Blesing Blong Jeova i Mekem Yumi Rij
Blesing Blong Jeova i Mekem Yumi Rij
“Blesing blong Jeova, hemia nao samting we i mekem man i rij. Mo hem i no givim soa wetem.”—OL PROVEB 10:22, NW.
1, 2. ?From wanem glad i no joen wetem ol sas samting?
BIGFALA samting long laef blong plante milian man tede, i blong hivimap ol sas samting. ?Be ol sas samting ya, oli givim glad long olgeta? Niuspepa ya, The Australian Women’s Weekly i talem se: “Mi no save rimemba wan taem we i olsem naoia, we ol man oli harem nogud long laef blong olgeta.” Hem i gohed se: “Samting ya i narakaen. Yumi stap harem ol tok olsem se Ostrelia i no gat trabol nating long saed blong mane, mo se laef i moagud naoia i bitim olgeta yia bifo. . . . Be, fulap man long olgeta ples long kantri ya, oli no glad yet. Ol man mo woman oli haremsave se oli sot long wan samting long laef blong olgeta, be oli no save talem wanem samting.” !Baebol i tru nomo, taem i talem se yumi no save kasem glad no laef from ol sas samting we yumi gat!—Prija 5:10; Luk 12:15.
2 Baebol i tijim yumi se, glad we i bigwan olgeta, i kamaot from blesing blong God nomo. Ol Proveb 10:22 (NW ) i tokbaot samting ya i se: “Blesing blong Jeova, hemia nao samting we i mekem man i rij. Mo hem i no givim soa wetem.” Plante taem, man we i griri, mo i traehad blong hivimap fulap sas samting, hem i kasem trabol mo soa. Taswe, aposol Pol i givim woning ya se: “Ol man ya we oli wantem kam rijman, be oltaem, ol samting blong traem yumi oli stap mekem olgeta oli foldaon. Ol samting we oli wantem, we i krangke, mo we i stap spolem olgeta, i olsem trap blong kasem olgeta. Nao fasin ya blong wantem evri samting, hem i save mekem olgeta oli foldaon we laef blong olgeta i kam nogud olgeta.”—1 Timoti 6:9, 10.
3. ?From wanem ol man blong God oli stap kasem traem?
3 Be, ol samting i defren long saed blong olgeta we “oli stap lesin oltaem long Jeova.” Ol blesing we oli no givim soa nating, oli kam kavremap olgeta. (Dutronome 28:2, NW ) Be, maet samfala oli askem se: ‘?Sipos Jeova i no givim soa wetem blesing blong hem, from wanem plante man blong hem oli safa?’ Baebol i soemaot se Jeova i save letem sam samting oli kam traem yumi, be stamba blong ol traem ya, hemia Setan, rabis wol blong hem, mo sin long bodi blong yumi. (Jenesis 6:5; Dutronome 32:4, 5; Jon 15:19; Jemes 1:14, 15) Jeova i stamba blong “evri samting we oli gud mo evri presen we oli nambawan.” (Jemes 1:17) From samting ya, neva ol blesing blong hem oli givim soa. Naoia, bambae yumi tokbaot sam long ol nambawan presen we Jeova i stap givim.
Tok Blong God—Wan Sas Presen
4. ?Wanem blesing mo sas presen ya we ol man blong Jeova oli kasem long taem ya we “i klosap en blong wol” ya?
4 Profet tok blong Daniel i tokbaot taem we i “klosap en blong wol,” i se: “Bambae tru save i kam fulap.” (NW ) Be, hem i eksplenem moa, i se: “Olgeta we oli man nogud bambae oli no save luksave samting ya, bambae oli gohed nomo blong mekem ol fasin nogud. Olgeta ya nomo we oli waes bambae oli luksave.” (Daniel 12:4, 10) !Tingbaot samting ya! God i stap talemaot Tok blong Hem, antap moa ol profet tok, long fasin we i waes tumas. Taswe, ol rabis man oli no save kasem save long hem, ol man blong Jeova nomo oli save kasem save. Pikinini blong God i prea se: “Papa, yu yu Hae God yu Masta blong olgeta samting long heven mo long wol. Mi mi talem tangkiu long yu, from we yu yu haedem ol samting ya long fes blong ol man we oli waes, mo ol man we oli skul gud, be yu soemaot olgeta long ol man we oli olsem smol pikinini nomo.” (Luk 10:21) !I wan nambawan blesing blong gat sas presen ya Baebol, mo blong stap wetem ol man we Jeova i soemaot mining blong Tok blong hem long olgeta!—1 Korin 1:21, 27, 28; 2:14, 15.
5. ?Wanem ya waes, mo olsem wanem yumi save kasem?
5 Sipos yumi no gat “waes we i kam long heven,” bambae yumi no save kasem save long Tok blong God. (Jemes 3:17) Fasin waes i minim se yumi naf blong lukluk dip long ol samting, mo yumi naf blong yusum save blong yumi blong stretem trabol, blong blokem no ronwe long trabol, blong kasem ol hae mak, mo blong givim ol gudfala advaes. ?Olsem wanem yumi kasem waes we i kam long God? Ol Proveb 2:6 i talem se: “Hae God nomo i save mekem man i waes. Fasin blong save mo fasin blong haremsave, tufala i stap kamaot long hem nomo.” Yes Jeova bambae i blesem yumi, i givim waes long yumi, sipos yumi gohed blong askem hem long prea. Bambae hem i mekem olsem we hem i bin mekem long King Solomon, taem i givim long hem “wan hat we i waes mo i kasem save long ol dip trutok.” (1 King 3:11, 12, NW; Jemes 1:5-8) Mo tu, blong kasem waes, yumi mas gohed oltaem blong lesin long Jeova. Hemia yumi mekem taem yumi stadi oltaem long Tok blong hem mo mekem i wok long laef blong yumi.
6. ?From wanem i waes blong folem ol loa mo tingting blong God long laef blong yumi?
6 Ol loa blong Baebol mo ol tingting we Baebol i givim blong lidim yumi, oli nambawan eksampol blong soemaot waes ya we i kam long God. Olgeta ya oli mekem i gud long yumi long evri fasin—long saed blong bodi, tingting, filing, mo spirit. Man blong raetem Ol Sam i talem i stret nomo, taem hem i singsing se: “Loa blong Hae God i stret gud, mo i stap givim niufala paoa long yumi. Ol tok we Hae God i putum, yumi save bilif long hem, mo i stap givim waes long olgeta we oli no waes. Ol loa we hem i stap tijim yumi long hem oli stret, mo olgeta we oli stap obei long ol loa ya, oli stap harem gud. Ol tok we hem i putum oli stret gud, mo oli stap givim save long yumi. Fasin ya we man i ona long Hae God, hem i gud tumas, mo bambae i save stap oltaem nomo. Ol tingting blong Hae God oli stret gud, mo hem i stap jajem yumi long fasin we i stret long evri man. Mi mi wantem ol tok ya moa, i winim we mi wantem gol we i beswan.”—Ol Sam 19:7-10; 119:72.
7. ?Wanem frut i stap kamaot taem yumi no wantem folem ol stret rul blong God?
7 Ol samting i defren long ol man we oli no wantem folem ol stret rul blong God. Olgeta ya oli no faenem glad mo fasin fri we oli traehad blong kasem. Oli faenemaot se man i no save jikim God, from we sid we man i planem long garen blong hem, frut blong hem nao bambae i mas kakae. (Galesia 6:7) Plante milian man we oli no bin wantem blong folem ol rul blong Baebol, oli stap kasem ol rabis frut, olsem, oli gat bel be oli no wantem pikinini, oli kasem ol nogud sik, mo oli slef blong ol fasin we i stap spolem olgeta nomo. Sipos olgeta ya oli no tanem tingting mo jenisim fasin blong olgeta, rod we oli stap folem bambae i lidim olgeta i go long ded, sipos no, maet bambae God i spolem olgeta taem hem i jajem ol man.—Matiu 7:13, 14.
8. ?From wanem olgeta we oli laekem tumas Tok blong God oli glad?
8 Be, olgeta we oli laekem tumas Tok blong God mo oli folem, bambae ol bigfala blesing oli kam kavremap olgeta naoia mo long fiuja. Oli harem se loa blong God i mekem olgeta oli rili fri, oli glad fulwan, mo oli stap wet nomo long taem ya we bambae oli kam fri long sin mo ded. (Rom 8:20, 21; Jemes 1:25) Gudfala fiuja ya i sua blong kamtru, from we promes blong hem i stanap long beswan presen we God i givim long ol man, hemia ransom sakrefaes blong stret Pikinini blong hem, Jisas Kraes. (Matiu 20:28; Jon 3:16; Rom 6:23) Presen olsem, we i nambawan tumas, i soemaot olsem wanem lav we God i gat long ol man i bigwan tumas, mo tu, i mekem yumi suagud se olgeta we oli stap lesin oltaem long Jeova, bambae oli kasem ol blesing we oli no save finis.—Rom 8:32.
Tangkiu From Presen Ya Blong Tabu Spirit
9, 10. ?Olsem wanem tabu spirit we i wan presen long Jeova, i save givhan long yumi? Storian long wan eksampol.
9 Wan narafala presen we i soemaot bigfala lav blong God, mo we yumi mas gat tangkiu from, hemia tabu spirit. Long dei blong Pentekos 33 K.T., * aposol Pita i talem long fulap man we oli hivap long Jerusalem, se: “Yufala i mas tanem tingting blong yufala from ol sin blong yufala, mo yufala evriwan i mas baptaes long nem blong Jisas Kraes, blong bambae God i tekemaot ol sin blong yufala. Nao bambae God i givim Tabu Spirit ya long yufala.” (Ol Wok 2:38) Tede, Jeova i stap givim tabu spirit long ol man blong hem we oli prea blong askem, mo we oli glad blong mekem samting we God i wantem. (Luk 11:9-13) Tabu spirit blong God, no paoa blong hem we i strong moa long ol narafala paoa long heven mo wol, i fulumap ol man mo woman blong bilif long taem bifo, wetem ol faswan Kristin tu. (Sekaraea 4:6; Ol Wok 4:31) Paoa ya i save mekem yumi strong tu, nating se yumi fesem plante bigfala traem mo trabol from we yumi ol man blong Jeova.—Joel 2:28, 29.
10 Tingbaot wan woman, nem blong hem Laurel. Hem i kasem sik ya polio, mo blong 37 yia, hem i mas slip oltaem insaed long wan aean bokis we i gat mesin long hem, blong givhan long hem blong pulum win. * Be, nating se traem ya i bigwan tumas, hem i gohed blong mekem wok blong God wetem strong tingting gogo hem i ded. Ol bigfala blesing blong Jeova oli kavremap Laurel. !Hem i givhan long 17 man blong oli kasem stret save long trutok blong Baebol, nating se hem i mas slip insaed long bokis ya 24 aoa evri dei! Stori blong hem i mekem yumi tingbaot tok blong aposol Pol se: “Long taem we mi mi no gat paoa, long taem ya nao, mi mi gat paoa.” (2 Korin 12:10) Yes, ol gudfala frut we yumi kasem taem yumi talemaot gud nius, i no kamaot from prapa save mo paoa blong yumi, be hem i kamaot from we God i halpem yumi wetem tabu spirit blong hem. Hem i givim spirit ya long olgeta we oli stap lesin oltaem long hem.—Aesea 40:29-31.
11. ?Wanem ol fasin we tabu spirit blong God i save wokem long olgeta we oli putum “niufala fasin blong laef”?
11 Sipos yumi obei long God mo lesin long hem oltaem, spirit blong hem bambae i givhan long yumi blong wokem ol gudfala fasin, olsem lav, glad, pis, longfala tingting, kaen fasin, gud fasin, bilif, kwaet fasin, mo fasin blong blokem samting we yumi nomo i wantem. (Galesia 5:22, 23) Ol ‘fasin ya we oli kamaot long tabu spirit,’ oli mekemap “niufala fasin blong laef” we ol Kristin oli mas putum. Hemia i mas tekem ples blong ol fasin we oli bin gat bifo, ol fasin we oli olsem wael anamol stret. (Efesas 4:20-24, NW; Aesea 11:6-9) Wan frut we i impoten tumas, hemia lav, we “i save joenemgud olgeta samting, blong oli kam wan.”—Kolosi 3:14.
Kristin Lav—Tinghae Long Presen Ya
12. ?Olsem wanem Tabita mo sam narafala Kristin long faswan handred yia oli bin soemaot lav?
12 Kristin lav i wan narafala presen we Jeova i givim olsem blesing, mo i stret nomo we yumi tinghae tumas long fasin ya. Lav ya i stanap long ol stret rul. Man we i gat lav ya i soemaot bigfala kea long narafala. Taswe, lav ya i save pulum ol Kristin man oli kam klosap moa i bitim we oli stret brata mo sista. (Jon 15:12, 13; 1 Pita 1:22) Tingbaot Tabita, wan gudfala Kristin woman long faswan handred yia. “Oltaem hem i stap mekem ol gudfala wok, mo i stap givhan long ol puaman,” speseli ol wido long kongregesen. (Ol Wok 9:36) Ating ol wido ya oli gat ol prapa famle blong olgeta i stap, be nating, Tabita i mekem wanem we hem i naf blong mekem, blong halpem mo leftemap tingting blong olgeta. (1 Jon 3:18) !Tabita i givim wan nambawan eksampol long yumi! Mo tu, Kristin lav i mekem se Akwila mo Prisila tufala i “rere blong lusum laef blong tufala” from Pol. Mo lav ya i pusum Epafras, Luk, Onesiforas, mo sam narafala tu blong givhan long aposol ya taem hem i stap kalabus long Rom. (Rom 16:3, 4; 2 Timoti 1:16; 4:11; Filimon 23, 24) Yes, ol trufala Kristin tede tu oli ‘stap lavlavem olgeta.’ Hemia wan presen we God i givim long olgeta olsem blesing, mo we i soemaot se oli ol trufala disaepol blong Jisas.—Jon 13:34, 35.
13. ?Olsem wanem yumi soemaot se yumi gat bigfala tangkiu from ol Kristin brata mo sista blong yumi?
13 ?Yu yu tinghae tumas long lav we i stap insaed long Kristin kongregesen? ?Yu yu gat tangkiu from ol Kristin brata mo sista blong yumi, we oli stap long olgeta ples blong wol? Hemia wan presen we Jeova i givim long yumi blong blesem yumi, mo i mekem yumi rij. ?Olsem wanem yumi save soemaot se yumi tinghae long presen ya? Yumi mas mekem tabu wok blong God, joen long ol Kristin miting, mo soemaot lav wetem ol narafala frut blong tabu spirit blong God.—Filipae 1:9; Hibrus 10:24, 25.
‘Ol Presen We Oli Go Nomo Long Ol Man’
14. ?Wanem ol fasin we Kristin man i nidim blong kam naf blong mekem wok blong elda no man blong givhan?
14 Ol Kristin man we oli wantem mekem wok blong elda no man blong givhan, blong halpem ol Kristin brata mo sista blong olgeta, oli stap traehad from wan nambawan wok. (1 Timoti 3:1, 8) Blong kam naf blong mekem nambawan wok ya, wan brata i mas wan bigman long ol Kristin fasin, i mas savegud Baebol, mo i mas wok strong long wok blong prij. (Ol Wok 18:24; 1 Timoti 4:15; 2 Timoti 4:5) Hem i mas gat tingting daon, hem i no bitim mak long ol fasin blong hem, mo hem i gat longfala tingting. Blesing blong Jeova i no save kavremap olgeta we oli gat hae tingting tumas, oli flas, mo oli wantem haenem nomo. (Ol Proveb 11:2; Hibrus 6:15; 3 Jon 9, 10) Sipos hem i mared, hem i mas lidim famle blong hem wetem lav, mo hem i mas naf blong lukaotgud long famle blong hem. (1 Timoti 3:4, 5, 12) Man olsem i tinghae long ol sas samting long saed blong spirit, taswe hem i pulum blesing blong Jeova i kam long laef blong hem.—Matiu 6:19-21.
15, 16. ?Hu i stap soemaot se oli ‘ol presen we oli go nomo long ol man’? Storian long sam eksampol.
15 Taem olgeta we oli mekem wok blong elda long kongregesen oli traehad long wok blong prij mo tij, mo oli lukaot gud long ol sipsip, oli pulum yumi blong tinghae long olgeta olsem ‘ol presen we oli go nomo long ol man.’ (Efesas 4:8, 11) Ol elda ya we oli holemstrong long Jeova oli givhan wetem lav long plante brata mo sista, mo maet i no evriwan we oli talem tangkiu long olgeta from. Be Jeova i stap luk ol gudfala wok blong ol elda ya. Bambae hem i no fogetem ol samting we oli mekem blong soemaot se oli laekem tumas nem blong hem, taem oli givhan long ol man blong hem.—1 Timoti 5:17; Hibrus 6:10.
16 Tingbaot wan elda we i stap wok strong oltaem. Hem i go luk wan Kristin gel we i gat wan sik long bren blong hem, mo we ol dokta oli rere blong katem hem. Wan fren blong famle ya i tokbaot elda ya i se: “Hem i kaen tumas, i givhan bigwan long mifala, mo i soemaot se hem i rili kea. Hem i askem sipos hem i save prea wetem mifala. Taem hem i stap prea long Jeova, papa blong gel ya [we i no wan Witnes blong Jeova] i stat krae, mo wota i foldaon long ae blong evriwan we i stap long rum ya long hospital. Prea blong elda ya i fulap long filing. !Tru ya, Jeova i rili soemaot lav taem hem i sanem brata ya i kam long taem we mifala i nidim tumas!” Wan narafala Witnes we i stap slip long hospital, i tokbaot ol elda we oli kam luk hem, i se: “Mi stap slip long rum blong hospital we oli putum ol man we oli sik tumas, klosap oli ded. Taem ol elda oli kam klosap long bed blong mi, mi harem se nomata wanem samting i hapen long mi biaen, naoia mi mi naf blong gotru long hem. Mi harem se tingting blong mi i strong mo mi gat pis.” ?Fasin kea mo lav we ol elda ya oli soemaot, yumi save pem? !Neva! Hemia wan presen we God i givim, mo yumi kasem presen ya taem yumi stap long Kristin kongregesen.—Aesea 32:1, 2.
Wok Blong Prij We i Wan Presen
17, 18. (a) ?Wanem wok we i olsem presen, we Jeova i givim long olgeta man blong hem? (b) ?Wanem samting we God i givim blong halpem yumi blong mekemgud wok blong prij?
17 I no gat samting we i save givim moa ona long wan man, i bitim we hem i gat janis blong mekem wok blong Jeova, God ya we i antap olgeta. (Aesea 43:10; 2 Korin 4:7; 1 Pita 2:9) Be, olgeta man we oli wantem mekem wok blong God oli gat blesing ya, nating se oli yangfala no olfala, oli man no woman. ?Yu yu stap yusum sas presen ya? Maet samfala oli fraet blong prij from we oli harem se oli no naf. Be yumi no mas fogetem se, Jeova i stap givim tabu spirit long olgeta we oli mekem wok blong hem, mo paoa ya i naf blong givim ol fasin we yumi sot long olgeta.—Jeremaea 1:6-8; 20:11.
18 Jeova i givim wok ya blong talemaot Kingdom long ol man blong hem we oli gat tingting daon, i no long ol man we oli gat flas tingting mo oli dipen long prapa waes mo save blong olgeta. (1 Korin 1:20, 26-29) Olgeta we oli gat tingtingdaon mo oli no tinghae tumas long olgeta bakegen, oli save se oli no naf blong mekem plante samting. Taswe, oli dipen long God blong givhan long olgeta long wok blong prij. Mo tu, oli glad long ol samting we “slef we i stret” i stap mekem blong givhan long olgeta long saed blong spirit.—Luk 12:42-44, NW; Ol Proveb 22:4.
Hapi Famle—Nambawan Presen
19. ?Wanem ol samting we oli givhan long ol papa mama blong karem gudfala frut taem oli stap tijim ol pikinini blong olgeta?
19 Mared mo hapi famle, hemia wan presen we God i givim. (Rut 1:9; Efesas 3:14, 15) Ol pikinini tu, oli olsem sas “presen we Hae God i givim long yumi.” Oli givim glad long ol papa mama we oli tijimgud olgeta long ol fasin we God i wantem. (Ol Sam 127:3) Sipos yu yu wan papa no mama, yu mas gohed oltaem blong lesin long Jeova. Yu mekem samting ya taem yu tijim ol pikinini blong yu folem Tok blong Hem. Olgeta we oli mekem olsem, oli save sua se Jeova bambae i givhan long olgeta mo blesem olgeta bigwan.—Ol Proveb 3:5, 6; 22:6; Efesas 6:1-4.
20. ?Wanem i save givhan long ol papa mama we pikinini blong olgeta i lego trufala wosip?
20 Nating se ol papa mama we oli laekem God oli tijimgud ol pikinini blong olgeta, sam pikinini oli jusum blong lego trufala wosip taem oli kam bigwan. (Jenesis 26:34, 35) Samting ya i save mekem papa mama blong olgeta i harem nogud bitim mak. (Ol Proveb 17:21, 25) Be, ol papa mama ya oli no mas letem tingting blong olgeta i foldaon tumas. Oli mas tingbaot parabol we Jisas i givim long saed blong boe we i lusum rod. Boe ya i aot long haos blong papa blong hem, nao i folem ol rabis fasin. Be, biaen, hem i kambak long papa blong hem, mo papa blong hem i welkamem hem wetem glad mo lav. (Luk 15:11-32) Nomata wanem samting i kamaot, ol Kristin papa mama we oli stap tru long God, oli save bilif strong se Jeova i kasem save long filing blong olgeta, hem i kea, mo bambae hem i givhan long olgeta oltaem.—Ol Sam 145:14.
21. ?Yumi mas lesin long hu, mo from wanem?
21 Ale, yumi evriwan i mas luksave wanem samting i impoten moa long laef. ?Yumi stap traehad blong hivimap plante sas samting blong laef, we maet oli save givim soa long yumi mo famle blong yumi? ?No yumi stap traehad blong kasem “evri samting we oli gud mo evri presen we oli nambawan,” long ‘God we i mekem olgeta laet blong skae’? (Jemes 1:17) Setan, “we i stamba blong ol giaman toktok,” i wantem se yumi hadwok blong kam rijman, mo yumi lusum glad mo laef tu. (Jon 8:44; Luk 12:15) Be, Jeova i wantem se yumi gat wan nambawan laef. (Aesea 48:17, 18) Taswe, yumi mas gohed oltaem blong lesin long Papa blong yumi long heven we i laekem yumi tumas. Yumi mas ‘luk long Hem blong i mekem yumi glad.’ (Ol Sam 37:4) Sipos yumi folem rod ya, fulap presen mo blesing we oli sas tumas bambae oli kamaot long Jeova, bambae oli mekem yumi rij, mo bambae i no gat soa wetem.
[Ol futnot]
^ K.T. i minim Kristin Taem.
^ Lukluk Wekap! (Inglis mo Franis) Jenuware 22, 1993, pej 18-21.
?Yu Yu Rimemba?
• ?Olsem wanem blong faenem glad we i bigwan moa?
• ?Wanem sam presen we Jeova i stap givim long ol man blong hem?
• ?From wanem yumi talem se wok blong prij i wan presen?
• ?Ol papa mama oli save mekem wanem blong kasem blesing blong God long wok blong olgeta blong tijim ol pikinini?
[Kwestin]
[Tok blong pija long pej 16]
?Yu yu gat tangkiu from presen ya we God i givim, hemia Tok blong hem Baebol?
[Tok blong pija long pej 17]
Nating se Laurel Nisbet i kasem bigfala traem, hem i gohed blong mekem wok blong God wetem fulhat blong hem
[Tok blong pija long pej 18]
Olsem Tabita, ol Kristin tede oli mekem ol wok blong soemaot lav
[Tok blong pija long pej 19]
Ol elda oli soemaot lav mo kea long ol Kristin brata sista blong olgeta