Benediksyon Zeova I Fer Nou Ris
Benediksyon Zeova I Fer Nou Ris
“Benediksyon Zeova—se sa ki fer ris, e i pa azout okenn douler avek li.” —Proverb 10:22.“
1, 2. Akoz boner napa nanryen pour fer avek larises materyel?
PLIZYER milyon dimoun ozordi i ganny kontrole par bann lobzektif materyel. Me eski keksoz materyel i fer zot ere? The Australian Women’s Weekly i dir, “Mon pa kapab rapel en letan kot dimoun in santi zot pli tris an rapor avek zot fortin.” I azoute: “Sa i en keksoz vreman bizar. Zot ti dir nou ki sitiasyon ekonomik Lostrali i ekselan, lavi pa’n zanmen pli meyer ki sa. . . . Kantmenm sa, dezespwar pe anvair sa nasyon. Zonm ensi ki fanm i santi ki zot mank en keksoz dan zot lavi me zot pa arive konnen kwa.” Pa Labib pe koz laverite kan i dir ki bann keksoz ki nou posede pa donn nou ni boner ni lavi!—Eklezyast 5:10; Lik 12:15.
2 Labib i ansennyen ki pli gran boner i vin atraver benediksyon Bondye. An rapor avek sa, Proverb 10:22 i dir: “Benediksyon Zeova—se sa ki fer ris, e i pa azout okenn douler avek li.” Kan nou rod larises materyel avek vorasite, sa i souvan anmenn douler. Anliny avek sa, zapot Pol ti byen donn sa lavertisman: “Bann ki oule vin ris i tonm dan tantasyon e dan pyez en kantite dezir bet e move, ki plonz dimoun dan larin e fer zot maler. Lanmour larzan i rasin tou lemal. Serten dimoun, pour posed larzan in egare lwen avek lafwa e zot in met zot lekor dan en kantite tourman.”—1 Timote 6:9, 10.
3. Akoz bann serviter Bondye i pas atraver bann leprev?
3 Parkont, bann benediksyon san douler i ariv lo tou bann ki “kontinyen ekout lavwa Zeova.” (Deterononm 28:2) Pourtan, i annan serten dimoun ki kapab demande, ‘Si okenn douler pa ganny azoute avek benediksyon Zeova, akoz bokou serviter Bondye i soufer?’ Labib i montre ki Bondye i permet sa bann leprev ki nou pas ladan, me an realite zot sorti kot Satan, son sistenm mesan ek nou prop natir enparfe. (Zenez 6:5; Deterononm 32:4, 5; Zan 15:19; Zak 1:14, 15) Zeova i sours “tou don ekselan, tou kado parfe.” (Zak 1:17) Alors, son bann benediksyon pa anmenn okenn douler. Annou vwar serten kado parfe ki Bondye i donn nou.
Parol Bondye—en Kado tre presye
4. Ki benediksyon ek kado presye pep Zeova pe rezwir pandan “letan lafen”?
4 Konsernan “letan lafen,” profesi Danyel i dir: “Vre konnesans pou vin an abondans.” Me sa ti ganny restrikte par sa parol: “Napa okenn mesan ki pou konpran; me sa bann ki annan disernman pou konpran.” (Danyel 12:4, 10) Get sa! Parol Bondye—sirtou son profesi—in ganny eksprimen avek en tel sazes divin ki bann dimoun mesan pa kapab konpran li byen, tandis ki pep Zeova i kapab. Garson Bondye ti priye: “Mon Papa, Senyer lesyel ek later, mon rann ou glwar akoz ou’n kasyet sa bann keksoz avek bann malen ek bann entelizan e ou’n revel zot avek bann pti zanfan.” (Lik 10:21) I vreman en benediksyon pour nou annan Parol Bondye, sa kado tre presye, e pour parmi sa bann ki Zeova in akord konprenezon spirityel!—1 Korentyen 1:21, 27, 28; 2:14, 15.
5. Kisisa lasazes, e ki mannyer nou kapab ganny li?
5 Nou ti pou napa okenn konprenezon spirityel si nou pa ti’n ganny “lasazes ki sorti dan lesyel.” (Zak 3:17) Lasazes i en abilite pour servi konnesans ek lentelizans pour rezourd bann problenm, evit oubyen detourn kont bann danze, atenn bann lobzektif, oubyen donn bann bon konsey. Ki mannyer nou kapab ganny lasazes divin? Proverb 2:6 i dir: “Parski Zeova li menm i donn lasazes; dan son labous i sorti konnesans ek disernman.” Wi, Zeova pou beni nou avek lasazes si nou kontinyen demann li dan lapriyer, zis parey i ti donn Lerwa Salomon “en leker saz e entelizan.” (1 Lerwa 3:11, 12; Zak 1:5-8) Pour ganny lasazes, nou bezwen osi kontinyen ekout Zeova par regilyerman etidye e aplik son Parol.
6. Akoz i saz pour aplik lalwa ek prensip Bondye dan nou lavi?
6 Nou vwar bann legzanp prensipal lasazes divin dan bann lalwa ek prensip Labib. Zot benefisye nou dan tou sans—fizikman, mantalman, emosyonnelman, e spirityelman. Sa psalmis ti byen sante: “Lalwa Zeova i parfe, i reanmenn nanm. Rapel Zeova i diny konfyans, i fer sa ki napa leksperyans saz. Bann lord Zeova i drwat, i fer leker rezwir; komannman Zeova i prop, i fer lizye briye. Lakrent Zeova i pir, i tenir pour touzour. Bann desizyon zizman Zeova i vre; zot tou zot in ganny revele drwat. Zot pli dezirab ki lor, wi, plis ki bokou lor rafinen.”—Psonm 19:7-10; 119:72.
7. Ki i arive kan nou inyor bann standar drwat Bondye?
7 Parkont, bann dimoun ki inyor bann standar drwat Bondye pa trouv sa boner ek liberte ki zot pe rode. To-ou-tar, zot dekouver ki Bondye pa en dimoun pour monke, parski sa ki en dimoun i senmen se sanmenm ki i rekolte. (Galat 6:7) Plizyer milyon dimoun ki inyor bann prensip Labib pe rekolte bann konsekans trazik tel ki bann lansentman ki zot pa ti anvi, maladi repinyan, oubyen depandans lo bann sibstans ki afebli zot. Amwen ki zot sanz zot lavi, zot semen pou finalman anmenn zot dan lanmor e petet destriksyon par Bondye.—Matye 7:13, 14.
8. Akoz bann dimoun ki kontan Parol Bondye i ere?
8 Toutfwa, bann dimoun ki kontan Parol Bondye e ki aplik li pou ganny bann benediksyon ris la konmela e dan lavenir. Zot annan tou rezon pour santi ki Lalwa Bondye in rann zot lib, zot vreman zwaye, e avek lantouzyasm zot pe esper sa letan kot zot pou ganny libere avek pese ek son bann lefe destriktif. (Romen 8:20, 21; Zak 1:25) Sa lesperans i garanti parski i repoz lo kado pli marke avek lanmour ki Bondye in donn limanite—sakrifis ranson son sel Garson, Zezi Kri. (Matye 20:28; Zan 3:16; Romen 6:23) Sa pli gran kado i montre profonder lanmour Bondye pour limanite e i garanti bann benediksyon enfini pour tou sa ki kontinyen ekout Zeova.—Romen 8:32.
Rekonesan pour Kado Lespri sen
9, 10. Ki mannyer nou benefisye avek lespri sen, sa kado ki sorti kot Zeova? Donn en legzanp.
9 En lot kado ki Bondye in donn nou avek lanmour ki nou devret rekonesan se son lespri sen. Zour Lapannkot 33 N.L., zapot Pyer ti enplor sa gran nonm dimoun ki ti la an Zerizalenm: “Sanz zot lavi e ki sakenn ant zot i ganny batize o non Zezi-Kri pour ki zot ganny pardon zot bann pese. Alor zot a resevwar kado Bondye, Sent-Espri.” (Akt 2:38) Denozour, Zeova i donn son lespri sen tou son bann serviter ki demann li e ki anvi fer son lavolonte. (Lik 11:9-13) Dan lepase, sa lafors pli pwisan dan liniver—lespri sen Bondye, oubyen son lafors aktif—ti fortifye bann zonm ek fanm ki ti annan lafwa, enkli bann premye Kretyen. (Zekarya 4:6; Akt 4:31) I kapab azir parey lo nou, menm si nou kapab fer fas avek bann gro lobstak oubyen bann difikilte konman pep Zeova.—Yoel 2:28, 29.
10 Annou pran legzanp Laurel, ki ti ganny polyo e ki ti viv avek en poumon an fer pour 37 an. * Malgre ki son sitiasyon ti ekstrememan difisil, i ti servi Bondye avek zel ziska son lanmor. Pandan bann lannen, Laurel ti resevwar benediksyon ris sorti kot Zeova. Par egzanp, i ti kapab ed 17 dimoun pour ganny konnesans egzakt lo laverite Biblik, menm si i ti oblize reste dan son masin 24 er lo 24! Son sitiasyon i fer nou rapel parol zapot Pol: “Ler mon feb, lanmenm ler ki mon for.” (2 Korentyen 12:10) Annefe, tou sa ki nou reisi fer ler nou pres sa bon nouvel i pa gras a nou prop kapasite ek lafors, me se gras a led Bondye par son lespri sen ki i donn bann ki kontinyen ekout son lavwa.—Izai 40:29-31.
11. Ki bann kalite ki lespri Bondye i prodwi dan bann “dimoun konpletman nouvo”?
11 Si avek lobeisans nou ekout Bondye, son lespri i prodwi bann kalite dan nou tel ki lanmour, lazwa, lape, pasyans, labonte, lafwa, ladouser, kontrol lo nou prop lekor. (Galat 5:22, 23) Sa “fri Lespri” i form par sa “dimoun konpletman nouvo” ki bann Kretyen i devret vini pour ranplas sa bann latitid voras e mesan ki petet zot ti annan oparavan. (Efezyen 4:20-24; Izai 11:6-9) Lanmour i tre enportan dan sa fri, i “soud tou keksoz parfetman ansanm dan larmoni.”—Kolosyen 3:14.
Lanmour Kretyen—en Kado pour seri
12. Ki mannyer Tabita ek lezot Kretyen premye syek ti demontre lanmour?
12 Lanmour Kretyen i en lot kado ki Zeova in beni nou avek—enn ki nou vreman seri. I ganny gide par prensip, me i sitan ranpli avek lafeksyon ki i anmenn bann krwayan pli pros avek kanmarad, plis ki sa relasyon ki egziste antre fanmiy. (Zan 15:12, 13; 1 Pyer 1:22) Pran par egzanp, Tabita, en fanm Kretyen ekselan ki ti viv dan premye syek. “I ti touzour okipe pe fer dibyen,” sirtou anver bann vev dan kongregasyon. (Akt 9:36) Sa bann vev ti kapab annan zot prop fanmiy, me Tabita ti anvi fer tou sa ki i kapab pour ed zot e ankouraz zot. (1 Zan 3:18) Tabita ti demontre en tre bon legzanp! Lanmour Kretyen ti pous Prisil ek Akilas pour “riske zot prop lavi” pour Pol. Lanmour ti osi motiv Epafras, Lik, Onezifor ek lezot pour ed sa zapot kan i ti’n ganny anprizonnen an Ronm. (Romen 16:3, 4; 2 Timote 1:16; 4:11; Filemon 23, 24) Wi, bann Kretyen ki koumsa denozour i “kontan kanmarad,” en kado ki Bondye in beni zot avek, ki idantifye zot konman bann vre disip Zezi.—Zan 13:34, 35.
13. Ki mannyer nou kapab montre ki nou vreman apresye nou lasosyasyon Kretyen?
13 Eski ou seri sa lanmour ki ganny demontre dan kongregasyon Kretyen? Eski ou rekonesan pour nou lasosyasyon frer spirityel ki nou kapab trouve partou lo later? Zot osi zot bann kado sorti kot Zeova ki donn nou lazwa e ki fer nou ris. Ki mannyer nou kapab montre ki nou apresye zot? Par rann en servis sakre Bondye, par partisip dan bann renyon Kretyen, e par demontre lanmour ek lezot fri lespri Bondye.—Filipyen 1:9; Ebre 10:24, 25.
“Bann Don an Zonm”
14. Si en Kretyen i anvi servi konman en ansyen oubyen en asistan ministeryel, kwa ki neseser lo son par?
14 Bann frer Kretyen ki annan sa dezir pour servi zot bann konpanyon Kretyen konman ansyen oubyen asistan ministeryel i annan en bon lobzektif. (1 Timote 3:1, 8) Pour en frer kalifye pour sa bann privilez, i bezwen en zonm spirityel, ki konn byen Labib e zele dan predikasyon. (Akt 18:24; 1 Timote 4:15; 2 Timote 4:5) I bezwen demontre limilite, modesti, ek pasyans, parski Bondye pa beni bann dimoun ki annan lodas, ki orgeye e ki anbisye. (Proverb 11:2; Ebre 6:15; 3 Zan 9, 10) Si i’n marye, i pou bezwen vin en bon sef lafanmiy ki kapab diriz byen son fanmiy antye. (1 Timote 3:4, 5, 12) Vi ki i akord gran valer avek larises spirityel, en tel zonm pou resevwar benediksyon Zeova.—Matye 6:19-21.
15, 16. Lekel ki’n prouve ki zot “bann don an zonm”? Donn bann legzanp.
15 Kan bann ki pe servi konman ansyen dan kongregasyon i fer bokou zefor konman bann evanzelizater, berze ek ansennyan, zot donn nou bann bon rezon pour vreman apresye sa “bann don an zonm.” (Efezyen 4:8, 11, NW ) Petet bann ki benefisye atraver zot servis pa touzour eksprim zot lapresyasyon, me Zeova i vwar tou sa ki bann ansyen fidel pe fer. I pa pou oubliy lanmour ki zot in montre pour son non par servis ki zot in rann son pep.—1 Timote 5:17; Ebre 6:10.
16 Par egzanp, en ansyen ki travay dir ti vizit en pti fiy Kretyen ki ti pe al oper son laservel. En zanmi sa fanmiy ti ekrir: “I ti vreman zantiy, vreman en gran soutyen, e vreman konsernen.” “I ti demann permisyon pour priy Zeova avek nou. Letan i ti pe priye, papa sa pti fiy [ki pa ti en Temwen Zeova] ti plere, e larm tou dimoun ki ti dan sa lasanm lopital ti koule. Konman lapriyer sa ansyen ti tousan, e ki lanmour Zeova ti demontre par anvoy li zis sa moman apropriye!” En lot pasyan ki ti en Temwen ti dir sa konsernan bann ansyen ki ti vizit li: “Kan zot ti vin kot mon lili dan younit swen entansif, mon ti konnen ki nenport kwa ki kapab arive apartir sa moman, mon ti pou kapab siporte. Mon ti’n vin for e anpe.” Eski i annan okenn dimoun ki kapab aste en lentere sitan ranpli avek lanmour? Zanmen! I en kado ki Bondye i donnen atraver kongregasyon Kretyen.—Izai 32:1, 2.
Sa Kado pour prese
17, 18. (a) Ki kado Zeova in donn tou son pep? (b) Ki led Bondye in fourni afen ki nou kapab akonpli nou minister?
17 Napa pli gran loner ki imen i kapab gannyen ki servi Zeova, Tre O. (Izai 43:10; 2 Korentyen 4:7; 1 Pyer 2:9) Ziska prezan, sa privilez pour partisip dan predikasyon i ouver pour tou dimoun—zenn konman vye, zonm konman fanm—ki annan en dezir senser pour servi Bondye. Eski ou servi sa kado presye? Serten i kapab ezite akoz zot santi ki zot pa kapab fer li, me mazinen ki Zeova i donn son lespri sen bann ki servi li, e i kouver nenport mankman ki nou kapab annan.—Zeremi 1:6-8; 20:11.
18 Zeova in konfye sa travay pour pres lo Rwayonm avek son bann serviter ki abes zot, non pa bann dimoun ki annan sa tandans orgeye e ki depan lo zot prop kapasite. (1 Korentyen 1:20, 26-29) Bann dimoun ki annan limilite ek modesti i rekonnet zot limit e zot depan lo led Bondye kan zot pe prese. Zot osi apresye led spirityel ki i fourni atraver “sa serviter fidel.”—Lik 12:42-44; Proverb 22:4.
En Lavi Fanmiy ere—En Kado ekselan
19. Ki bann fakter ki fer nou reisi elve nou zanfan?
19 Maryaz ek en lavi fanmiy ere i en kado ki sorti kot Bondye. (Rit 1:9; Efezyen 3:14, 15) Bann zanfan osi i en “leritaz sorti kot Zeova,” ki anmenn lazwa pour bann paran ki reisi enkilke dan zot bann kalite ki fer plezir Bondye. (Psonm 127:3) Si ou en paran, kontinyen ekout lavwa Zeova par enstri ou zanfan dapre son Parol. Bann ki fer sa pou sirman santi soutyen Zeova ek son benediksyon ris.—Proverb 3:5, 6; 22:6; Efezyen 6:1-4.
20. Kwa ki kapab itil pour bann paran ki zot zanfan in abandonn vre ladorasyon?
20 Malgre i annan paran ki fer tou zot zefor, serten zot zanfan i kapab deside abandonn vre ladorasyon kan zot pli gran. (Zenez 26:34, 35) Sa i kapab vreman demoralizan pour bann paran. (Proverb 17:21, 25) Me olye perdi lespwar, petet i itil pour zot mazin ilistrasyon Zezi lo sa garson ki ti fer fize tou son byen. Menm si sa garson ti kit se li e al viv en lavi dezordonnen, plitar i ti retourn kot son papa, ki ti resevwar li avek lazwa ek lanmour. (Lik 15:11-32) Nenport kwa ki kapab arive, bann paran Kretyen fidel i kapab asire ki Zeova i konpran, ki i vreman enterese avek zot, e ki i pou touzour donn zot son soutyen.—Psonm 145:14.
21. Ki sennla ki nou devret ekoute, e akoz?
21 Alor, annou determinen ki sa ki vreman enportan dan nou lavi. Eski nou pe tay deryer bann keksoz materyel, ki kapab anmenn douler pour nou e pour nou fanmiy? Oubyen eski nou pe rod ‘sa bann don ekselan ek kado parfe’ ki sorti kot “Papa tou lalimyer”? (Zak 1:17) Satan, “papa tou mansonz,” i oule ki nou rente pour larises materyel e perdi nou lazwa ensi ki nou lavi. (Zan 8:44; Lik 12:15) Parkont, Zeova i vreman pran nou lentere aker. (Izai 48:17, 18) Alor, annou kontinyen ekout nou Papa lanmour ki dan lesyel e touzour ‘met nou plezir’ dan li. (Psonm 37:4) Si nou fer sa, bann kado presye ek benediksyon ki Zeova i donn nou pou fer nou ris—e san azout okenn douler.
[Not anba lo paz]
^ par. 10 Vwar Réveillez-vous! le 22 Zanvye, 1993, paz 18-21.
Eski ou rapel?
• Kote nou kapab trouv pli gran lazwa?
• Nonm serten kado ki Zeova i donn son pep?
• Akoz predikasyon i en kado?
• Ki bann paran i kapab fer pour ganny benediksyon Bondye pour elve zot zanfan?
[Kestyon]
[Portre lo paz 14]
Eski ou montre lapresyasyon pour Parol Bondye ki i’n donn ou konman en kado?
[Portre lo paz 15]
Malgre bann sitiasyon vreman difisil, Laurel Nisbet ti servi Bondye avek zel
[Portre lo paz 16]
Parey Tabita, bann Kretyen denozour i byen koni pour zot lanmour
[Portre lo paz 17]
Bann ansyen i enterese senserman avek bann konpanyon Kretyen