Mga Pamangkot Gikan sa mga Bumalasa

Ano ang kahulugan sang pagsimba kay Jehova “sa espiritu”?

Sang ginpanaksihan ang isa ka babayi nga taga-Samaria nga nagsag-ub sing tubig sa bubon ni Jacob malapit sa siudad sang Sicar, si Jesucristo nagsiling: “Ang Dios Espiritu, kag ang mga nagasimba sa iya dapat magsimba sa espiritu kag kamatuoran.” (Juan 4:24) Ang matuod nga pagsimba dapat himuon nahisuno ‘sa kamatuoran’ amo nga dapat ini nahisanto sa ginpahayag ni Jehova nga Dios sa Biblia tuhoy sa iya kaugalingon kag sa iya mga katuyuan. Ang aton pag-alagad sa Dios dapat man mangin mapagsik, ukon makugi, nga ginapahulag sing isa ka tagipusuon nga puno sing gugma kag pagtuo. (Tito 2:14) Apang, ginapakita sang konteksto nga ang pinamulong ni Jesus tuhoy sa ‘pagsimba sa Dios sa espiritu’ wala lamang nagapatuhoy sa panimuot sang aton hunahuna nga paagi sini nagaalagad kita kay Jehova.

Ang pagpakigsugilanon ni Jesus sa babayi sa bubon indi tuhoy sa kakugi ukon kakulang sini sa pagsimba. Bisan ang butig nga pagsimba mahimo himuon nga may kakugi kag debosyon. Sa baylo, sa tapos magsiling nga ang Amay indi dapat simbahon sa isa ka bukid sang Samaria ukon sa templo sang Jerusalem​​—⁠lunsay pisikal nga mga duog​​—⁠ginpatalupangod ni Jesus ang isa ka bag-o nga paagi sang pagsimba pasad sa matuod nga kinaugali sang Dios. (Juan 4:21) Nagsiling sia: “Ang Dios isa ka espirituwal nga Persona.” (Juan 4:​24, Charles B. Williams) Ang matuod nga Dios indi pisikal kag indi gid makita ukon matandog. Ang pagsimba sa iya wala lamang nasentro sa pisikal nga templo ukon bukid. Busa, ginapatuhuyan ni Jesus ang di-makita nga mga bahin sang pagsimba.

Magluwas nga ginahimo sa kamatuoran, ang kalahamut-an nga pagsimba dapat man tuytuyan sang balaan nga espiritu​​—⁠ang di-makita aktibo nga kusog sang Dios. “Ang [balaan] nga espiritu nagausisa sang tanan nga mga butang,” sulat ni apostol Pablo, “bisan ang madalom nga mga butang sang Dios.” Nagdugang sia: “Nabaton naton, indi ang espiritu sang kalibutan, kundi ang espiritu nga gikan sa Dios, agod mahangpan naton ang mga butang nga mainayuhon nga ginhatag sa aton sang Dios.” (1 Corinto 2:8-12) Agod masimba ang Dios sing kalahamut-an, dapat may espiritu kita niya kag ginatuytuyan sini. Dugang pa, kinahanglan nga ang aton espiritu, ukon panimuot sa panghunahuna, nagahisanto sa iya espiritu paagi sa pagtuon kag pag-aplikar sang iya Pulong.

[Retrato sa pahina 28]

Simbaha ang Dios “sa espiritu kag kamatuoran”