Ke Eng Seo se Nago le Mohola wa Kgonthe?

Go ba le selo se itšego sa mohola wa kgonthe e ka ba mo go thabišago. Eupša seo e ka ba eng? Tšhelete e ntši? Mabenyabje a theko ya godimo goba a sa tlwaelegago? Botumo le bophagamo? Batho ba bantši ba tšeela dilo tše godimo kudu. Go ba le tšona go ka ba phediša, gwa dira bophelo gore e be bjo bo nago le morero kudu goba gwa kgotsofatša senyakwa sa ka gare sa go nyaka go lemogwa le bokgoni. Na re katanela go fihlelela dilo tše bjalo, re holofela gore di tla phethagatša dipakane tša rena le ditlhologelo bakeng sa bokamoso?

GANTŠI, batho ba tšeela godimo selo seo se theilwego tseleng yeo e kgotsofatšago dinyakwa tša bona goba e kgotsofatšago dikganyogo tša bona ka noši. Re tšeela godimo dilo tšeo di tsošago maikwelo a go phela gabotse le go ba le tebelelo ya bokamoso bjo bo šireletšegilego. Re thabela dilo tšeo di tlišago kimollo ya kapejana, khomotšo goba go lemogwa. Lega go le bjalo, go lebelela selo e le sa mohola re ithekgile ka dikganyogo tša rena tše di fetogago goba dilo tše re di ratago ke mo go sa išego le go naganela kgaufsi. Ka kgonthe, selo sa mohola wa kgonthe se hlaolwa ka seo re se kwešišago e le senyakwa sa rena se segolo kudu.

Senyakwa sa rena se segolo kudu ke eng? Ga go na selo seo se nago le mohola wa kgonthe ka ntle le setlabakelo se segolo​—bophelo. Ka ntle le bophelo, ga re gona. Kgoši Salomo wa Isiraele ya bogologolo o ngwadile gore: “ ’Me xo bahu xa xo se se tsebyaxo . . . Kwa bo-dula-bahu [lebitla la batho le le tlwaelegilego] mo O yaxo xôna, xa xo na modirô, xa xo na kxopolô, xa xo tsebô le bohlale.” (Mmoledi 9:​5, 10) Ge e ba re e-hwa, re gapeletšega go tlogela selo se sengwe le se sengwe seo re nago le sona. Ka gona, senyakwa sa rena se segolo kudu ke go hwetša selo seo se tla šireletšago maphelo a rena. Ke eng seo se tla dirago seo?

Ke Eng Seo se Tlago go Šireletša Maphelo a Rena?

Kgoši Salomo o itše: “Tšhelete ke tšhireletšo.” (Mmoledi 7:​12, PK) Ka tšhelete e lekanego, re ka hwetša dijo le legae la manobonobo. Tšhelete e ka dira gore re kgone go thabela boipshino bja go etela mafelong a kgole. E ka re nea dinyakwa tša rena ge re se sa kgona go  šoma ka baka la botšofadi goba bolwetši. Mehola ya go ba le tšhelete ke e mentši. Lega go le bjalo, tšhelete e ka se ke ya šireletša maphelo a rena. Moapostola Paulo o eleditše Timotheo ka gore: “Bahumi ba mehleng ya byale ba laêlê O re ba se ikxodišê, ba se holofêlê lehumô la xo tla le xo tloxa; ba holofêlê Modimo e a phelaxo, e a re faxo tšohle xore di re natêfêlê.” (1 Timotheo 6:​17) Tšhelete ka moka e lego lefaseng e ka se re rekele bophelo.

Ela hloko phihlelo ya monna yo a bitšwago Hitoshi. Ka ge a godišeditšwe lapeng leo le diilago, Hitoshi o ile a ba le kganyogo e matla ya go huma. O be a dumela kudu matleng a tšhelete moo a ilego a ba a nagana gore gaešita le batho ba ka rekwa ka yona. Ke moka monna o ile a tla legaeng la gabo Hitoshi gomme a mmotšiša ge e ba a be a tseba gore Jesu Kriste o mo hwetše. Potšišo ye e ile ya dira gore Hitoshi a nyake go tseba ka ge a be a nagana gore ga go na yo a ka hwelago motho yo a swanago le yena. O ile a ba gona polelong ya Beibele ya phatlalatša gomme o ile a makatšwa ke go kwa keletšo e lego mabapi le go ‘boloka leihlo le lokile.’ Seboledi se ile sa hlalosa gore leihlo le le ‘lokilego’ ke leo le lebelelago bokamosong gomme la lebiša tlhokomelo dilong tša moya. (Luka 11:​34) Go e na le go šomela tšhelete ka thata, Hitoshi o ile a thoma go etiša pele mehola ya moya bophelong bja gagwe.

Dilo tše di bonagalago gape di ka re tlišetša tekanyo ya matla le tšhireletšego. Go ba le dilo tše dintši go ka re imolla dipelaelo mabapi le dinyakwa tša letšatši le letšatši. Legae le lebotse tikologong yeo re e ratago le ka re nea maikwelo a go ba le bokgoni. Diaparo tše di lego nakong le koloi e botse di ka re tlišetša go ratwa ke ba bangwe.

Ke tšhegofatšo go ‘bona tše botse ka ditapišego tšohle tša rena.’ (Mmoledi 3:​13) Gomme go ba le tše dintši go ka dira gore baratiwa ba rena ba kgone go ‘khutša, ba je, ba nwe gomme ba ipshine.’ Lega go le bjalo, dilo tše di bonagalago di na le feela mohola o fetago. Jesu Kriste ge a be a lemoša malebana le megabaru o itše: “Xobane bophelô bya motho xa bo tšwe lehumong le xo tše a di ruilexo.” (Luka 12:​15-21) Dithoto, go sa šetšwe gore ke tše dintši goba di na le mohola gakaakang, di ka se re nee bophelo.

Ka mohlala, Liz o be a nyetšwe ke monna yo a atlegilego kudu ka tša ditšhelete. O laodiša ka gore: “Re be re na le legae le lebotse le dikoloi tše pedi, gomme boemo bja rena bja tša ditšhelete bo ile bja re dumelela tokologo ya go thabela selo le ge e le sefe seo lefase le ka se neago dilong tše di bonagalago. . . . Ka mo go makatšago, ke sa dutše ke belaela ka tšhelete.” O hlalosa gore: “Re be re timelelwa ke dilo tše dintši kudu. Go bonagala eka ge o e-na le dilo tše dintši kudu, ke moo o ikwago o sa šireletšega kudu.”

Botumo le bophagamo le tšona di tšeelwa godimo ke ba bantši ka gobane di ka tliša tumišo le tlhompho. Lefaseng la lehono mošomo o atlegilego ke selo seo se dungwago. Go hlagolela ditalente goba bokgoni bja moswana-noši go ka re thuša go itirela leina. Ba bangwe ba ka re tumiša, ba tšeela godimo dikakanyo tša rena gomme ba katanela gore re ba rate. Tše ka moka e ka ba tšeo di thabišago le go kgotsofatša. Lega go le bjalo, mafelelong di a hwelela. Salomo o be a na le letago le matla ka moka tšeo kgoši e ka bago le tšona, eupša o llile ka gore: “Xobane yo bohlale xotee le setlatla xa ba xopolwe xo ya xo ile . . . [Ba] lebetšwe bohle.” (Mmoledi 2:​16) Bophelo ga se moputso wa botumo le go ba le maemo a godimo.

Mmetli yo mogolo yo a bitšwago Celo o ile a thoma go tšeela godimo kudu selo seo se nago le mohola kudu go feta botumo. Ka ge a be a filwe, o ile a swanelegela go tsena sekolo seo se ilego sa kaonefatša bokgoni bja gagwe. Kapejana mošomo wa gagwe o ile wa tumišwa dikuranteng le go ditsebi tša bokgabo. Bontši bja diswantšho tša gagwe di be di ile tša bontšhwa metseng e megolo ya Yuropa. Celo o anega ka gore: “Ke swanetše go dumela gore ka nako e itšego bokgabo e be e le selo sa bohlokwa kudu bophelong bja-ka. Lega go le bjalo, ke ile ka lemoga gore go nna go tšwela pele ka mošomo wa-ka go be go tla bapišwa le go leka go hlankela marena a mabedi. (Mateo 6:​24) Ke be ke kgodišegile gore selo sa bohlokwa kudu seo ke bego nka se dira e be e le go bolela ditaba tše dibotse tša Mmušo wa Modimo. Ka gona ke ile ka  dira phetho ya motho ka noši ya go tlogela mošomo wa-ka bjalo ka mmetli.”

Ke Eng Seo se Nago le Mohola o Mogolo Kudu?

Ka ge go se na selo seo se nago le morero goba mohola ka ntle le bophelo, re ka hwetša eng seo se tla kgonthišetšago gore re tšwela pele re phela? Bophelo ka moka bo tšwa go Jehofa Modimo. (Psalme 36:9) Ka kgonthe, “xe re phela, rè sepela, rè le xôna, ké ka Yêna.” (Ditiro 17:​28) O nea bophelo bjo bo sa felego e le mpho go bao a ba ratago. (Ba-Roma 6:​23) Re swanetše go dira’ng bakeng sa go swanelegela mpho ye?

Go amogela mpho ya bophelo bjo bo sa felego go ithekgile ka go ba le tswalano ya kgaufsi le Jehofa. Ka gona, go amogelwa ke yena go na le mohola o mogolo kudu go feta selo le ge e le sefe seo re ka bago le sona. Ge re na le yona, re na le tebelelo ya lethabo la kgonthe le la ka mo go sa felego. Lega go le bjalo, ka ntle le go amogelwa ke Modimo, re lebeletšana le go fedišetšwa ruri. Ka gona, ka mo go kwagalago, selo le ge e le sefe seo se tla re thušago go fihlelela tswalano e botse le Jehofa se na le mohola o tseneletšego.

Seo re Swanetšego go se Dira

Go atlega ga rena go ithekgile ka go hwetša ga rena tsebo. Mothopo wa tsebo e nepagetšego ke Lentšu la Jehofa, Beibele. Ke yona e nnoši e re botšago seo re swanetšego go se dira gore re kgahliše Modimo. Ka gona re swanetše go ithuta Mangwalo ka kelohloko. Boiteko bja kgonthe bja go ithuta sohle se re ka se kgonago ka Jehofa Modimo le Jesu Kriste bo feleletša ka ‘tsebo yeo e bolelago bophelo bjo bo sa felego.’ (Johane 17:3) Tsebo e bjalo ke lehumo leo le swanetšego go tšeelwa godimo!​—Diema 2:​1-5.

Tsebo ye re e hwetšago Lentšung la Modimo e re hlamela go gata mogato o latelago​—go bontšha tumelo go Jesu Kriste. Jehofa o laetše gore bohle bao ba tlago go yena ba swanetše go dira bjalo ka Jesu. (Johane 14:6) Ge e le gabotse, “xa xo phološô xo e mongwê.” (Ditiro 4:​12) Go phologa ga rena mafelelong ga se gwa ithekga ka ‘silifera goba gauta . . . , eupša ka madi a bohlokwa a Kriste.’ (1 Petro 1:​18, 19) Re swanetše go bontšha tumelo ya rena ka go dumela dithuto tša Jesu le ka go latela mohlala wa gagwe. (Ba-Hebere 12:​1-3; 1 Petro 2:​21) Gomme sehlabelo sa gagwe se na le mohola gakaakang! Go dirišwa ga mehola ya sona go bolela bokamoso bja ka mo go sa felego bathong ka moka. Ge se dirišitšwe ka mo go feletšego bakeng sa rena, re newa mpho ya mohola e le ka kgonthe ya bophelo bjo bo sa felego.​—Johane 3:16.

Jesu o itše: “Morêna Modimo wa xaxo O mo ratê ka pelo ya xaxo ka moka, le ka môya wa xaxo ka moka, le ka thlaoloxanyô ya xaxo ka moka.” (Mateo 22:​37) Go rata Jehofa go bolela gore re ‘kwe melao ya gagwe.’ (1 Johane 5:3) Melao ya gagwe e nyaka gore re dule re arogile lefaseng, re boloke boitshwaro bjo bobotse gomme re thekge Mmušo wa gagwe ka potego. Ke ka tsela yeo re ‘kgethago bophelo’ go e-na le lehu. (Doiteronomio 30:​19) Ge e ba re ‘batamela kgaufsi le Modimo, le yena o tla re batamela.’​—Jakobo 4:8.

Kgonthišetšo ya go amogelwa ke Modimo e feta kgole kudu mahumo ka moka a lefase. Bao ba nago le yona ke bahumi-humi mo lefaseng! Ka gona, anke re kataneleng go ba le lehumo la mohola wa kgonthe​—go amogelwa ke Jehofa. Ka kgonthe, anke re eleng hloko keletšo ya moapostola Paulo: “O phêxêlêlê tokô, le borapedi, le tumêlô le leratô, le kxôtlêlêlô, le bonôlô. Hlabana thlabanô e botse ya tumêlô, O thopê bophelô byo bo sa felexo.”​—1 Timotheo 6:​11,  12.

[Diswantšho go letlakala 21]

Ke eng seo o se tšeelago godimo? Tšhelete, dilo tše di bonagalago, botumo goba selo se sengwe?

[Seswantšho go letlakala 23]

Re swanetše go ithuta Mangwalo ka kelohloko