Thumbiko la Yehova Likutisambaziska
Thumbiko la Yehova Likutisambaziska
‘Thumbiko la Yehova likusambazga, ndipo kuti wakusazgakoso citima cara.’—ZINTHARIKA 10:22.
1, 2. Ncifukwa wuli cimwemwe cikukolerana cara na cuma cakuthupi?
ŴANTU ŵanandi mazuŵa ghano ŵakupenjerezga vintu vyakuthupi. Kweni, kasi vintu ivi vikuŵapa cimwemwe? “Nkukumbuka yayi kuti yikaŵapo nyengo iyo ŵantu ŵakatemwanga comene vintu vya kuthupi nga ni umo ŵakucitira mazuŵa ghano,” yikayowoya nteura The Australian Women’s Weekly. Ndipo yikarutilira kuyowoya kuti: “Ncacilendo ndiposo ncakuzizwiska comene. Tikaphalirika kuti caru ca Australia ncisambazi, kweni umoyo undaŵepo wakukhorweska. . . . Ndipo ŵantu mu caru ici mbakukondwa cara. Ŵanarumi na ŵanakazi wuwo wose ŵakuwona kuti ŵakupeleŵera cintu cinyake mu umoyo wawo, kweni ŵakutondeka kuti ŵacizunure.” Mwee, nawo mbunenesko wa Malemba peneapo ghakuyowoya kuti tingasanga cara cimwemwe panji umoyo cifukwa ca vintu vyakuthupi ivyo tili navyo!—Mupharazgi 5:10; Luka 12:15.
2 Baibolo likutisambizga kuti tingasanga cimwemwe kufuma ku thumbiko la Ciuta. Mwakuyana na nkani iyi, lemba la Zintharika 10:22 likuyowoya kuti: ‘Thumbiko la Yehova likusambazga, ndipo kuti wakusazgakoso citima cara.’ Citima cikwiza cifukwa cakupenjerezga vyuma vyakuthupi mwauzukusi. Ndico cifukwa cake mpostole Paulos wakacenjezga kuti: “Aŵo ŵakukhumba kusambazgika ŵakuwa mu Iwavyo na cipingo na makhumbiro ghanandi ghakupusa na ghakupweteka, agho ghakubizga ŵantu mu paraniko na mu kutayika. Cifukwa kutemwa ndrama ndukorozi lwa mitundu yose ya viheni: izo ŵanji pa kuzipenjiska ŵali kupuruskikako ku cipulikano, ndipo ŵali kujilasa na vitima vinandi.”—1 Timote 6:9, 10.
3. Ncifukwa wuli ŵateŵeti ŵa Yehova ŵakusangana na masuzgo?
3 Kulwande linyake, awo ‘ŵapulikirenge mazgu gha Yehova’ ŵazamusanga vitumbiko mwambura kusuzgika. (Duteronome 28:2) Kweni, ŵanyake ŵangafumba kuti: ‘Usange thumbiko la Yehova lingasangika mwambura suzgo, ncifukwa wuli ŵateŵeti ŵa Ciuta ŵakusuzgika?’ Baibolo likuyowoya kuti viyezgo ivyo tikusangana navyo vikuzomerezgeka na Ciuta kweni uyo wakucitiska ni Satana na kawiro kake kaheni ka vintu, ndiposo kwananga kwa ise taŵene. (Genesis 6:5; Duteronome 32:4, 5; Yohane 15:19; Yakobe 1:14, 15) Yehova ncitopoko ca ‘vyawanangwa viwemi vyose na vyakufiskika vyose.’ (Yakobe 1:17) Mwanteura, vitumbiko vyake vikwiziska citima cara. Sono tiyeni tisande vinyake mwa vyawanangwa viwemi ivyo Ciuta wakupereka.
Mazgu gha Ciuta Ncawanangwa ca Mtengo Wapacanya
4. Kasi ni thumbiko wuli na cawanangwa ca mtengo wapacanya ivyo ŵantu ŵa Yehova ŵakusangwa navyo mu “nyengo ya umaliro” yino?
4 Pakuyowoya za “nyengo ya umaliro,” ucimi wa Daniel ukuyowoya kuti: ‘Mahara ghaunenesko ghamkwandana.’ Ndipouli, ici cikupambana na mazgu ghakuti: “Kulije yumoza wa ŵaheni wamkumanyiska; kweni ŵavinjeru ndiŵo ŵamkumanyiska.” (Daniel 12:4, 10) Aghanaghanirani za ici! Mazgu gha Ciuta, comene-comene maucimi ghakuyowoyeka na vinjeru vya Ciuta mwakuti ŵaheni ŵangapulikiska cara, kweni ŵantu ŵa Yehova pera. “Nkumuwongani imwe, Ŵadada, Fumu ya kucanya na pasi, cifukwa mukabisa vyeneivi ku ŵa mahara na ŵakumanya, ndipo mukavivumbulira ŵabonda.” (Luka 10:21) Mwee, nalo ni thumbiko kuŵa na cawanangwa ca mtengo wapacanya, Mazgu gha Ciuta, Baibolo, nakuŵa pakati pa ŵantu awo Yehova waŵapa mahara gha kumanyira vintu vyauzimu!—1 Ŵakorinte 1:21,27, 28; 2:14, 15.
5. Kasi vinjeru ni vici, ndipo tingavisanga wuli?
5 Mpanyi tilije vinjeru vyauzimu usange pakaŵavye “vinjeru ivyo nvyakucanya.” (Yakobe 3:17) Vinjeru ni nkongono iyo yikutipangiska kuti tigwiriskire ncito mahara pa kumazga masuzgo, kutceŵa urwani, kusanga ivyo tikukhumba panji kupereka urongozgi ku ŵanji. Ni mwauli umo tingasangira vinjeru ivyo Ciuta wakupereka? Lemba la Zintharika 2:6 likuyowoya kuti “Yehova wakupa vinjeru; mu mlomo wake mukufuma mahara na umanyi.” Enya, Yehova wazamutitumbika na vinjeru usange tirutilirenge kufwilirapo mukuromba vinjeru, nga ni umo wakaperekera kwa Themba Solomon “mtima wa vinjeru na wakumanyiska.” (1 Mathemba 3:11, 12; Yakobe 1:5-8) Kuti tisange vinjeru, tikwenera kurutilira kupulikira Yehova nyengo zose mwakuŵazga na kugwiriskira ncito Mazgu ghake.
6. Ncifukwa wuli ncamahara kugwiriskira ncito marango gha Ciuta mu umoyo withu?
6 Viyerezgero viwemi vya vinjeru vya Ciuta vikusangika mu Baibolo. Ivi vikutovwira mu ntowa zinandi nga ni kaghanaghaniro ndiposo mu umoyo withu wauzimu na wakuthupi. Ndico cifukwa cake wamasalmo wakimba kuti: ‘Dango la Yehova ndiweme lakufikapo, likuwezgeramo umoyo; cisimikizgo ca Yehova ncakukhora, muzereza cikumuzgora wamahara; vilayizgo vya Yehova nvyakunyoroka, vikusekereska mtima; langulo la Yehova ndakutowa, likungweruska maso; kumopa Yehova nkwakutowa, kukukhalirira swi-i maweruzgo gha Yehova ngakuneneska, ngakurunjika nkanira. Ngakukhumbikwa kwakuruska golide, nadi, kwakuruska golide linandi lakwengeka.’—Salmo 19:7-10; 119:72.
7. Kasi cakufumapo ca kuyuyura marango ghaurunji gha Ciuta ncivici?
7 Kulwande linyake, awo wakuyuyura marango gha Ciuta walije cimwemwe na wanangwa ivyo iwo ŵakukhumba. Ndipo pamanyuma pake, ŵakuzakamanya kuti Ciuta wakusekeka cara, cifukwa muntu wazamuvuna ico wakumija. (Ŵagalatiya 6:7) Ŵantu ŵanandi awo ŵakuyuyura marango gha Baibolo ŵakuvuna ivyo ŵakamija nga ni ntumbo za pa thengere, matenda ghakofya panji kugotomara cifukwa ca minkwara ya kuzweteska wongo. Usange ŵakuleka kurapa na kusinta umoyo wawo, kacitiro kawo ka vintu kangaŵarongozgera ku nyifwa mutepanji ku paraniko ilo laneng’enera lakurongozgeka na Ciuta.—Mateyu 7:13, 14.
8. Ncifukwa wuli ŵantu awo ŵakutemwa Mazgu gha Ciuta mbacimwemwe?
8 Ndipouli, awo ŵakutemwa Mazgu gha Ciuta na kughagwiriskira ncito ŵazamusanga vitumbiko vinandi mu nyengo yino ndiposo muntazi. Awo ŵakuwona kuti marango gha Ciuta ghaŵawombora, mbacimwemwe, ndipo ŵakulindirira na mtima wose nyengo iyo ŵazamufwatuka ku nyifwa na ku vyakufumapo vyake viheni. (Ŵaroma 8:20, 21;Yakobe 1:25) Cilindizga ici ncakusimikizgirika cifukwa ncawanangwa ico Ciuta wacitemwa wapereka ku ŵantu kwazira mu sembe ya ciwombolero ya Mwana wake wakutemweka, Yesu Kristu. (Mateyu 20:28; Yohane 3:16; Ŵaroma 6:23) Cawanangwa ca mtengo wapacanya ici cikusimikizgira kuti Ciuta wakutemwa nadi ŵantu ndiposo cikurongora vitumbiko vyambura kumara ivyo ŵantu awo ŵarutirizgenge kupulikira Yehova ŵazamusanga.—Ŵaroma 8:32.
Sangwani na Cawanangwa ca Mzimu Utuŵa
9, 10. Ni mwauli umo tikovwirikira na cawanangwa cakufuma kwa Yehova ca mzimu utuŵa? Perekani ciyerezgero.
9 Cawanangwa cinyake cakufuma kwa Ciuta wacitemwa ico tikwenera kusangwa naco ni mzimu utuŵa. Pa zuŵa la Pentekoste 33 C.E., mpostole Petros wakaphalira wumba wa ŵantu uwo wukawungana ku Yerusalemu kuti: ‘Ng’anamukani, ndipo mubapatizike muntu yose wa imwe mu zina la Yesu Kristu kuti viheni vinu vigowokereke; ndipo muti mupokere cawanangwa ca mzimu utuŵa.’ (Milimo 2:38) Lero Yehova wakupereka mzimu utuŵa ku ŵateŵeti ŵake ŵakujipereka awo ŵakuwuromba ndiposo awo ŵakukhumba kucita khumbo lake. (Luka 11:9-13) Mu nyengo zakale, nkongono yakuzirwa comene iyi yakucanya, mzimu utuŵa wa Ciuta panji nkongono yakugwira ncito, ukakhozga ŵanarumi na ŵanakazi ŵa cigomezgo kusazgapo Ŵakristu ŵakudanga. (Zekariya 4:6; Milimo 4:31) Yingacitaso nteura kwa ise, nangauli tingakumana na masuzgo na vyakumara mahara nga mbantu ŵa Yehova.—Joel 2:28, 29.
10 Aghanaghanirani za ciyerezgero ca mwanakazi munyake wakucemeka Laurel, mweneuyo wakaŵa ŵakulemara ndiposo wakaŵa na suzgo pa kuthuta kwa virimika 37. a Mwambura kupwererako za masuzgo agha, iye wakateŵetera Ciuta mwamwampu mupaka panyengo iyo wakafwira. Kwa virimika vyose ivyo iye wakaŵa ŵamoyo, Laurel wakasanga vitumbiko vya Yehova. Mwaciyerezgero, iye wakawovwira ŵantu 17 kumanya unenesko, nangauli iye wakagonanga pa mashini agho ghakamovwira kuthuta kwa maora 24 pa zuŵa. Ukhaliro wake ukutikumbuska mazgu agho mpostole Paulos wakayowoya: “Penepapo ndiri wakutomboroka, apo ndipo ndiri wa nkongono.” (2 Ŵakorinte 12:10) Enya kuruta kwithu pantazi kulikose uko tikuŵa nako mu uteŵeti ŵakupharazga makani ghawemi kukucitika cifukwa ca nkongono zithu cara kweni cifukwa ca covwiro ca mzimu utuŵa wa Ciuta weneuwo wakupereka ku awo ŵakurutilira kupulikira mazgu ghake.—Yesaya 40:29-31.
11. Kasi ni mikhaliro wuli iyo mzimu wa Ciuta ukupambika mu ŵantu awo ŵakuvwara “wuntu upya”?
11 Usange tikupulikira Ciuta mwakugomezgeka, mzimu wake ukutipangiska kuti tiŵe na mikhaliro ya citemwa, cimwemwe, mtende, kuzizipizga, wezi, uweme, magomezgeko, kuzika, na kujikora. (Ŵagalatiya 5:22, 23) “Vipambi vya mzimu” ivi ncigaŵa ca “wuntu upya” weneuwo Ŵakristu ŵakuvwara ndipo ŵakuvura wuntu ukoroŵere. (Ŵaefeso 4:20-24; Yesaya 11:6-9) Cakuzirwa comene mwa vipambi vyose ivi ni citemwa ico “ncakukakira cakukhora.”—Ŵakolose 3:14, NW.
Citemwa ca Cikristu—Cawanangwa Ico Tikwenera kuwongera
12. Ni mwauli umo Tabita na Ŵakristu ŵanyake ŵamu virimika vyamu handiredi lakudanga ŵakarongolera citemwa?
12 Citemwa ca Cikristu ncawanangwa cinyake cakufuma kwa Yehova ico tikwenera kuwongera. Ico cikurongozgeka na marango, kweni ncakuzura na lusungu ulo lukukoleraniska ŵasopi kuruska cikolerano ico cikuŵapo pa ubali wakuthupi. (Yohane 15:12, 13; 1 Petros 1:22) Mwaciyerezgero, aghanaghanirani za Tabita, mwanakazi muwemi wa Cikristu wa mu virimika vyamu handiredi lakudanga. Iye “wakazura milimo yiweme na vya lusungu ivyo wakacitanga,” comene-comene kwa vyokoro vyanakazi mu mpingo. (Milimo 9:36) Vyokoro vyanakazi ivi vikaŵa na ŵabali ŵawo ŵakuthupi, kweni Tabita wakakhumbanga kucita ivyo wangafiska kuwovwira na kuviciska. (1 Yohane 3:18) Mwee, naco nciyerezgero ciwemi ico Tabita wakarongora! Citemwa ca pa ŵabali cikakhuŵirizga Priska na Akula kuŵika umoyo wawo pangozi cifukwa ca Paulos. Citemwa cikakhuŵirizgaso Epafra, Luka, Oneseforo, na ŵanyake kuwovwira mpostole uyu apo wakaŵa mu jere ku Roma. (Ŵaroma 16:3, 4; 2 Timote 1:16; 4:11; Filemone 23, 24) Enya, mazuŵa ghano Ŵakristu ŵanga ni aŵa ‘ŵakutemwana’ ceneico ncawanangwa cakufuma kwa Ciuta ico cikuŵamanyikwiska kuŵa ŵarondezgi ŵaunenesko ŵa Yesu.—Yohane 13:34, 35.
13. Kasi ni mwauli umo tingarongolera kuti tikuwongera ubali withu Wacikristu?
13 Kasi mukusangwa na citemwa ico cikurongoreka mu mpingo Wacikristu? Kasi mukuwongera ubali withu wauzimu wa pacaru cose? Ici naco ncawanangwa cakufuma kwa Yehova. Kasi ni mwauli umo tingarongolera kuti tikuzirwiska vintu ivi? Mwakucita uteŵeti wakupatulika kwa Ciuta, mwakufika na kutoramo cigaŵa mu maungano gha Cikristu, ndiposo mwakurongora citemwa na vipambi vinyake vya mzimu wa Ciuta.—Ŵafilipi 1:9; Ŵahebere 10:24, 25.
“Vyawanangwa mu Ŵanarumi”
14. Kasi ncivici ico cikukhumbikwira kuti Mkristu wateŵetere nga ni murara panji muteŵeti ŵakuteŵetera?
14 Ŵanarumi ŵa Cikristu awo ŵakukhumba kuteŵetera ŵasopi ŵanyawo nga mbarara panji nga mbateŵeti ŵakuteŵetera ŵali na khumbo liwemi. (1 Timote 3:1, 8) Kuti ŵasange mwaŵi uwu, mbali wakwenera kuŵa mwanarumi wakutemwa vintu vyauzimu, wakumanya makora Malemba ndiposo wamwampu mu uteŵeti wa m’munda. (Milimo 18:24; 1 Timote 4:15; 2 Timote 4:5) Wakweneraso kuŵa muntu wakujicepeska ndiposo wakuzika cifukwa muntu wakujikuzga na wakujitemwa wangasanga cara vitumbiko vya Ciuta. (Zintharika 11:2; Ŵahebere 6:15; 3 Yohane 9, 10) Usange ngwakutora, iye wakwenera kuŵa mutu wa mbumba uyo wakutemwa na wakuwusa makora mbumba yake. (1 Timote 3:4, 5, 12) Cifukwa cakuti wakuzirwiska vintu vyauzimu, muntu wa nga ni uyu wakupokera vitumbiko vya Yehova.—Mateyu 6:19-21.
15, 16. Kasi mbanjani awo ni “vyawanangwa mu ŵanarumi”? Perekani viyerezgero.
15 Peneapo awo ŵakuteŵetera nga mbarara mu mpingo ŵakunjizgikamo mu ncito yakupharazga, kukhozga viŵaro vya mpingo, na kusambizga, ici cikupangiska kuti tiwongerenge comene [“vyawanangwa mu ŵanarumi,” NW] ivi. (Ŵaefeso 4:8, 11) Awo ŵakovwirika na milimo yawo yacitemwa kuti ŵangarongora kuwongera nyengo zose cara, kweni Yehova wakuwona vyose ivyo ŵarara ŵakugomezgeka ŵakucita. Iye wazamuruwa cara citemwa ico ŵarongora kwa iye mwakuteŵetera ŵantu ŵake.—1 Timote 5:17; Ŵahebere 6:10.
16 Aghanaghanirani za murara munyake wamwampu uyo wakaruta kukawona msungwana wa Cikristu uyo wakakhala pacoko kuti ŵamucite opaleshoni mu wongo. “Iye wakaŵa wacitemwa, wakukhozga ndiposo wakovwira,” wakalemba nteura mubwezi wa mbumba iyo. “Iye wakatipempa kuti wapempere kwa Yehova pamoza nase. Peneapo wakapemperanga, ŵadada awo ŵakaŵa [yumoza wa Ŵakaboni ŵa Yehova cara] ŵakaliranga, ndipo muntu waliyose uyo wakaŵa mu cipinda ico wakafumya masozi. Mwee, nako nkukhozga kwa pempero la mbali murara ndiposo na citemwa ca Yehova pakutuma mbali uyo panyengo yake!” Mudumbu munyake uyo ni Kaboni wakayowoya nteura za ŵabali ŵarara awo ŵakiza kuzakamuwona peneapo wakaŵa murwari: “Peneapo ŵakafika apo nkagona mu cipinda ico mukuŵa ŵantu awo mbarwari comene, nkamanya kuti cilicose ico cingacitika panyengo iyo, ningazizipizga. Nkakhozgeka ndipo nkaleka kwenjerwa.” Kasi walipo uyo wangagura citemwa ca nga ni ici? Palije! Ico ncawanangwa cakufuma kwa Ciuta ndipo wakucipereka kwizira mu mpingo wa Cikristu.—Yesaya 32:1, 2.
Cawanangwa ca Uteŵeti wa m’Munda
17, 18. (a) Kasi ncawanangwa wuli ico Yehova wapereka ku ŵantu ŵake? (b) Ni covwiro wuli ico Ciuta wapereka mwakuti tifiske uteŵeti withu?
17 Palije ucindami uwo ŵantu ŵali nawo wakuruska kuteŵetera Yehova, Wapacanya Nkanira. (Yesaya 43:10; 2 Ŵakorinte 4:7; 1 Petros 2:9) Kweni, mwaŵi wakunjizgikamo mu uteŵeti wa m’munda wulipo kwa waliyose—ŵana na ŵarara, ŵanakazi na ŵanarumi ŵeneawo mbakukhumbisiska nadi kuteŵetera Ciuta. Kasi mukugwiriskira ncito cawanangwa cakuzirwa ici? Ŵanji ŵakuzerezga kupharazga cifukwa ŵakujiwona kuti ŵangafiska yayi, kweni kumbukirani kuti Yehova wakupereka mzimu utuŵa ku ŵantu awo ŵakumuteŵetera, ndipo wukutovwira para tikutondeka.—Yeremiya 1:6-8; 20:11.
18 Yehova wapereka ncito yakupharazga Ufumu ku ŵateŵeti ŵake ŵakujicefya, ku ŵantu awo mbakujikuzga na ŵakuthemba pa nkongono za iwoŵene cara. (1 Ŵakorinte 1:20, 26-29) Ŵantu wakujipepula wakumanya kuti mbakupeleŵera ndipo ŵakugomezga pa covwiro ca Ciuta peneapo ŵakuteŵetera mu uteŵeti wa m’munda. Iwo ŵakuwongeraso covwiro ca mzimu ico iye wakupereka kwizira mwa “mulinda murara wa magomezgeko.”—Luka 12:42-44; Zintharika 22:4.
Umoyo wa Mbumba Wacimwemwe— Cawanangwa Ciwemi
19. Ni vintu wuli ivyo vingapangiska kuti ŵana ŵalereke makora?
19 Ntengwa na umoyo wa mbumba wacimwemwe ni vyawanangwa vyakufuma kwa Ciuta. (Ruth 1:9; Ŵaefeso 3:14, 15) Ŵana nawo ‘nciharo cakuzirwa cakufuma kwa Yehova,’ ceneico cikwiziska cimwemwe ku ŵapapi awo ŵakuŵasambizga mikhaliro iyo Ciuta wakukhumba. (Salmo 127:3) Usange ndimwe mupapi, rutirizgani kupulikira ivyo Yehova wakuyowoya mwakusambizga ŵana ŵinu mwakuyana na umo Mazgu ghake ghakuyowoyera. Awo ŵakucita nteura mbakusimikizga kuti ŵazamovwirika na Yehova ndipo ŵazamusanga vitumbiko vinandi.—Zintharika 3:5, 6; 22:6; Ŵaefeso 6:1-4.
20. Kasi ncivici ico cingawovwira ŵapapi awo ŵana ŵawo wali kuleka cisopo caunenesko?
20 Mwambura kupwererako kantu za kuyezgayezga kwa ŵapapi awo ŵakopa Ciuta, ŵana ŵanyake ŵakuleka cisopo caunenesko para ŵakura. (Genesis 26:34, 35) Ici cingaŵa cakuŵinya comene ku ŵapapi. (Zintharika 17:21, 25) Mu malo mwakugongowa, cingaŵa cakovwira kukumbukira nkani ya mwana wakuzgeŵa iyo Yesu wakalongosora. Nangauli mwana yura wakafumapo panyumba na kukacita vintu viheni, kweni mukuruta kwa nyengo iye wakawelera ku nyumba ya ŵadada ŵake ŵeneawo ŵakamupokelera mwacimwemwe ndiposo mwacitemwa. (Luka 15:11-32) Cilicose ico cingacitika, ŵapapi ŵakugomezgeka ŵa Cikristu ŵakwenera kumanya kuti Yehova wakuŵapulikiska, wakuŵatemwa ndipo wazamurutilira kuwovwira.—Salmo 145:14.
21. Kasi tikwenera kupulikira njani, ndipo cifukwa wuli?
21 Waliyose wa ise wakwenera kumanya ico ncakukhumbikwa mu umoyo withu. Kasi tikupenjerezga vintu vinandi vyakuthupi vyeneivyo vingiziska masuzgo kwa ise na ku mbumba zithu? Panji kasi tikupenjerezga ‘vyawanangwa viwemi vyose’ ivyo vikufuma kwa “Wiske wa kugweruka.”? (Yakobe 1:17) Satana “wiske wa utesi” wakukhumba kuti tipenjerezgenge vintu vyakuthupi na khumbo lakuti titaye vyose cimwemwe na umoyo. (Yohane 8:44; Luka 12:15) Kweni Yehova wakutikhumbira viwemi. (Yesaya 48:17, 18) Mwanteura, tiyeni tirutirizge kupulikira Ŵadada ŵithu ŵacitemwa ndipo nyengo zose ‘tikondwere” mwa iye. (Salmo 37:4) Usange tikucita nteura, tizamusambazgika na vyawanangwa vya mtengo wapacanya vyakufumira kwa Yehova na vitumbiko vinandi mwambura kusuzgika.
[Mazgu ghamusi]
a Wonani Galamukani! ya Cingelezi ya January 22, 1993 peji 18-21.
Kasi Mukukumbuka?
• Ni nku uko tingasangako cimwemwe ceneko?
• Kasi vyawanangwa vinyake ivyo Yehova wapereka ku ŵantu ŵake ni vici?
• Ncifukwa wuli uteŵeti wa m’munda ncawanangwa?
• Kasi ŵapapi ŵangacitaci kuti ŵasange vitumbiko vya Ciuta pakulera ŵana ŵawo?
[Mafumbo]
[Cithuzithuzi pa peji 14]
Kasi mukuwongera cawanangwa ca Ciuta ca Mazgu ghake?
[Cithuzithuzi pa peji 15]
Mwambura kupwererako za mukhaliro wakusuzga, Laurel Nisbet wakateŵetera Ciuta mwamwampu
[Cithuzithuzi pa peji 16]
Nga Tabita, Ŵakristu ŵa lero ŵakumanyikwa na milimo yawo ya citemwa
[Cithuzithuzi pa peji 17]
Ŵarara ŵa Cikristu wali na citemwa pa ŵasopi ŵanyawo