi kwa moya.

Panya, wa Mubuddha, ne li sinuhi wa za kwapili ha n’a potezwi ki Lipaki za Jehova lwa pili mwa Bangkok. Kacwalo bupolofita bwa mwa Bibele ne bu mu tabisize hahulu. Panya n’a ize: “Ha ne ni zibile libaka miinelo ya cwale ha i shutana ni ya n’a lelile Mubupi kwa makalelo ni mwa lelezi ku feliseza sinyehelo ye tahisizwe ki ba ba mu hana ni ku hana bubusi bwa hae, ne ku swana inge kuli fa meto a ka ku zwisizwe kapai. Lika kaufela ka za lushango lwa Bibele ne li lumelelana. Na lata Jehova inge mutu; nto yeo ne i ni file susuezo ya ku eza ze ne ni ziba kuli ki ze nde. Ne ni iyakatwa ku tusa ba bañwi kuli ba bone shutano ye mwahal’a butali bwa batu ni butali bwa Mulimu. Butali bwa niti bu cincize bupilo bwa ka luli.”

Hanyinyani-hanyinyani, Virgil a kalisa ku honona ka za litumelo za bulapeli bwa hae. Ku fita ku lapela kuli Mulimu a fe nzila ya ku tusa ka yona batu ba bansu ni ku lapelela kopano ya n’a ngile ku ba ya saluluti sa mushobo ye n’e bonahala ku tahisa sitoyo kwa makuwa, a lapelela niti, mo ne i inezi kaufela, ko ne i fumaneha kaufela. Virgil u hupula kuli: “Ha ni zuha habusa hamulaho wa ku lapela ka t’ata ku Mulimu, na fumana magazini ya Tora ya ku Libelela mwa ndu. . . . Ku bonahala kuli n’e kashelizwe kwatas’a sikwalo.” Kapili-pili a kalisa ku ituta hahulu Bibele ni Lipaki za Jehova. U zwelapili kuli: “Ne ni utwile niti lwa pili mwa bupilo bwa ka. . . . Sepo ya kalisa ku hula mwa pilu ya ka.” Kapili-pili Virgil a swalisana ni  batu ba ba fa batu sepo i nosi ya niti ka mo i ñolezwi mwa Linzwi la Mulimu, yona Bibele.

Charo wa kwa Latin America n’a tabezi ha n’a tusizwe ki Paki ya bizwa Gladys ya n’a mu boni inz’a ziyelehile ni bana ba hae ba banyinyani mi a mu tusa ka ku mu isanga kwa musika. Hañi-hañi, Charo a amuhela tuto ya Bibele ya fa ndu ye sa lifelwi ye n’e filwe ki Gladys. Charo n’a komokile hahulu ha n’a ipalezi mwa Bibele ya hae kuli haki batu ba bande kaufela ba ba ya kwa lihalimu, kono Jehova u ka fa hape bupilo bo bu sa feli kwa batu fa lifasi. (Samu 37:11, 29) Charo yena ka sibili s’a abani sepo yeo ni ba bañwi ka lilimo ze 15.

Mu nahane ka za lifasi kaufela le li yahilwe ki batu ba ba sepahala ba ba swalisani mwa ku lapela Jehova, yena Mulimu a nosi wa niti! Nto yeo haki ya ku nuhelela fela. I sepisizwe ki Jehova. Ka mupolofita wa hae Zefania, Mulimu n’a zibahalize kuli: “Ni ka siya ku wena sicaba se si ishuwa, se si fokola, mi si ka sepa Libizo la [Muñ’a] Bupilo. . . . Ha ba sa na ku eza bumaswe, ha ba sa na ku bulela mashano hape; lilimi la buhata ha li sa na ku fumanwa mwa milomo ya bona; . . . ku si na ya ba sabisa.” (Zefania 3:12, 13) Haiba sepiso yeo ya mi tabisa, mu utwe kelezo ya Bibele, ye li: “A mu bate [Muña] Bupilo, mina kaufela ba ba ishuwa mwa lifasi, ba ba zamaya ka milao ya hae; a mu bate ze lukile, mu bate buikokobezo; mwendi mu ka suhana mu silelezwa mwa lizazi la buhali bwa [Muña] Bupilo.”—Zefania 2:3.