Na te Akameitakianga a Iehova e Apingai Tatou
Na te Akameitakianga a Iehova e Apingai Tatou
“Na Iehova te meitaki i apingaʼi te apinga, kare oki e kapiti katoaia mai te kino i te reira.”—MASELI 10:22.
1, 2. Eaa ra te mataora anga i kore ei e akapiriia mai ma te apinganui pae kopapa ra?
TE AKATERE ra te noinoi apinga i te au oraanga o te aronga e au mirioni ua atu i teia tuatau. Inara te akamataora ra ainei te au apinga kopapa ia ratou? “Kare au e maara ana i tetai tuatau i kino roai te maromaroa o te au tangata no to ratou turanga,” i akakite mai ei The Australian Women’s Weekly. Kua akakite katoa maira: “E mea tuke rai ia. Te tuatuaia maira kia tatou e tei roto a Autireria i tetai turanga meitaki i te pae puapinga, e kare te oraanga i meitaki atu i mua ana. . . . Inara te tupu maata ra te manako anga kino takapini i taua enua ra. Te au tane e te au vaine aiteite to ratou ra manako e te ngere ra ratou i tetai apinga i to ratou au oraanga inara kare i kite i te akataka e eaa tikai te reira.” Mei teaa ra te tika ta te au Tuatua Tapu i te tou mai anga e kare te mataora e te ora anga e tupu mai mei ta tatou au apinga maata i rauka ra!—Koheleta 5:10; Luka 12:15.
2 Te apii maira te Pipiria e ko te mataora anga maata no ko mai i ta te Atua akameitakianga ra. No teia ra, te tuatua ra a Maseli 10:22: “Na Iehova te meitaki i apingaʼi te apinga, kare oki e kapiti katoaia mai te kino i te reira.” E putuputu te kino i te tupu mai i te tu noinoi no te au apinga kopapa. E tau ra, ta te apotetoro ko Paulo akamatakite anga: “Te aronga e māro e kia maata te apinga, e rokoia ïa e te timataanga, e te ereere, e te anoano neneva e manganui, e kino ei ra, e maremo takiri atu ei te tangata ki roto i te pou e te mate. Ko te anoano maata oki i te moni te tumu o te au kino katoa nei; kua taka ke rava oki tetai aronga i te akarongo nei, i te umuumu anga i te reira, e kua ko mama rava ia ratou uaorai i te iriea e manganui.”—1 Timoteo 6:9, 10.
3. Eaa ra te au tavini o te Atua i kite ei i te au timataanga?
3 I tetai pae, ko te au meitaki te ka vai mai ki te aronga katoa tei ‘akarongo i te reo o Iehova.’ (Deuteronomi 28:2) Inara, penei ka ui tetai papaki, ‘Me kare e kino e kapitiia atu ki te meitaki na Iehova ra, eaa etai au tavini e manganui o te Atua ra i kino ei?’ Te akakite maira te Pipiria e te tuku ua ra te Atua i to tatou au timataanga kia tupu mari ra kua akamata mai ia Satani, e tana akatereanga kino, e to tatou uaorai tu apa ua ra. (Genese 6:5; Deuteronomi 32:4, 5; Ioane 15:19; Iakobo 1:14, 15) Ko Iehova te tumu o “te au mea memeitaki i o maiia ra, e te au mea tika ravarai.” (Iakobo 1:17) No reira, kare tana au meitaki e akatupu i te kino. No reira e akamanako tatou i etai o ta te Atua au mea memeitaki ra.
Te Tuatua a te Atua—E Apinga Aroa Okomaata Ia
4. Eaa te akameitakianga e te apinga aroa okomaata te rekarekaia ra e te au tangata o Iehova i roto i teia “tuatau openga ra”?
4 No runga i “te tuatau openga ra,” te tuatua ra ta Daniela totou: “E tupu atura te kite i te maata anga.” Inara, kua akatakaia teia e te au tuatua: “Kare oki tetai o te aronga kino e kite, e kite ra te aronga pakari.” (Daniela 12:4, 10) E tamanako ana i te reira! Te Tuatua a te Atua—i te totou tikai—te akakiteia maira ma taua pakari tu-Atua ra e kare te aronga rave i te kino e kite tikai i te aite anga o te reira, inara ka kite te au tangata o Iehova. “E akameitaki au ia koe, e taku Metua, te Atu no te rangi e te enua,” ta te Tamaiti a te Atua i pure, “i te mea ko koe i uuna ke atu i teianei au mea i te aronga pakari e te kite, e kua akakite mai ki te tamariki nei.” (Luka 10:21) Mei teaa ra te akameitakianga te reira kia rauka te apinga okomaata te Tuatua tataia a te Atua, koia te Pipiria, e kia o atu ki roto i te aronga ta Iehova ra i oronga atu i te kite oonu i te pae vaerua!—1 Korinetia 1:21, 27, 28; 2:14, 15.
5. Eaa te pakari, e akapeea e raukai ia tatou?
5 Kare e rauka ia tatou te kite oonu i te pae vaerua naringa kare “te pakari no runga maira.” (Iakobo 3:17) Te pakari ko te kite ia kia taangaanga i te kite e te marama kia akakore i te au manamanata, kia kopae me kare kia akaariu ke atu i te kino, kia rauka te au akakoroanga, me kare kia oronga i te akoanga tau. Akapeea e raukai ia tatou te pakari tau i te Atua ra? Te tuatua ra Maseli 2:6: “Ko Iehova oki tei oronga mai i te pakari: no roto i tona vaa te kite e te karape.” Ae, ka akameitaki mai a Iehova ia tatou ma te pakari me aruaru tatou i te pureanga no te reira, mei tana i oronga ra ki te Ariki ko Solomona “i te ngakau karape e te kite.” (1 Ariki 3:11, 12; Iakobo 1:5-8) E raukai te pakari, ka tika katoa tatou kia tamou marie i te akarongoanga kia Iehova na te apiianga putuputu e te akonoanga i tana Tuatua.
6. Eaa ra i riro ei ei aerenga pakari kia akono i te au ture e te au kaveinga a te Atua i to tatou oraanga?
6 Te au akatauanga maata no te pakari tau i te Atua te kitea ra i roto i te au ture e te au kaveinga o te Pipiria. Ka puapingaia tatou e te reira i te au tu ravarai—i te pae kopapa, te manako, te manako ngakau, e te pae vaerua oki. Kua tau ta te tata taramo i te imene anga: “Ko te ture a Iehova kare e apa, i te akaariu anga i te vaerua; te tuatua-akakite a Iehova, e mea mou ïa, e pakari ei te kamakura. Te akonoanga a Iehova, e mea tika ïa, e rekarekaʼi te ngakau; te akauenga a Iehova, e mea viivii kore ïa, e māramaʼi te mata nei. Te mataku ia Iehova, e mea viivii kore ïa, ka tu ïa e rimua; te tuatua-tau a Iehova, e mea mou ïa, e mea tika anake ïa. E apinga anoano maataia ïa i to te auro, i te auro maata ra e te memeitaki.”—Salamo 19:7-10; 119:72.
7. Eaa te au tupu anga no te akakoreanga i ta te Atua ra au turanga tuatua tika?
7 I tetai pae, te aronga tei manako kore i ta te Atua au turanga tuatua tika kare e kite i te mataora e te tu rangatira ta ratou e kimi ra. Kare e roaia, ka kitea e ratou e kare te Atua i tetai kia aviriia, no te mea ka kokoti te tangata i tana i ruru ra. (Galatia 6:7) E au mirioni ua atu tei manako kore ra i te au kaveinga Pipiria te kokoti ra i taua au tupuanga tumatetenga ra mei te au nuianga anoano koreia ra, te au maki mate kikino, me kare te au ravenga apinga akakona tei akaparuparu ra. Na to ratou taui anga tataraara anake i to ratou aerenga i te oraanga, te taki atura to ratou arataa ia ratou ki te matenga e penei ki te akapouanga a te rima o te Atua ra.—Mataio 7:13, 14.
8. Eaa ra i mataorai te aronga inangaro i te Tuatua a te Atua ra?
8 Inara, ko te aronga te inangaro ra i te Tuatua a te Atua e te akono ra i te reira ka vai tika mai rai te au akameitakianga maata no ratou i teianei e i te tuatau ki mua. Ka tika ra to ratou manako ngakau i te tatara angaia e te ture a te Atua ra, e ka mataora tikai, e ka tatari meitaki atu i te tuatau e akarangatiraiai ratou mei te ara mai e tona au tupu anga kikino oki. (Roma 8:20, 21; Iakobo 1:25) E mea papu teianei manakonako anga no te mea te akanooia ra ki rungao i ta te Atua ra apinga aroa maata rava—koia te atinga oko o tana Tamaiti anau tai, ko Iesu Karaiti. (Mataio 20:28; Ioane 3:16; Roma 6:23) Te akapapu meitaki maira taua apinga aroa maata ra i te oonu o to te Atua ra aroa no te au tangata e te akapapu maira i te au akameitakianga mutu kore no te aronga katoatoa te ka tamou marie i te akarongoanga ia Iehova.—Roma 8:32.
Akameitaki Anga no te Apinga Orongaia Mai ko te Vaerua Tapu
9, 10. Akapeea tatou i puapingaiai mei te vaerua tapu e apinga meitaki na Iehova ra? E oronga mai i tetai akatauanga.
9 Ko tetai atu apinga aroa a te Atua ka tau tatou kia akameitaki ko tona vaerua tapu ia. I te ra o Penetekote 33 T.N., kua raurau te apotetoro ko Petero i te aronga tini i Ierusalema ra: “E tataraara, e kia bapetizoia, kotou ravarai, i roto i te ingoa o Iesu Mesia, kia matara te ara; e ka orongaia mai ïa te Vaerua Tapu kia kotou.” (Angaanga 2:38) I teia tuatau, te oronga ra Iehova i te vaerua tapu ki tona au tavini akatapuia tei pure ra no te reira e te inangaro ra kia rave i tona anoano. (Luka 11:9-13) I te au tuatau i taito ra, ko te mana ririnui maata i te ao katoa e pini ua ake—ko te vaerua tapu o te Atua ra, me kare mana rave angaanga—kua akamaroiroi maira i te au tangata e te au vaine akarongo, kapiti katoa i te au Kerititiano mua ra. (Zekaria 4:6; Angaanga 4:31) Ka rauka i te reira kia rave aiteite no tatou, noatu me ka aro atura tatou i te au arairai anga maata me kare te au akaaoanga ei au tangata no Iehova.—Ioela 2:28, 29.
10 E akamanako ana i te akatauanga a Laurel, tei makiia ra e te polio e kua noo ki roto i tetai ate mama auri no te 37 mataiti. * Noatu rai tona au turanga kino roa, kua tavini totomapu aia i te Atua e tae roa ki tona matenga. I taua au mataiti katoa ra, kua vairai te akameitaki anga maata a Iehova kia Laurel. Ei akatauanga, kua rauka iaia te tauturu i etai 17 aronga tataki tai kia rauka te kite tika i te tuatua mou Pipiria, noatu rai e kua akapiriia atu aia ki tona matini e 24 ora i te ra! Te akamaaraara maira tona turanga i te au tuatua a te apotetoro ko Paulo ra: “Kia paruparu oki au ra, te maroiroi ra au i reira.” (2 Korinetia 12:10) Ae, ko tetai ua atu autu anga ka rauka ia tatou i te tutuanga i te tuatua meitaki te aere maira, kare no to tatou uaorai kite e te mana, mari ra mei ko mai i te tauturu a te vaerua tapu o te Atua ra, tana e oronga maira ki te aronga te tamou marie ra i te akarongoanga i tona reo.—Isaia 40:29-31.
11. Eaa te au tu ta te vaerua o te Atua e akatupu ra i roto i te aronga tei “akatangata ou” ra?
11 Me akarongo meitaki tatou ki te Atua, na tona vaerua tapu e akatupu ki roto ia tatou te au tu te inangaro, te rekareka, te au, te akakoromaki, te takinga meitaki, te meitaki, te pikikaa kore, te maru, e te akono meitaki. (Galatia 5:22, 23) Ko ta te “vaerua e akatupu” e tuanga no te “akatangata ou” ta te au Kerititiano ka kakau ei mono i tetai ua atu au tu kino, mei te puaka taae rai ta ratou i akakite i mua ana. (Ephesia 4:22-24; Isaia 11:6-9) Tei puapinga maata rava i teianei au ua ko te aroa ia, “ko taua tatua apa kore ua ra ïa.”—Kolosa 3:14.
Te Aroa Kerititiano—E Apinga kia Akaperepereia
12. Akapeea ra a Tabita e etai atu au Kerititiano o te anere mataiti mua ra i te akakite anga i te aroa?
12 Ko te aroa Kerititiano tetai atu apinga akameitakiia mei ko mai ia Iehova ra—tetai ka tika kia akaperepere tatou. Te akatereia ra te reira e te kaveinga, inara no tona apinganui i te inangaro te kika maira i te aronga akarongo kia piri vaitata atu i te ka rauka i ta te au pirianga kopapa. (Ioane 15:12, 13; 1 Petero 1:22) Ei akatauanga, e akamanako ana ia Tabita, ko tetai vaine Kerititiano meitaki no te anere mataiti mua ra. “Kua ki oki taua vaine ra i te angaanga meitaki tana i rave ra, e te oronga oki i te apinga,” no te au vaine takaua tikai i roto i te putuputuanga ra. (Angaanga 9:36) Penei e au kopu tangata to taua au vaine ra, inara kua anoano a Tabita kia rave i te ka rauka iaia kia tauturu e kia akamaroiroi atu ia ratou ra. (1 Ioane 3:18) Mei teaa ra tetai akatauanga meitaki ta Tabita i akanoo mai! Na te aroa taeake i akakeu ia Peresila raua ko Akuila kia ‘tuku i to raua uaorai kaki ki raro’ no Paulo ra. Na te aroa katoa i akakeu ia Epaphera, ia Luka, ia Onesiphoro e etai atura kia tauturu i te apotetoro ra iaia i roto i te tapekaanga i Roma. (Roma 16:3, 4; 2 Timoteo 1:16; 4:11; Philemona 23, 24) Ae, te au Kerititiano mei te reira te tu i teia tuatau ‘te aroa ra ia ratou uaorai,’ ei apinga akameitakiia mei te Atua ra te akataka ra ia ratou ei au pipi mou na Iesu.—Ioane 13:34, 35.
13. Akapeea tatou me akaari e te ariki oonu ra tatou i to tatou taokotai anga taeake Kerititiano?
13 Te akaperepere ra ainei koe i te aroa te akakiteia ra i roto i te putuputuanga Kerititiano? Te akameitaki ra ainei koe no to tatou taeake anga pae vaerua, te koropini nei i te ao katoa? Ko teianei katoa e au apinga akameitakiia e te puapinga mei runga maira. Akapeea tatou me akaari e te manako maata ra tatou ia ratou? Na te tavinianga i te Atua ra, na te kapitianga i te au uipaanga Kerititiano, e te akakiteanga i te aroa e etai atu ua o te vaerua o te Atua ra.—Philipi 1:9; Ebera 10:24, 25.
“Te Meitaki i te Tangata Nei”
14. Eaa te umuumuia maira no tetai Kerititiano me kia tavini aia ei tangata pakari me kare ei tavini orometua?
14 Te au tangata Kerititiano tei anoano ra kia tavini atu i to ratou au oa akamori ei aronga pakari me kare ei au tavini orometua e akakoroanga meitaki ta ratou. (1 Timoteo 3:1, 8) E tau ei no teianei au taoonga, ka tika te taeake kia riro ei tangata pae vaerua, kia kite meitaki i te au Tuatua Tapu e kia maroiroi i roto i te angaanga orometua tutu aerenga. (Angaanga 18:24; 1 Timoteo 4:15; 2 Timoteo 4:5) Ka tika aia kia akakite i te tu akaaka, te mako, e te akakoromaki oki, no te mea kare te au akameitakianga tu-Atua e vai mai i te au tangata akateitei maata ia ratou uaorai, te ngakau parau, e te inangaro kia akateiteiia. (Maseli 11:2; Ebera 6:15; 3 Ioane 9, 10) Me kua akaipoipo, ka tau aia ei upoko aroa no te pamiri e kia akono meitaki i te akatereanga i tona ngutuare tangata katoa. (1 Timoteo 3:4, 5, 12) No te mea te manako maata ra aia i te au apinga pae vaerua, ka pati taua tu tangata ra i ta Iehova akameitakianga.—Mataio 6:19-21.
15, 16. Koai ma tei akapapu ia ratou ei “meitaki i te tangata nei”? E oronga mai i te au akatauanga.
15 Me tauta maata te aronga te tavini ra ei aronga pakari ia ratou uaorai ei aronga tutu evangeria, ei au tiaki, e ei au orometua oki, ka oronga mai ratou i te tumu tau no tatou kia ariki ia ratou ei “meitaki i te tangata nei.” (Ephesia 4:8, 11) Te aronga tei puapingaia mei ta ratou tavinianga aroa penei kare e akakite i to ratou arikianga, mari ra te kite ra Iehova i ta te aronga pakari tiratiratu katoa e rave ra. Kare e ngaropoina iaia te inangaro ta ratou i akaari no tona ingoa ra na te tavinianga i tona au tangata.—1 Timoteo 5:17; Ebera 6:10.
16 E akamanako ana i te turanga o tetai tangata pakari i rave angaanga maata ra tei aere atura i te atoro i tetai tamaine Kerititiano te vaitata ra e kia vaiia tona roro. “E takinga meitaki tikai aia, e turu meitaki, e te utuutuanga,” ta tetai oa o te pamiri ra i tata. “Kua pati mai aia kia akatikaia kia pure kia Iehova ma matou katoa. I tana pure anga, kua aue te metua tane [kare ra e ko tetai o te Au Kite o Iehova], e kua tae mai te roimata mei te au mata o te katoatoa i roto i taua pia o te are maki ra. Mei teaa ra te maru o te pure anga a taua tangata pakari ra, e mei teaa katoa oki te aroa o Iehova i tono mai iaia i taua tuatau tikai ra!” Kua tuatua tetai atu vaine maki e Kite, no te aronga pakari tei aere atura i te atoro iaia: “I to ratou aereanga mai ki toku roi i roto i te ngai akonoanga takake, kua kite au e noatu eaa te ka tupu mei te reira maira, ka rauka iaku kia akakoromaki i te reira. Kua riro au kia maroiroi e kia ponuiaau oki.” Ka rauka ainei i tetai i te oko mai i taua tu manako anga aroa ra? Kare rava! E meitaki te reira mei ko mai i te Atua ra, kua rauka mai na roto i te putuputuanga Kerititiano ra.—Isaia 32:1, 2.
Te Meitaki o te Angaanga Orometua Tutu Aerenga
17, 18. (a) Eaa te meitaki o te tavini anga ta Iehova ra i oronga mai ki tona au tangata katoa? (e) Eaa ta te Atua ra tauturu i oronga mai e raukai ia tatou te akono i ta tatou angaanga orometua?
17 Kare e ngateitei maata atu kia orongaia ki runga i tetai ua atu tangata e i te tavinianga ia Iehova ra, koia tei Teitei Rava. (Isaia 43:10; 2 Korinetia 4:7; 1 Petero 2:9) Inara, ko te tika kia piri atu ki roto i te angaanga orometua ki te au tangata te tuera ua ra ki te katoatoa—te aronga ou e te ruaine, te tane e te vaine—tei inangaro tika ra kia tavini i te Atua. Te taangaanga ra ainei koe i teianei meitaki okomaata? Penei ka unui tetai papaki ki muri no to ratou manako ngakau e e tau kore ratou, inara kia maara e te oronga maira Iehova i te vaerua tapu ki te aronga te tavini ra iaia, e na te reira e oronga mai i tetai ua atu ngere anga ia tatou nei.—Ieremia 1:6-8; 20:11.
18 Kua oronga atu a Iehova i te angaanga tutuanga i te Patireia ki tona au tavini akaaka, kare ki te aronga te manako ngakau parau ra e te irinaki ra ki to ratou uaorai au kite. (1 Korinetia 1:20, 26-29) Te au tangata akaaka, e te mako te akatika ra e e au kotinga to ratou e te irinaki ra ki runga i ta te Atua ra tauturu ia ratou e rave ra i te angaanga orometua tutu aerenga. Te ariki katoa ra ratou i te tauturu anga pae vaerua tana i oronga mai na roto i “te akaaere pikikaa kore.”—Luka 12:42-44; Maseli 22:4.
Oraanga Pamiri Mataora—Tetai Apinga Meitaki
19. Eaa te au tika te taki atura ki te autu anga i te akonoanga i te au tamariki?
19 Te akaipoipo anga e te oraanga pamiri mataora e au apinga meitaki ia mei te Atua maira. (Ruta 1:9; Ephesia 3:14, 15) Te tamariki katoa oki e okomaata “e tuanga ïa no ko ia Iehova ra,” tei apai mai i te rekareka ki te au metua tei autu ra i te tuku anga i te au tu tau i te Atua ki roto ia ratou. (Salamo 127:3) Me ko koe tetai e metua, e akarongo tamou marie i te reo o Iehova na te terenianga i taau au tamariki kia tau ki tana Tuatua. Te aronga te ka rave i te reira ka papu te kite i ta Iehova ra turu anga e te akameitakianga maata.—Maseli 3:5, 6; 22:6; Ephesia 6:1-4.
20. Penei eaa te ka tauturu i te au metua tei akaruke ra ta ratou tamariki i te akamori anga mou?
20 Noatu rai te au tauta anga ngakau tae a te au metua akono tau i te Atua ra, penei ko etai o ta ratou tamariki ka iki kia ariu ke atu mei te akamori anga mou me pakarikari mai ratou. (Genese 26:34, 35) Ka riro teia ei manako ngakau mamaeanga ki te au metua. (Maseli 17:21, 25) Inara, auraka e akakore i te manakonako anga katoa, penei ka tauturu ia ratou kia maara i te akatutuanga a Iesu no te tamaiti kaimoumou apinga ra. Noatu rai kua akaruke taua tamaiti ra i te kainga e kua aruaru i tetai aerenga tau kore, i muri akera kua oki akaou atura ra aia ki te are o tona metua, tei ariki maira iaia na roto i tetai tu rekareka e te aroa. (Luka 15:11-32) Noatu eaa te ka tupu, ka papu i te au metua Kerititiano tiratiratu ra to Iehova kiteanga, tona manako aroa, e tana turu anga puapinga oki.—Salamo 145:14.
21. Koai ta tatou ka tau kia akarongo atu, e no teaa ra?
21 I reira, e tamanako tatou tataki tai e eaa te apinga puapinga maata tikai i to tatou oraanga. Te aruaru noinoi ra ainei tatou kia maata te apinga pae kopapa, te ka apai mai kia tatou e ta tatou au pamiri i te turanga mamae? Me kare te aruaru ra ainei tatou i te ‘au mea memeitaki e te au mea tika’ no ko mai i “te Metua o te au mārama ra”? (Iakobo 1:17) A Satani “e metua oki no te pikikaa,” te anoano ra ia tatou kia angaanga no te au apinga kopapa e kia ngere oki i te mataora anga e te oraanga. (Ioane 8:44; Luka 12:15) Inara, ko Iehova, tei roto i tona ngakau te meitaki no tatou. (Isaia 48:17, 18) No reira, kia akarongo tamou marie tatou i to tatou Metua aroa i te rangi ra e “kia mataora oki” iaia. (Salamo 37:4) Me aruaru tatou i taua aerenga ra, ka akaapinga mai ta Iehova ra au apinga okomaata e te akameitakianga maata ia tatou—ma te kore te kino.
[Tataanga Rikiriki i Raro]
^ para. 10 Akara i te Awake!, Tianuare 22, 1993, kapi 18-21.
Maara Ainei ia Koe?
• Ka kitea kiea te mataora anga maata roa atu?
• Eaa etai o te au apinga meitaki ta Iehova e oronga ra ki tona au tangata?
• Eaa ra te angaanga orometua tutu aerenga i tau ei ei apinga aroa?
• Eaa ta te au metua ka rave e raukai ta te Atua ra akameitakianga ia ratou e akono ra i ta ratou tamariki?
[Au Uianga Apii]
[Tutu i te kapi 16]
Te akaari ra ainei koe i te arikianga no ta te Atua ra apinga oronga mai i tana Tuatua tataia ra?
[Tutu i te kapi 17]
Noatu te au turanga ngata rava, kua tavini totomapu a Laurel Nisbet i te Atua ra
[Au Tutu i te kapi 18]
Mei ia Tabita rai, kua matau meitakiia te au Kerititiano o teia tuatau nei no ta ratou angaanga aroa
[Tutu i te kapi 19]
E manako anga aroa to te aronga pakari Kerititiano no to ratou au oa akarongo ra