Tshitendelelu tshilelela tshidi tshisangisha bantu mu buobumue

NANSHA mudi bitendelelu bia bungi bitapulula bantu, ntendelelu wa Nzambi umu’epele mulelela udi yeye ne bukole bua kusangisha bantu mu buobumue. Pavua Isalele muikale tshisamba tshisungula kudi Nzambi, bantu bavule ba bisamba bia bende bavua banange bulelela bakabuela mu ntendelelu mulelela. Tshilejilu, Luta wakalekela nzambi ya mu buloba buabu bua bena Moaba, kuambilaye Naomi ne: “Bantu bebe nebikale bantu banyi ne Nzambi webe neikale Nzambi wanyi.” (Luta 1:16) Mu bidimu lukama bia kumpala, bantu ba bungi ba bisamba bia bende bakalua batendeledi ba Nzambi mulelela. (Bienzedi 13:48; 17:4) Pashishe pakabanga bapostolo ba Yezu kuenza ngendu mile benda bamanyisha lumu luimpe, bantu bakuabu bavua basue bulelela bakadisangisha mu buobumue mu ntendelelu wa Nzambi mulelela. Mupostolo Paulo wakafunda ne: ‘Nuakakudimuka kudi Nzambi panuakalekela mpingu bua kukuatshila Nzambi wa muoyo ne wa bushuwa mudimu.’ (1 Tesalonike 1:9) Ntendendelu wa Nzambi mulelela udiku lelu ne bukole bua kusangisha bantu mushindu’eu mu buobumue anyi?

Bedi ba mpata badi bamba ne: kakutu “batendeledi balelela” anyi “Nzambi mulelela” to. Badi bamba nanku bualu ki mbamanye muaba nansha umue udibu mua kupetela bulelela to. Kadi bantu ba mu matunga mashilangane badi bakeba bulelela mbafike ku dijingulula ne: ki ntuetu badi ne bua kudisunguila mushindu utudi basue kutendelela Nzambi to. Muntu umu’epele udi muakanyine bua tuetu kumutendelela n’Yehowa Nzambi, Mufuki wa bintu bionso. (Buakabuluibua 4:11) Yeye ki n’Nzambi mulelela, ne amu yeye ke udi ne bukenji bua kupangadika mushindu udi bantu ne bua kumutendelela.

Yehowa mmutumanyishe malu adiye utulomba mu Bible Dîyi diende. Bantu pabuipi ne bonso lelu pa buloba badi ne Bible mujima anyi tshitupa. Kabidi, Muana wa Nzambi wakamba ne: ‘Binuashala mu dîyi dianyi, nenumanye bulelela.’ (Yone 8:31, 32) Nunku kudi mushindu wa kumanya bulelela. Ne bantu miliyo ne miliyo ba mu bitendelelu bishilangane badi basue malu mimpe badi benda bitaba bulelela ebu ne muoyo mujima ne kabidi badisangisha mu buobumue mu ntendelelu mulelela.​—Matayo 28:19, 20; Buakabuluibua 7:9, 10.

Buobumue pa buloba bujima mu tshikondo tshietu etshi

Umue mulayi wa mushinga udi mu mukanda wa Sefanya udi wakula bua didisangisha pamue dia bantu ba miaba kabukabu. Yehowa udi wamba mu mulayi eu ne: ‘Nenkudimune [muakulu] wa bantu ba bende bua wikale [muakulu] wa ku mishiku milengejibue; bua bobu bamanye mua kubikila dîna dia Yehowa, bamukuatshile mudimu [mu buobumue].’ (Sefanya 3:9) Mmêyi kayipu malenga adi aleja bantu bashintuluke bikale basadila Nzambi mu buobumue!

Mêyi aa avua ne bua kukumbana tshikondo kayi? Sefanya 3:8 udi wamba ne: ‘Yehowa udi wamba ne: Nungindile, too ne ku dituku dindi mbika bua kunyenga bintu; bualu bua ngakupangadija bua kusangisha bisamba bia bantu, bua kukungija makalenge, bua meme kupumuna tshiji tshianyi pambidi pabu, kapia konso ka tshiji tshianyi mene; bualu bua buloba buonso nebupie mu kapia ka lukunukunu luanyi.’ Eyowa, tshikondo tshidi Yehowa usangisha bisamba bia bantu ne kumpala kua kupumunaye kapia ka tshiji tshiende pambidi pabi, udi upesha bantu bena bupuekele ba pa buloba muakulu wa ku mishiku milengejibue anyi muakulu mupeluke. Tshikondo atshi ntshiotshi tshitudi etshi, bualu disangisha dia bisamba bionso ku mvita ya dituku dinene dia Nzambi wa Bukole Buonso ya Armagedone didi munkatshi mua dienzeka.​—Buakabuluibua 16:14, 15.

Yehowa udi upesha bantu bende muakulu mupeluke bua kubasangisha mu buobumue. Muakulu mupiamupia eu ngumvuilu muimpe wa bulelela budi mu Bible budi butangila Nzambi ne malu adiye mulongolole bua kuenza. Kuakula muakulu mupeluke eu kudi kumvuija kuitabuja bulelela ebu, kubulongesha bantu bakuabu ne kutumikila mikenji ya Nzambi ne mêyi ende. Bantu badi bawakula badi ne bua kuepuka malu a tshididi atu mene atapulula bantu ne kujomona meji mabi onso  mu mitshima yabu, tshilejilu dikala ne kansungasunga bua bantu ba makoba ne ba bisamba bikuabu kadi kikale tshimanyinu tshia bena panu. (Yone 17:14; Bienzedi 10:34, 35) Bantu bonso badi banange bulelela badi mua kulonga muakulu eu. Tangila mushindu udi bantu batanu badibu batela mu tshiena-bualu tshishale bavua kumpala mu bitendelelu bishilangane, kadi badi badisangishe mpindieu mu ntendelelu wa Yehowa, Nzambi umu’epele mulelela.

Badi mu buobumu mu ntendelelu mulelela

Pavua Fidelia (uvua kumpala muena Katolike wa tshisumi) musumbile muanende wa bakaji Bible wa kuenzaye nende midimu ya mu kalasa, wakakonka nsaserdose wabu bua kumumvuija ne Bible tshivua tshienzekele bana bende batanu bavua bafue abu. Udi wamba ne: “Wakangela mâyi ku makasa.” Nunku pakaya Bantemu ba Yehowa kuende, wakabela lukonko alu. Pakabalaye mu Bible wende bulelela budi buleja menemene tshidi tshienzekela bafue, wakamona ne: tshitendelelu tshiende tshivua tshimushime bikole. Wakajingulula ne: bafue kabena bamanye bualu nansha bumue ne kabena batata mu muaba kampanda udibu balamine bafue bavua kabayi banji kutambula nansha. (Musambu 146:4; Muambi 9:5) Fidelia wakimansha tupingu ne bimfuanyi biende bionso bia mu tshitendelelu tshiabu, kupatukaye mu Katolike ne kutuadijaye kulonga Bible. (1 Yone 5:21) Kukadi mpindieu bidimu dikumi Fidelia udi munkatshi mua dilongesha bantu bakuabu bulelela budi mu Bible.

Tara wa mu tshimenga tshia Katmandou wakaya mu ditunga dikuabu mudi ntempelo ya bena Hindu mibala ku minu. Ke yeye kuya mu tshitanda tshia ba-Metodiste ne ditekemena dia kukumbaja majinga ende a mu nyuma. Kadi kakapeta diandamuna dia lukonko luende lua kumanya tshidi bantu bakengela to. Pashishe Bantemu ba Yehowa bakayikila nende ne kutuadijabu kumulongesha Bible. Tara udi wamba ne: “Ngakafika ku dijingulula ne: Nzambi wa dinanga ki mmukebeshi wa makenga onso a bantu to . . . Tshilumbu tshia ditekemena dia bukua-panu bupiabupia bua ditalala ne buobumue tshiakansankisha bikole.” (Buakabuluibua 21:3, 4) Wakimansha tupingu ne bimfuanyi biende bia bena Hindu, kulekelaye dilonda bilele bia ntendelelu bivua nabi bantu mu ditunga diabu, kuluaye Ntemu wa Yehowa uvua muikale ne disanka dilelela dia kuambuluisha bakuabu bua kukumbaja majinga abu a mu nyuma.

Panya (muena Buddha) uvua muena lubuku pakayikila Bantemu ba Yehowa nende musangu wa kumpala mu tshimenga tshia Bangkok. Milayi ya mu Bible yakamanyaye yakamusankisha bikole. Panya wakamba ne: “Pangakamanya tshidi nsombelu ya lelu mishilangane ne eyi ivua Mufuki mulongolole ku ntuadijilu ne kabidi pangakamanya mushindu udiye mulongolole bua kujikija ntatu mikebesha kudi bantu badi bamubenga yeye ne bumfumu buende, bivua anu bu bavua bangumbushe tshilamba ku mêsu. Malu onso adi mu Bible mvua ngamona umvuangana bimpe. Ngakafika ku dinanga Yehowa bu muntu mulelela; bualu ebu buakansaka bua kuenza malu onso amvua mumanye ne: avua makane. Mvua ne dijinga dikole dia kuambuluisha bantu bakuabu bua bamanye pabu dishilangana didi pankatshi pa meji a bantu ne meji a Nzambi. Bushuwa, meji malelela mmashintulule nsombelu wanyi bikole.”

Pakapita matuku, Virgil wakatuadija kuelakana bikole bua malongesha a mu tshitendelelu tshiabu. Pamutu pa kulomba Nzambi bua amupeshe mushindu wa kuambuluisha bantu bafike ne bua tshivuaye wangata bu bulongolodi bua bena kansungasunga buvua bumueneka bulongesha bantu bua kukinabu batoke, wakalomba Nzambi bua kumanyaye bulelela, nansha buobu bua mushindu kayi anyi buikale muaba kayi. Udi wamba ne: “Pangakabika mu dinda dia dituku diakalonda dingakasambila Nzambi ne muoyo mujima adi, ngakasangana tshibejibeji tshia Tshibumba tshia Nsentedi mu nzubu. . . . Bavua ne bua kuikala batshingelele muinshi mua tshiibi.” Wakatuadija diakamue kulonga Bible ne Bantemu ba Yehowa ne tshisumi. Udi wamba kabidi ne: “Bua musangu wa  kumpala katshia bandela, ngakapeta tshimvua nkeba. . . . Ngakabanga kupeta ditekemena.” Abidi mmale asatu mmîpi, Virgil kubangaye kudisanga mu buobumue ne aba badi bamanyisha bantu ditekemena dimu’epele dilelela didi mu Bible.

Charo wa mu Amerike wa ku Sud wakakema bikole pakatuadija Ntemu mukuabu diende Gladys kulua kumuangata bua kuikalabu baya nende tshiapamue mu tshisalu, bualu wakamona ne: bana ba Charo batshivua bakese bavua bamutatshisha bikole. Mu bungi bua matuku, Gladys wakalomba Charo bua kulonga Bible, e kuitabaye. Pakalonga Charo Bible ne kumvuaye ne: ki bantu bimpe bonso badi baya mu diulu to, ne kumvuaye kabidi ne: Yehowa neapeshe bantu muoyo wa tshiendelele pa buloba, wakakema kukatshila. (Musambu 37:11, 29) Charo udi munkatshi mua dimanyisha bantu bakuabu ditekemena edi kukadi bidimu 15 mpindieu.

Elabi meji pikala buloba bujima bûle tente ne bantu badi basue bulelela badisangishe mu buobumue mu ntendelelu wa Yehowa, Nzambi umu’epele mulelela! Ebu ki mbualu bufuikakaja patupu to. Ke tshidi Yehowa mulaye bua kuenza. Nzambi wakamanyisha mukana mua muprofete wende Sefanya ne: ‘Nenshiye bantu bakengeshibue ne bapele munkatshi muenu, bobu nebanyemene ku dîna dia Yehowa. Kabena benza malu mabi kabidi, kabena bamba mashimi; kabena basangana mukana muabu ludimi ludi ludinga; kakuena kuikalaku muntu wabatshinyisha.’ (Sefanya 3:12, 13) Pikala mulayi eu ukusankisha, tumikila mubelu wa mu Bible eu: ‘Kebayi Yehowa, nuenu bena [bupuekele] bonso ba pa buloba, badi batumikila mikenji yende; kebayi buakane, kebayi [bupuekele]; bumue nebanusokoke mu dituku dia tshiji tshia Yehowa.’​—Sefanya 2:3.