Nkateko Wa Yehovha Wa Hi Fuwisa
Nkateko Wa Yehovha Wa Hi Fuwisa
“Nkateko wa Yehovha—hi wona lowu fuwisaka, naswona a nga engeteli ku vaviseka eka wona.”—SWIVURISO 10:22.
1, 2. Ha yini ntsako wu nga fambisani ni swilo leswi vonakaka?
VANHU va timiliyoni va hlongorisa swilo leswi vonakaka namuntlha. Kambe, xana swilo leswi vonakaka swi va tisela ntsako? The Australian Women’s Weekly yi ri: “Vanhu a va si tshama va hlunamisiwa hi leswi va nga na swona ku fana ni sweswi.” Ya engetela: “Mhaka leyi a yi twisiseki. Hi byeriwa leswaku Australia ri yime kahle hi tlhelo ra timali, leswaku vutomi a byi si tshama byi antswa. . . . Hambiswiritano, tiko ri funengetiwe hi papa ra ntima. Vavanuna ni vavasati va swi twa leswaku va kayivela xo karhi evuton’wini bya vona kambe a va swi koti ku hlamusela leswaku xilo xa kona i yini.” Hakunene Matsalwa ma tiyisile loko ma vula leswaku ntsako kumbe vutomi a hi swi kumi eka swilo leswi hi nga na swona!—Eklesiasta 5:10; Luka 12:15.
2 Bibele yi dyondzisa leswaku ntsako lowukulu wu kumeka eka nkateko wa Xikwembu. Malunghana ni mhaka leyi, Swivuriso 10:22 yi ri: “Nkateko wa Yehovha—hi wona lowu fuwisaka, naswona a nga engeteli ku vaviseka eka wona.” Hakanyingi munhu u vavisiwa hi ku lava ku tikumela swilo leswi vonakaka hi makwanga. Hilaha ku faneleke muapostola Pawulo u tsundzuxile: “Lava tiyimiseleke ku fuwa va wela endzingweni ni le ntlhan’wini ni le ku naveleni ko tala ka vuhunguki ni loku vavisaka, loku nghenisaka vanhu endzovisweni ni le ku onhakeni. Hikuva ku rhandza mali i rimitsu ra mixaka hinkwayo ya swilo swo biha, naswona hi ku lwela ku fikelela rirhandzu leri, van’wana va lahlekisiwile eripfumelweni naswona va titlhave hinkwako-nkwako hi switlhavi swo tala.”—1 Timotiya 6:9, 10.
3. Ha yini malandza ya Xikwembu ma langutana ni miringo?
3 Hi hala tlhelo, mikateko leyi nga riki na khombo yi kumiwa hi hinkwavo lava ‘hambetaka va yingisa rito ra Yehovha.’ (Deteronoma 28:2) Hambiswiritano, van’wana va nga ha vutisa, ‘Loko nkateko wa Yehovha wu nga ri na khombo, ha yini malandza yo tala ya Xikwembu ma xaniseka?’ Bibele yi paluxa leswaku miringo ya hina yi pfumeleriwa hi Xikwembu kambe kahle-kahle yi huma eka Sathana, mafambiselo ya yena yo homboloka ni ku nga hetiseki ka hina. (Genesa 6:5; Deteronoma 32:4, 5; Yohane 15:19; Yakobo 1:14, 15) Yehovha i xihlovo xa “nyiko yin’wana ni yin’wana leyinene ni nyiko yin’wana ni yin’wana leyi hetisekeke.” (Yakobo 1:17) Hikwalaho, mikateko ya yena a yi na khombo. Hikwalaho a hi kambisiseni tin’wana ta tinyiko ta Xikwembu leti hetisekeke.
Rito Ra Xikwembu—Nyiko Ya Risima
4. Hi wihi nkateko ni nyiko ya risima leswi vanhu va Yehovha va tiphinaka ha swona ‘enkarhini lowu wa makumu’?
4 Vuprofeta bya Daniyele byi vula leswi landzelaka malunghana ni ‘nkarhi wa makumu,’ byi ri: “Vutivi bya ntiyiso byi ta andza.” Hambiswiritano, a hi hinkwavo lava nga ta byi kuma hi ku landza marito lawa: “A va kona vo homboloka lava va nga ta twisisa; kambe lava va nga ni vutlhari va ta twisisa.” (Daniyele 12:4, 10) Anakanya hi sweswo! Rito ra Xikwembu—ngopfu-ngopfu vuprofeta—byi hlamuseriwa hi vutlhari byo tano bya Xikwembu lerova lavo homboloka va nge byi twisisi, kambe vanhu va Yehovha va ta byi twisisa. N’wana wa Xikwembu u khongerile: “Ndza ku dzunisa erivaleni, Tatana, Hosi ya tilo ni misava, hikuva swilo leswi u va fihlele hi vukheta lavo tlhariha ni lava va nga ni ku twisisa, kutani u swi hlavutele swihlangi.” (Luka 10:21) I nkateko ku va ni nyiko leyi ya risima ya Rito leri tsariweke ra Xikwembu, ku nga Bibele, ni ku va exikarhi ka lava Yehovha a va nyikeke ku twisisa ka moya!—1 Vakorinto 1:21, 27, 28; 2:14, 15.
5. Vutlhari i yini, naswona hi nga byi kuma njhani?
5 A hi ta va hi nga ri na ku twisisa ka moya loko a hi nga kumanga “vutlhari lebyi humaka ehenhla.” (Yakobo 3:17) Vutlhari i vuswikoti byo tirhisa vutivi ni ku twisisa leswaku u tlhantlha swiphiqo, u papalata makhombo, u fikelela tipakani kumbe ku nyikela ndzayo leyi twalaka. Hi byi kuma njhani vutlhari bya Xikwembu? Swivuriso 2:6 yi ri: “Yehovha u nyika vutlhari; enon’wini wakwe ku ni vutivi ni ku twisisa.” Ina, Yehovha u ta hi katekisa hi vutlhari loko hi hambeta hi byi kombela hi xikhongelo, hilaha a nyikeke hakona Hosi Solomoni “mbilu yo tlhariha ni leyi twisisaka.” (1 Tihosi 3:11, 12; Yakobo 1:5-8) Leswaku hi kuma vutlhari, hi fanele hi tlhela hi hambeta hi yingisa Yehovha hi ku dyondza Rito ra yena nkarhi na nkarhi hi tlhela hi ri tirhisa.
6. Ha yini ku ri vutlhari ku tirhisa milawu ya Xikwembu ni misinya ya milawu ya xona evuton’wini bya hina?
6 Swikombiso leswikulu swa vutlhari bya Xikwembu swa kumeka emilawini ni le ka misinya ya milawu ya Bibele. Swikombiso leswi swi hi vuyerisa hi tindlela hinkwato—emirini, emianakanyweni, emintlhavekweni ni le moyeni. A swi fanerile loko mupisalema a yimbelela a ku: “Nawu wa Yehovha wu hetisekile, wu vuyisa moya-xiviri. Xitsundzuxo xa Yehovha xa tshembeka, xi tlharihisa la nga riki na ntokoto. Swileriso leswi humaka eka Yehovha swi lulamile, swi tsakisa mbilu; xileriso xa Yehovha xi basile, xi hatimisa mahlo. Ku chava Yehovha ku tengile, ku yima hi masiku. Swiboho swa vuavanyisi swa Yehovha i ntiyiso; swi lulame hi ku helela. Swi fanele swi naveriwa ngopfu ku tlula nsuku, ina, ku tlula nsuku lowu tengisiweke swinene.”—Pisalema 19:7-10; 119:72.
7. Hi byihi vuyelo bya ku honisa mimpimanyeto leyinene ya Xikwembu?
7 Hi hala tlhelo, lava va honisaka mimpimanyeto leyinene ya Xikwembu a va wu kumi ntsako ni ntshunxeko lowu va wu lavaka. Hi ku famba ka nkarhi, va swi xiya leswaku Xikwembu a xi vungunyiwi, hikuva munhu u ta tshovela leswi a swi byalaka. (Vagalatiya 6:7) Vanhu va timiliyoni lava honisaka misinya ya milawu ya Bibele va kuma vuyelo lebyi nga tsakisiki byo tanihi makhwiri lama nga lavekiki, mavabyi lama nyenyetsaka, kumbe ku godzomberiwa loku hetaka matimba. Loko va nga hundzuli ndlela leyi va hanyaka ha yona, ndlela ya vona yi ta hetelela yi va yise eku feni naswona kumbexana va lovisiwa hi Xikwembu.—Matewu 7:13, 14.
8. Ha yini vanhu lava rhandzaka Rito ra Xikwembu va tsakile?
8 Hambiswiritano, lava va rhandzaka Rito ra Xikwembu va tlhela va ri tirhisa va ta kuma mikateko leyikulu sweswi ni le nkarhini lowu taka. Va ni xivangelo xa ku titwa va ntshunxiwile hi nawu wa Xikwembu, va tsakile hakunene, naswona hi mahlo-ngati va rindzele nkarhi lowu va nga ta ntshunxiwa exidyohweni ni le ka vuyelo bya xona lebyi dlayaka. (Varhoma 8:20, 21; Yakobo 1:25) Ntshembo lowu i wa xiviri hikuva wu titshege hi nyiko ya rirhandzu lerikulu ra Xikwembu leyi xi yi nyikeke vanhu—gandzelo ra nkutsulo ra N’wana wa xona la tswariweke a ri swakwe, Yesu Kreste. (Matewu 20:28; Yohane 3:16; Varhoma 6:23) Nyiko yo tano ya risima yi tiyisekisa ku enta ka rirhandzu ra Xikwembu evanhwini naswona yi tiyisekisa mikateko leyi nga heriki leyi nga ta kumiwa hi hinkwavo lava hambetaka va yingisa Yehovha.—Varhoma 8:32.
Ha Yi Tlangela Nyiko Ya Moya Lowo Kwetsima
9, 10. Hi vuyeriwa njhani eka nyiko ya Yehovha ya moya lowo kwetsima? Nyika xikombiso.
9 Nyiko yin’wana ya rirhandzu ya Xikwembu leyi hi faneleke hi yi tlangela i moya wa xona lowo kwetsima. Hi siku ra Pentekosta ya 33 C.E., muapostola Petro u khutaze vunyingi lebyi a byi ri kona eYerusalema a ku: “Hundzukani, un’wana ni un’wana wa n’wina a khuvuriwa hi vito ra Yesu Kreste leswaku mi rivaleriwa swidyoho swa n’wina, kutani mi ta kuma nyiko ya mahala ya moya lowo kwetsima.” (Mintirho 2:38) Namuntlha, Yehovha u nyika malandza ya yena lama tinyiketeleke moya lowo kwetsima loko ma wu kombela hi xikhongelo naswona ma lava ku endla ku rhandza ka yena. (Luka 11:9-13) Eminkarhini ya khale, matimba lawa lamakulu swinene evuakweni—ku nga moya lowo kwetsima wa Xikwembu, kumbe matimba lama tirhaka—ma nyike vavanuna ni vavasati va ripfumelo matimba, ku katsa ni Vakreste vo sungula. (Zakariya 4:6; Mintirho 4:31) Leswi na hina hi nga vanhu va Yehovha, wu nga hi endlela leswi fanaka, hambiloko ho langutana ni swihinga swo chavisa.—Yuwele 2:28, 29.
10 Xiya xikombiso xa Laurel, loyi a hlaseriweke hi vuvabyi byo khwanyana swirho kutani a tshama eka hahu ra nsimbi ku ringana malembe ya 37. * Ku nga khathariseki xiyimo xa yena lexi a xi nonon’hwa swinene, u tirhele Xikwembu hi ku hiseka kukondza a fa. Yehovha u n’wi katekise swinene Laurel. Hi xikombiso, u swi kotile ku pfuna vanhu va kwalomu ka 17 leswaku va va ni vutivi lebyi kongomeke bya ntiyiso wa Bibele, hambileswi a a tshama emuchinini wa yena siku hinkwaro! Xiyimo xa yena xi hi tsundzuxa marito ya muapostola Pawulo, lama nge: “Loko ndzi tsanile, hi kona ndzi vaka ni matimba.” (2 Vakorinto 12:10) Ndlela leyi hi humelelaka ha yona loko hi chumayela mahungu lamanene, a hi yi endli hi vuswikoti bya hina ni matimba ya hina, kambe hi pfuniwa hi Xikwembu hi moya wa xona lowo kwetsima, lowu xi wu nyikaka lava hambetaka va yingisa rito ra xona.—Esaya 40:29-31.
11. Moya wa Xikwembu wu tswala mihandzu yihi eka lava ambalaka “vumunhu lebyintshwa”?
11 Loko hi yingisa Xikwembu hi ku tshembeka, moya wa xona wu endla leswaku hi va ni timfanelo ta rirhandzu, ntsako, ku rhula, ku va ni mbilu yo leha, musa, vunene, ripfumelo, ku olova ni ku tikhoma. (Vagalatiya 5:22, 23) ‘Mihandzu leyi ya moya’ i xiphemu xa “vumunhu lebyintshwa” lebyi Vakreste va byi ambalaka va siva mikhuva yihi na yihi ya makwanga, leyi fanaka ni ya vuharhi leyi a va ri na yona khale. (Vaefesa 4:20-24; Esaya 11:6-9) Wa nkoka swinene eka mihandzu leyi i rirhandzu, “xiboho lexi hetisekeke xa vun’we.”—Vakolosa 3:14.
Rirhandzu Ra Vukreste —Nyiko Leyi Faneleke Yi Tlangeriwa
12. Tabita ni Vakreste van’wana va lembe-xidzana ro sungula va ri kombise njhani rirhandzu?
12 Rirhandzu ra Vukreste i nyiko yin’wana leyi tsakisaka leyi humaka eka Yehovha—leyi hi faneleke hi yi tlangela. Ri lawuriwa hi nsinya wa nawu, kambe ri tele nkhathalelo lerova ri endla leswaku vapfumeri va tolovelana swinene ku tlula loko a va ri maxaka ya nyama. (Yohane 15:12, 13; 1 Petro 1:22) Hi xikombiso, anakanya hi Tabita, wansati lonene wa Mukreste wa lembe-xidzana ro sungula. “A a ri ni swiendlo swo tala leswinene naswona a a endla tinyiko to tala ta tintswalo,” ngopfu-ngopfu eka tinoni ta le vandlheni. (Mintirho 9:36) Swi nga ha endleka vavasati lava a va ri na wona maxaka ya vona ya nyama, kambe Tabita a a lava ku endla leswi a nga swi kotaka leswaku a va pfuna ni ku va khutaza. (1 Yohane 3:18) Tabita u veke xikombiso lexinene hakunene! Rirhandzu ra vumakwerhu ri susumetele Priska na Akwila leswaku va ‘veka tinhamu ta vona ekhombyeni’ hikwalaho ka Pawulo. Rirhandzu ri tlhele ri susumetela Epafrasi, Luka, Onesiforo ni van’wana leswaku va pfuna muapostola loko a khotsiwile eRhoma. (Varhoma 16:3, 4; 2 Timotiya 1:16; 4:11; Filemoni 23, 24) Ina, Vakreste va muxaka wolowo namuntlha ‘va rhandzana,’ ku nga nyiko leyikulu leyi humaka eka Xikwembu leyi va hlawulaka tanihi vadyondzisiwa va xiviri va Yesu.—Yohane 13:34, 35.
13. Hi nga swi kombisa njhani leswaku hi byi tlangela swinene vumakwerhu bya hina bya Vukreste?
13 Xana wa ri tlangela rirhandzu leri kombisiwaka evandlheni ra Vukreste? Xana wa byi tlangela vumakwerhu bya hina bya moya, lebyi nga kona emisaveni hinkwayo? Leti na tona i tinyiko leti tsakisaka ni leti fuwisaka leti humaka ehenhla. Hi nga swi kombisa njhani leswaku ha ti tlangela? Hi ku endlela Xikwembu ntirho wo kwetsima, hi ku hlanganyela eminhlanganweni ya Vukreste na hi ku kombisa rirhandzu ni mihandzu yin’wana ya moya wa Xikwembu.—Vafilipiya 1:9; Vaheveru 10:24, 25.
“Tinyiko Leti Nga Vanhu”
14. I yini leswi lavekaka leswaku Mukreste a va nkulu kumbe nandza wa vutirheli?
14 Vavanuna lava nga Vakreste lava navelaka ku tirhela vagandzeri-kulobye tanihi vakulu kumbe malandza ya vutirheli va ni pakani leyinene. (1 Timotiya 3:1, 8) Leswaku makwerhu a fanelekela malunghelo lawa, u fanele a va wanuna wa moya, a ma tiva kahle Matsalwa naswona a hiseka evutirhelini bya nsimu. (Mintirho 18:24; 1 Timotiya 4:15; 2 Timotiya 4:5) U fanele a titsongahata, a va ni xichavo naswona a lehisa mbilu, hikuva mikateko ya Xikwembu a yi kumiwi hi vanhu lava tikukumuxaka, lava tivonaka ni lava tinavelelaka swikhundlha. (Swivuriso 11:2; Vaheveru 6:15; 3 Yohane 9, 10) Loko a tekile, u fanele a va nhloko ya ndyangu leyi nga ni rirhandzu leyi wu rhangelaka kahle ndyangu wa yona hinkwawo. (1 Timotiya 3:4, 5, 12) Hikwalaho ka leswi a tekaka rifuwo ra moya ri ri ra nkoka, wanuna wo tano u ta kuma nkateko wa Yehovha.—Matewu 6:19-21.
15, 16. I vamani lava nga “tinyiko leti nga vanhu”? Nyika swikombiso.
15 Loko lava nga vakulu evandlheni va tirha hi matimba entirhweni wo vula evhangeli, wa vurisi ni wa ku va vadyondzisi, va hi nyika swivangelo leswi twalaka swo teka “tinyiko leti nga vanhu” ti ri ta nkoka swinene. (Vaefesa 4:8, 11) Lava vuyeriwaka eka ntirho wa vona wa rirhandzu swi nga ha endleka va nga kombisi ku tlangela nkarhi hinkwawo, kambe Yehovha wa swi vona hinkwaswo leswi vakulu volavo lava tshembekaka va swi endlaka. A nge ri rivali rirhandzu leri va ri kombiseke hikwalaho ka vito ra yena hileswi va tirhelaka vanhu va yena.—1 Timotiya 5:17; Vaheveru 6:10.
16 Anakanya hi mhaka ya nkulu un’wana la tirhaka hi matimba loyi a endzeleke wanhwana la nga Mukreste loyi a ri kusuhi ni ku endliwa vuhandzuri bya byongo. Munghana wa ndyangu wolowo u tsarile: “A a ri ni tintswalo, a hi seketela naswona a khathala. U kombele mpfumelelo wo khongela eka Yehovha swin’we na hina. Loko a ri karhi a khongela, tata wa n’wana loyi [loyi a nga ri Mbhoni ya Yehovha] u mpfikurile, naswona un’wana ni un’wana loyi a ri kwalaho a a tenga-tenga mihloti. Xikhongelo xa nkulu yoloye a xi khumba mbilu, naswona Yehovha u hi kombise rirhandzu hi ku n’wi rhumela hi nkarhi wolowo!” Mbhoni yin’wana leyi a yi vabya yi vule leswi landzelaka malunghana ni vakulu lava yi endzeleke: “Loko va tshinela ekusuhi ni mubedo wa mina ekamareni ra lava vabyaka swinene, a ndzi swi tiva leswaku hambi ko ba lexi dumaka ndzi ta swi kota ku tiyisela. Ndzi ve ni matimba swinene ndzi rhula.” Xana u kona la nga xavaka nkhathalelo wo tano wa rirhandzu? A nga kona! I nyiko leyi humaka eka Xikwembu, leyi kumekaka evandlheni ra Vukreste.—Esaya 32:1, 2.
Nyiko Ya Vutirheli Bya Nsimu
17, 18. (a) I nyiko yihi ya ntirho leyi Yehovha a yi nyikaka vanhu va yena hinkwavo? (b) Hi wihi mpfuno lowu Xikwembu xi wu nyikeleke leswaku hi ta hetisisa vutirheli bya hina?
17 Ku dzuneka lokukulu loku nga nyikiwaka munhu wihi na wihi i ka ku tirhela Yehovha, La nge Henhla-henhla. (Esaya 43:10; 2 Vakorinto 4:7; 1 Petro 2:9) Nilokoswiritano, lunghelo ra ku hlanganyela evutirhelini bya le rivaleni ri pfulekele vanhu hinkwavo—lavatsongo ni lavakulu, vavanuna ni vavasati—lava nga ni ku navela ka xiviri ko tirhela Xikwembu. Xana wa hlanganyela eka lunghelo leri ra risima? Van’wana va nga ha tshika va nga hlanganyeli hikwalaho ka leswi va titwaka va nga faneleki, kambe tsundzuka leswaku Yehovha u va nyika moya lowo kwetsima vanhu lava n’wi tirhelaka, naswona wu pfala laha hi salelaka kona endzhaku.—Yeremiya 1:6-8; 20:11.
18 Yehovha u nyike malandza ya yena lama titsongahataka ntirho wo chumayela hi Mfumo, a nga wu nyikanga vanhu lava tikukumuxaka ni lava titshegaka hi vuswikoti bya vona. (1 Vakorinto 1:20, 26-29) Vanhu lava titsongahataka, lava nga ni xichavo va ku xiya ku tsana ka vona naswona va titshega hi mpfuno wa Xikwembu loko va ri karhi va hlanganyela evutirhelini bya nsimu. Va tlhela va tlangela mpfuno wa moya lowu xi wu nyikelaka hi ku tirhisa “mulanguteri wo tshembeka.”—Luka 12:42-44; Swivuriso 22:4.
Vutomi Bya Ndyangu Lebyi Tsakisaka—Nyiko Leyinene
19. Hi swihi swilo leswi vangelaka leswaku vatswari va humelela loko va kurisa vana?
19 Vukati ni vutomi bya ndyangu lebyi tsakisaka i tinyiko leti humaka eka Xikwembu. (Rhuti 1:9; Vaefesa 3:14, 15) Vana na vona i “ndzhaka leyi humaka eka Yehovha” ya risima, leyi va tiselaka ntsako vatswari lava va dyondzisaka hi ndlela leyinene timfanelo leti tsakisaka Xikwembu. (Pisalema 127:3) Loko u ri mutswari, hambeta u yingisa rito ra Yehovha hi ku letela vana va wena hi ku ya hi Rito ra yena. Lava va ri yingisaka va tiyiseka leswaku Yehovha u ta va seketela a tlhela a va katekisa swinene.—Swivuriso 3:5, 6; 22:6; Vaefesa 6:1-4.
20. I yini lexi nga pfunaka vatswari lava vana va vona va hambukaka evugandzerini bya ntiyiso?
20 Ku nga khathariseki matshalatshala ya ku tshembeka ya vatswari lava chavaka Xikwembu, kumbexana van’wana va vana va vona va hlawula ku hambuka evugandzerini bya ntiyiso loko va kula. (Genesa 26:34, 35) Leswi swi nga ha yi vavisa swinene mintlhaveko ya vatswari. (Swivuriso 17:21, 25) Hambiswiritano, ematshan’weni yo heleriwa hi ntshembo, swi nga ha va pfuna loko vo tsundzuka xifaniso xa Yesu xa n’wana wa vusopfa. Hambileswi n’wana loyi a sukeke ekaya ivi a ya hanya hi ndlela yo biha, endzhakunyana u vuyile ekaya ka tata wa yena, loyi a n’wi amukeleke hi ntsako na hi rirhandzu. (Luka 15:11-32) Ku nga khathariseki leswaku ku nga humelela yini, vatswari lava nga Vakreste lava tshembekaka va nga tiyiseka leswaku Yehovha wa twisisa, wa khathala hi ndlela ya rirhandzu naswona u ta va seketela swinene.—Pisalema 145:14.
21. Hi fanele hi yingisa mani, naswona ha yini?
21 Kutani, un’wana ni un’wana wa hina a a kambisise leswi nga swa nkoka hakunene evuton’wini bya yena. Xana hi hisekela ku hlengeleta swilo leswi vonakaka, leswi nga hi vangelaka ku vaviseka, hina ni mindyangu ya hina? Kumbe hi hlongorisa ‘tinyiko letinene ni leti hetisekeke’ leti humaka eka “Tata wa mavoningo ya le xibakabakeni”? (Yakobo 1:17) Sathana, “tata wa mavunwa,” u lava leswaku hi tikarhatela swilo leswi vonakaka naswona hi lahlekeriwa hi ntsako ni vutomi. (Yohane 8:44; Luka 12:15) Kambe, Yehovha u hi navelela leswinene. (Esaya 48:17, 18) Kutani, a hi hambeteni hi yingisa Tata wa hina wa rirhandzu wa le tilweni naswona minkarhi hinkwayo hi “kuma ntsako lowu heleleke” eka yena. (Pisalema 37:4) Loko hi famba hi ntila wolowo, tinyiko ta risima ta Yehovha ni nkateko lowu teleke wu ta hi fuwisa—naswona sweswo swi nge hi vangeli ku vaviseka.
[Nhlamuselo ya le hansi]
^ par. 10 Vona Xalamuka! (ya Xinghezi) ya January 22, 1993, matluka 18-21.
Wa Tsundzuka Xana?
• Ntsako lowukulu wu nga kumiwa kwihi?
• Hi tihi tinyiko tin’wana leti Yehovha a ti nyikaka vanhu va yena?
• Ha yini vutirheli bya nsimu byi ri nyiko?
• I yini leswi vatswari va nga swi endlaka leswaku va kuma nkateko wa Xikwembu loko va ri karhi va kurisa vana va vona?
[Swivutiso Swa Dyondzo]
[Xifaniso eka tluka 16]
Xana wa yi tlangela nyiko ya Xikwembu ya Rito ra yena leri tsariweke?
[Xifaniso eka tluka 17]
Ku nga khathariseki swiyimo swo nonon’hwa swinene, Laurel Nisbet u tirhele Xikwembu hi ku hiseka
[Swifaniso eka tluka 18]
Ku fana na Tabita, Vakreste va namuntlha va tiviwa hi swiendlo swa vona swa rirhandzu
[Xifaniso eka tluka 19]
Vakulu lava nga Vakreste va khathalela vapfumeri-kulobye hi ndlela ya rirhandzu