Jehova Malsâwmnain Min Tihausa
Jehova Malsâwmnain Min Tihausa
“LALPA malsâwmna chuan a tihausa ṭhîn a, lungngaihna a belhchhah ṭhîn lo.”—THUFINGTE 10:22.
1, 2. Engvângin nge hlimna leh khawvêl hausaknain inkungkaihna a neih loh?
KHAWVEL hausakna ûmna hian tûn laia mi maktaduai tam takte nun chu a thunun tlat a. A nih leh, chûng khawvêl thilte chuan hlimna a pe em? Australian Women’s Weekly chanchinbu chuan: “Nuna an chanvo ngaihtuah avânga tûn ang êma mite an ngui ka la hre ngai lo,” a ti. Hetiang hian a sawi belh a: “Thil mak a ni. Australia hi sum leh pai lama dinhmun ṭha ber a ni a, tûn aia changkân lehzual ngaihna awm tawh lo anga hrilh kan ni a. . . . Chutichung pawh chuan, ram chhûng zawng zawng chu beidawnnain a khat tlat a. Ahmei apa hian an nunah engemaw kim lo awmin an hria a; mahse, eng nge a nih an sawi thei si lo,” tiin. Pathian Lehkha Thuin sum ngah hian hlimna a thlen thei lo va, nunna a pe thei hek lo tih a sawi hi a va dik êm!—Thuhriltu 5:10; Luka 12:15.
2 Bible chuan hlimna nasa ber chu Pathian malsâwmna aṭanga lo awm a ni a ti a. He mi chungchângah chuan, Thufingte 10:22 chuan: “LALPA malsâwmna chuan a tihausa ṭhîn a, lungngaihna a belhchhah ṭhîn lo,” a ti a. Lungngaihna chu khawvêl hausakna duhâm taka ûmna aṭanga lo awm a ni fo. Tirhkoh Paula pawhin: “Hausak tumte chu thlêmnaah te, thangah te, âtthlâk leh tikhawlo thei duhna tam takah te an tlu lût ṭhîn, chûng duhnate chuan chhiatna leh boralnaah chuan mite a tipil ṭhîn. Tangka sum ngainat hi sual tinrêng bul a ni si a; chu chu ṭhenkhatten an awt a, rinna chu an kal bosan a, anmahni leh anmahni lungngaihna tam takin an inchhun tlang ta chuk a,” tiin vaukhânna thu a sawi bawk a ni.—1 Timothea 6:9, 10.
3. Engvângin nge Pathian chhiahhlawhte’n fiahna an tawrh?
3 Kawng lehlamah chuan, lungngaihna tel lo malsâwmna chuan “Jehova thu pawm” zawng zawngte chu a ûm zêl a ni. (Deuteronomy 28:2) Amaherawhchu, ṭhenkhatin, ‘Jehova malsâwmnain lungngaihna a belhchhah lo a nih si chuan, engvângin nge Pathian chhiahhlawh tam takte’n hrehawmna an tawrh?’ an ti mai thei. Hêng fiahna kan tawrhte hi a nihna takah chuan Setana hnên aṭang te, a kalhmang suaksual aṭang te, leh keimahni pianpui ṭhat famkim lohna te aṭanga lo awm a ni a, chûngte awm chu Pathianin a phal mai chauh a ni tih Bible chuan a târ lang. (Genesis 6:5; Deuteronomy 32:4, 5; Johana 15:19; Jakoba 1:14, 15) Jehova chu “thilpêk ṭha leh thilpêk famkim zawng zawng” bul a ni a. (Jakoba 1:17) Chuvângin, a malsâwmna chuan lungngaihna a thlen ngai lo a ni. Tûnah chuan Pathian thilpêk famkim ṭhenkhatte lo ngaihtuah ta ila.
Pathian Thu—Thilthlâwnpêk Hlu Tak Chu
4. Jehova mite’n he “tâwpna hun” chhûngah hian eng malsâwmna leh thilthlâwnpêk hlu takte nge an dawn?
4 “Tâwpna hun” chungchâng thu Daniela chuan heti hian a lo sawi lâwk a: “Hriatnate a pung dâwn a ni,” tiin. Nimahsela, chu thu chu: “Mi suaksual tumahin a ngaihna an hre lo vang a; mi fingte erawh chuan a ngaihna an hria ang,” tiin a sawi danglam leh a ni. (Daniela 12:4, 10) Han ngaihtuah teh! Pathian Thu—abîk takin hrilh lâwknate—chu Pathian finnaa hrilhfiah a nih avângin Jehova mite chuan hre thiam mah se, mi suaksualte chuan a ngaihna an hre lo a ni. Pathian Fapa chu: “Aw ka Pa, lei leh vân Lalpa, nangin mi fing leh mi bengvârte hnênah hêng thu hi i zêp a, nausênte hnêna i puan avâng hian ka fak a che,” tiin a ṭawngṭai a ni. (Luka 10:21) Thilthlâwnpêk hlu tak, Pathian Thu, Bible leh thlarau lama hriatthiamna Jehova pêk dawngtute zînga mi nih chu malsâwmna a va ni êm!—1 Korinth 1:21, 27, 28; 2:14, 15.
5. Finna chu eng nge ni a, engtin nge kan neih theih?
5 “Chung lam aṭanga finna lo chhuk” dawng lo ila chuan thlarau lama hriatthiamna chu kan nei hauh lo vang le. (Jakoba 3:17) Finna chu buainate chingfel tûr te, hlauhawm pumpelh tûr emaw, thil tum tihlawhtling tûr emaw, a nih loh leh mi dangte zilhna ṭha tak pe tûra hriatthiamna leh hriatna hman thiamna hi a ni a. A nih leh Pathian finna chu engtin nge kan neih theih? Thufingte 2:6 chuan: “LALPA chuan finna a pe ṭhîn a, a kâ aṭang chuan finna leh hriat thiamna a lo chhuak ṭhîn,” a ti. Ni e, finna dîla kan ṭawngṭai fan fan chuan, Lal Solomona pawh “finna leh hriatna thinlung” a pêk ang bawk khân, keini pawh min pe ve ang. (1 Lalte 3:11, 12; Jakoba 1:5-8) Tin, finna nei tûr chuan, a Thu kan zir a, kan nuna a taka hmangin Jehova thu kan pawm tûr a ni.
6. Engvângin nge kan nuna Pathian dân leh thubulte hman chu a finthlâk?
6 Pathian finna ṭha ber chu Bible dân leh thubulahte hmuh a ni a. Chûngte chu kawng tinrêng—taksa lam te, rilru lam te, ngaithuahna lam te, leh thlarau lam te thlengin kan hlâwkpui a ni. Chu mi nêna inmil takin fakna hla phuahtu pawh: “LALPA dân chu a ṭha famkim a, nunna a siam ṭha ṭhîn; LALPA thuhriattîr chu a rinawm a, mi mâwl a tifing ṭhîn; LALPA thununna thu chu a dik a, thinlung a tilâwm ṭhîn; LALPA thupêk chu a thianghlim a, mitte a tivâr ṭhîn. LALPA ṭihna chu a fai a, kumkhua atân a awm ṭhîn; LALPA rorêlnate chu a tak a, a fel vêl vek a ni. Chûng chu rangkachak aia duhawm zâwk a ni a, a ni, rangkachak thianghlim tam tak ai pawhin,” tiin a zai a ni.—Sâm 19:7-10; 119:72.
7. Pathian tehna felte hmuhsitna chuan eng rahte nge a chhuah?
7 Kawng lehlamah chuan, Pathian tehna felte hmusittute chuan an zawn hlimna leh zalenna chu an hmu lo thung a. Atâwp atâwpah chuan Pathian chu nuihzat zia a ni lo, miin a tuh apiang chu a seng dâwn tih chu an hmuchhuak nge nge ṭhîn. (Galatia 6:7) Bible dân bulte hmusittu mi maktaduai tam takte chuan chûng an tuh rah râpthlâk tak tak, sâwn pai te, natna tenawm tak tak te, a nih loh leh tihtâwp theih loh khawpa ngawlvei te chu an seng a ni. Chûng mite chuan inchhîra an nun kawng chu an thlâk a nih chauh loh chuan, a tâwpah thihna leh Pathian tihboralna hial pawh an tawng ang.—Matthaia 7:13, 14.
8. Engvângin nge Pathian Thu hmangaihtute an hlim?
8 Amaherawhchu, Pathian Thu hmangaiha, a taka hmangtute chu tûn apang leh nakin hunah malsâwmna nasa takin a zui zêl dâwn a ni. Anni chuan Pathian dânin zalentîra inngaihna tûr chhan an nei a, an hlim tak zet a; tin, sualna leh a rah chhuah thihna lak ata chhuahtîr an nih hun tûr chu nghâkhlel takin an thlîr a ni. (Rom 8:20, 21; Jakoba 1:25) He beiseina hi a rinawm êm êm a ni. Mihringte hnêna Pathian hmangaih thilthlâwnpêk ropui ber—a Fapa mal neih chhun, Isua Krista tlanna inthawina—chunga innghat tlat a nih avângin. (Matthaia 20:28; Johana 3:16; Rom 6:23) Chu thilpêk ṭha ber chuan, Pathianin mihringte a hmangaihzia a nemnghet a, Jehova pawmtu apiang tâna malsâwmna tâwpintai nei lo chu a tiam a ni.—Rom 8:32.
Thilthlâwnpêk Thlarau Thianghlim Avânga Lâwmna
9, 10. Jehova thilthlâwnpêk thlarau thianghlim chu engtin nge kan hlâwkpui? Entîrna pakhat pe rawh.
9 Pathian thilthlâwnpêk dang chu thlarau thianghlim hi a ni a; chu mi atân kan lâwm êm êm tûr a ni. C.E. 33, Pentikost nî khân, tirhkoh Petera chuan Jerusalema kal khâwm mipui tam takte chu hetiang hian a fuih a: “Sim ula, in sual ngaihdam nân Isua Krista hmingin baptisma chang ṭheuh rawh u; tichuan thlarau thianghlim pêk hi in hmu ang,” tiin. (Tirhkohte 2:38) Tûn laiah pawh, Jehova chuan a chhiahhlawh inpumpêk, a duhzâwng ti duhtute leh a dîltute hnênah chuan thlarau thianghlim a pe ṭhîn a ni. (Luka 11:9-13) Hmân lai hunah pawh, he lei leh vâna tha chak ber mai—Pathian thlarau thianghlim, a nih loh leh a chakna chevêl reng—hian mi rinawmte chu a lo tichak tawh ṭhîn a, chûng mite zîngah chuan Kristian hmasate pawh an tel a ni. (Zakaria 4:6; Tirhkohte 4:31) Chuvângin, Jehova mite kan nih avânga dodâlna leh harsatna nasa takte tâwk ṭhîn mah ila, thlarau thianghlim chuan hmân laia mite a tihchak ang bawk khân min tichak ve thei a ni.—Joela 2:28, 29.
10 Laurel-i entawn tûr siam hi lo ngaihtuah ta ila. Ani chu zeng hri veiin, kum 37 chhûng chu khâwl siamchawp hmanga thâwktîr a ni a. * Harsa tak chunga nung hrâm hrâm mah nise, a thih thlengin Pathian rawng ṭhahnemngai takin a bâwl a ni. A dam chhûng zawng chuan Jehova malsâwmna nasa takin Laurel-i chu a zui zêl a. Entîr nân, nilênga khâwl invuah reng chung pawhin, mi 17 lai chu Bible thutak hriatna dik nei tûrin a ṭanpui a ni. A dinhmun chuan tirhkoh Paula thusawi: “Ka chak loh apiangin a ni ka chak ṭhin ni,” tih min hriatchhuahtîr a ni. (2 Korinth 12:10) Ni e, chanchin ṭha hrilhnaa hlawhtlinna kan neih rêng rêng hi kan thiamna leh thiltihtheihna avânga kan neih a ni lo va, a thu pawmtute hnêna a pêk ṭhîn thlarau thianghlim hmanga Pathian ṭanpuina avânga kan neih a ni.—Isaia 40:29-31.
11. ‘Mihring thara’ inthuamte hnênah eng mizia nge Pathian thlarauvin a pêk?
11 Thu âwih taka Pathian thu kan pawm chuan, a thlarau thianghlim chuan hmangaihna te, hlimna te, remna te, dawhtheihna te, ngilneihna te, ṭhatna te, rinawmna te, thuhnuairawlhna te, insûmtheihna te min neihtîr dâwn a ni. (Galatia 5:22, 23) He “thlarau rah” hi Kristiante’n tûn hmaa an lo lantîr ṭhin ramsa nungchang ang mai, kohamna engpawh thlâktu “mihring thar” pêng pakhat a ni. (Ephesi 4:20-24; Isaia 11:6-9) Hêng thlarau rahte zînga pawimawh ber chu hmangaihna a ni a, chu chu “phuar famkimna” a ni.—Kolossa 3:14.
Kristian Hmangaihna—Hlimpui Tûr Thilthlâwnpêk
12. Tabithi leh kum zabi pakhatnaa Kristian dangte khân hmangaihna engtin nge an lantîr?
12 Kristian hmangaihna hi Jehova hnên aṭanga kan dawn, kan hlimpui êm êm thilthlâwnpêk dang a ni. Chu chu thubulte hmanga inthununna a ni a; mahse, inhmangaihnaa a khah tlat avângin chhûngkhat lainâte aia nasa zâwkin ringtute chu a inhnaihtîr zâwk a ni. (Johana 15:12, 12; 1 Petera 1:22) Entîr nân, kum zabi pakhatnaa Kristian hmeichhe entawn tlâk tak Tabithi hi han ngaihtuah teh. Ani chuan “thil tihṭhat leh thil pêk a ngah hle a,” a bîk takin kohhrana hmeithaite chungah a ni zual a. (Tirhkohte 9:36) Hêng hmeithaite hian chhûngkhat lainâte pawh an nei ve ngei ang; mahse, Tabithi chuan anmahni ṭanpui leh fuih nâna a tih theih tâwk tih chu a duh a ni. (1 Johana 3:18) Tabithi chuan entawn tûr ṭha a va siam tak êm! Unau inhmangaihna chuan Priskilli leh Akuila te chu Paula tâna ‘an nghâwng dawh’ tûrin a chêttîr a. Tin, chu unau inhmangaihna bawk chuan Epaphra te, Onesiphora te, leh mi dangte chu Rome khaw tân ina a tân laia ṭanpui tûrin a chêttîr bawk a ni. (Rom 16:3, 4; 2 Timothea 1:16; 4:11; Philemona 23, 24) Ni e, anmahni ang bawk tûn laia Kristiante pawhin Krista zirtîr dikte an nihzia tifiahtu, Pathian thilthlâwnpêk malsâwmna, ‘inhmangaih tawnna chu an nei,’ a ni.—Johana 13:34, 35.
13. Kan Kristian inunauna hi kan ngaihlu tak zet a ni tih engtin nge kan lantîr theih?
13 Kristian kohhrana hmangaihna lantîr chu i hlut em? Khawvêl pum puia thlarau lama kan inunauna avâng chuan i lâwm em? Hêngte pawh hi min tihlimtu leh min tihausatu chung lam aṭanga thilthlâwnpêk ropui tak a ni. Chûng thilte kan hlutzia engtin nge kan lantîr theih? Pathian hnêna rawngbâwlna thianghlim hlânin, Kristian inkhâwmnaa chanvo nei vein, leh hmangaihna leh Pathian thlarau rah dangte lantîrna hmangin kan lantîr thei a ni.
‘Mihringte Hnêna Thilpêkte’
14. Upa emaw, kohhranho rawngbâwltu emaw nih duh Kristian tân eng nge ngai?
14 Kristian mipa tupawhin an rinpuite rawng bâwlsak tûra upa emaw, kohhranho rawngbâwltu emawa ṭan a duh chuan thil tum ṭha tak a nei tihna a ni. (1 Timothea 3:1, 8) Hêng rawngbâwlna hlu takte atâna tling tûr chuan, unaupa chu thlarau mi tak, Pathian Lehkha Thu hre bel tak, leh thlawhhma rawngbâwlnaa taima tak a ni tûr a ni. (Tirhkohte 18:24; 1 Timothea 4:15; 2 Timothea 4:5) Chapona te, intihveina te, leh chungnun duhna te chu Pathian malsâwmnain a zui zêl loh avângin, anni chu mi inngaitlâwm, thuhnuai rawlh, leh zaidam an ni tûr a ni. (Thufingte 11:2; Hebrai 6:15; 3 Johana 9, 10) Nupui fanau nei a nih chuan, chhûngkaw pa hmangaihna nei, a inchhûngkhur rêl fel thiam mi a ni tûr a ni. (1 Timothea 3:4, 5, 12) Chutiang mi chuan thlarau lam hausakna a ngaihhlut avângin, Jehova malsâwmna a dawng ang.—Matthaia 6:19-21.
15, 16. Tute nge ‘mihringte hnêna thilpêkte’ chu ni ta? Entîrna pe rawh.
15 Kohhrana upate chuan chanchin ṭha hriltu te, kohhran châwmtu te, leh zirtîrtu te anga ṭhahnem ngai taka an thawh hrâm hrâm chuan, chutiang ‘mihringte hnêna thipêkte’ ngaihhlutna tûr chhan ṭha tak an awmtîr a ni. (Ephesi 4:8, 11) Hmangaih taka an rawngbâwlna hlâwkpuite chuan an ngaihhlutna sawi chhuak kher lo mah se, Jehova chuan upa rinawm takte thiltih chu a hmu vek a. A mite rawng bâwlsakna hmanga a hming an hmangaihzia an lantîr chu a theihnghilh dâwn lo.—1 Timothea 5:17; Hebrai 6:10.
16 Rim taka rawng bâwl ṭhîn upa pakhatin, thluak zai tûr Kristian hmeichhe naupang pakhat a tlawh chungchâng hi lo ngaituah ta la. Chu hmeichhe chhûngkaw ṭhian pakhat chuan: “Ngil a nei a, mi a ṭanpui a, min ngaihtuah êm êm a ni. Jehova hnêna ṭawngṭaina hun min dîl hmasa a. A ṭawngṭai lai chuan, damlo hmeichhe tleirâwl pa [Jehova Thuhretu ni ve lo] chu a ṭap ta mai a, chu damdawi in pindana mi zawng zawngte mittui chu a tla vek mai a ni. Kha upa ṭawngṭaina duhawmzia leh a hun taka amah rawn thawntu Jehova hmangaihna ngahzia tak hi aw!” tiin a ziak a ni. Thuhretu damlo dang pakhat pawhin, amah tlawhtu upate chungchâng chu heti hian a sawi: “Damlo zualte enkawlna hmuna ka awm laia ka khum lam pana an rawn kal ka hmuh aṭang chuan, eng thil pawh thleng se, ka tuar thei ang tih ka inhre nghâl mai a. Ka chakin, ka thla a muang sawt mai a ni,” tiin. Chutiang hmangaih taka inngaihsakna chu suma lei thei kan awm dâwn em ni? Kan lei thei hauh lo vang! Chu chu Kristian kohhran kal tlanga Pathian thilthlâwnpêk a ni.—Isaia 32:1, 2.
Thlawhhma Rawngbâwlna Thilthlâwnpêk
17, 18. (a) Jehova’n a mite tân eng rawngbâwlna thilthlâwnpêk nge a siam? (b) Kan rawngbâwlna kan hlen chhuah theih nân eng ṭanpuina nge Pathianin a siam?
17 Chungnungbera, Jehova rawngbâwlna chu mihringte hnêna pêk theih chawimawina sâng ber a ni. (Isaia 43:10; 2 Korinth 4:7; 1 Petera 2:9) Nimahsela, chu rawngbâwlnaa telve theihna chanvo chu Pathian rawng bâwl châkna tak tak neitu apiang—apui apang, ahmei apa te—tân a awm a ni. Chu thilthlâwnpêk hlu tak chu i hmang ṭangkai em? Ṭhenkhat chuan tling lo nia an inhriat avângin, thuhrilhna chu an pumpelh mai thei; nimahsela, Jehova chuan a rawngbâwltute chu thlarau thianghlim a pe ṭhîn a, chu chuan kan thlâkchhamna apiangah min ṭanpui ṭhîn tih hre reng ang che.—Jeremia 1:6-8; 20:11.
18 Jehova chuan Lalram thuhrilh rawngbâwlna chu mi chapo, mahni theihnaa innghatte a kawltîr lo va, a chhiahhlawh inngaitlâwm takte a kawltîr ta zâwk a ni. (1 Korinth 1:20, 26-29) Mi inngaitlâwmte chuan an theih tâwk an hriat kar avângin, thlawhhma rawngbâwlnaa an telin Pathian ṭanpuina an rinchhan ṭhîn a. “Sum enkawltu rinawm,” kaltlanga thlarau lam ṭanpuina Pathian pêkte hi an ngaisâng bawk a ni.—Luka 12:42-44; Thufingte 22:4.
Chhûngkaw Nun Hlim —Thilthlâwnpêk Ṭha
19. Eng thilte’n nge fate hlawhtling taka enkawl tûra min ṭanpui thei?
19 Inneihna leh chhûngkaw nun hlim hi Pathian thilthlâwnpêk a ni. (Ruthi 1:9; Ephesi 3:14, 15) Fanaute pawh hi “LALPA laka rochan” hlu tak an ni a, an laka Pathian mizia hlawhtling taka tuh thei nu leh pate tân hlimna thlentu an ni. (Sâm 127:3) Fa nei i nih chuan, a Thu ang zêla i fate zirtîrin, Jehova thu pawm ang che. Chutianga tite chuan Jehova ṭanpuina leh malsâwmna an dawng ngei ngei ang.—Thufingte 3:5, 6; 22:6; Ephesi 6:1-4.
20. Biakna dik pênsantu fa nei nu leh pate tân eng nge ṭangkai thei?
20 Pathian ṭih nu leh pate’n theihtâwp an chhuah chung pawhin, an fate zînga tuemaw chuan an lo ṭhanlen hunah biakna dik an hawisan pawh a ni thei. (Genesis 26:34, 35) Chu chu nu leh pa tân chuan rilru natna tâwpkhâwk a ni thei a ni. (Thufingte 17:21, 25) Nimahsela, beiseina zawng zawng hlauh mai lova, fapa tlânbo chungchâng Isua tehkhin thu hriat reng chu an tân a ṭangkai thei a ni. Chu fapa tlânbo chuan in kalsanin, kawng ṭha lo zawh mah se, a hnuah chuan a pa, hlim tak leh hmangaih taka lo lâwmtu inah chuan a kîr leh a ni. (Luka 15:11-32) Chuvângin, eng thil pawh thleng se, Kristian nu leh pa rinawmte chuan Jehova’n anmahni a hriatthiamzia, a ngaihtuahzia, leh a ṭanpui rengzia te hi an ring thei a ni.—Sâm 145:14.
21. Tu thu nge kan pawm ang a, engvângin nge?
21 Tichuan, kan zain kan nuna thil pawimawh ber chu i ngaituah ṭheuh vang u. Keimahni leh kan chhûngte tâna hrehawmna min thlen thei, khawvêl hausakna kan ûm em? Nge, “Êngte Pa” hnên ata ‘thilpêk ṭha leh thilpêk famkim zawng zawng chu’ kan ûm zâwk? (Jakoba 1:17) “Dâwt pa,” Setana chuan khawvêl hausakna ûma kan thawh rim a, hlimna leh nunna chân tûrin min duh a ni. (Johana 8:44; Luka 12:15) Jehova erawh chuan min ngaihtuah êm êm a, kan tâna thil ṭha ber a duh thung a ni. (Isaia 48:17, 18) Chuvângin, hmangaihnaa khat kan Pa vâna mi thu chu pawm reng ila, a chungah i “lâwm” reng bawk ang u. (Sâm 37:4) Chutiang kawng chu kan zawh reng chuan, Jehova thilthlâwnpêk hlu tak leh malsâwmna nasa tak chuan min tihausa ang—chutah chuan lungngaihna a tel lo vang. (w01 9/15)
[Footnote]
^ par. 10 Awake!, January 22, 1993, phêk 18-21-na en rawh.
I Hre Chhuak Em?
• Hlimna nasa ber chu khawi aṭanga hmuh theih nge ni?
• A mite hnêna Jehova thilthlâwnpêk ṭhenkhatte chu eng nge ni?
• Engvângin nge thlawhhma rawngbâwlna chu thilthlâwnpêk a nih?
• An fate an enkawlnaa Pathian malsâwmna an dawn theih nân nu leh pate’n eng nge an tih theih?
[Zirlai Atâna Zawhnate]
[Phêk 24-naa milem]
Pathian thilthlâwnpêk a Thu i ngaihhlutzia i lantîr em?
[Phêk 25-naa milem]
Dinhmun harsa tak hnuaiah pawh, Laurel Nisbet-i chuan Pathian rawng ṭhahnemngai takin a bâwl
[Phêk 26-naa milemte]
Tûn laia Kristiante chu Tabithi ang bawkin hmangaihna lantîr kawngah hriat hlawh tak an ni
[Phêk 27-naa milem]
Kristian upate chuan an rinpuite ngaihtuahna tak tak an nei