Unsa ang Dunay Tinuod nga Bili?

Makapalipay ang pagpanag-iya sa usa ka butang nga dunay tinuod nga bili. Apan unsa kaha kana? Dakong kantidad sa salapi? Mahalon o talagsaong alahas? Kabantog o pagkaprominente? Gipabilhan kaayo kini sa daghang tawo. Ang pagbaton niini makatagana sa panginahanglan sa kinabuhi, makahimo sa kinabuhi nga mas makahuloganon, o makatagbaw sa panginahanglan nga ilhon ug dunay nahimo. Naningkamot ba kita sa pagbaton niining mga butanga, naglaom nga matuman niini ang atong mga tumong ug mga pangandoy alang sa umaabot?

KASAGARAN, gipabilhan sa mga tawo ang usa ka butang binase sa kon sa unsang paagi motagana kini sa ilang mga panginahanglan o motagbaw sa ilang personal nga mga tinguha. Gipabilhan nato ang mga butang nga naghatag ug kalipay ug nagtanyag ug paglaom sa usa ka seguradong kaugmaon. Gipakabahandi nato ang mga butang nga mohatag ug dihadihang kahupayan, paglipay, o pag-ila. Apan, ang pag-isip sa usa ka butang nga bililhon binase sa atong nag-usab-usab nga mga tinguha o mga interes maoy taphaw ug pagpakitag mubong panglantaw. Sa pagkatinuod, ang tinuod nga bili gitino sa kon unsay atong giila nga mao ang atong labing dakong panginahanglan.

Unsa ang atong labing dakong panginahanglan? Walay bili ang bisan unsang butang kon wala ang usa ka pangunang sangkap—kinabuhi. Kon walay kinabuhi, dili kita maglungtad. Si Haring Solomon sa karaang Israel misulat: “Bahin sa mga patay, sila walay nahibaloan nga bisan unsa . . . Walay buluhaton ni lalang ni kahibalo ni kaalam sa Sheol [komong lubnganan sa mga tawo].” (Ecclesiastes 9:5, 10) Kon mamatay kita, mapugos kita sa pagbiya sa tanan nga atong gipanag-iya. Busa, ang atong labing dakong panginahanglan mao ang pagbaton sa butang nga magtipig sa atong kinabuhi. Unsa kana?

Unsa ang Magtipig sa Atong Kinabuhi?

“Ang salapi usa ka panalipod,” nag-ingon si Haring Solomon. (Ecclesiastes 7:12) Kon may igong salapi, kita makabaton ug pagkaon ug komportableng puy-anan. Ang salapi mahimong magpaarang kanato sa pagtagamtam sa kalipay sa pagbiyahe ngadto sa lagyong mga dapit. Makatagana kini sa atong mga kinahanglanon sa dihang dili na  kita makatrabaho tungod sa katigulangon o sakit. Daghang kaayohan ang mabatonan kon dunay salapi. Bisan pa niana, ang salapi dili makatipig sa atong kinabuhi. Gitambagan ni apostol Pablo si Timoteo: “Sugoa ang mga dato niini nga sistema sa mga butang nga dili magmapahitas-on sa kaisipan, ug magbutang sa ilang paglaom, dili sa walay-kasegurohang bahandi, kondili sa Diyos.” (1 Timoteo 6:17) Ang tanang salapi sa kalibotan dili makapalit ug kinabuhi alang kanato.

Tagda ang kasinatian sa usa ka tawo nga ginganlag Hitoshi. Kay gimatuto nga kabos, dako kaayo ang tinguha ni Hitoshi nga madato. Nagtuo gayod siya sa gahom sa salapi mao nga siya naghunahuna nga iyang mapalit bisan ang mga tawo pinaagi niini. Dayon dunay miduaw nga lalaki kang Hitoshi ug nangutana kaniya kon nahibalo ba siya nga si Jesu-Kristo namatay alang kaniya. Kining pangutanaha nakapukaw sa pagkamaukiton ni Hitoshi tungod kay siya nagtuo nga walay tawong magpakamatay alang sa usa ka tawong sama niya. Mitambong siya sa usa ka pakigpulong publiko sa Bibliya ug nakurat sa pagkadungog sa tambag nga ‘huptang yano ang mata.’ Gipatin-aw sa mamumulong nga ang “yano” nga mata taas ug panglantaw ug nasentro sa espirituwal nga mga butang. (Lucas 11:34) Imbes maghago alang sa salapi, si Hitoshi nagsugod sa pag-una sa espirituwal nga mga sukdanan diha sa iyang kinabuhi.

Ang materyal nga mga kabtangan makahatag usab kanato ug usa ka sukod sa kalig-on ug kasegurohan. Dili kita mabalaka bahin sa atong adlaw-adlawng mga panginahanglan tungod sa materyal nga kadagaya. Ang usa ka nindot nga balay diha sa patsadang kasilinganan makahatag kanato ug pagbati nga nagmalamposon. Ang mga sininang sunod sa uso ug mahalong awto makapadayeg sa uban kanato.

Usa ka panalangin ang ‘pagpahimulos ug maayo sa tanan natong kahago.’ (Ecclesiastes 3:13) Ug ang pagbaton ug sobra makapaarang sa atong mga minahal sa ‘pagpahayahay, pagkaon, pag-inom, ug paglipaylipay.’ Apan, ang materyal nga mga butang dunay lumalabay lamang nga bili. Sa pagpasidaan batok sa hakog nga pangibog, si Jesu-Kristo nag-ingon: “Bisag ang usa ka tawo adunay kadagaya ang iyang kinabuhi wala magagikan sa mga butang nga iyang gipanag-iya.” (Lucas 12:15-21) Ang mga kabtangan, bisag unsa pa ang kantidad o bili niini, dili makagarantiya sa paghatag kanato ug kinabuhi.

Pananglitan, si Liz naminyo sa usa ka arangan nga lalaki. Siya miasoy: “Kami dunay nindot nga balay ug duha ka kotse, ug ang among pinansiyal nga kahimtang naghatag kanamog kagawasan sa pagtagamtam sa bisan unsang materyal nga mga butang nga ikatanyag sa kalibotan . . . Motuo kag sa dili, mabalaka gihapon ko bahin sa salapi.” Siya nagpatin-aw: “Dako kaayo ang mawala kanamo. Kon mas daghan ang imong mabatonan sa materyal, morag mobati ka na hinuon nga mas walay kasegurohan.”

Ang kabantog ug pagkaprominente gipabilhan usab pag-ayo sa daghan tungod kay mohatag kinig pagdayeg ug pasidungog. Sa kalibotan karon ang usa ka malamposong karera maoy usa ka kalamposan nga gikaibgan. Ang pag-ugmad ug talagsaong mga abilidad o mga katakos tingali makatabang kanato sa pagkahimong ilado. Tingali dayegon kita sa uban, pabilhan pag-ayo ang atong mga opinyon, ug gustong maangkon ang atong pabor. Kining tanan mahimong makapalipay ug makapatagbaw. Apan, sa ngadtongadto kini mahanaw. Nabatonan ni Solomon ang tanang himaya ug gahom nga mahimong maangkon sa usa ka hari, apan siya mimulo: “Walay handomanan sa tawong maalamon nga labaw kay sa hungog . . . Ang tanan tino nga nahikalimtan.” (Ecclesiastes 2:16) Ang kinabuhi dili mao ang ganti alang sa kabantog o pagkaprominente.

Gipabilhan pag-ayo sa usa ka tigkulit nga ginganlag Celo ang usa ka butang nga mas bililhon kay sa kabantog. Kay abilidaran, siya mikuwalipikar alang sa pag-eskuyla nga magpauswag sa iyang mga katakos. Wala madugay ang iyang kinulit gidayeg sa prensa ug sa mga kritiko sa arte. Daghan sa iyang mga kinulit gipasundayag sa dagkong mga siyudad sa Uropa. Si Celo miasoy: “Angkonon ko nga dihay panahon nga ang arte mao ang labing hinungdanong butang sa akong kinabuhi. Apan, akong naamgohan nga para nako, ang pagpadayon sa akong karera maoy sama sa pagpaningkamot sa pag-alagad ug duha ka agalon. (Mateo 6:24) Ako kombinsido nga ang labing hinungdanong butang nga akong mahimo mao ang pagsangyaw sa maayong balita sa Gingharian sa Diyos. Busa nakadesisyon ako nga biyaan ang akong trabaho ingong usa ka tigkulit.”

 Unsa ang Dunay Kinalabwan ug Bili?

Sanglit walay butang nga dunay kahulogan o bili kon walay kinabuhi, unsay atong mahimong mabatonan nga mogarantiya nga kita padayong mabuhi? Ang tanang kinabuhi naggikan kang Jehova nga Diyos. (Salmo 36:9) Sa pagkatinuod, “pinaagi kaniya kita adunay kinabuhi ug naglihok ug naglungtad.” (Buhat 17:28) Siya mohatag ug kinabuhing walay kataposan ingong gasa ngadto sa mga tawong iyang gihigugma. (Roma 6:23) Unsay angay natong buhaton aron mokuwalipikar sa pagdawat niini nga gasa?

Ang pagdawat sa gasa sa kinabuhing walay kataposan nag-agad sa atong pagbaton ug suod nga relasyon kang Jehova. Busa, ang iyang pabor mas labawg bili kay sa bisan unsang butang nga mahimo natong mapanag-iya. Kon mabatonan nato kini, kita makadahom ug tinuod ug walay kataposang kalipay. Apan, kon wala ang pabor sa Diyos, kita makadahom ug dumalayong pagkapuo. Nan, tin-aw nga ang bisan unsang butang nga makatabang kanato sa pagbaton ug maayong relasyon kang Jehova adunay dako kaayong bili.

Unsay Angay Natong Buhaton

Ang atong kalamposan nag-agad sa atong pagbaton ug kahibalo. Ang tinubdan sa tukma nga kahibalo mao ang Pulong ni Jehova, ang Bibliya. Kini lamang ang makasulti kanato kon unsay angay natong buhaton aron pahimut-an ang Diyos. Busa kinahanglang atong tun-an pag-ayo ang Kasulatan. Ang pagkugi sa pagtuon sa tanan kutob sa atong maarangan bahin kang Jehova nga Diyos ug kang Jesu-Kristo moresulta sa ‘kahibalo nga nagkahulogan ug kinabuhing walay kataposan.’ (Juan 17:3) Ang maong kahibalo maoy usa ka bahandi nga angayng pabilhan!—Proverbio 2:1-5.

Ang kahibalo nga atong mabatonan gikan sa Pulong sa Diyos magsangkap kanato sa paghimo sa sunod nga lakang—pagpasundayag ug pagtuo kang Jesu-Kristo. Si Jehova nagbaod nga ang tanang moduol kaniya kinahanglang maghimo niini pinaagi kang Jesus. (Juan 14:6) Sa pagkatinuod, “walay kaluwasan diha kang bisan kinsa pang lain.” (Buhat 4:12) Ang atong kaluwasan sa kataposan mag-agad, dili sa ‘plata o sa bulawan . . . , kondili sa bililhong dugo ni Kristo.’ (1 Pedro 1:18, 19) Kinahanglang ipasundayag nato ang atong pagtuo pinaagi sa pagtuo sa mga pagtulon-an ni Jesus ug sa pagsundog sa iyang panig-ingnan. (Hebreohanon 12:1-3; 1 Pedro 2:21) Ug pagkabililhon sa iyang halad! Ang kapadapatan sa mga benepisyo niini magtino sa walay kataposang kaugmaon sa tanang katawhan. Kon kini bug-os na nga mapadapat kanato, gihatag na kanato ang tinuod nga bililhong gasa sa kinabuhing walay kataposan.—Juan 3:16.

Si Jesus nag-ingon: “Higugmaon mo si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan.” (Mateo 22:37) Ang paghigugma kang Jehova nagpasabot nga “atong bantayan ang iyang mga sugo.” (1 Juan 5:3) Siya nagsugo nga kita magpabiling bulag sa kalibotan, maghupot ug matarong nga panggawi, ug maunongong magpaluyo sa iyang Gingharian. Kana ang paagi sa atong ‘pagpili sa kinabuhi’ imbes sa kamatayon. (Deuteronomio 30:19) Kon kita ‘moduol sa Diyos, siya moduol kanato.’—Santiago 4:8.

Ang pasalig nga mabatonan ang pabor sa Diyos labaw kaayog bili kay sa tanang bahandi sa kalibotan. Kadtong nakabaton niini mao ang labing adunahang mga tawo sa kalibotan! Nan, hinaot nga maningkamot kita sa pagbaton sa bahandi nga dunay tinuod nga bili—ang pag-uyon ni Jehova. Busa, sundon gayod nato ang tambag ni apostol Pablo: “Tinguhaa ang pagkamatarong, diyosnong pagkamahinalaron, pagtuo, gugma, pagkamainantoson, kalumo sa buot. Pakigbugno sa maayong pakigbugno sa pagtuo, pangupot pag-ayo sa kinabuhing walay kataposan.”—1 Timoteo 6:11, 12.

[Mga hulagway sa panid 21]

Unsay imong gipabilhan ug dako? Salapi, materyal nga mga kabtangan, kabantog, o lain pang butang?

[Hulagway sa panid 23]

Kinahanglang atong tun-an pag-ayo ang Kasulatan