Mga Pangutana Gikan sa mga Magbabasa

Unsay buot ipasabot sa pagsimba kang Jehova “uban sa espiritu”?

Sa dihang nagsangyaw sa usa ka babaye sa Samaria nga nagkalos ug tubig sa tuboran ni Jacob duol sa siyudad sa Sicar, si Jesu-Kristo miingon: “Ang Diyos maoy Espiritu, ug silang magasimba kaniya kinahanglan nga magasimba uban sa espiritu ug sa kamatuoran.” (Juan 4:24) Ang matuod nga pagsimba kinahanglang buhaton ‘uban sa kamatuoran’ sa diwa nga kini kinahanglang mahiuyon sa gipadayag ni Jehova nga Diyos diha sa Bibliya bahin sa iyang kaugalingon ug sa iyang mga katuyoan. Ang atong pag-alagad sa Diyos kinahanglang madasigon, o masiboton, nga gipalihok sa usa ka kasingkasing nga tugob sa gugma ug pagtuo. (Tito 2:14) Apan, ang konteksto nagpakita nga ang pahayag ni Jesus bahin sa ‘pagsimba sa Diyos uban sa espiritu’ nagtumong ug labaw pa kay sa kiling sa kaisipan nga nakapalihok kanato sa pag-alagad kang Jehova.

Ang panaghisgot ni Jesus uban sa babaye sa atabay maoy dili bahin sa pagkamay-kasibot o kakulang niini diha sa pagsimba. Bisan ang bakak nga pagsimba mahimong buhaton uban ang kasibot ug pagkamahinalaron. Hinunoa, human isulti nga ang Amahan pagasimbahon dili sa bukid sa Samaria ni sa templo sa Jerusalem—parehong pisikal nga mga dapit—gipunting ni Jesus ang usa ka bag-ong paagi sa pagsimba pinasukad sa matuod nga kinaiya sa Diyos. (Juan 4:21) Siya miingon: “Ang Diyos maoy usa ka espirituwal nga Persona.” (Juan 4:24, Charles B. Williams) Ang matuod nga Diyos dili materyal ug dili makita o mahikap. Ang pagsimba kaniya wala masentro sa usa ka pisikal nga templo o bukid. Busa, gitumong ni Jesus ang usa ka bahin sa pagsimba nga saylo pa sa mga butang nga makita.

Dugang pa sa pagbuhat uban sa kamatuoran, ang dalawatong pagsimba kinahanglan usab nga magiyahan pinaagi sa balaang espiritu—ang dili makitang aktibong puwersa sa Diyos. “Ginasusi sa [balaang] espiritu ang tanang butang,” misulat si apostol Pablo, “bisan ang lawom nga mga butang sa Diyos.” Siya midugang: “Atong nadawat, dili ang espiritu sa kalibotan, kondili ang espiritu nga gikan sa Diyos, aron kita mahibalo sa mga butang nga malulotong gihatag kanato sa Diyos.” (1 Corinto 2:8-12) Aron masimba ang Diyos sa dalawatong paagi, kinahanglang batonan nato ang iyang espiritu ug magpagiya niana. Dugang pa, hinungdanon nga ang atong espiritu, o kiling sa pangisip, mahiuyon sa espiritu sa Diyos pinaagi sa pagtuon ug pagpadapat sa iyang Pulong.

[Hulagway sa panid 28]

Simbaha ang Diyos “uban sa espiritu ug kamatuoran”