Раст кувынад адӕмы иу кӕны

КӔД адӕм фылдӕр дины тыххӕй дихтӕ кӕнынц, уӕддӕр иунӕг ӕцӕг Хуыцауӕн кувгӕйӕ адӕм иу кӕнынц. Израилӕгтӕ Хуыцауы ӕвзӕрст адӕм куы уыдысты, уӕд бирӕ сыгъдӕгзӕрдӕ муртаттӕ цыдысты раст кувынадмӕ. Зӕгъӕм, Руф ныууагъта йӕ фыдӕлты, моавитӕгты хуыцӕутты ӕмӕ Ноеминӕн загъта: «Дӕ адӕм мӕ адӕм дӕр уыдзысты, дӕ Хуыцау та — мӕ Хуыцау» (Руф 1:16, «Мах дуг» №4, 2000). Н. э. агъоммӕ I ӕнусмӕ муртаттӕй бирӕтӕ райдыдтой ӕцӕг Хуыцауӕн кувын (Куыстытӕ 13:48; 17:4). Фӕстӕдӕр, Йесойы апостолтӕ дард рӕттӕм хорз уацхъуыд хъусын кӕнынмӕ куы ацыдысты, уӕд дӕр бирӕ сыгъдӕгзӕрдӕ адӕймӕгтӕ райдыдтой ӕцӕг Хуыцауӕн кувын. «[Сымах] раздӕхтыстут Хуыцаумӕ гуымирытӕй, цӕмӕй кусат ӕгас ӕмӕ ӕцӕг Хуыцауӕн»,— фыста апостол Павел (1 Фессалоникӕгтӕм 1:9). Цымӕ абон дӕр раст кувынадӕн йӕ бон у адӕмы баиу кӕнын?

Ӕцӕгад базоныныл чи гуырысхо кӕны, уыдон дзурынц, зӕгъгӕ, раст нӕу пайда кӕнын ахӕм дзырдтӕй, куыд: «ӕцӕг кувджытӕ» кӕнӕ «ӕцӕг Хуыцау». Афтӕ сӕм, ӕвӕццӕгӕн, уымӕн кӕсы, ӕмӕ нӕ зонынц, ӕцӕгад кӕцӕй ис базонӕн, уый. Фӕлӕ алыхуызон динты минӕвӕрттӕй ӕцӕгад чи агуры, уыдон бамбӕрстой, Хуыцауӕн, мах куыд фӕнды, афтӕ кувӕн кӕй нӕй, уый. Кувын ӕмбӕлы, ӕппӕтдӕр Чи сфӕлдыста, ӕрмӕстдӕр уымӕн — Иегъовӕ Хуыцауӕн (Раргомад 4:11). Уый у ӕцӕг Хуыцау, ӕмӕ ӕрмӕстдӕр уымӕн ис бар, кувын ын куыд ӕмбӕлы, уый скъуыддзаг кӕнынӕн.

Цӕмӕй нын Иегъовӕ йӕ домӕнтӕ бамбарын кӕна, уый тыххӕй немӕ ныхас кӕны йӕ Ныхас Библийы уылты. Зӕгъӕн ис, ӕмӕ абон алкӕмӕдӕр ис Библи ӕнӕхъӕнӕй кӕнӕ йӕ хӕйттӕй искӕцы. Уымӕй уӕлдай ма Хуыцауы Фырт загъта: «Мӕ дзырдыл куы лӕууат, уӕд... ӕцӕгад базондзыстут» (Иоанны 8:31, 32, НФ). Уӕдӕ уый ууыл дзурӕг у, ӕмӕ ӕцӕгад базонӕн ис. Ӕцӕгӕйдӕр, алыхуызон динтӕй милуангай сыгъдӕгзӕрдӕ адӕймӕгтӕ уыцы ӕцӕгады фӕндагыл ныфсджынӕй ӕрлӕууынц ӕмӕ раст кувынады баиу вӕййынц (Матфейы 28:19, 20; Раргомад 7:9, 10).

Иудзинад ӕгас зӕххыл абон!

Софонийы чиныджы цы диссаджы пехуымпарад ис, уым дзырдӕуы, алыхуызон адӕймӕгтӕ иумӕ кӕй ӕрӕмбырд уыдзысты, уый тыххӕй: «Уӕд ӕз [Иегъовӕ Хуыцау] адӕмӕн ратдзынӕн сыгъдӕг ӕвзаг, цӕмӕй се ’ппӕт дӕр сидой Иегъовӕйы номмӕ ӕмӕ йын уӕхски-уӕхск лӕггад кӕной» (Софони 3:9). Куыд рӕсугъд ныв у: адӕм фӕивтой сӕ зондахаст ӕмӕ Хуыцауӕн иумӕ лӕггад кӕнынц!

Уыцы ныхӕстӕ кӕд хъуамӕ сӕххӕст уой? Софонийы 3:8-ӕм стихы дзырдӕуы: «Ӕнхъӕлмӕ мӕм кӕсут,— дзуры Иегъовӕ,— уыцы бонмӕ, цалынмӕ амӕттаджы фӕдыл нӕ ацӕуон. Уымӕн ӕмӕ мӕ фӕнд у адӕмты ӕрӕмбырд кӕнын, паддзахӕдтӕ иумӕ ӕрхонын, цӕмӕй сыл мӕ фыдӕх ныккалон; мӕ фыдӕхы арт бахӕрдзӕн ӕгас зӕхх дӕр». О, цалынмӕ Иегъовӕ адӕмтыл йӕ фыдӕх нӕ ныккалдта, уӕдмӕ сӕ ӕмбырд кӕны ӕмӕ, зӕххы къорийыл цы сӕрныллӕг адӕм ис, уыдонӕн та дӕтты фадат сыгъдӕг ӕвзаг базонынӕн. Ныртӕккӕ у уыцы рӕстӕг, уымӕн ӕмӕ Иегъовӕ адӕмты ӕмбырд кӕнын райдыдта Ӕппӕтхъомысджын Хуыцауы стыр бонмӕ, Армагеддонмӕ (Раргомад 16:14, 16).

Цӕмӕй Иегъовӕ йӕ адӕмы баиу кӕна, уый тыххӕй сын дӕтты сыгъдӕг ӕвзаг. Уыцы ног ӕвзаг чи зоны, уый раст ӕмбары Библийы ӕцӕгад Хуыцау ӕмӕ йӕ фӕндты тыххӕй. Сыгъдӕг ӕвзагыл дзурын ма нысан кӕны ӕцӕгадыл ӕууӕндын, иннӕтӕн ӕй амонын ӕмӕ Хуыцауы закъӕттӕ ӕмӕ уагӕвӕрдтӕм гӕсгӕ цӕрын. Уый тыххӕй хъӕуы, адӕмы кӕрӕдзийы ныхмӕ чи аразы, уыцы политикӕйӕ хи хизын ӕмӕ зӕрдӕтӕ ссыгъдӕг кӕнын, ацы дуне цы хиуарзон ахастӕй ӕмӕ миниуджытӕй хицӕн кӕны, уыдонӕй, зӕгъӕм: расизм ӕмӕ национализмӕй (Иоанны 17:14; Куыстытӕ 10:34, 35). Ӕцӕгад чи уарзы, уыцы сыгъдӕгзӕрдӕ адӕмӕн се ’ппӕтӕн дӕр сӕ бон у уыцы  ӕвзаг базонын. Ӕркӕсӕм, фыццаг статьяйы цы фондз адӕймаджы кой кодтам — кӕддӕр алыхуызон динтыл хӕст чи уыд — уыдон ныр иунӕг ӕцӕг Хуыцау Иегъовӕйӕн иумӕ куыд кувынц, уымӕ.

Уыдоны баиу кодта раст кувынад

Фидели, ромаг-католикон аргъуаны минӕвар, йӕ чызгӕн скъоламӕ Библи куы балхӕдта, уӕд сауджынӕн загъта, цӕмӕй йын Библимӕ гӕсгӕ бамбарын кодтаид, йӕ фондз сывӕллоны куы амардысты, уӕд цы фесты. «Куыд фӕфыдӕнхъӕл дӕн!» — загъта сылгоймаг. Иегъовӕйы Ӕвдисӕнтӕ йӕм куы ӕрбацыдысты, уӕд уыдонмӕ дӕр радта уыцы фарст. Йӕхи Библийы куы бакаст, мӕрдтӕ цы уавӕры сты, уый, уӕд бамбӕрста, аргъуаны йӕ сайгӕ кӕй кодтой. Уый базыдта, мӕрдтӕ кӕй ницы ӕмбарынц ӕмӕ уымӕ гӕсгӕ сӕ удтӕ сыгъдӕггӕнӕны кӕнӕ ӕндӕр искуы кӕй нӕ хъизӕмар кӕнынц (Псалом 145:4; Екклесиаст 9:5). Фиделимӕ цы дины нывтӕ ӕмӕ гуымирытӕ уыд, уыдон иууылдӕр аппӕрста, ныууагъта аргъуан ӕмӕ райдыдта Библи ахуыр кӕнын (1 Иоанны 5:21). Ныр дӕс азы дӕргъы Библийы ӕцӕгад йӕхӕдӕг амоны иннӕ адӕмӕн.

Тарӕ Катмандуйӕ алыгъди ӕндӕр бӕстӕмӕ, цыран индуистаг кувӕндӕттӕ бирӕ нӕ уыд. Уымӕ гӕсгӕ, цӕмӕй Хуыцауы тыххӕй фылдӕр базыдтаид, уый тыххӕй райдыдта цӕуын методистты аргъуанмӕ. Фӕлӕ дзы йӕ фарстӕн, адӕм цӕмӕн хъизӕмар кӕнынц, зӕгъгӕ, дзуапп не ссардта. Уый фӕстӕ йыл фембӕлдысты Иегъовӕйы Ӕвдисӕнтӕ ӕмӕ йын загътой Библи ахуыр кӕныны тыххӕй. Тарӕ дзуры: «Ӕз бамбӕрстон, хӕларзӕрдӕ Хуыцау адӕмы хъизӕмӕртты аххосджын кӕй нӕу, уый. [...] Куыд цин кодтон, сабырдзинад ӕмӕ иудзинад кӕм уыдзӕн, ахӕм ног дуне нӕм кӕй ӕнхъӕлмӕ кӕсы, ууыл» (Раргомад 21:3, 4). Тарӕ аппӕрста йӕ индуистаг нывтӕ ӕмӕ гуымирытӕ, йӕ райгуырӕн бӕстӕйы дины кӕнонтӕ ныууагъта ӕмӕ ныр ӕцӕгдӕр амондджын у, Иегъовӕйы Ӕвдисӕн кӕй сси ӕмӕ иннӕтӕн Хуыцауы базонынӕн кӕй ӕххуыс кӕны, уый руаджы.

Паньямӕ Бангкокы фыццаг хатт Иегъовӕйы Ӕвдисӕнтӕ куы бацыдысты, уӕд уыцы рӕстӕджы уый хӕст уыд буддизмыл ӕмӕ дӕсны фарста, уымӕ гӕсгӕ йын Библийы пехуымпарӕдтӕ йӕ зӕрдӕйы арф фӕд ныууагътой. Панья загъта: «Ӕз базыдтон, ныры уавӕртӕ, Сфӕлдисӕг райдианы цы уавӕртӕ скодта, уыдонӕй афтӕ тынг цӕмӕн хицӕн кӕнынц, уый, стӕй Хуыцауы ӕмӕ йӕ хицаудзинад чи ницӕмӕ дары, уыдон цы зиан ӕрхастой, уымӕй фӕд дӕр кӕй нал баззайдзӕн. Уӕд мӕм афтӕ фӕкаст, цыма мӕ цӕстытӕ байгом сты. Библийы ныхӕстӕй иу дӕр иннӕйы ныхмӕ нӕ уыд. Ӕз базыдтон, Иегъовӕ ӕцӕг гоймаг кӕй у, ӕмӕ йӕ бауарзтон. Уый мӕ разӕнгард кодта, раст цы у, уый аразынмӕ. Тынг мӕ фӕндыд иннӕтӕн дӕр баххуыс кӕнын, цӕмӕй базыдтаиккой, адӕймаджы зонд ӕмӕ Хуыцауы зонд куыд хицӕн кӕнынц, уый. Ӕцӕг зондджындзинад мын фӕивта мӕ цард».

Рӕстӕг куыд цыди, афтӕ Верджил райдыдта йӕ дины уырнындзинӕдтыл гуырысхо кӕнын. Уый Хуыцаумӕ нал куывта саутӕн баххуыс кӕныны тыххӕй ӕмӕ фӕстӕдӕр куыд бамбӕрста, афтӕмӕй урс адӕммӕ ӕнӕуынондзинад чи ӕвзӕрын кодта, уыцы расистон организацийы тыххӕй. Фӕлӕ уый куывта, цӕмӕй йын равдыстаид ӕцӕгад, цавӕрфӕнды ма уыдаид ӕмӕ кӕмфӕнды ма уыдаид, уӕддӕр. «Дыккаг бон, зӕрдиаг куывдтыты фӕстӕ куы райхъал дӕн,— дзуры Верджил,— уӕд хӕдзары ссардтон журнал «Хъахъхъӕнӕг мӕсыг». [...] Ӕвӕццӕгӕн ӕй чидӕр дуары бынты ӕрбатъыста». Бирӕ нӕ рацыд, афтӕ лӕппу зӕрдӕбынӕй ахуыр кӕнын райдыдта Библи Иегъовӕйы Ӕвдисӕнтимӕ. Уый дарддӕр дзуры: «Мӕ царды фыццаг хатт уыдтӕн райгонд. [...] Мӕ зӕрдӕйы фӕзынд ныфс». Цыбыр рӕстӕджы фӕстӕ Верджил баиу, Хуыцауы Ныхас Библийы иунӕг ӕцӕг ныфсы тыххӕй чи дзуры, уыдонимӕ.

Чаройӕн, Латинаг Америкӕйы цӕрӕг сылгоймагӕн, йӕ сабитӕм зын кӕсын кӕй уыди,  уый федта иу Ӕвдисӕн, Глэдис, зӕгъгӕ, ӕмӕ йын ӕххуыс кӕнын райдыдта: базармӕ-иу ӕй аласта. Уыцы хабар Чаройӕн йӕ зӕрдӕ бацагайдта. Фӕстӕдӕр Чаро сразы Глэдисимӕ хӕдзары Библи лӕвар ахуыр кӕныныл. Чаро йӕхи Библийы куы бакасти, хорз адӕм иууылдӕр уӕларвмӕ кӕй нӕ цӕуынц, фӕлӕ Иегъовӕ зӕххыл цӕрӕг адӕмӕн дӕр ӕнусон цард кӕй ӕрцӕттӕ кодта, уӕд тынг бацин кодта (Псалом 36:11, 29). Ныр фынддӕс азы дӕргъы Чаро йӕхӕдӕг дзуры иннӕтӕн уыцы ныфсы тыххӕй.

Ахъуыды ма кӕн, зӕххыл цӕрынц ӕрмӕстдӕр сыгъдӕгзӕрдӕ адӕм ӕмӕ иууылдӕр иумӕ иунӕг ӕцӕг Хуыцау Иегъовӕйӕн лӕггад кӕнынц! Уый аргъау нӕу. Уымӕй нын Иегъовӕ йӕхӕдӕг бавӕрдта зӕрдӕ. Хуыцау йӕ пехуымпар Софонийы уылты загъта: «Ӕз дын де ’хсӕн ныууадздзынӕн ӕрмӕстдӕр сӕрныллӕг ӕмӕ хуымӕтӕг адӕмы, ӕмӕ уыдон ӕцӕг ӕмбӕхсӕн ссардзысты Иегъовӕйы номы. ...Уыдон ӕвзӕрдзинад нӕ кӕндзысты, гӕдыныхас ӕмӕ мӕнгдзинад нӕ уыдзӕни се ’взагыл... ӕмӕ сын тӕссаг никӕмӕй уыдзӕни» (Софонийы 3:12, 13). Кӕд ацы зӕрдӕвӕрд дӕ зӕрдӕмӕ цӕуы, уӕд дӕ хъус ӕрдар Библийы фӕдзӕхстмӕ: «Зӕххы къорийыл цы сӕрныллӕг адӕм ис, Йӕ закъонмӕ гӕсгӕ чи цӕры, уе ’ппӕт дӕр, агурут Иегъовӕйы. Тырнут рӕстдзинадмӕ, тырнут сӕрныллӕгдзинадмӕ. Чи зоны, Иегъовӕйы масты бон ӕмбӕхст ӕрцӕуат» (Софонийы 2:3).