Vugandzeri Bya Ntiyiso Byi Hlanganisa Vanhu

HAMBILESWI hi ntolovelo vukhongeri byi talaka ku endla vanhu va avana, vugandzeri bya Xikwembu xi ri xin’we xa ntiyiso byi ni matimba yo hlanganisa vanhu. Loko Israyele a ha ri rixaka ra Xikwembu leri hlawuriweke, vanhu vo tala Vamatiko lava nga ni timbilu letinene va amukele vugandzeri bya ntiyiso. Hi xikombiso, Rhuti u fularhele swikwembu swa tiko ra ka vona ra Mowabu kutani a ku eka Nawomi: “Vanhu va wena va ta va vanhu va mina.” (Rhuti 1:16) Hi lembe-xidzana ro sungula C.E., nhlayo leyikulu ya Vamatiko a yi ri vagandzeri va Xikwembu xa ntiyiso. (Mintirho 13:48; 17:4) Hi ku famba ka nkarhi loko vaapostola va Yesu va sungule ku ya etindhawini ta le kule ni mahungu lamanene, vanhu van’wana lava nga ni timbilu letinene va amukele vugandzeri bya Xikwembu xa ntiyiso. Muapostola Pawulo u tsarile ku: “Mi hundzuke[le] eka Xikwembu [mi] suka eswifanisweni swa n’wina swa hava leswaku mi va mahlonga ya Xikwembu lexi hanyaka ni xa ntiyiso.” (1 Vatesalonika 1:9) Xana vugandzeri bya Xikwembu xa ntiyiso byi ni matimba yo tano yo hlanganisa vanhu namuntlha?

Vahehli va vukhongeri va sindzisa leswaku swi hoxile ku vula leswaku ku ni “vagandzeri va ntiyiso” kumbe “Xikwembu xa ntiyiso.” Va nga ha titwa tano hikuva a va swi tivi leswaku ku kona laha ntiyiso wu nga dyondziwaka kona. Kambe varhandzi va ntiyiso vo huma eka mindhavuko yo hambana-hambana va swi xiya leswaku vugandzeri a byi yi hi leswaku wena u rhandza yini. Loyi a faneriwaka hi vugandzeri bya hina i Muvumbi wa swilo hinkwaswo—Yehovha Xikwembu. (Nhlavutelo 4:11) I Xikwembu xa ntiyiso naswona u ni mfanelo yo hlawula leswaku u fanele a gandzeriwa njhani.

Leswaku a hi pfuna hi twisisa leswi a swi languteleke eka hina, Yehovha u vulavule na hina hi ku tirhisa Rito ra yena Bibele. Kwalomu ka un’wana ni un’wana emisaveni namuntlha a nga swi kota ku kuma Bibele yi helerile kumbe xiphemu xa yona. Tlhandlakambirhi, n’wana wa Xikwembu u te: “Loko mi tshama eritweni ra mina, . . . mi ta tiva ntiyiso.” (Yohane 8:31, 32) Leswi swi vula leswaku ntiyiso wu nga tiviwa. Naswona timiliyoni ta vanhu va timbilu to tshembeka lava humaka evukhongerini byo hambana-hambana va karhi va amukela ntiyiso lowu hi xivindzi naswona va hlanganisiwa va va un’we evugandzerini bya ntiyiso.—Matewu 28:19, 20; Nhlavutelo 7:9, 10.

Vun’we Bya Misava Hinkwayo Enkarhini Wa Hina!

Vuprofeta lebyi tiviwaka swinene ebukwini ya Bibele ya Sofaniya byi vulavula hi ku hlengeletana ka vanhu va tinxaka to hambana-hambana. Byi ri: “Hikuva enkarhini wolowo [mina Yehovha Xikwembu] ndzi ta endla leswaku vanhu va hundzukela eka ririmi leri tengeke, leswaku hinkwavo va vitana vito ra Yehovha, va n’wi tirhela hi mbilu yin’we.” (Sofaniya 3:9) Swa tsakisa ku vona vanhu lava hundzukeke va tirhela Xikwembu hi vun’we!

Xana leswi a swi ta endleka rini? Sofaniya 3:8 yi ri: “‘Tshamani mi ndzi languterile,’ ku vula Yehovha, ‘ku fikela esikwini leri ndzi nga ta yima ha rona ndzi phanga, hikuva xiboho xa mina xa vuavanyisi i ku hlengeleta matiko, leswaku ndzi hlengeleta mimfumo, ndzi chululela xigwevo xa mina ehenhla ka wona, ku hlundzuka ka mina hinkwako lokukulu; hikuva misava hinkwayo yi ta herisiwa hi ndzilo wa ku hiseka ka mina.’” Ina, hi nkarhi lowu Yehovha a hlengeletaka matiko ha wona kambe emahlweni ko chulula vukarhi bya yena, u endla leswaku lava va titsongahataka va cinca va vulavula ririmi leri tengeke. Nkarhi wolowo hi wona lowu hi nga eka wona, hikuva ku hlengeletiwa ka matiko hinkwawo ma hlengeleteriwa nyimpi ya siku lerikulu ra Xikwembu xa Matimba hinkwawo eArmagedoni ka endliwa.—Nhlavutelo 16:14, 16.

Yehovha u hlanganisa vanhu vakwe hi ku va nyika ririmi leri tengeke. Ririmi leri lerintshwa ri katsa ku twisisa lokunene ka ntiyiso wa Bibele malunghana ni Xikwembu ni xikongomelo xa xona. Ku vulavula ririmi leri tengeke swi katsa ku tshemba ntiyiso, ku wu dyondzisa van’wana ni ku  hanya hi ku pfumelelana ni milawu swin’we ni misinya ya milawu ya Xikwembu. Swi katsa ku papalata tipolitiki leti vangaka ku avana ni ku susa vutianakanyi embilwini ya hina, yo fana ni xihlawuhlawu ni ku avana hi vutiko, ku nga swilo leswi khutaziwaka hi misava leyi. (Yohane 17:14; Mintirho 10:34, 35) Hinkwavo lava nga ni timbilu to tshembeka lava rhandzaka ntiyiso va nga ri dyondza ririmi leri. Xiya ndlela leyi vanhu lavaya va ntlhanu lava ku vulavuriweke ha vona exihlokweni lexi hundzeke—lava a va hambanile swinene hi tlhelo ra vukhongeri—sweswi va hlanganeke ha yona evugandzerini bya Xikwembu xi ri xin’we xa ntiyiso, Yehovha.

Va Hlanganisiwile eVugandzerini Bya Ntiyiso

Loko Fidelia, la nga Murhoma Khatoliki wa xiviri, a xavele n’wana wa yena Bibele ya xikolo, u kombele mufundhisi leswaku a tirhisa yona ku n’wi hlamusela xiyimo lexi vana va yena va ntlhanu, lava feke, va nga eka xona. U ri: “Ndzi hele matimba!” Kutani loko Timbhoni ta Yehovha ti n’wi endzela u ti vutise xivutiso lexi fanaka. Loko a tihlayele eBibeleni ya yena ntiyiso malunghana ni xiyimo xa vafi, u vone ndlela leyi kereke yi n’wi xiseke ha yona. U dyondze leswaku vafi a va twi nchumu naswona a va le ku xanisekeni eLimbo kumbe kun’wana. (Pisalema 146:4; Eklesiasta 9:5) Fedelia u cukumete swifaniso hinkwaswo swa vukhongeri, a tshika kereke kutani a sungula ku dyondza Bibele. (1 Yohane 5:21) Eka malembe ya khume lama hundzeke, a a ri karhi a dyondzisa van’wana ntiyiso wa Matsalwa.

Tara wa le Kathmandu u rhurhele etikweni leri ri nga ni titempele ti nga ri tingani ta Mahindu. Hiloko a endzela kereke ya Methodist a ri ni ntshembo wo enerisa xilaveko xa yena xa moya. Kambe a nga yi kumanga nhlamulo ya xivutiso xa yena malunghana ni lexi endlaka vanhu va xaniseka. Hiloko Timbhoni ta Yehovha ti n’wi endzela kutani ti n’wi tshembisa leswaku ti ta hamba ti dyondza Bibele na yena. Tara u ri: “Ndzi sungule ku swi vona leswaku Xikwembu xa rirhandzu a hi xona xi endlaka leswaku vanhu va xaniseka swonghasi emisaveni . . . Ndzi tsakisiwe hi ku twa leswaku ku ta va ni misava leyintshwa ya ku rhula ni vun’we.” (Nhlavutelo 21:3, 4) Tara u lahle swifaniso swa yena hinkwaswo swa Vuhindu, a tshika ku landzelela mindhavuko ya kereke ya tiko ra ka vona kutani a tikumela ntsako wa xiviri hi ku pfuneta ku enerisa swilaveko swa moya swa van’wana, tanihi Mbhoni ya Yehovha.

Panya wa Mubudha, a a ri nyamusoro loko Timbhoni ta Yehovha ti fika ro sungula ekaya ra yena le Bangkok, u tsakisiwe swinene hi vuprofeta lebyi kumekaka eBibeleni. Panya u te: “Loko ndzi dyondze leswaku hikwalaho ka yini swiyimo swa namuntlha swi hambanile ni leswi Muvumbi a a lava leswaku swi va xiswona eku sunguleni, ni ndlela leyi a hleleke ku lunghisa leswi onhiweke hi lava va n’wi bakanyeke va tlhela va bakanya ni vulawuri byakwe, a swi fana niloko ku susiwe nguvu ya ntima ematihlweni ya mina. Xin’wana ni xin’wana lexi vuriwaka hi Bibele a xi twisiseka. Ndzi sungule ku rhandza Yehovha tanihi munhu; leswi swi ndzi khutaze ku endla leswi a ndzi swi tiva leswaku swi lulamile. A ndzi ri ni nkhinkhi wo pfuna van’wana va vona ku hambana exikarhi ka vutlhari bya munhu ni vutlhari bya Xikwembu. Vutlhari bya ntiyiso byi cince vutomi bya mina hakunene.”

Hi ku famba ka nkarhi Virgil u sungule ku ti kanakana swinene tidyondzo ta vukhongeri bya yena. Ematshan’weni yo khongela eka Xikwembu leswaku xi pfuna vantima ni vukhongeri lebyi hi ku vula ka yena byi nga bya xihlawuhlawu lebyi kucetelaka vanhu leswaku va venga valungu, u khongelele ku kuma ntiyiso, loko wu ri kona. Virgil u ri: “Loko ndzi pfuka siku leri landzelaka endzhaku ko khongela Xikwembu swinene, ndzi kume magazini wa Xihondzo xo Rindza endlwini. . . . Swi nga endlaka leswaku wu nghenisiwe hi le hansi ka nyangwa.” Hi ku hatlisa u sungule ku dyondza Bibele ni Timbhoni ta Yehovha hi vuenti. U ya emahlweni a ku: “A ku ri ro sungula evuton’wini bya mina ndzi titwa ndzi enerisekile. . . . Ndzi sungule ku va ni ntshembo.” Hi ku hatlisa  Virgil a ri exikarhi ka lava va nyikaka vanhu ntshembo wu ri un’we wa ntiyiso hi laha wu tsariweke ha kona eRitweni ra Xikwembu, Bibele.

Charo la humaka eLatin Amerika a a tsakile loko Mbhoni leyi vuriwaka Gladys yi vona leswaku a a khome xo tika hi vana va yena lavatsongo, kutani a sungula ku n’wi pfuna hi ku n’wi yisa emakete. Hi ku famba ka nkarhi, Charo u amukele nyiko yo huma eka Gladys—ku nga dyondzo ya mahala ya Bibele. Charo u hlamarile loko a dyondze eBibeleni ya yena leswaku a hi vanhu hinkwavo lava lulameke va nga ta ya etilweni kambe Yehovha u ta tlhela a nyika vanhu van’wana lunghelo ro hanya hi laha ku nga heriki emisaveni. (Pisalema 37:11, 29) Charo se u ni malembe ya 15 a ri karhi a avelana ni van’wana ntshembo lowu.

Ehleketa hi misava hinkwayo se yi tele hi vanhu va timbilu letinene, lava nga ni vun’we eku gandzeleni ka Yehovha, Xikwembu xi ri xin’we xa ntiyiso! Leswi a hi norho. Hi leswi Yehovha a swi tshembiseke. Xikwembu loko xi vulavula hi ku tirhisa muprofeta wa xona Sofaniya xi te: “Kunene exikarhi ka wena ndzi ta siya vanhu lava va titsongahataka, lava va tivekaka ehansi, entiyisweni va ta tumbela evitweni ra Yehovha. . . . A va nge swi endli leswi swi nga lulamangiki, kumbe va vulavula mavunwa, naswona ririmi ra mano a ri nge kumeki emilon’wini ya vona; . . . a ku nge vi na munhu loyi a va chavisaka.” (Sofaniya 3:12, 13) Loko xitshembiso lexi xi ku tsakisa, xi tekele enhlokweni xikhutazo lexi nge: “Lavani Yehovha, n’wina hinkwenu lavo rhula va misava, n’wina lava mi hanyeke hi ku landza xiboho xa Yena xa vuavanyisi. Lavani ku lulama, lavani ku rhula. Kumbexana mi nga tumbetiwa esikwini ra ku hlundzuka ka Yehovha.”—Sofaniya 2:3.