Ano an May Tunay na Halaga?

An pagkaigwa nin sarong bagay na may tunay na halaga puedeng magin nakaoogmang marhay. Alagad ano daw iyan? Dakulang kantidad nin kuarta? Mamahalon o pambihirang mga alahas? Kabantogan asin pagkaprominente? Dakol na tawo an labi-labi an pagpahalaga sa mga ini. An pagkaigwa kaiyan puedeng magtao nin pansustenir, gibohon na mas makahulogan an buhay, o panigoan an pangangaipo nin isip na rekonoseron asin makamateng may nagibo. Kita daw nagmamaigot na magkaigwa kan siring na mga bagay, na naglalaom na maootob kaiyan an satong mga pasohan asin ambisyon para sa ngapit?

SA PANKAGABSAN, an pagpahalaga nin mga tawo sa sarong bagay basado sa kun paano kaiyan nahihipnoan an saindang mga pangangaipo o napaninigoan an saindang personal na mga kamawotan. Mahal niato an mga bagay na nakapamamate nin pagkaigwa nin marahay na kamugtakan asin nag-oopresir nin oportunidad para sa seguradong ngapit. Pinakamamahal niato an mga bagay na nagtatao nin ensegidang kaginhawahan, karangahan, o pagrekonoser. Pero, an pagtao nin halaga na basado sa satong nagliliwatliwat na mga pagmawot o interes hababaw asin halipot an pananaw. An totoo, an tunay na halaga nadedeterminaran paagi sa kun ano an nasasabotan niato na nakalalabi sa gabos na pangangaipo niato.

Ano an nakalalabi sa gabos na pangangaipo niato? Mayo nin ano man na may halaga kun mayo an sarong pangenot na elemento​—an buhay. Kun mayo nin buhay, dai kita nag-eeksister. Si Hadeng Salomon kan suanoy na Israel nagsurat: “Kun dapit sa mga gadan, mayo man lamang sinda nin pakaaram . . . Mayo nin gibohon ni pagplano ni kaaraman ni kadonongan sa Sheol [an pankagabsan na lolobngan nin katawohan].” (Eclesiastes 9:​5, 10) Kun abotan kita nin kagadanan, mapipiritan kitang butasan an gabos na nasasadirihan niato. An nakalalabi sa gabos na pangangaipo niato, kun siring, iyo an pagkua nin sarong bagay na iingatan an satong buhay. Ano an magibo kaiyan?

Ano an Makapag-iingat kan Satong Buhay?

“An kuarta para sa proteksion,” an sabi ni Hadeng Salomon. (Eclesiastes 7:12) Kun may igong kuarta, puede kitang magkaigwa nin kakanon asin komportableng harong. Puedeng pangyarihon nin kuarta na makamtan niato an kaogmahan nin pagbiahe sa hararayong lugar. Puedeng  itao kaiyan an satong mga pangangaipo kun dai na kita puedeng magtrabaho huli sa kagurangan o kamatean. Dakol an bentaha sa pagkaigwa nin kuarta. Pero, dai kayang ingatan nin kuarta an satong buhay. Sinadol ni apostol Pablo si Timoteo: “Pagbotan mo an mga mayaman sa presenteng sistema nin mga bagay na dai magin mapalangkaw, asin ibugtak an saindang paglaom, bakong sa kayamanan na bakong segurado, kundi sa Dios.” (1 Timoteo 6:17) An gabos na kuarta sa kinaban dai makababakal nin buhay para sa sato.

Estudyare an eksperyensia nin sarong lalaki na an ngaran Hitoshi. Huling nagdakulang dukha, makosog an pagmawot ni Hitoshi na magin mayaman. Sobra an pagtubod nia sa kapangyarihan nin kuarta na sa paghona nia puedeng bakalon kaiyan dawa an mga tawo. Dangan sarong lalaki an nag-abot sa pinto ni Hitoshi asin hinapot sia kun naaaraman nia na nagadan si Jesu-Cristo para saiya. Napukaw kan hapot na ini an interes ni Hitoshi huli ta naniniwala sia na mayo nin siisay man na matogot na magadan para sa sarong tawo na arog nia. Nag-atender sia sa pampublikong pahayag sa Biblia asin nabigla kan madangog an konseho na ‘papagdanayon na simple an mata.’ Ipinaliwanag kan ispiker na an ‘simpleng’ mata saro na harayo an pananaw asin nakaturuhok sa espirituwal na mga bagay. (Lucas 11:34) Imbes na magpagal para sa kuarta, nagpoon si Hitoshi na enoton sa saiyang buhay an mga may halaga sa espirituwal.

An materyal na mga rogaring puede man na magtao sa sato nin sarong sokol nin karigonan asin seguridad. An pagkaigwa nin abundansia puedeng makahale kan satong kahaditan manongod sa satong pan-aroaldaw na mga pangangaipo. An magayon na harong sa kawiliwiling pagtaraed tibaad magpamateng may nagibo na kita. An sunod sa usong mga bado asin magayon na auto puedeng magpangyari na hangaan kita nin iba.

Sarong bendisyon na ‘maheling an karahayan sa gabos niatong kahigosan.’ (Eclesiastes 3:13) Asin an pagkaigwa nin sobra tibaad magpangyari sa satong mga namomotan na ‘magpaginhawa, magkakan, uminom, asin magpasiramsiram.’ Minsan siring, an materyal na mga bagay igwa sana nin halaga na madaling mawara. Sa sarong patanid tumang sa kaaraan, si Jesu-Cristo nagsabi: “Dawa kun an sarong tawo abunda an saiyang buhay dai minagikan sa mga bagay na saiyang nasasadirihan.” (Lucas 12:15-21) An mga rogaring, ano man an kantidad o halaga, dai makagagarantiya sa sato nin buhay.

Halimbawa, si Liz naagom nin sarong lalaki na asensado sa pinansial. Sia nagsasaysay: “Igwa kaming magayon na harong asin duwang kotse, saka an samong kamugtakan sa pinansial tinatawan kami nin katalingkasan na makamtan an ano man na iinaalok kan kinaban na materyal na mga bagay . . . Makangangalas nanggad, naghahadit pa man giraray ako manongod sa kuarta.” Nagpapaliwanag sia: “Dakulaon an mawawara sa samo. Minalataw na mientras na dakol an yaon saimo, mas dikit an pakamate mo nin seguridad.”

Labi-labi man an pagpahalaga nin dakol sa kabantogan asin pagkaprominente huli ta ini puedeng magdara nin kaomawan asin onra. Sa kinaban ngonyan an mapangganang karera sarong nagibo na kinaaaraan. An pagkultibar nin napapalaen na mga talento o abilidad tibaad makatabang sa sato na mabantog kita. An iba tibaad omawon kita, halangkaw an pagmirar sa satong mga opinyon, asin gustong-gustong makua an satong pabor. An gabos na ini puedeng magin nakaoogmang marhay asin nakakokontento. Minsan siring, sa katapustapusi iyan nawawara. Si Salomon igwa kan gabos na kamurawayan asin kapangyarihan na puedeng makua nin sarong hade, alagad sia nag-agrangay: “Daing kalabihan an paggirumdom sa madonong kisa lolong . . . An gabos siertong malilingawan.” (Eclesiastes 2:16) Dai nagtatao nin buhay an kabantogan o pagkaprominente.

Inapresyar nin sarong eskultor na an ngaran Celo an sarong bagay na mas mahalagang marhay kisa kabantogan. Huling may abilidad, nakualipikar siang mag-adal na nagpaoswag kan saiyang abilidad. Dai nahaloy an saiyang trabaho nag-ako nin pag-omaw hale sa prensa asin hale sa mga kritiko nin arte. Ipinag-eksibit an dakol sa saiyang eskultura sa darakulang siudad sa Europa. Si Celo nagsasaysay: “Aadmitiron ko na sa halipot na panahon an arte nagin pinakaimportanteng bagay sa sakong buhay. Minsan siring, narealisar ko na para sa sako, an pagpadagos sa sakong karera garo man sana pagmamaigot na maglingkod sa duwang kagurangnan. (Mateo 6:24) Nakombensir ako na an pinakaimportanteng bagay na magigibo ko iyo an paghuhulit kan maogmang bareta kan Kahadean nin Dios. Kaya naggibo ako nin personal na desisyon na butasan an sakong trabaho bilang sarong eskultor.”

 Ano an May Pinakadakulang Halaga?

Mantang daing ano man na kahulogan o halaga kun mayo nin buhay, ano an puedeng mapasato na magarantiya na kita padagos na mabubuhay? An gabos na buhay gikan ki Jehova Dios. (Salmo 36:9) Tunay nanggad, “paagi sa saiya kita igwa nin buhay asin naghihiro asin nagdadanay.” (Gibo 17:28) Itinatao nia an buhay na daing katapusan bilang regalo sa mga namomotan nia. (Roma 6:23) Ano an dapat niatong gibohon tanganing makualipikar para sa regalong ini?

An pakaresibi kan regalong ini na buhay na daing katapusan nakadepende sa pagkaigwa niato nin dayupot na relasyon ki Jehova. Kun siring, an saiyang pabor an may mas dakulang halaga kisa ano pa man na puede niatong makamtan. Kun igwa kita kaiyan, may tinatanaw kitang tunay asin daing katapusan na kaogmahan. Minsan siring, kun mayo an pabor nin Dios, napapaatubang kita sa daing sagkod na pagkapara. Kun siring, malinaw nanggad na igwa nin dakulaon na halaga an ano man na makatatabang sa sato na makamtan an marahay na relasyon ki Jehova.

Kun Ano an Dapat Niatong Gibohon

An satong kapangganahan minadepende sa pagkua niato nin kaaraman. An gikanan nin tamang kaaraman iyo an Tataramon ni Jehova, an Biblia. Iyan an solamenteng nagsasabi sa sato kun ano an dapat niatong gibohon tanganing paogmahon an Dios. Kaipuhan niato kun siring na maingat na pag-adalan an Kasuratan. An maigot na paghihingoang manodan an gabos na makakaya niatong maaraman manongod ki Jehova Dios asin ki Jesu-Cristo maresulta sa ‘kaaraman na nangangahulogan nin buhay na daing katapusan.’ (Juan 17:3) An siring na kaaraman sarong kayamanan na dapat pakamahalon!​—Talinhaga 2:1-5.

Sinasangkapan kita kan kaaraman na nakukua niato sa Tataramon nin Dios na gibohon an sunod na lakdang​—gumibo nin pagtubod ki Jesu-Cristo. Ipinagboot ni Jehova na an gabos na minadolok sa saiya dapat na gibohon iyan paagi ki Jesus. (Juan 14:6) An totoo, “mayo nin kaligtasan sa siisay pa man na iba.” (Gibo 4:12) An satong pagdadanay na buhay sa kahurihurihi minadepende, bakong sa ‘pirak o bulawan . . . , kundi sa mahal na marhay na dugo ni Cristo.’ (1 Pedro 1:​18, 19) Dapat niatong ipaheling an satong pagtubod paagi sa paniniwala sa mga katokdoan ni Jesus asin pagsunod sa saiyang halimbawa. (Hebreo 12:1-3; 1 Pedro 2:21) Asin kanigoan an halaga kan saiyang atang! An pag-aplikar kan mga pakinabang kaiyan an nagdedeterminar kan daing katapusan na ngapit kan bilog na katawohan. Kun iyan biyo nang ikaaplikar para sa sato, tinatawan kita kan tunay na mahalagang regalo na buhay na daing katapusan.​—Juan 3:16.

Si Jesus nagsabi: “Kamotan mo si Jehova na saimong Dios sa bilog mong puso asin sa bilog mong kalag patin sa bilog mong isip.” (Mateo 22:37) An pagkamoot ki Jehova nangangahulogan na “kuyogon niato an saiyang mga togon.” (1 Juan 5:3) Hinahagad kan saiyang togon na magdanay kitang siblag sa kinaban, magdanay na tanos an gawe-gawe, asin maimbod na magsuportar sa saiyang Kahadean. Iyan an paagi na ‘pinipili niato an buhay’ imbes na an kagadanan. (Deuteronomio 30:19) Kun kita ‘rumani sa Dios, sia marani sa sato.’​—Santiago 4:8.

An garantiya nin pabor nin Dios mas mahalagang marhay kisa gabos na kayamanan kan kinaban. An mga igwa kaiyan iyo an pinakamayaman na mga tawo sa daga! Kun siring, magmaigot logod kita na makua an kayamanan na may tunay na halaga​—an pag-oyon ni Jehova. Tunay nanggad, isapuso niato an konseho ni apostol Pablo: “Sunodon mo an katanosan, diosnon na debosyon, pagtubod, pagkamoot, pakatagal, kahoyoan nin boot. Makipaglaban ka kan marahay na pakilaban kan pagtubod, mangapot ka nin marigon sa buhay na daing katapusan.”​—1 Timoteo 6:​11, 12.

[Mga Ritrato sa pahina 21]

Ano an pinahahalagahan nindo nin labi-labi? Kuarta, materyal na mga rogaring, kabantogan, o iba pa?

[Ritrato sa pahina 23]

Kaipuhan na maingat niatong pag-adalan an Kasuratan