Ẹfọn Ẹma, Ẹnyụn̄ Ẹtịm Ẹfiọk

Ikpọ Mbono—Idara Idara Nsọn̄ọ Itie Nditọete Nnyịn

JOSEPH F. RUTHERFORD emi edide isua 50 ke emana, oro idem mîsọn̄ke, ke ama ọkọnyọn̄ se ikekperede ndisịm n̄kpọkọbi ufịk isua kiet edi, anam utom ye idatesịt nte andida isenowo n̄kọnọ ufọk. Enye atan̄ mme ekpatisan̄ ifịk ifịk onyụn̄ ada mme ekemmọ Christian akayak ke ufọkisen mmọ. Iba ke otu n̄kani ekemmọ mbon n̄kpọkọbi—ekemmọ Nditọ Ukpepn̄kpọ Bible—ẹnọ akwa otuowo oro ẹbetde ndibọ itieidụn̄ ubet. Edinam aka iso ntem tutu ebe ufọt okoneyo. Nduaidem oro ebede-be owo omụm kpukpru mmọ. Nso edinam edi emi?

Ekedi ke isua 1919, ndien Nditọ Ukpepn̄kpọ Bible (oro ẹdiọn̄ọde mfịn nte Mme Ntiense Jehovah) ndisụk mbọhọ ibak ibak ukọbọ ekedi oro. Man ẹsọn̄ọ nditọete mmọ idem, mmọ ẹma ẹnịm mbono ke Cedar Point, Ohio, U.S.A., ọtọn̄ọde ke September 1 esịm 8, 1919. Ke akpatre usen mbono oro, owo 7,000 emi ẹkopde nduaidem ẹma ẹtịm ẹkpan̄ utọn̄ nte Brọda Rutherford akadade mme ikọ emi esịn udọn̄ ọnọ mme andidụk mbono oro kiet kiet ete: “Afo edi isụn̄utom Edidem ndidem ye Ọbọn̄ mbọn̄, emi ọtọtde mme owo aban̄a . . . uyama uyama obio ubọn̄ Ọbọn̄ nnyịn.”

Ikpọ mbono ikọt Jehovah ẹkọtọn̄ọ ke eyo Israel eset. (Exodus 23:14-17; Luke 2:41-43) Mme utọ mboho oro ẹkedi ini idatesịt, ẹn̄wamde kpukpru mme andidụk ndiwụk ekikere mmọ ke Ikọ Abasi. Ukem ntre, ikpọ mbono Mme Ntiense Jehovah ke eyomfịn ẹwụhọ ke mme udọn̄ n̄kpọ eke spirit. Ye mme andida nse oro ẹnyenede esịt akpanikọ mme utọ idara idara mboho oro ẹnọ in̄wan̄-in̄wan̄ uyarade nte ke ọkpọsọn̄ mbọbọ itie nditọete Christian adian Mme Ntiense ọtọkiet.

Mme Ukeme Oro Ẹsịnde Man Ẹdụk

Mme Christian eyomfịn ẹfiọk ẹte ke ikpọ mbono mmimọ ẹdi ini edibọ nduọkodudu eke spirit ye item Ikọ Abasi. Mmọ ẹbat ikpọ mboho emi nte akpan usụn̄ oro an̄wamde mmọ “ẹfọn ẹma, ẹnyụn̄ ẹtịm ẹfiọk ofụri uduak Abasi.” (Colossae 4:12) Ntem, Mme Ntiense ẹsinọ mme mboho emi ibetedem ofụri esịt, ẹsịnde ọkpọsọn̄ ukeme man ẹdụk mmọ.

Esiyom ndusụk owo ẹwụt mbuọtidem ẹnyụn̄ ẹkan mme n̄kpọ ubiọn̄ọ oro ẹtiede nte ikpọ obot man mmọ ẹkeme ndidụk mme utọ mbono oro. Ke uwụtn̄kpọ, kere ban̄a akanian̄wan Ntiense kiet ke Austria. Okposụkedi ọkọdọn̄ọde ikịm an̄wan n̄kụhọ okonyụn̄ oyomde ẹkịm enye mmọn̄ibọk insulin kpukpru usen, enye ama okụt ete ke ima idụk ofụri usen mbono district kiet ke idụt mmọ. Ke India, akamba ubon Mme Ntiense oro ẹdide ọkpọikpọi ubuene ẹma ẹkụt nte edide ọkpọsọn̄ n̄kpọ ndidụk akamba mbono. Andibuana kiet ke ubon oro ama edinọ un̄wam. Enye ọdọhọ ete: “Sia mmen̄koyomke nditaba edinam oro, mma nnyam n̄kpanuen utọn̄ o-gold mi man inyene okụk ukpeusụn̄. Emi ama odot ye n̄waidem oro, sia ebuana ye mme ifiọkutom ẹma ẹsọn̄ọ mbuọtidem nnyịn.”

Ke Papua New Guinea, otu mbon oro mînaha baptism, oro ẹnyenede udọn̄ ẹma ẹbiere ndikodụk mbono district ke ibuot obio. Mmọ ẹma ẹka ẹbịne eren kiet ke obio-in̄wan̄ mmọ emi ekenyenede ubomisọn̄ umen owo ke ukpeokụk ẹnyụn̄ ẹkebụp m̀mê enye edibọ okụk ifan̄ ndimen mmimọ n̄ka mbono oro. Sia okụk ẹkeyomde okokponde akan ukeme mmọ, mmọ ẹma ẹdiomi ndikanam utom ke ufọk owo oro, ndifiak mbọp itie utem udia esie.  Ntem mmọ ẹma ẹkeme ndika mbono district oro ẹnyụn̄ ẹbọ ufọn ẹto edidụk ofụri edinam oro.

Usụn̄ ndiyom idịghe mfịna oro owo mîkemeke ndikan inọ Mme Ntiense Jehovah oro ẹduakde ndidụk ikpọ mbono. Ke 1978, akparawa kiet otode Poland ama awat kilomita 1,200 ke enan̄ukwak usen itiokiet man okodụk akamba mbono ke Lille, France. Ke ndaeyo 1997, Ntiense iba ẹtode Mongolia ẹma ẹsan̄a kilomita 1,200 man ẹkedụk mboho Christian ke Irkutsk, Russia.

Ata Itie Nditọete Oro Ẹnamde-Nam Ẹwụt

Mme andida nse oro mînyeneke asari ẹsinen̄ede ẹkụt edidianakiet ye ima oro Mme Ntiense ẹsiwụtde ke mme mbono mmọ. Esitụk ediwak owo ndikụt nte ke asari idụhe ke otu mme andidụk mbono ye nte ke ata ima odu idem ke otu mbon oro ẹkemede ndidi ẹsobo ye kiet eken ke akpa ini.

Ke akamba mbono ofụri ererimbot oro ẹkenịmde ndondo emi ke Australia, adausụn̄ isan̄ oro okodude ye mme andidụk mbono urua kiet ama oyom ndika iso ndu ye mmọ esisịt man okop inem itie ebuana mmọ. Ke ima ye edidianakiet mmọ otụkde, enye ikenịmke ite ke mmọ ẹkeme ndinyene eti itie ebuana ntre, sia ata ediwak mmọ ẹkedide isenowo. Ke ekemde ini unyọn̄ esie, enye ama eben̄e mmọ ete ẹnọ imọ n̄kpan̄utọn̄. Ke okotde mmọ “nditọete,” enye ama ọtọn̄ọ ndikọm mmọ edi ikekemeke nditịn̄ n̄kụre, koro ama enen̄ede otụk enye ndien enye ama atua eyet.

Ke 1997, nditọete ke Sri Lanka ẹma ẹnịm akpa mbono district mmọ ke usem ita ke akamba an̄wambre. Ẹkenam ofụri edinam oro ke ukem ini ke Ikọmbakara, Sinhalese, ye Tamil. Ke ererimbot oro en̄wan ekpụk ye ekpụk akade-ka iso ndikọri, utọ mboho otu usem ita oro ikedịghe edịbe. Bodisi kiet ama obụp eyenete kiet ete: “Mmanie ẹnam ndutịm mbono emi—mbon Sinhalese, mbon Tamil, m̀mê mbon England?” Eyenete oro ama ọbọrọ ete: “Idịghe otu kiet anam ndutịm mbono emi. Nnyịn kpukpru idian ubọk ọtọkiet inam enye.” Bodisi oro ama okop n̄kpaidem. Ke ini otu usem mbita emi ẹkedianade ke akam ediberi ndien kpukpru owo ke an̄wambre ẹdiande uyo ẹdọhọ “Amen” ke ọkpọsọn̄ uyo, mme andidụk mbono ẹma ẹkwak ubọk. Mmọn̄eyet ama asiaha kpukpru owo ke otuowo. Ih, ikpọ mbono ẹnen̄ede ẹdi idara idara nsọn̄ọ itie nditọete nnyịn.—Psalm 133:1. *

[Ikọ idakisọn̄]