Sanebimɔi ni Jɛ Kanelɔi Adɛŋ

Mɛni Yehowa ni Aaajá lɛ “yɛ mumɔŋ” lɛ Tsɔɔ?

Beni Yesu Kristo yeɔ Samaria yoo ko ni eba nu yɛɛ yɛ Yakob nubu ni bɛŋkɛ Sikar maŋtiase lɛ odase lɛ, ekɛɛ akɛ: “Nyɔŋmɔ lɛ Mumɔŋ, ni mɛi ni jáa lɛ lɛ, ja amɛjá lɛ yɛ mumɔ kɛ anɔkwale mli.” (Yohane 4:24) Esa akɛ akɛ anɔkwa jamɔ aha ‘yɛ anɔkwale mli,’ ni ji akɛ, esa akɛ ekɛ nɔ ni Yehowa Nyɔŋmɔ ejie lɛ kpo yɛ Biblia lɛ mli ni kɔɔ lɛ diɛŋtsɛ kɛ eyiŋtoi ahe lɛ akpã gbee. Esa akɛ sɔɔmɔ ni wɔkɛhaa Nyɔŋmɔ lɛ hu afee nɔ ni jɛ mumɔ mli, kɛ shishinumɔ akɛ efee nɔ ni ekãa yɔɔ mli ni nɔ ni kanyaa lɛ ji tsui ni mli eyi obɔ kɛ suɔmɔ kɛ hemɔkɛyeli. (Tito 2:14) Shi kɛlɛ, emli sane lɛ tsɔɔ akɛ Yesu wiemɔ ni kɔɔ ‘Nyɔŋmɔ ni ajáa lɛ yɛ mumɔŋ’ lɛ he lɛ yaa shɔŋŋ fe jwɛŋmɔŋ su ni wɔkɛ sɔmɔɔ Yehowa lɛ.

Sane ni Yesu kɛ yoo lɛ gba yɛ nubu lɛ he lɛ kɔɔɔ henumɔ ni mli wa ni ayɔɔ loo ni abɛ yɛ jamɔ mli lɛ he. Abaanyɛ akɛ apasa jamɔ po aha yɛ ekãa kɛ hetuu-kɛhamɔ mli. Yɛ no najiaŋ lɛ, beni Yesu jaje akɛ ajáŋ Tsɛ lɛ yɛ gɔŋ ko ni yɔɔ Samaria lɛ nɔ, loo yɛ sɔlemɔtsu ni yɔɔ Yerusalem—hei enyɔ ni anaa lɛ sɛɛ lɛ—etsɔɔ gbɛ hee ko ni atsɔɔ nɔ ajáa Nyɔŋmɔ yɛ bɔ ni eji diɛŋtsɛ lɛ naa. (Yohane 4:21) Ekɛɛ akɛ: “Nyɔŋmɔ lɛ, mumɔŋ Gbɔmɔ ni.” (Yohane 4:24, Charles B. Williams) Anɔkwa Nyɔŋmɔ lɛ jeee heloo gbɔmɔ, ni anyɛŋ ana lɛ loo ata ehe. Jamɔ ni akɛhaa lɛ lɛ damɔɔɔ sɔlemɔtsu ko ni anaa loo gɔŋ ko nɔ. No hewɔ lɛ, Yesu gbala jwɛŋmɔ kɛtee jamɔ fã ko ni yaa shɔŋŋ fe nibii ni anaa lɛ nɔ.

Kɛfata anɔkwale mli ni abaajɛ ajá Nyɔŋmɔ lɛ he lɛ, esa akɛ mumɔ krɔŋkrɔŋ—ni ji enifeemɔ hewalɛ ni anaaa lɛ akudɔ jamɔ ni akpɛlɛɔ nɔ lɛ hu. Bɔfo Paulo ŋma akɛ: ‘Mumɔ krɔŋkrɔŋ lɛ taoɔ nibii fɛɛ mli, Nyɔŋmɔ nibii ni mli kwɔlɔ lɛ tete.’ Ekɛfata he akɛ: “Jeee je nɛŋ mumɔ lɛ wɔná, shi moŋ Mumɔ ni jɛ Nyɔŋmɔ mli lɛ, koni wɔle nii ni Nyɔŋmɔ eŋɔduro wɔ lɛ.” (1 Korintobii 2:8-12) Bɔni afee ni wɔjá Nyɔŋmɔ yɛ enɔkpɛlɛmɔ mli lɛ, esa akɛ wɔná emumɔ lɛ eko ni ekudɔ wɔ. Kɛfata he lɛ, ehe miihia ni wɔmumɔ lɛ, loo jwɛŋmɔŋ su lɛ kɛ Nyɔŋmɔ mumɔ lɛ akpã gbee kɛtsɔ e-Wiemɔ lɛ kasemɔ kɛ ekɛ nitsumɔ nɔ.

[Mfoniri ni yɔɔ baafa 28]

Já Nyɔŋmɔ “yɛ mumɔ kɛ anɔkwale mli”