Иегъовӕйы арфӕдзинадӕй хайджын уыдзынӕ?

«Ӕппӕт ацы арфӕдзинӕдтӕ дыл ӕрцӕудзысты ӕмӕ сӕ хайджын уыдзынӕ, дӕ Хуыцау Иегъовӕйы ныхасмӕ кӕй хъусыс, уый тыххӕй» (ДЫККАГ ЗАКЪОН 28:2).

1. Израилӕгтӕ арфӕгонд уыдаиккой ӕви ӕлгъыстаг, уый цӕуыл баст уыди?

ДЫУИССӔДЗ азы дӕргъы ӕдзӕрӕг быдырты рахау-бахауы фӕстӕ Израилы адӕм ӕрӕнцадысты Мовы быдырты. Зӕрдӕвӕрд зӕхх уыди сӕ тӕккӕ раз. Уыцы ран Моисей ныффыста Дыккаг закъоны чиныг, цыран ранымадта арфӕдзинӕдтӕ ӕмӕ ӕлгъыстытӕ. Израилы адӕм «Иегъовӕйы ныхасмӕ куы хъуыстаиккой», ома йӕ коммӕ куы кастаиккой, уӕд йӕ арфӕдзинӕдтӕй «хайджын уыдаиккой». Иегъовӕйӕн йӕ «ӕвзӕрст адӕм» кӕй уыдысты, уымӕ гӕсгӕ сӕ уарзта ӕмӕ йӕ фӕндыд уыдонӕн ӕххуыс кӕнын. Куы нӕ йӕм хъуыстаиккой, уӕд та сӕ йе ’лгъыстытӕ баййӕфтаиккой (Дыккаг закъон 8:10—14; 26:18; 28:2, 15).

2. Дыккаг закъоны 28:2-ӕм стихы дзуттаг мивдисджытӕ «хъусын» ӕмӕ «хайджын уын» цы нысан кӕнынц?

² Дыккаг закъоны 28:2-ӕм стихы мивдисӕг «хъусын» ӕвдисы иугӕндзон архайд. Иегъовӕмӕ йӕ адӕм рӕстӕгӕй-рӕстӕгмӕ хъуамӕ ма хъуыстаиккой, фӕлӕ ӕппынӕдзухдӕр. Ӕрмӕстдӕр уӕд уыдаиккой хайджын Хуыцауы арфӕдзинӕдтӕй. Дзуттаг ӕвзагӕй тӕлмац мивдисджытӕ «хайджын уын» ӕмӕ «баййафын» та сты, цуанӕтты ӕвзаджы чи ӕмбӕлы, ахӕм дзырдтӕ ӕмӕ арӕхдӕр нысан кӕнынц «сӕмбӕлын» кӕнӕ «ӕрцахсын».

3. Куыд у нӕ бон Навины фырт Йесойы фӕзмын, ӕмӕ уый афтӕ ахсджиаг цӕмӕн у?

³ Израилы адӕмы раздзог Навины фырт Йесо хъуыста Иегъовӕмӕ ӕмӕ уый тыххӕй хайджын уыди йӕ арфӕдзинӕдтӕй. Уый загъта: «Равзарут абон уӕхицӕн, кӕмӕн лӕггад кӕндзыстут, уый... Ӕз ӕмӕ мӕ хӕдзарвӕндаг та лӕггад кӕндзыстӕм Иегъовӕйӕн». Адӕм уый куы фехъуыстой, уӕд загътой: «Нӕ, Иегъовӕйы ныууадзӕм ӕмӕ ӕндӕр хуыцӕуттӕн лӕггад кӕнӕм, уый нӕ бон нӕу» (Йесо Навины 24:15, 16). Йесо ахӕм хорз зонды хицау кӕй уыди, уый тыххӕй уый бацыд Зӕрдӕвӕрд зӕхмӕ, йӕ адӕмӕй Хуыцау цы гыццыл къорд саккаг кодта, уыдонимӕ. Абон мах та лӕууӕм уымӕй бирӕ хуыздӕр Зӕрдӕвӕрд зӕххы — Дзӕнӕты — къӕсӕрыл. Уым адӕм хайджын уыдзысты, Навины фырт Йесойы дуджы Хуыцауы хорзӕх кӕй уыди, уыдонмӕ цы арфӕдзинӕдтӕ ӕнхъӕлмӕ каст, уыдонӕй бирӕ стырдӕр арфӕдзинӕдтӕ. Уыцы арфӕдзинӕдтӕй ды дӕр хайджын уыдзынӕ? Кӕд дарддӕр дӕр Иегъовӕмӕ хъусай, уӕд ӕнӕмӕнг. Цӕмӕй йӕм ноджы зӕрдӕбындӕрӕй хъусай, уый тыххӕй ӕркӕс рагон Израилы адӕмы цардмӕ дӕр ӕмӕ хицӕн адӕймӕгты ахадгӕ дӕнцӕгтӕм дӕр (Ромӕгтӕм 15:4). 

Арфӕ ӕви ӕлгъыст?

4. Хуыцау Соломонӕн йӕ куывдмӕ гӕсгӕ цы радта, ӕмӕ ахӕм арфӕдзинӕдтӕм мах цы цӕстӕй хъуамӕ кӕсӕм?

⁴ Израилы паддзах Соломон куы уыди, уыцы рӕстӕгӕн йӕ фылдӕр хай адӕм уӕлдай арфӕгонд уыдысты Иегъовӕйӕ. Сӕхицӕн ӕдасӕй ӕмӕ фӕрнӕй цардысты (3 Паддзахӕдты 4:25). Соломонӕн йӕ хъӕздыгдзинады кой кӕд дардыл айхъуысти, уӕддӕр уый Хуыцауӕй зӕххон хъӕздыгдзинӕдтӕ нӕ куырдта. Хӕрз ӕрыгон ӕмӕ ма ӕвӕлтӕрд куы уыди, уӕд Иегъовӕмӕ куывта, цӕмӕй йын радтаид коммӕгӕс зӕрдӕ; ӕмӕ йын Иегъовӕ йӕ курдиат сӕххӕст кодта — схайджын ӕй кодта зонд ӕмӕ ӕмбаргӕдзинадӕй. Уый фӕрцы Соломон адӕмыл тӕрхон кодта раст, уымӕн ӕмӕ йӕ бон уыди хорз ӕвзӕрӕй хицӕн кӕнын. Ӕмӕ кӕд Хуыцау Соломонӕн хъӕздыгдзинад дӕр радта ӕмӕ кад дӕр, уӕддӕр, ӕвзонг адӕймаг уӕвгӕйӕ, уый ӕмбӕрста, зонд ӕмӕ ӕмбаргӕдзинад бирӕ зынаргъдӕр кӕй сты, уый (3 Паддзахӕдты 3:9—13). Уӕдӕ нын фӕллой ӕмӕ дзаумайӕ бирӕ цыдӕртӕ ис ӕви гыццыл, уӕддӕр нӕ Иегъовӕйы хорзӕх ӕмӕ йӕ арфӕдзинӕдтӕй хайджын кӕй стӕм, уый тыххӕй кӕуылты бузныг хъуамӕ уӕм!

5. Израилы ӕмӕ Иудӕйы адӕм Иегъовӕмӕ куы нал хъуыстой, уӕд сыл цы ’рцыди?

⁵ Израилӕгтӕ ферох кодтой Иегъовӕйы хорздзинӕдтӕ. Кӕй йӕм нал хъуыстой, уый тыххӕй сӕ баййӕфтой, развӕлгъау сӕ кӕмӕй бафӕдзӕхста, уыцы ӕлгъыстытӕ. Уыйадыл сӕ се знӕгтӕ басастой ӕмӕ куыд Израилы, афтӕ Иудӕйы паддзахады цӕрджыты дӕр уацары акодтой (Дыккаг закъон 28:36; 4 Паддзахӕдты 17:22, 23; 2 Паралипоменон 36:17—20). Цымӕ уыцы хъизӕмӕрттӕ бавзаргӕйӕ, Хуыцауы адӕм бамбӕрстой, Иегъовӕйы арфӕдзинӕдтӕй хайджын кӕй вӕййынц, алы хъуыддаджы дӕр ӕм чи хъусы, ӕрмӕстдӕр уыдон? Н. э. агъоммӕ 537 азы иудейтӕй фӕстӕмӕ сӕ райгуырӕн зӕхмӕ чи ӕрыздӕхт, уыдонӕн фӕзынди фадат, «зондджын зӕрдӕ» ссардтой ӕмӕ сӕ Хуыцаумӕ ӕдзухдӕр хъусын кӕй хъӕуы, уый бамбӕрстой ӕви нӕ, уый равдисынӕн (Псалом 89:12).

6. а) Иегъовӕ йӕ пехуымпартӕ Аггей ӕмӕ Захарийы йӕ адӕммӕ цӕмӕн арвыста? ӕ) Хуыцау Аггейы уылты цы ныхӕстӕ загъта, уым цавӕр ахсджиаг хъуыды ис?

⁶ Йӕ райгуырӕн зӕхмӕ чи ӕрыздӕхт, уыцы иудейтӕ нывондхӕссӕн сарӕзтой ӕмӕ ӕрӕвнӕлдтой Иерусалимы кувӕндон аразынмӕ. Фӕлӕ сӕ сӕ ныхмӕлӕуджытӕ тынг хъыгдарын куы райдыдтой, уӕд ӕруазал сты ӕмӕ уыйадыл арӕзтад ӕрлӕууыд (Ездрӕ 3:1—3, 10; 4:1—4, 23, 24). Ныр сӕ сӕйраг мӕт сси, сӕ цард куыд хуыздӕр саразой, уый. Фӕлӕ уӕд Хуыцау арвыста йӕ пехуымпартӕ Аггей ӕмӕ Захарийы, цӕмӕй йын йӕ адӕмы зӕрдӕйы ногӕй ссудзой раст кувынадмӕ уарзондзинад. Иегъовӕ Аггейы уылты загъта: «Цымӕ ныр уый рӕстӕг у, ӕмӕ фӕйнӕгӕй ӕмбӕрзт хӕдзӕртты цӕрат, ацы [кувынады] хӕдзар ӕдзӕллаг уавӕры куы ис, уӕд?... Уӕ зӕрдӕ раздахут уӕ хъуыддӕгтӕм. Бирӕ таут, фӕлӕ дзы исгӕ ницы кӕнут. Хӕрут, фӕлӕ не ’фсӕдут... Куыстӕй уӕ уд скъуынут, фӕлӕ цыма уӕ фыдӕбон хуынкъ чыссӕйы ацӕуы, афтӕ вӕййы» (Аггей 1:4—6). Адӕймаг Хуыцауы хъуыддагӕй зӕххон хорздзинӕдтыл фылдӕр куы хъуыды кӕна, уӕд ын уый Иегъовӕйы арфӕдзинад не ’рхӕсдзӕн (Лукайы 12:15—21).

7. Иегъовӕ израилӕгтӕн афтӕ цӕмӕн загъта: «Уӕ зӕрдӕ раздахут уӕ хъуыддӕгтӕм»?

⁷ Иудейтӕ се ’рвылбоны сагъӕстыл фесты, ӕмӕ сӕ ферох, Хуыцау сын къӕвда ӕмӕ тыллӕгджын афонтӕй ӕрмӕстдӕр уӕд кӕй арфӕ кӕндзӕн, кӕд ӕмӕ йӕм хъусой алкӕддӕр, суанг фыдгул сӕ ныхмӕ куы архайа, уӕддӕр (Аггей 1:9—11). Уӕдӕ сын Хуыцау дзӕгъӕлы нӕ загъта: «Уӕ зӕрдӕ раздахут уӕ хъуыддӕгтӕм»! (Аггей 1:7). Ацы ныхӕстӕ афтӕ ис бамбарӕн, ӕмӕ сын Иегъовӕ загъта: «Ахъуыды кӕнут! Мӕ кувынады хӕдзар ӕдзӕллаг уавӕры кӕй ис, уӕ хуымты куыст дзӕгъӕлы дӕр уымӕн у». Ӕппынфӕстаг Иегъовӕйы удцырынӕй йӕ пехуымпартӕ цы дзырдтой, уый адӕмы зӕрдӕмӕ бахъардта ӕмӕ ногӕй ӕрӕвнӕлдтой кувӕндоны арӕзтадмӕ; уый арӕзт фӕци н. э. агъоммӕ 515 азы.

8. Малахийы рӕстӕджы Иегъовӕ иудейтӕн цы загъта ӕмӕ сын афтӕ цӕмӕн загъта?

⁸ Фӕстӕдӕр та, пехуымпар Малахийы рӕстӕджы, иудейтӕ Хуыцауы кувынадмӕ куыдфӕндыйы цӕстӕй райдыдтой кӕсын, уыдон нывондӕн хастой, чи ницӕмӕн бӕззыд, ахӕм фос (Малахи 1:6—8). Ӕмӕ сӕм уӕд Иегъовӕ ӕрсидт, цӕмӕй сӕ фӕллойы дӕсӕм хай ӕрбахӕссой йӕ хордонмӕ ӕмӕ йӕ уымӕй бафӕлварой, кӕддӕра уӕларвон къӕбицы дуӕрттӕ нӕ бакӕнид ӕмӕ сыл йӕ хорзӕх кӕлгӕуӕлдайӕ  нӕ рауадзид (Малахи 3:10). Цӕй ӕнӕзонд ми уыди, иудейтӕн Хуыцау афтӕ цӕмӕй загъта, зӕгъгӕ, ӕрмӕст мӕнмӕ хъусут, ӕмӕ уын уыдзӕн парахатӕй, уыцы фӕллӕйттыл сӕ уд кӕй скъуыдтой! (2 Паралипоменон 31:10).

9. Библийӕ цавӕр ӕртӕ адӕймаджы цардмӕ ӕркӕсдзыстӕм?

⁹ Израилы адӕмы цардӕй уӕлдай ма нын Библи дзуры, Иегъовӕмӕ кӕй хъуыстой, уый тыххӕй йӕ арфӕдзинӕдтӕй хайджын чи уыд, ӕмӕ йӕм кӕй нӕ хъуыстой, уый тыххӕй йе ’лгъыст кӕй баййӕфта, бирӕ ахӕм адӕймӕгты тыххӕй дӕр. Ӕркӕсӕм ӕртӕ адӕймаджы: Вооз, Навал ӕмӕ Аннӕйы дӕнцӕгтӕм ӕмӕ нӕ цӕуыл ахуыр кӕнынц, ууыл ахъуыды кӕнӕм. Хорз уаид уый тыххӕй куы бакӕсис Руфы чиныг, 1 Паддзахӕдты 1:1—2:21-ӕм стихтӕ ӕмӕ 1 Паддзахӕдты 25:2—42-ӕм стихтӕ.

Вооз хъуыста Хуыцаумӕ

10. Вооз ӕмӕ Навалӕн иумӕйагӕй цы уыди?

¹⁰ Кӕд Вооз ӕмӕ Навал иу дуджы нӕ цардысты, уӕддӕр сын бӕрӕг цыдӕртӕ уыдис иумӕйагӕй. Цӕвиттон, сӕ дыууӕ дӕр цардысты Иудӕйы зӕххыл. Сӕ дыууӕ дӕр уыдысты стыр зӕххыты хицӕуттӕ ӕмӕ сӕ дыууӕйӕн дӕр уыди диссаджы фадат, ӕххуысы сӕр кӕй хъуыди, уыдонмӕ зӕрдӕхӕларӕй се ’ххуысы къух фӕдарынӕн. Фӕлӕ сын уымӕй дарддӕр иумӕйагӕй ницы уыди.

11. Вооз Иегъовӕмӕ кӕй хъуыста, уый хъуыддагӕй куыд равдыста?

¹¹ Вооз царди, Израилы ма тӕрхонгӕнджытӕ куы уыди, уӕды заманы. Уый аргъ кодта адӕмӕн, ӕмӕ йӕ йӕ хуымгӕрдджытӕ дӕр уарзтой, стыр кад ын кодтой (Руф 2:4). Вооз Закъонмӕ кӕй хъуыста, уымӕ гӕсгӕ батыхст, цӕмӕй-иу йӕ хуымты тыллӕгӕй уагътаиккой ӕнӕбон ӕмӕ мӕгуыр адӕмӕн (Левит 19:9, 10). Вооз Руф ӕмӕ Ноемины ӕрцыды хабар куы фехъуыста, ӕмӕ Руф йӕ зӕронд ӕфсиныл куыд зӕрдиагӕй тыхстис, уый куы федта, уӕд цы сарӕзта? Руфыл уӕлдай зӕрдиагӕй батыхсти ӕмӕ йӕ кусджытӕн бафӕдзӕхста, цӕмӕй йӕ йӕ хуымы ӕфсиртӕ ӕмбырд кӕнын ма хъыгдарой. Йӕ ныхӕстӕ ӕмӕ йӕ цӕстуарзон хъуыддӕгтӕй Вооз равдыста, Иегъовӕмӕ чи хъусы ӕмӕ йыл иузӕрдион чи у, ахӕм адӕймаг кӕй уыди, уый. Уымӕн уыди Хуыцауы хорзӕх ӕмӕ арфӕйӕ дӕр хайджын (Левит 19:18; Руф 2:5—16).

12, 13. а) Вооз, Иегъовӕйы закъон фӕстӕмӕ балхӕныны тыххӕй цы амыдта, уымӕн кӕй аргъ кодта, уый куыд равдыста? ӕ) Вооз Хуыцауӕй цавӕр арфӕдзинӕдтӕ райста?

¹² Иууыл цымыдисагдӕр та уый у, ӕмӕ Вооз Иегъовӕмӕ хъуыста, йӕхицӕн дзы куы ницы пайда уыди, уӕддӕр. Дзырд цӕуы, Хуыцауы  закъон фӕстӕмӕ балхӕныны тыххӕй цы амыдта, Вооз уымӕ гӕсгӕ куыд архайдта, ууыл. Вооз ӕппӕтдӕр сарӕзта, цӕмӕй йӕ хӕстӕг Ноемины мард лӕг Елимелехы бынтӕ баззадаиккой Елимелехы бинонтӕн. Идӕдз усы-иу йӕ мард лӕджы ӕфысмӕртӕй исчи кӕнӕ ӕввахсдӕр ӕрвад кӕй ракуырдта, уымӕ гӕсгӕ-иу ын йӕ «тиуӕй» цы лӕппу райгуырд, уымӕн-иу баззадысты бынтӕ (Дыккаг закъон 25:5—10; Левит 25:47—49). Ноемин сывӕллон ныййарынӕн ӕгӕр зӕронд кӕй уыди, уымӕ гӕсгӕ Руф йӕ бӕсты разы уыди мой скӕныныл. Елимелехы ӕввахсдӕр ӕрвад куы нӕ сразы Ноеминӕн баххуыс кӕнын, уӕд Вооз ракуырдта Руфы. Сӕ фырт Овид нымад уыди Ноемины байзӕддагыл ӕмӕ Елимелехы бындарыл (Руф 2:19, 20; 4:1, 6, 9, 13—16).

¹³ Воозӕн йӕхицӕн пайда куы нӕ уыди, уӕддӕр Хуыцауы закъонмӕ гӕсгӕ кӕй архайдта, уый тыххӕй арфӕгонд ӕрцыд. Сӕ фырт Овиды уылты сӕм Руфимӕ ӕрхаудта стыр кад: уыдон систы Йесо Чырыстийы фыдӕлтӕ (Руф 2:12; 4:13, 21, 22; Матфейы 1:1, 5, 6). Воозы ӕнӕхин хъуыддӕгтӕй мах ууыл ахуыр кӕнӕм, ӕмӕ арфӕдзинӕдтӕ ӕнхъӕлмӕ кӕсынц, иннӕты чи уарзы ӕмӕ Хуыцауы домӕнтӕм гӕсгӕ чи архайы, уыдонмӕ.

Навал нӕ хъуыста Хуыцаумӕ

14. Цавӕр адӕймаг уыди Навал?

¹⁴ Воозӕй хъауджыдӕр Навал Иегъовӕмӕ нӕ хъуыста. Уый ахызт Хуыцауы закъоны сӕрты: «Дӕхи куыд уарзыс, афтӕ уарз иннӕйы дӕр» (Левит 19:18). Навал, Хуыцауыл чи хъуыды кодта, ахӕм адӕймаг нӕ уыди; уый уыди, «дӕрзӕг ӕмӕ тынг фыдлӕг». Йӕ лӕггадгӕнджытӕ дӕр ӕй нымадтой «ницӕйаг адӕймагыл». Суанг йӕ ном дӕр, Навал, зӕгъгӕ, нысан кӕны «ӕнӕзонд» кӕнӕ «сӕрхъӕн» (1 Паддзахӕдты 25:3, 17, 25). Уӕдӕ йын, ӕххуысы сӕр кӕй хъуыди, ахӕм адӕймагӕн — Иегъовӕйы сӕрст Давидӕн — хӕрзиуӕг ракӕныны фадат куы фӕзынд, уӕд Навал цы сарӕзта? (1 Паддзахӕдты 16:13).

15. Навал Давиды куыд суазӕг кодта ӕмӕ уыцы хъуыддаджы Авигейӕ йӕ лӕгӕй хъауджыдӕр цы сарӕзта?

¹⁵ Давид йӕ адӕмимӕ, Навалы фос кӕм хызтысты, уым хӕстӕг куы ӕрбынат кодта, уӕд сӕ абырджытӕй хъахъхъӕдтой, ӕмӕ сӕ уый тыххӕй ницы ӕрдомдтой. «Ӕхсӕвӕй-бонӕй нӕ алыварс сисау лӕууыдысты»,— загъта Навалы фыййӕуттӕй сӕ иу. Фӕлӕ Давиды ӕрвыст лӕгтӕ Навалмӕ къӕбӕр курӕг куы ӕрцыдысты, уӕд сӕ уый «хъӕр ӕмӕ фидисы бын фӕкодта» ӕмӕ сӕ фӕстӕмӕ афтид къухӕй арвыста (1 Паддзахӕдты 25:2—16). Навалӕн йӕ ус Авигейӕ уайтагъд хӕринӕгтӕ арӕвдз кодта ӕмӕ сӕ Давидмӕ арвыста. Давид йӕ фырмӕстӕй цӕттӕ уыд Навал ӕмӕ йӕ адӕмы ныццӕгъдынмӕ. Фӕлӕ Авигейӕ хъуыддаг йӕхимӕ кӕй райста, уый фӕрцы мӕлӕтӕй фервӕзын кодта бирӕты, Давидӕн йӕхи та бахызта тугкалдӕй. Фӕлӕ уӕддӕр Навал куыд уыди, афтӕ ӕгъатыр ӕмӕ зыд адӕймагӕй баззад. Дӕс боны фӕстӕ «Иегъовӕ ӕрцавта Навалы, ӕмӕ уый фӕмард» (1 Паддзахӕдты 25:18—38).

16. Куыд у нӕ бон Воозы фӕзмын ӕмӕ Навалы зондахастӕй та нӕхи хизын?

¹⁶ Куыд тынг хицӕн кодтой кӕрӕдзийӕ Вооз ӕмӕ Навал! Уӕдӕ Навалау дӕрзӕг ӕмӕ хиуарзон макуы суӕм, фӕлӕ уӕм Воозау хӕларзӕрдӕ ӕмӕ мах дӕр хъуыды кӕнӕм иннӕты хорздзинадыл (Дзуттытӕм 13:16). Уыцы хъуыддажы ӕнтыстджын уӕд уыдзыстӕм, кӕд ӕмӕ хъусӕм апостол Павелы уынаффӕмӕ: «Цалынмӕ рӕстӕг ис, [уӕдмӕ] кӕндзыстӕм хорздзинад алкӕмӕн дӕр, уӕлдайдӕр та нӕхионтӕн уырнындзинады иу кӕимӕ стӕм» (Галатӕгтӕм 6:10). Йесойы «ӕндӕр фыстӕн», ӕнустӕм зӕххыл цӕрыны ныфс кӕй ис, уыцы чырыстӕттӕн ис диссаджы фадат, цӕмӕй хорздзинад кӕной Иегъовӕйы сӕрстытӕн, 144 000-ӕй ма зӕххыл чи ис ӕмӕ уӕларвыл ӕнӕмӕлгӕ цард чи райсдзӕн, уыдонӕн (Иоанны 10:16; 1 Коринфӕгтӕм 15:50—53; Раргомад 14:1, 4). Ахӕм хорз хъуыддӕгтӕ Йесо афтӕ нымайы, цыма сӕ уымӕн, йӕхицӕн кӕнынц, ӕмӕ уымӕ гӕсгӕ уыцы хорз хъуыддӕгтӕ адӕймагӕн хӕссынц Иегъовӕйӕ стыр арфӕдзинӕдтӕ (Матфейы 25:34—40; 1 Иоанны 3:18, НФ).

Аннӕйы зындзинӕдтӕ ӕмӕ арфӕдзинӕдтӕ

17. Цавӕр зындзинӕдтӕ ӕвзӕрста Аннӕ ӕмӕ уыцы уавӕрты йӕхи куыд дардта?

¹⁷ Иегъовӕйы арфӕдзинадӕй хайджын уыди Хуыцауысконд сылгоймаг Аннӕ дӕр. Аннӕ йӕ сӕрыхицау Елхъанимӕ царди хӕхбӕстӕ Ефремы. Елхъан уыди левит. Закъон куыд лӕвӕрдта бар ӕмӕ уыцы хъуыддаг кӕмӕ хауд, уыдонӕй алкӕй бартӕ дӕр куыд хъахъхъӕдта, афтӕ Елхъанӕн уыди ӕндӕр ус дӕр —  Феннанӕ, зӕгъгӕ. Аннӕйӕн зӕнӕг нӕ цыди, ӕмӕ уый та израилаг сылгоймагӕн тынг ӕгад уыди. Уыцы рӕстӕджы Феннанӕйӕн та цалдӕр сывӕллоны уыди (1 Паддзахӕдты 1:1—3; 1 Паралипоменон 6:16, 33, 34). Феннанӕ Аннӕйӕн тӕригъӕд нӕ кодта, фӕлӕ йӕ йӕ фидистӕй уый онг скодта, ӕмӕ Аннӕ йӕ цӕссыгӕй йӕхи ӕхсадта, йӕ зӕрдӕ хӕрд дӕр нал агуырдта. Аннӕйӕн иууыл зындӕр та уый уыди, ӕмӕ-иу ын Феннанӕ фидистыл кӕй схӕцыд, «алы аз дӕр»-иу бинонтӕ Иегъовӕйы хӕдзармӕ Силоммӕ куы цыдысты, уӕд (1 Паддзахӕдты 1:4—8). Уӕвгӕ, куыд дурзӕрдӕ уыди Фенаннӕ, ӕмӕ куыд стыр маст кодта уый Аннӕйӕн! Фӕлӕ уыцы уавӕры дӕр Аннӕ Иегъовӕйы никуы ралгъыста, ӕмӕ-иу йӕ лӕг Силоммӕ куы цыди, уӕд иу хатт дӕр хӕдзары никуы баззад. Гъе уый тыххӕй йӕм ӕнхъӕлмӕ каст стыр арфӕдзинад дӕр.

18. Аннӕ нын цавӕр дӕнцӕг ныууагъта?

¹⁸ Абон Иегъовӕйы адӕмӕн Аннӕ у диссаджы дӕнцӕг. Уӕлдайдӕр та ӕнаххосӕй ӕфхӕрд чи ӕййафы, уыдонӕн. Ахӕм уавӕры нӕхи иннӕтӕй иуварс ласӕм, уымӕй ницы рауайдзӕн (Фӕсномыг ныхӕстӕ 18:1). Кӕд Аннӕйӕн тынг зын уыди, уӕддӕр ӕй фӕндыд, Хуыцауы Ныхас кӕм амыдтой ӕмӕ Хуыцауы адӕм кувынмӕ кӕм ӕмбырд кодтой, уырдӕм цӕуын. Ӕмӕ уый фӕрцы нӕ адард Хуыцауӕй, кӕронмӕ йыл ӕнувыдӕй баззад. Хуыцаумӕ куыд ӕввахс уыди, уый ирдӕй зыны йӕ зӕрдӕбын куывды 1 Паддзахӕдты 2:1—10-ӕм стихты *.

19. Хуыцауы фӕндонимӕ баст цы хъуыддӕгтӕ сты, уыдонӕн кӕй аргъ кӕнӕм, уый куыд у нӕ бон ӕвдисын?

¹⁹ Абон мах Иегъовӕйӕн цатыры нӕ кувӕм. Фӕлӕ махӕн дӕр Аннӕйау нӕ бон у, Хуыцауы фӕндонимӕ цы хъуыддӕгтӕ сты баст, уыдонӕн аргъ кӕнын. Цӕвиттон, махӕн дӕр ӕрвылкъуырион чырыстон фембӕлдтӕ ӕмӕ ӕрвылазон конгрестӕм куы цӕуӕм, уӕд уымӕй аргъ кӕндзыстӕм, цы стыр хъӕздыгдзинад дзы райсӕм, уымӕн. Цӕй уӕдӕ уыцы фембӕлдты кӕрӕдзийы разӕнгард кӕнӕм Иегъовӕйӕн ӕппӕт зӕрдӕйӕ лӕггад кӕнынмӕ, махӕн уыцы стыр кад чи скодта, «цӕмӕй йын ӕдӕрсгӕйӕ лӕггад кӕнӕм, иузӕрдионӕй ӕмӕ рӕстӕй» (Лукайы 1:74, 75, НД; Дзуттытӕм 10:24, 25).

20, 21. Аннӕ Хуыцауыл иузӕрдион кӕй уыди, уый тыххӕй куыд ӕрцыди арфӕгонд?

²⁰ Иегъовӕ Аннӕйы иузӕрдиондзинад ӕнӕбафиппайгӕ нӕ фӕци ӕмӕ йын уый тыххӕй раарфӕ кодта. Иу хатт ӕгас бинонтӕй Силоммӕ куы ацыдысты, уӕд Аннӕ цӕссыгкалгӕйӕ зӕрдиагӕй куывта Хуыцаумӕ ӕмӕ йын расомы кодта: «О Ӕфсӕдты Хуыцау Иегъовӕ, кӕд дӕ цагъар сылгоймаджы хъыгдзинадмӕ ӕркӕсай ӕмӕ мӕ ӕрхъуыды кӕнай, ӕмӕ нӕ ферох кӕнай дӕ цагъар сылгоймаджы, ӕмӕ дӕ цагъар сылгоймагӕн радтай лӕппу, уӕд ӕй йӕ цард-цӕрӕнбонтӕм ратдзынӕн Иегъовӕйӕн» (1 Паддзахӕдты 1:9—11). Хуыцау фехъуыста Аннӕйы лӕгъстӕ ӕмӕ йын радта фырт; Аннӕ йыл сӕвӕрдта ном Самуил. Самуилӕн дзидзи куы нал дардта, уӕд ӕй акодта Силоммӕ, цӕмӕй уым хӕсгӕ кувӕндоны цатыры лӕггад кодтаид (1 Паддзахӕдты 1:20, 24—28).

²¹ Аннӕ Хуыцауы кӕй уарзта, уый равдыста, Самуилы тыххӕй цы дзырд радта, уый кӕй сӕххӕст кодта, уымӕй. Ӕмӕ ма ахъуыды кӕн, куыд арфӕйаг ӕмӕ амондджын уыдысты йӕ лӕг Елхъанимӕ, сӕ уарзон фырт Иегъовӕйы хӕсгӕ кувӕндоны цатыры кӕй лӕггад кодта, уымӕй! Абон дӕр афтӕ арфӕйаг ӕмӕ амондджын сты, сӕ лӕппутӕ ӕмӕ сӕ чызджытӕ, ӕххӕстрӕстӕг пионертӕй, Вефилы, йе та ӕндӕр хуызы лӕггад кӕнгӕйӕ, кӕмӕн кадджын кӕнынц Иегъовӕйы ном, уыцы чырыстон ныййарджытӕ.

Алкӕддӕр хъус Иегъовӕмӕ!

22, 23. а) Иегъовӕйы ныхасмӕ куы хъусӕм, уӕд нын уый цы ӕрхӕсдзӕн? ӕ) Цӕуыл дзурдзыстӕм иннӕ статьяйы?

²² Алы хъуыддаджы дӕр Иегъовӕмӕ куы хъусӕм, уӕд нын уый цы ӕрхӕсдзӕн? Ӕппӕт  зӕрдӕйӕ йӕ кӕй уарзӕм ӕмӕ нӕ цард уымӕн кӕй снывонд кодтам, уый кӕд хъуыддагӕй ӕвдисӕм, уӕд ӕфсӕст уыдзыстӕм Хуыцауы хорздзинӕдтӕй. Ӕмӕ кӕд чырыстон цардвӕндагыл зындзинӕдтӕ дӕр ӕййафӕм, уӕддӕр ӕнӕмӕнг хайджын уыдзыстӕм Иегъовӕйы арфӕдзинадӕй, ӕнхъӕл куыд не стӕм, ахӕм хуызы дӕр (Псалом 36:4; Дзуттытӕм 6:10).

²³ Хуыцауы адӕммӕ стыр арфӕдзинӕдтӕ ӕнхъӕлмӕ кӕсы фидӕны. «Тынг бирӕ адӕм» Иегъовӕмӕ ӕнӕзивӕгӕй кӕй хъусынц, уый тыххӕй удӕгас баззайдзысты «стыр утӕхсӕны» (НФ) ӕмӕ Хуыцауы ног дунейы амондджынӕй цӕрдзысты (Раргомад 7:9—14; 2 Петры 3:13). Уым Иегъовӕ сӕххӕст кӕндзӕн йӕ адӕмы хорз фӕндтӕ иууылдӕр (Псалом 144:16). Иннӕ статьяйӕ куыд фендзыстӕм, афтӕмӕй Иегъовӕйы ныхасмӕ чи хъусы, уыдон ныридӕгӕн дӕр хайджын сты, уӕлейӕ ӕрцӕугӕ «алкӕцы хорз лӕвар ӕмӕ алкӕцы ӕххӕст лӕварӕй» (Иаковы 1:17).

[Фиппаинаг]

Цавӕр дзуапп радтис?

• Хуыцау йӕ арфӕдзинӕдтӕй кӕй хайджын кӕны, уый тыххӕй нӕ Израилы адӕмы цард цӕуыл ахуыр кӕны?

• Вооз ӕмӕ Навал кӕрӕдзийӕ цӕмӕй хицӕн кодтой?

• Цы хуызы у нӕ бон Аннӕйы фӕзмын?

• Иегъовӕйы ныхасмӕ нӕ алкӕддӕр цӕмӕн хъӕуы хъусын?

[Фарстатӕ ахуыр кӕнынӕн]

[Ныв 8 фарсыл]

Паддзах Соломон куырдта коммӕгӕс зӕрдӕ ӕмӕ йын Иегъовӕ радта стыр зонд.

[Ныв 10 фарсыл]

Вооз кад кодта адӕмӕн ӕмӕ уыд хӕларзӕрдӕ.

[Ныв 13 фарсыл]

Аннӕ арфӕгонд ӕрцыд, Иегъовӕйыл йӕ ныфс кӕй дардта, уый тыххӕй.