ယေဟောဝါ၏ကောင်းချီးသည် ကျွန်ုပ်တို့အား ကြွယ်ဝစေ
ယေဟောဝါ၏ကောင်းချီးသည် ကျွန်ုပ်တို့အား ကြွယ်ဝစေ
“ထာဝရဘုရား၏ကောင်းချီးမင်္ဂလာသည် စည်းစိမ်ကိုဖြစ်စေတတ်၏။ ထိုစည်းစိမ်နှင့်လည်း ဝမ်းနည်းခြင်းအကြောင်းကို ရောနှောတော်မမူ။”—သု. ၁၀:၂၂။
၁၊ ၂။ ပျော်ရွှင်မှုသည် ရုပ်ပစ္စည်းကြွယ်ဝချမ်းသာခြင်းနှင့် အဘယ်ကြောင့် မဆက်စပ်သနည်း။
ယနေ့သန်းပေါင်းများစွာသောလူတို့၏အသက်တာကို ဥစ္စာရှာဖွေခြင်းက လွှမ်းမိုးချုပ်ကိုင်ထားသည်။ သို့သော် ရုပ်ပစ္စည်းများက သူတို့ကို ပျော်ရွှင်စေသလော။ “လူတို့သည် မိမိတို့၏ကံကြမ္မာကို ဤမျှစိတ်ပူပန်ကြသည့် အချိန်အခါကို မမှတ်မိပါ” ဟူ၍ ဩစတြေးလျအမျိုးသမီးအပတ်စဉ်ရေးရာမဂ္ဂဇင်းက ဆိုသည်။ ဤသို့ထပ်ဆင့်ဖော်ပြသည်– “ယင်းသည် တွေးရခက်ပေသည်။ ဩစတြေးလျနိုင်ငံသည် စီးပွားရေးအရ အလွန်ကောင်းသည့်အခြေအနေ၌ရှိပြီး ဤထက်သာ၍ကောင်းသော အသက်တာမရှိဟု ဆိုကြသည်။ . . . သို့တိုင် နိုင်ငံတစ်လွှားသို့ကြည့်လျှင် အဆိုးဘက်သို့ရှုမြင်တတ်သည့်သဘော လွှမ်းမိုးနေသည်။ အမျိုးသားနှင့် အမျိုးသမီးများပါ သူတို့၏အသက်တာမှ တစ်စုံတစ်ရာပျောက်ဆုံးနေသည်ဟု ခံစားနေကြရသော်လည်း အဘယ်အရာဖြစ်ကြောင်းကို ဂဃနဏမပြောနိုင်ကြချေ။” ပျော်ရွှင်မှု သို့မဟုတ် အသက်ဟူသည် ကျွန်ုပ်တို့ပိုင်ဆိုင်ရာများအပေါ်မတည်ကြောင်း သမ္မာကျမ်းစာ၌ ညွှန်ပြထားခြင်းမှာ တကယ်မှန်ကန်လိုက်လေခြင်း!—ဒေ. ၅:၁၀; လုကာ ၁၂:၁၅။
၂ အကြီးမားဆုံးပျော်ရွှင်မှုမှာ ဘုရားသခင့်ကောင်းချီးခံစားရခြင်းမှဖြစ်ပေါ်လာကြောင်း သမ္မာကျမ်းစာကသွန်သင်သည်။ ယင်းနှင့်ပတ်သက်၍ နယပုံပြင် ၁၀:၂၂ က ဤသို့ဆိုသည်– “ထာဝရဘုရား၏ကောင်းချီးမင်္ဂလာသည် စည်းစိမ်ကိုဖြစ်စေတတ်၏။ ထိုစည်းစိမ်နှင့်လည်း ဝမ်းနည်းခြင်းအကြောင်းကို ရောနှောတော်မမူ။” စည်းစိမ်ဥစ္စာကို တပ်မက်လွန်းခြင်းမှ ဝမ်းနည်းခြင်း ဖြစ်ပေါ်လာလေ့ရှိ၏။ တမန်တော်ပေါလု ဤသို့သတိပေးခဲ့ခြင်းမှာ ဆီလျော်လှပေသည်– “ငွေရတတ်ခြင်းငှာအလိုရှိသောသူတို့သည် အပြစ်သွေးဆောင်ခြင်း၊ ဖမ်းမိခြင်း၊ မိုက် မဲဖျက်ဆီးတတ်သောတပ်မက်ခြင်းများထဲသို့ ကျရောက်တတ်ကြ၏။ ထိုသူတို့အားဖြင့် လူတို့သည် အကျိုးနည်းခြင်း၊ ပျက်စီးခြင်း၌နစ်မွန်းတတ်ကြ၏။ အကြောင်းမူကား၊ ငွေကိုတပ်မက်ခြင်းသည် မကောင်းသောအမှုအပေါင်းတို့တွင် မူလအမြစ်ဖြစ်သတည်း။ လူအချို့တို့သည် ငွေကိုတပ်မက်သောကြောင့် ယုံကြည်ခြင်းတရားလမ်းမှလွဲသွား၍၊ ပူပန်ခြင်းဝေဒနာများနှင့် ကိုယ်ကိုကိုယ်ထုတ်ချင်းခပ်အောင်ထိုးကြပြီ။”—၁ တိမောသေ ၆:၉၊ ၁၀။
၃။ ဘုရားသခင့်ကျေးကျွန်များသည် စုံစမ်းမှုများကို အဘယ်ကြောင့်ကြုံတွေ့ရကြသနည်း။
၃ အခြားတစ်ဖက်တွင်မူ “[“ယေဟောဝါ၊” ကဘ] ၏စကားတော်ကို နားထောင်” နေသူအားလုံး ဝမ်းနည်းခြင်းမရှိသော ကောင်းချီးများခံစားကြရ၏။ (တရားဟောရာ ၂၈:၂) သို့တိုင် အချို့က ‘ယေဟောဝါပေးသောကောင်းချီးတွင် ဝမ်းနည်းခြင်းမပါလျှင် ဘုရားသခင့်ကျေးကျွန်များစွာသည် အဘယ်ကြောင့် ဆင်းရဲကြရသနည်း’ ဟူ၍မေးကြပေမည်။ ကျွန်ုပ်တို့ခံရသောစုံစမ်းခြင်းများကို ဘုရားသခင်ခွင့်ပြုသော်လည်း အမှန်မှာ စာတန်၊ သူ၏ဆိုးညစ်သောစနစ်နှင့် ကျွန်ုပ်တို့ကိုယ်တိုင်၏ မစုံလင်သောပင်ကိုစိတ်ထားတို့မှ အစပြုကြောင်း သမ္မာကျမ်းစာကဖော်ပြသည်။ (ကမ္ဘာဦး ၆:၅; တရားဟောရာ ၃၂:၄၊ ၅; ယောဟန် ၁၅:၁၉; ယာကုပ် ၁:၁၄၊ ၁၅) ယေဟောဝါသည် “ကောင်းမြတ်စုံလင်သောဆုကျေးဇူးရှိသမျှ” ၏ရင်းမြစ်ဖြစ်တော်မူ၏။ (ယာကုပ် ၁:၁၇) သို့ဖြစ်၍ ကိုယ်တော်၏ကောင်းချီးများသည် ဘယ်သောအခါမျှ ဝမ်းနည်းစရာများ မဖြစ်ပေါ်စေပါ။ ထို့ကြောင့် ဘုရားသခင်၏စုံလင်သောဆုကျေးဇူးအချို့ကို သုံးသပ်ကြည့်ကြစို့။
ဘုရားသခင့်နှုတ်မြွက်စကားတော် —တန်ဖိုးမဖြတ်နိုင်သောဆုကျေးဇူး
၄။ ဤ “အမှုကုန်ရသည့်ကာလ” အတွင်း ယေဟောဝါ၏လူတို့သည် အဘယ်ကောင်းချီးနှင့် အဖိုးမဖြတ်နိုင်သောဆုကျေးဇူးကို ခံစားကြရသနည်း။
၄ “အမှုကုန်ရသည်ကာလ” နှင့်ပတ်သက်၍ ဒံယေလပရောဖက်ပြုချက်က ဤသို့ဖော်ပြသည်– ‘[စစ်မှန်သောအသိ] ပညာ တိုးပွားလာလိမ့်မည်။’ သို့သော် ယင်းကို ဤစကားများက အနည်းငယ်ပြုပြင်သည်– “မတရားသောသူတို့ . . . တစ်ယောက်မျှနားမလည်ရ။ ပညာရှိသောသူတို့မူကား နားလည်ကြလိမ့်မည်။” (ဒံယေလ ၁၂:၄၊ ၁၀) စဉ်းစားကြည့်ပါ! ဘုရားသခင့်စကားတော်—အထူးသဖြင့် ပရောဖက်ပြုချက်—ကို ဘုရားသခင့်ဉာဏ်ပညာဖြင့် ဖော်ပြထားရာ ဆိုးညစ်သောလူတို့သည် ယင်း၏ ဆိုလိုရင်းကို မသိနိုင်သော်လည်း ယေဟောဝါ၏လူတို့မူကား သိရှိနိုင်ကြသည်။ “ကောင်းကင်နှင့်မြေကြီးကို အစိုးရတော်မူသောအဘ၊ ကိုယ်တော်သည် ပညာအလိမ္မာနှင့်ပြည့်စုံသောသူတို့အား ဤအရာများကိုထိမ်ဝှက်ကွယ်ထားလျက် သူငယ်တို့အား ဖော်ပြတော်မူသည်ဖြစ်၍၊ ကျေးဇူးတော်ကို အကျွန်ုပ်ချီးမွမ်းပါ၏” ဟုဘုရားသခင့်သားတော်က ဆုတောင်းခဲ့သည်။ (လုကာ ၁၀:၂၁) ဘုရားသခင့်ထံတော်မှ တန်ဖိုးမဖြတ်နိုင်သောရေးသားထားသည့် နှုတ်မြွက်စကားတော်သမ္မာကျမ်းစာကို ကျွန်ုပ်တို့ရရှိထားခြင်း၊ ယေဟောဝါပေးသော ဝိညာဉ်ရေးရာထိုးထွင်းသိမြင်မှု ရရှိထားသူတို့အလယ်တွင် ကျွန်ုပ်တို့ရှိနေကြခြင်းသည် ထူးမြတ်သောကောင်းချီးပါတကား!—၁ ကောရိန္သု ၁:၂၁၊ ၂၇၊ ၂၈; ၂:၁၄၊ ၁၅။
၅။ ဉာဏ်ပညာကား အဘယ်နည်း၊ ယင်းကို မည်သို့ရရှိနိုင်သနည်း။
၅ “အထက်မှသက်ရောက်သောပညာ” ကို ကျွန်ုပ်တို့မရခဲ့လျှင် ကျွန်ုပ်တို့၌ ဝိညာဉ်ရေးရာထိုးထွင်းသိမြင်မှု လုံးဝရှိမည်မဟုတ်။ (ယာကုပ် ၃:၁၇) ဉာဏ်ပညာဟူသည် ပြဿနာများကိုဖြေရှင်းရန် အသိပညာနှင့် သိနားလည်မှုကို အသုံးပြုနိုင်ခြင်း၊ အန္တရာယ်များကို ရှောင်ရှားရန် သို့မဟုတ် လွှဲဖယ်စေရန်၊ ပန်းတိုင်ရောက်ရန်၊ သို့မဟုတ် ကောင်းသောသွန်သင်ချက်ပေးရန် စွမ်းရည်ရှိခြင်းဖြစ်၏။ ဘုရားသခင့်ရေးရာဉာဏ်ပညာကို ကျွန်ုပ်တို့မည်သို့ရရှိနိုင်သနည်း။ နယပုံပြင် ၂:၆ ကဤသို့ဆိုသည်– “ထာဝရဘုရားသည် ပညာကိုပေးတော်မူတတ်၏။ နားလည်နိုင်သောဉာဏ်သည် နှုတ် [မြွက်စကား] တော်အားဖြင့်သာဖြစ်တတ်၏။” မှန်ပါသည်၊ ရှောလမုန်ဘုရင်အား “ပိုင်းခြား၍သိတတ်သောဉာဏ်” ကို ယေဟောဝါပေးတော်မူသကဲ့သို့ ကျွန်ုပ်တို့သည် ဉာဏ်ပညာရှိဖို့အတွက် စွဲစွဲမြဲမြဲတောင်းဆိုလျှင် ကျွန်ုပ်တို့ကို ကိုယ်တော်ပေးတော်မူမည်။ (၃ ဓမ္မရာဇဝင် ၃:၁၁၊ ၁၂ သမ္မာ; ယာကုပ် ၁:၅-၈) ဉာဏ်ပညာရရှိရန် ယေဟောဝါ၏နှုတ်မြွက်စကားတော်ကို မှန်မှန်လေ့လာပြီး လိုက်နာခြင်းဖြင့် ကိုယ်တော့်စကားကို အမြဲနားထောင်ရမည်။
၆။ ကျွန်ုပ်တို့၏အသက်တာတွင် ဘုရားသခင့်ပညတ်များနှင့် မူများကို လိုက်လျှောက်ခြင်းက အဘယ်ကြောင့် ပညာရှိလမ်းစဉ်ဖြစ်သနည်း။
၆ ဘုရားသခင့်ရေးရာဉာဏ်ပညာ၏ အလွန်အရေးပါသောပုံဥပမာများကို သမ္မာကျမ်းစာပညတ်များနှင့် မူများတွင်တွေ့ရှိရသည်။ ယင်းတို့ဆာလံ ၁၉:၇-၁၀; ၁၁၉:၇၂။
သည် ကျွန်ုပ်တို့အား ကိုယ်ခန္ဓာရေး၊ စိတ္တရေး၊ စိတ်ပိုင်းဆိုင်ရာနှင့်၊ ဝိညာဉ်ရေးအရ နည်းအမျိုးမျိုးဖြင့်အကျိုးပြု၏။ ဆာလံဆရာက ဤသို့ဆီလျော်စွာ သီဆိုခဲ့သည်– “ထာဝရဘုရား၏တရားတော်သည် စုံလင်သည်ဖြစ်၍ စိတ်ဝိညာဉ်ကိုပြုပြင်တတ်၏။ ထာဝရဘုရား၏သက်သေခံတော်မူချက်သည် ဟုတ်မှန်သည်ဖြစ်၍ မလိမ္မာသောသူတို့ကို လိမ္မာစေတတ်၏။ ထာဝရဘုရား၏နည်းဥပဒေသတို့သည် ဖြောင့်မတ်သည်ဖြစ်၍ စိတ်နှလုံးကိုရွှင်လန်းစေတတ်၏။ ထာဝရဘုရား၏ပညတ်တော်သည် စင်ကြယ်သည်ဖြစ်၍ မျက်စိကိုရှင်းလင်းစေတတ်၏။ ထာဝရဘုရားကိုကြောက်ရွံ့ခြင်းသဘောသည် သန့်ရှင်းသည်ဖြစ်၍ ကာလအစဉ်အမြဲတည်၏။ ထာဝရဘုရား၏စီရင်တော်မူချက်တို့သည် သစ္စာတရားနှင့်ညီ၍ တညီတညွတ်တည်းဖြောင့်မတ်ကြ၏။ ရွှေထက်မက များစွာသောရွှေစင်ထက် နှစ်သက်ဖွယ်ဖြစ်” သည်။—၇။ ဘုရားသခင်၏ဖြောင့်မတ်သောမူများကို လျစ်လျူရှုခြင်းမှ အဘယ်ရလဒ်များရရှိသနည်း။
၇ အခြားတစ်ဖက်တွင်မူ ဘုရားသခင်၏ဖြောင့်မတ်သောစံနှုန်းများကို လျစ်လျူရှုသူတို့သည် သူတို့ရရှိလိုကြသော ပျော်ရွှင်မှုနှင့် လွတ်လပ်မှုကို မရကြချေ။ ဘုရားသခင်သည် သူတို့မထီမဲ့မြင်ပြုနိုင်သူမဟုတ်ကြောင်း၊ လူသည် မိမိစိုက်သည့်အတိုင်း ရိတ်ရမည်ဖြစ်ကြောင်း အနှေးနှင့်အမြန် တွေ့ရှိလာကြပေမည်။ (ဂလာတိ ၆:၇) သမ္မာကျမ်းစာမူများကို လျစ်လျူရှုသူ သန်းနှင့်ချီသူတို့သည် မလိုချင်သောကိုယ်ဝန်များ၊ စက်ဆုပ်ရွံရှာဖွယ်ရောဂါများ၊ အားလျော့စေသည့် မူးယစ်ဆေးစွဲခြင်းကဲ့သို့သော ဝမ်းနည်းဖွယ်ရာအကျိုးဆက်များကို ရိတ်သိမ်းလျက်ရှိကြသည်။ ဤသူတို့နောင်တယူကာ သူတို့၏ဘဝလမ်းစဉ်ကို မပြောင်းလဲကြလျှင် အဆုံး၌ သေခြင်းနှင့် ဘုရားသခင့်လက်တော်ဖြင့် ပျက်စီးရလိမ့်မည်။—မဿဲ ၇:၁၃၊ ၁၄။
၈။ ဘုရားသခင့်နှုတ်မြွက်စကားတော်ကို ချစ်မြတ်နိုးသူတို့ အဘယ်ကြောင့်ပျော်ရွှင်ကြသနည်း။
၈ သို့သော် ဘုရားသခင့်နှုတ်မြွက်စကားကို ချစ်မြတ်နိုး၍ ယင်းကို လိုက်လျှောက်သောသူတို့သည် ယခုနှင့် အနာဂတ်တွင် ကြွယ်ဝသောကောင်းချီးများ ခံစားကြရလိမ့်မည်။ သူတို့သည် ဘုရားသခင့်ပညတ်တော်အားဖြင့် လွတ်မြောက်လာခဲ့ကြရာ အမှန်တကယ်ပျော်ရွှင်နေကြပြီး အပြစ်နှင့် ၎င်း၏ဆိုးကျိုးများမှ လုံးလုံးလွတ်မြောက်မည့်အချိန်ကို စိတ်အားထက်သန်စွာ စောင့်မျှော်လျက်ရှိကြသည်။ (ရောမ ၈:၂၀၊ ၂၁; ယာကုပ် ၁:၂၅) ဤမျှော်လင့်ချက်သည် သေချာ၏၊ အကြောင်းမှာ ယင်းသည် လူသားတို့အား ဘုရားသခင်ပေးသော မေတ္တာအပါဆုံးဆုကျေးဇူးဖြစ်သည့် မိမိ၏တစ်ပါးတည်းသောသားတော် ယေရှုခရစ်၏ရွေးနုတ်ဖိုးပူဇော်သကာအပေါ် အခြေပြုသောကြောင့်ဖြစ်သည်။ (မဿဲ ၂၀:၂၈; ယောဟန် ၃:၁၆; ရောမ ၆:၂၃) ထိုသို့သော သာလွန်ထူးကဲသည့် ဆုကျေးဇူးက လူသားတို့အပေါ် ဘုရားသခင်၏မေတ္တာ မည်မျှကြီးမားသည်ကို အတည်ပြုစေပြီး ယေဟောဝါ၏စကား နားထောင်သူအားလုံး အဆုံးမရှိကောင်းချီးခံစားစေမည်ဟု အာမခံသည်။—ရောမ ၈:၃၂။
သန့်ရှင်းသောဝိညာဉ်တော် ဆုကျေးဇူးအတွက် ကျေးဇူးတင်ခြင်း
၉၊ ၁၀။ ယေဟောဝါ၏သန့်ရှင်းသောဝိညာဉ်တော်ဆုကျေးဇူးမှ ကျွန်ုပ်တို့ မည်သို့အကျိုးခံစားရသနည်း။ ဥပမာတစ်ခုပေးပါ။
၉ ကျွန်ုပ်တို့ကျေးဇူးတင်သင့်သည့် ဘုရားသခင်၏ မေတ္တာပါအခြားဆုကျေးဇူးတစ်ခုမှာ သန့်ရှင်းသောဝိညာဉ်တော်ဖြစ်သည်။ စီ.အီး. ၃၃ ပင်တေကုတ္တေပွဲနေ့တွင် တမန်တော်ပေတရုသည် ယေရုရှလင်မြို့ရှိ များစွာသောသူတို့ကို ဤသို့တိုက်တွန်းခဲ့သည်– “သင်တို့၏အပြစ်ကိုလွတ်စေခြင်းငှာ နောင်တရ၍ တစ်ယောက်မျှမကြွင်း၊ ယေရှုခရစ်၏နာမ၌ ဗတ္တိဇံကိုခံကြလော့။ သို့ပြုလျှင် သန့်ရှင်းသောဝိညာဉ်တော်တည်းဟူသော ဆုကျေးဇူးတော်ကို ခံရကြလိမ့်မည်။” (တမန်တော် ၂:၃၈) ယနေ့ ယေဟောဝါသည် ဝိညာဉ်တော်ကို တောင်းခံ၍ ကိုယ်တော့်အလိုတော် ဆောင်ရွက်လိုသူ ဆက်ကပ်အပ်နှံထားသော ကျေးကျွန်များအား သန့်ရှင်းသောဝိညာဉ်တော် ပေးသနားတော်မူသည်။ (လုကာ ၁၁:၉-၁၃) ရှေးအချိန်က စကြဝဠာတွင် ဤတန်ခိုးအကြီးမားဆုံးစွမ်းအင်ဖြစ်သည့် ဘုရားသခင့်သန့်ရှင်းသောဝိညာဉ်တော် သို့မဟုတ် လှုပ်ရှားတတ်သောစွမ်းအားသည် အစောပိုင်းခရစ်ယာန်များအပါအဝင် ယုံကြည်ခြင်းရှိသူ အမျိုးသား၊ အမျိုးသမီးများကို အစွမ်းသတ္တိရှိစေခဲ့သည်။ (ဇာခရိ ၄:၆; တမန်တော် ၄:၃၁) ယေဟောဝါ၏လူမျိုးများအဖြစ် ကြောက်မက်ဖွယ်သောအခက်အခဲများ သို့မဟုတ် စိန်ခေါ်ချက်များကို ကျွန်ုပ်တို့ရင်ဆိုင်ရဦးတော့ ယင်းသည် ကျွန်ုပ်တို့အတွက် အလားတူပြုလုပ်ပေးနိုင်သည်။—ယောလ ၂:၂၈၊ ၂၉။
၁၀ ပိုလီယိုရောဂါစွဲကပ်ခဲ့၍ သံအဆုတ်ထဲ ၃၇ နှစ်တိုင်နေထိုင်ခဲ့ရသူ လော်ရယ်လ်၏ပုံသက်သေကို သုံးသပ်ကြည့်ပါ။ * သူ၏အလွန်ဆိုးဝါးသောအခြေအနေများကြား သူသည် သေသည့်အထိ ဘုရားသခင်ကိုဇွဲရှိရှိ အမှုတော်ဆောင်ခဲ့သည်။ နှစ်များတစ်လျှောက် ယေဟောဝါ၏ကြွယ်ဝသောကောင်းချီးကို လော်ရယ်လ်ခံစားခဲ့ရသည်။ ဥပမာ၊ တစ်ရက်လျှင် ၂၄ နာရီ သံအဆုတ်အတွင်း သူနေခဲ့ရသော်လည်း တိကျသော သမ္မာကျမ်းစာအမှန်တရားကို လူ ၁၇ ဦးအား သိရှိလာစေရန် သူကူညီပေးနိုင်ခဲ့သည်တကား! သူ၏အခြေအနေက တမန်တော်ပေါလု၏ ဤစကားကို ပြန်အမှတ်ရစေသည်– “ငါသည်အားနည်းသောအခါ တန်ခိုးနှင့်ပြည့်စုံလျက်ရှိ၏။” (၂ ကောရိန္သု ၁၂:၁၀) မှန်ပါသည်၊ သတင်းကောင်းဟောပြောရာတွင် ကျွန်ုပ်တို့ခံစားရသည့် မည်သည့်အောင်မြင်မှုမဆိုမှာ ကျွန်ုပ်တို့၏ကိုယ်ပိုင်အစွမ်းအစအားဖြင့်မဟုတ်ဘဲ ဘုရားသခင်၏စကားကို အမြဲနားထောင်သူတို့အား ကိုယ်တော်ပေးသနားတော်မူသော သန့်ရှင်းသောဝိညာဉ်တော်အားဖြင့်ဖြစ်သည်။—ဟေရှာယ ၄၀:၂၉-၃၁။
၁၁။ “လူသစ်” ကို ယူတင်ဝတ်ဆောင်သူတို့တွင် ဘုရားသခင့်ဝိညာဉ်တော်သီးပွင့်စေသည့် အရည်အသွေးများကား အဘယ်နည်း။
၁၁ ကျွန်ုပ်တို့သည် ဘုရားသခင့်စကားကိုနားထောင်မည်ဆိုလျှင် ကိုယ်တော်၏ဝိညာဉ်တော်က ကျွန်ုပ်တို့ကို ချစ်ခြင်း၊ ဝမ်းမြောက်ခြင်း၊ ငြိမ်သက်ခြင်း၊ စိတ်ရှည်ခြင်း၊ ကျေးဇူးပြုခြင်း၊ ကောင်းမြတ်ခြင်း၊ ယုံကြည်ခြင်း၊ နူးညံ့သိမ်မွေ့ခြင်း၊ ချုပ်တည်းခြင်း အရည်အသွေးများရှိစေသည်။ (ဂလာတိ ၅:၂၂၊ ၂၃) ဤ “ဝိညာဉ်ပကတိအကျိုး” သည် ယခင်က ရှိကောင်းရှိခဲ့မည့် လုယူကိုက်စားတတ်သည့် တိရစ္ဆာန်ကဲ့သို့သော အကျင့်စရိုက်များအစား ခရစ်ယာန်များဝတ်ဆင်ခဲ့ကြသည့် “လူသစ်” ၏တစ်စိတ်တစ်ပိုင်းဖြစ်သည်။ (ဧဖက် ၄:၂၀-၂၄; ဟေရှာယ ၁၁:၆-၉) ဤဝိညာဉ်အသီးတွင် အရေးကြီးသည့်အရည်အသွေးကား “စုံလင်ခြင်းအဖွဲ့အစည်းတည်းဟူသော” မေတ္တာပင်တည်း။—ကောလောသဲ ၃:၁၄။
ခရစ်ယာန်မေတ္တာ—မြတ်နိုးရန်ဆုကျေးဇူး
၁၂။ တဗိသနှင့် အခြားပထမရာစုရှိခရစ်ယာန်များသည် မေတ္တာကို မည်သို့ဖော်ပြကြသနည်း။
၁၂ ခရစ်ယာန်မေတ္တာသည် ဘုရားသခင့်ထံတော်မှလာသော ကျွန်ုပ်တို့အမှန်မြတ်နိုးရသည့် ဆုကျေးဇူးနောက်တစ်ခုဖြစ်၏။ ယင်းကို မူဖြင့်ထိန်းချုပ်ထားသော်လည်း ၎င်းသည် သွေးသားသံယောဇဉ်ထက်ပင် ယုံကြည်သူချင်းတို့ကို ပိုမိုရင်းနှီးချစ်ခင်စေသည်။ (ယောဟန် ၁၅:၁၂၊ ၁၃; ၁ ပေတရု ၁:၂၂) ဥပမာ၊ ပထမရာစုမှ အမျိုးသမီးကောင်းတစ်ဦးဖြစ်သူ တဗိသကို သုံးသပ်ကြည့်ပါ။ “ထိုမိန်းမသည် ကောင်းသောအကျင့်၊” အထူးသဖြင့် အသင်းတော်ရှိ မုဆိုးမများအား “စွန့်ကြဲခြင်းအကျင့်နှင့်ပြည့်စုံ” သည်။ (တမန်တော် ၉:၃၆) ဤအမျိုးသမီးများတွင် သူတို့၏သွေးသားရင်းဆွေမျိုးများ ရှိကောင်းရှိပေမည်၊ သို့သော် တဗိသသည် သူတို့ကို အတတ်နိုင်ဆုံး ကူညီအားပေးလိုခဲ့သည်။ (၁ ယောဟန် ၃:၁၈) အလွန်ကောင်းသောပုံသက်သေကို တဗိသပြခဲ့ပါသည်တကား! ညီအစ်ကိုချင်းမေတ္တာက ပြစ်ကိလနှင့် အာကုလတို့အား ပေါလုအတွက် “မိမိတို့လည်ပင်းကိုချထား” ဖို့ လှုံ့ဆော်ပေးခဲ့သည်။ အဆိုပါတမန်တော်သည် ရောမမြို့၌ထောင်ကျနေစဉ် သူ့ကိုကူညီပေးရန် မေတ္တာက ဧပဖြ၊ လုကာ၊ ဩနေသိဖော်နှင့် အခြားသူတို့ကို စေ့ဆော်ပေးခဲ့သည်။ (ရောမ ၁၆:၃၊ ၄; ၂ တိမောသေ ၁:၁၆; ၄:၁၁; ဖိလေမုန် ၂၃၊ ၂၄) မှန်ပါသည်၊ ယနေ့ ထိုသို့သောခရစ်ယာန်များသည် ‘သူတို့အချင်းချင်း၌ မေတ္တာရှိကြ’ ရာ ၎င်းသည် ဘုရားသခင့်ထံတော်မှ ဆုကျေးဇူးတစ်ရပ်ဖြစ်၏၊ ယင်းက သူတို့အား ယေရှု၏ခရစ်ယာန်စစ်များဖြစ်ကြောင်း ဖော်ပြသည်။—ယောဟန် ၁၃:၃၄၊ ၃၅။
၁၃။ ကျွန်ုပ်တို့၏ခရစ်ယာန်ညီအစ်ကိုအသင်းအပင်းကို အလွန်တန်ဖိုးထားလေးမြတ်ကြောင်း မည်သို့ဖော်ပြနိုင်သနည်း။
၁၃ ခရစ်ယာန်အသင်းတော်တွင် ထင်ရှားသောမေတ္တာကို သင်မြတ်ဖိလိပ္ပိ ၁:၉; ဟေဗြဲ ၁၀:၂၄၊ ၂၅။
နိုးသလော။ ကျွန်ုပ်တို့၏ကမ္ဘာချီ ဝိညာဉ်ရေးရာ ညီအစ်ကိုအသင်းအပင်းရှိသည့်အတွက် သင်ကျေးဇူးတင်သလော။ ၎င်းတို့သည်လည်း အထက်မှလာသော ကောင်းချီးများနှင့် နှစ်သက်ဖွယ်ရာဆုကျေးဇူးများ ဖြစ်သည်။ ၎င်းတို့ကို ကျွန်ုပ်တို့တန်ဖိုးထားကြောင်း မည်သို့ဖော်ပြနိုင်သနည်း။ ယေဟောဝါ၏မြင့်မြတ်သောအမှုတော်ကို ထမ်းဆောင်ခြင်း၊ ခရစ်ယာန်စည်းဝေးများတွင် ပါဝင်ခြင်းနှင့် မေတ္တာနှင့် ဘုရားသခင့်သန့်ရှင်းသောဝိညာဉ်တော်အသီးများကို ဖော်ပြခြင်းအားဖြင့်ဖြစ်သည်။—“လူ့အသွင် ဆုလာဘ်များ”
၁၄။ ခရစ်ယာန်တစ်ဦးသည် အကြီးအကဲတစ်ဦး သို့မဟုတ် ဓမ္မအမှုထမ်းတစ်ဦးအဖြစ် အမှုထမ်းဆောင်လိုမည်ဆိုလျှင် အဘယ်အရာလိုအပ်သနည်း။
၁၄ အကြီးအကဲများ သို့မဟုတ် ဓမ္မအမှုထမ်းများအဖြစ် ဝတ်ပြုသူချင်းတို့၏အကျိုးကိုဆောင်လိုသူ ခရစ်ယာန်အမျိုးသားများ၌ မွန်မြတ်သောပန်းတိုင်ရှိသည်။ (၁ တိမောသေ ၃:၁၊ ၈) ဤအခွင့်အရေးများရဖို့အတွက် အရည်အချင်းပြည့်မီရန် ညီအစ်ကိုတစ်ဦးသည် သမ္မာကျမ်းစာကို ပိုင်နိုင်စွာအသုံးပြုတတ်၍ ခရစ်ယာန်ဓမ္မအမှုတွင် ဇွဲရှိသော ဝိညာဉ်ရေးစိတ်ထားရှိသူတစ်ဦး ဖြစ်ရမည်။ (တမန်တော် ၁၈:၂၄; ၁ တိမောသေ ၄:၁၅; ၂ တိမောသေ ၄:၅) သူသည် စိတ်နှိမ့်ချခြင်း၊ ကျိုးနွံခြင်းနှင့် စိတ်ရှည်ခြင်းရှိသူဖြစ်ရမည်၊ အကြောင်းမူကား ရောင့်တက်ပြီး မာနကြီးသည့်အပြင် ရည်မှန်းချက်ကြီးသူများအပေါ် ဘုရားသခင့်ကောင်းချီးများ မသက်ရောက်ချေ။ (သု. ၁၁:၂; ဟေဗြဲ ၆:၁၅; ၃ ယောဟန် ၉၊ ၁၀) သူသည် အိမ်ထောင်သည်ဖြစ်ပါက မိမိအိမ်ထောင်ကို ကောင်းစွာကြီးကြပ်ကွပ်ကဲပေးနိုင်သည့် မေတ္တာပါသောအိမ်ထောင်ဦးစီး ဖြစ်ရပေမည်။ (၁ တိမောသေ ၃:၄၊ ၅၊ ၁၂) ဤသူသည် ဝိညာဉ်ရေးဘက်ကြွယ်ဝမှုကို တန်ဖိုးထားတတ်သောကြောင့် ယေဟောဝါ၏ကောင်းချီးရရှိလိမ့်မည်။—မဿဲ ၆:၁၉-၂၁။
၁၅၊ ၁၆။ မည်သူတို့သည် “လူ့အသွင် ဆုလာဘ်များ” ဖြစ်ကြောင်းသက်သေထူခဲ့ပြီနည်း။ ပုံဥပမာများပေးပါ။
၁၅ အသင်းတော်၌ အကြီးအကဲများအဖြစ် အမှုထမ်းဆောင်သူတို့သည် ဧဝံဂေလိဟောပြောသူများ၊ သိုးထိန်းများ၊ ဆရာသမားများဖြစ်ရန် ကြိုးပမ်းကြသောအခါ ထိုသို့သော “လူ့အသွင် ဆုလာဘ်များ” ကို ကျေးဇူးတင်လေးမြတ်ရန် အကြောင်းကောင်းများရှိစေသည်။ (ဧဖက် ၄:၈၊ ၁၁၊ ကဘ) သူတို့၏မေတ္တာပါသော အကျိုးဆောင်မှုကိုခံစားရသူတို့သည် ကျေးဇူးတင်ကြောင်းကို နှုတ်ဖြင့်အမြဲဖွင့်မပြောသော်လည်း ယေဟောဝါသည် တည်ကြည်သောအကြီးအကဲများ ပြုလေသမျှကို တွေ့မြင်တော်မူသည်။ ဘုရားသခင့်လူများ၏ အကျိုးဆောင်ခြင်းဖြင့် ကိုယ်တော့်နာမကိုထောက်၍ ပြသောမေတ္တာကို ကိုယ်တော် မေ့လျော့တော်မူလိမ့်မည်မဟုတ်ချေ။—၁ တိမောသေ ၅:၁၇; ဟေဗြဲ ၆:၁၀။
၁၆ ဦးနှောက်ခွဲစိတ်ကုသမှုခံယူလုဆဲရှိသည့် ခရစ်ယာန်မိန်းမငယ်လေးတစ်ဦးထံ သွားရောက်လည်ပတ်ခဲ့သော ဝီရိယရှိသည့် အကြီးအကဲတစ်ဦးအကြောင်းကို သုံးသပ်ကြည့်ပါ။ “သူသည် အလွန်ကြင်နာတတ်၊ အကူအညီပေးတတ်၊ ဂရုစိုက်တတ်သူတစ်ဦးဖြစ်သည်” ဟု မိသားစု၏မိတ်ဆွေတစ်ဦးက စာရေးအကြောင်းကြားခဲ့သည်။ “ကျွန်မတို့နှင့်အတူ ယေဟောဝါထံဆုတောင်းဖို့ သူအခွင့်တောင်းခဲ့သည်။ သူဆုတောင်းစဉ် [ယေဟောဝါသက်သေတစ်ဦးမဟုတ်သော] ဖခင်ဖြစ်သူသည် ရှိုက်ကြီးတငင်ငိုချလိုက်ပြီး ဆေးရုံခန်းထဲ၌ရှိသည့် လူတိုင်းပင် မျက်ရည်ကျလာလေသည်။ ထိုအကြီးအကဲ၏ ဆုတောင်းချက်မှာ အလွန်မေတ္တာပါသိမ်မွေ့ပြီး ဤအချိန်အခါမျိုးတွင် သူ့ကို ယေဟောဝါစေလွှတ်လိုက်ခြင်းက မည်မျှမေတ္တာပါလိုက်လေခြင်း!” အခြားသက်သေခံလူနာတစ်ဦးက သူ့ထံလည်ပတ်လာသော အကြီးအကဲများအကြောင်း ဤသို့ပြောပြသည်– “အထူးကြပ်မတ်ကုသဆောင်ထဲ ကျွန်မရဲ့ခုတင်ရှိတဲ့နေရာကို သူတို့လျှောက်လာကြတဲ့အခါ ရှေ့လျှောက်ဘာပဲဖြစ်ဖြစ် ကျွန်မခံရပ်နိုင်မယ်ဆိုတာ ကျွန်မအသေအချာသိတယ်။ ကျွန်မဟာ စိတ်ဓာတ်ကြံ့ခိုင်လာပြီး စိတ်ငြိမ်သက်မှုရှိလာတယ်။” ဤသို့သော မေတ္တာပါစိုးရိမ်ပူပန်ပေးမှုကို မည်သူ ဝယ်ယူနိုင်မည်နည်း။ လုံးဝမဝယ်နိုင်ချေ! ယင်းသည် ဘုရားသခင့်ထံတော်မှ ဆုကျေးဇူးဖြစ်ပြီး ခရစ်ယာန်အသင်းတော်မှတစ်ဆင့် ၎င်းကိုရရှိနိုင်သည်။—ဟေရှာယ ၃၂:၁၊ ၂။
လယ်ကွင်းဓမ္မအမှု ဆုကျေးဇူး
၁၇၊ ၁၈။ (က) ယေဟောဝါသည် မိမိလူမျိုးအားလုံးကို အဘယ်လုပ်ငန်းတော်ဆုကျေးဇူး ပေးသနားသနည်း။ (ခ) ကျွန်ုပ်တို့၏ခရစ်ယာန်ဓမ္မအမှုကို ပြီးမြောက်စေနိုင်ရန် အဘယ်အကူအညီကို ဘုရားသခင်ပေးသနည်း။
၁၇ လူသားအားပေးသော ဂုဏ်တို့တွင် အမြင့်မြတ်ဆုံးသောဘုရား ယေဟောဝါအား ဝတ်ပြုကိုးကွယ်ခြင်းထက် သာ၍ကြီးမြတ်သောဂုဏ် မရှိနိုင်ချေ။ (ဟေရှာယ ၄၃:၁၀; ၂ ကောရိန္သု ၄:၇; ၁ ပေတရု ၂:၉) မည်သို့ပင်ဖြစ်စေ လူထုဓမ္မအမှုတွင် ပါဝင်ခွင့်ကို ဘုရားသခင့်အမှုတော်ဆောင်လိုသူ ယောက်ျားမိန်းမ ကြီးငယ်မရွေး ရရှိနိုင်၏။ ဤအဖိုးတန်သောဆုကျေးဇူးကို သင်အသုံးပြုပါသလော။ အချို့က မိမိတို့သည် အရည်အချင်းမပြည့်မီဟုခံစားရသောကြောင့် တွန့်ဆုတ်နေကြပေမည်၊ သို့သော် ယေဟောဝါ၏အမှုတော်ထမ်းဆောင်သူတို့အပေါ် သန့်ရှင်းသောဝိညာဉ်တော်ကို သွန်းလောင်းတော်မူကြောင်း၊ ယင်းက ကျွန်ုပ်တို့တွင်မရှိသော မည်သည့်အရာကိုမဆို ဖြည့်စွက်ပေးနိုင်ကြောင်း သတိရပါ။—ယေရမိ ၁:၆-၈; ၂၀:၁၁။
၁၈ ယေဟောဝါသည် ဘုရားသခင့်နိုင်ငံတော် ဟောပြောခြင်းလုပ်ငန်းကို မာနကြီးသူ၊ ကိုယ့်အားကိုယ်ကိုးသူတို့အားမဟုတ်ဘဲ စိတ်နှိမ့်ချသော မိမိ၏ကျေးကျွန်များအား လွှဲအပ်ထားတော်မူသည်။ (၁ ကောရိန္သု ၁:၂၀၊ ၂၆-၂၉) စိတ်နှိမ့်ချ၍ ကျိုးနွံသူတို့သည် လယ်ကွင်းဓမ္မအမှုတွင် ပါဝင်ကြစဉ် မိမိတို့၏ကန့်သတ်ချက်များကို အသိအမှတ်ပြုကာ ဘုရားသခင့်အကူအညီရဖို့ မျှော်လင့်ကြသည်။ သူတို့သည် ‘သစ္စာရှိကျွန်’ မှတစ်ဆင့် ကိုယ်တော်ပေးတော်မူသည့် ဝိညာဉ်ရေးရာအထောက်အပံ့ကိုလည်း တန်ဖိုးထားကြသည်။—လုကာ ၁၂:၄၂-၄၄; သု. ၂၂:၄။
ပျော်ရွှင်သောမိသားစု—ကောင်းမွန်သောဆုကျေးဇူး
၁၉။ သားသမီးများမွေးမြူရေး၌ အဘယ်အချက်များက အောင်မြင်မှုရရှိစေသနည်း။
၁၉ အိမ်ထောင်ရေးနှင့် ပျော်ရွှင်သောမိသားစုဘဝသည် ဘုရားသခင့်ထံတော်မှ ဆုကျေးဇူးများဖြစ်သည်။ (ရုသ ၁:၉; ဧဖက် ၃:၁၄၊ ၁၅) ကလေးများသည်လည်း ‘ယေဟောဝါထံမှ [တန်ဖိုးရှိ] အမွေဥစ္စာ’ ဖြစ်ပြီး သူတို့တွင် ဘုရားသခင့်ရေးရာ အရည်အသွေးများ အောင်မြင်စွာသွတ်သွင်းပေးသော မိဘများအတွက် ပျော်ရွှင်စရာဖြစ်သည်။ (ဆာလံ ၁၂၇:၃) သင်သည် မိဘတစ်ဦးဖြစ်မည်ဆိုလျှင် ယေဟောဝါ၏နှုတ်မြွက်စကားတော်အတိုင်း သင့်ကလေးငယ်များကို လေ့ကျင့်သွန်သင်ပေးခြင်းဖြင့် ကိုယ်တော့်စကားသံကို နားစွင့်နေပါ။ ထိုသို့ပြုမူသူတို့သည် ယေဟောဝါ၏ထောက်ပံ့မှုနှင့် ကြွယ်ဝသောကောင်းချီးကို ခံစားရကြရန်သေချာပါသည်။—သု. ၃:၅၊ ၆; ၂၂:၆; ဧဖက် ၆:၁-၄။
၂၀။ စစ်မှန်သောဝတ်ပြုရေးမှ သွေဖည်သွားသည့် သားသမီးများရှိသူ မိဘများအတွက် အဘယ်အရာက အကူအညီဖြစ်စေမည်နည်း။
၂၀ ဘုရားသခင့်ရေးရာကိုရှေးရှုသော မိဘများသည် တာဝန်ကျေပွန်စွာကြိုးစားခဲ့သည့်ကြားမှပင် သူတို့၏သားသမီးများ ကြီးပြင်းလာကြသောအခါ သူတို့အထဲမှ အချို့သည် စစ်မှန်သောဝတ်ပြုရေးမှ သွေဖည်သွားကြပေမည်။ (ကမ္ဘာဦး ၂၆:၃၄၊ ၃၅) ယင်းက မိဘများ အကြီးအကျယ်စိတ်ပျက်စရာဖြစ်နိုင်သည်။ (သု. ၁၇:၂၁၊ ၂၅) သို့သော် မျှော်လင့်ချက်အားလုံးလက်လျော့လိုက်မည့်အစား ယေရှု၏သားမိုက်ပုံဥပမာကို သူတို့အမှတ်ရခြင်းက အကူအညီဖြစ်ပေမည်။ ထိုသားသည် အိမ်မှထွက်ခွာသွား၍ ထင်ရာစိုင်းခဲ့သော်လည်း နောက်ပိုင်းတွင် သူ့အား ရွှင်လန်းစွာ၊ မေတ္တာဖြင့်လက်ခံခဲ့သည့် ဖခင်အိမ်သို့ပြန်လာခဲ့သည်။ (လုကာ ၁၅:၁၁-၃၂) မည်သို့ပင်ဖြစ်ပျက်ပါလေစေ တည်ကြည်သောခရစ်ယာန်မိဘများသည် ယေဟောဝါ၏သိနားလည်မှု၊ ကိုယ်တော်၏မေတ္တာပါသော စိုးရိမ်ပူပန်မှုနှင့် ကိုယ်တော်၏ထောက်ပံ့ကူညီမှု အမြဲရရှိမည်ကို ယုံကြည်စိတ်ချနိုင်ကြသည်။—ဆာလံ ၁၄၅:၁၄။
၂၁။ မည်သူ့ကို ကျွန်ုပ်တို့နားထောင်သင့်နည်း၊ အဘယ်ကြောင့်နည်း။
၂၁ သို့ဖြစ်၍ ကျွန်ုပ်တို့တစ်ဦးစီအနေဖြင့် ကျွန်ုပ်တို့၏ဘဝအသက်တာတွင် အဘယ်အရာသည် အမှန်တကယ်အရေးကြီးကြောင်း ပိုင်းခြားကြည့်ပါ။ ကျွန်ုပ်တို့သည် ကျွန်ုပ်တို့နှင့် ကျွန်ုပ်တို့၏မိသားစုများအတွက် ဝမ်းနည်းစရာဖြစ်စေနိုင်မည့် စည်းစိမ်ဥစ္စာကို မက်မက်မောမောရှာဖွေနေကြသလော။ သို့မဟုတ် “အလင်းတို့၏အဘထံတော်က” သက်ရောက်သည့် “ကောင်းမြတ်စုံလင်သောဆုကျေးဇူး” ကိုရရှိဖို့ ကျွန်ုပ်တို့ကြိုးစားနေကြသလော။ (ယာကုပ် ၁:၁၇) “မုသာ၏အဘ” စာတန်သည် ကျွန်ုပ်တို့အား စည်းစိမ်ဥစ္စာအတွက် အားကုန်ကြိုးပမ်းစေလိုသည်၊ သို့ဖြင့် ပျော်ရွှင်မှုနှင့် အသက်ကိုပါ လက်လွှတ်ဆုံးရှုံးစေလိုသည်။ (ယောဟန် ၈:၄၄; လုကာ ၁၂:၁၅) သို့သော် ယေဟောဝါသည် ကျွန်ုပ်တို့၏အကောင်းဆုံးအကျိုးကို လိုလားတော်မူသည်။ (ဟေရှာယ ၄၈:၁၇၊ ၁၈) သို့ဖြစ်၍ ကျွန်ုပ်တို့၏မေတ္တာရှင်ကောင်းကင်ခမည်းတော်၏စကားကို အစဉ်အမြဲနားထောင်လျက် ကိုယ်တော်၌ “မွေ့လျော်” ကြပါစို့။ (ဆာလံ ၃၇:၄) ယင်းသို့သောလမ်းစဉ်ကို ကျွန်ုပ်တို့လိုက်လျှောက်မည်ဆိုလျှင် ယေဟောဝါ၏တန်ဖိုးမဖြတ်နိုင်သော ဆုကျေးဇူးများနှင့် မြောက်မြားလှသောကောင်းချီးသည် ကျွန်ုပ်တို့ကို ဝမ်းနည်းစရာအကြောင်း လုံးဝမရှိစေဘဲ ကြွယ်ဝချမ်းသာစေလိမ့်မည်။
[အောက်ခြေမှတ်ချက်]
^ အပိုဒ်၊ 10 နိုးလော့! ၁၉၉၃၊ ဇွန်လ ၈ ရက်၊ စာမျက်နှာ ၂၀-၂၃ ရှု။
သင်မှတ်မိသလော
• အကြီးမားဆုံးသောပျော်ရွှင်မှုကို မည်သည့်နေရာတွင် ကျွန်ုပ်တို့တွေ့ရှိနိုင်ကြသနည်း။
• မိမိလူတို့အား ယေဟောဝါပေးတော်မူသော ဆုကျေးဇူးအချို့ကား အဘယ်နည်း။
• လယ်ကွင်းဓမ္မအမှုသည် အဘယ်ကြောင့် ဆုကျေးဇူးတစ်ရပ်ဖြစ်သနည်း။
• မိဘများသည် မိမိတို့၏သားသမီးများကို မွေးမြူပျိုးထောင်ပေးစဉ် ဘုရားသခင့်ကောင်းချီးခံစားရရန် အဘယ်အရာကိုပြုလုပ်နိုင်သနည်း။
[လေ့လာရန်မေးခွန်းများ]
[စာမျက်နှာ ၁၆ ပါ ရုပ်ပုံ]
ဘုရားသခင်၏ ရေးသားထားသော နှုတ်မြွက်စကားတော်ဆုကျေးဇူးအတွက် တန်ဖိုးထားလေးမြတ်မှု သင်တင်ပြပါသလော
[စာမျက်နှာ ၁၇ ပါ ရုပ်ပုံ]
အလွန်ခက်ခဲသောအခြေအနေများကြားမှ လော်ရယ်လ်နစ္စဘက်သည် ဇွဲရှိရှိဖြင့် ဘုရားသခင့်အမှုတော်ဆောင်ခဲ့
[စာမျက်နှာ ၁၈ ပါ ရုပ်ပုံ]
တဗိသကဲ့သို့ပင် မျက်မှောက်ခေတ်ခရစ်ယာန်များသည် သူတို့၏မေတ္တာပါလုပ်ရပ်များအတွက် လူသိများကြ
[စာမျက်နှာ ၁၉ ပါ ရုပ်ပုံ]
ခရစ်ယာန်အကြီးအကဲများသည် ယုံကြည်သူချင်းတို့အတွက် မေတ္တာပါပါ စိုးရိမ်ပူပန်ကြ