Lipuzo Ze Zwa kwa Babali

Ku lapela Jehova “ka Moya” ku talusañi?

Jesu Kreste ha n’a kutaza ku musali yo muñwi wa kwa Samaria ya n’a tile kwa ku ka mezi kwa lisima la Jakobo bukaufi ni munzi wa Sikare, n’a ize: “Mulimu ki Moya, mi ba ba mu lapela, ba swanezi ku mu lapela ka Moya ni ka niti.” (Joani 4:24) Bulapeli bwa niti bu lukelwa ku eziwa “ka niti” ili ku talusa kuli bu lukela ku lumelelana ni s’a patuluzi Jehova Mulimu mwa Bibele ka za hae ni ka za milelo ya hae. Sebelezo ya luna ku Mulimu hape i lukela ku ba ya ka cisehelo, ili ku susumezwa ka pilu ye tezi lilato ni tumelo. (Tite 2:14) Niteñi, mutomo wa taba mo li fumaneha za n’a bulezi Jesu ka za ‘ku lapela Mulimu ka moya’ li ama ze ñata kwand’a fela maikuto ao ka ona lu sebeleza Jehova.

Puhisano yeo Jesu n’a bile ni yona ni musali y’o kwa lisima ne i sa ami za ku ba ni cisehelo kamba ku sa ba ni cisehelo mwa bulapeli. Niheba bulapeli bwa buhata bwa konwa ku eziwa ka cisehelo ni ka busepahali. Kono, ha s’a bulezi kuli Ndate n’a si ke a lapelwa kwa lilundu le liñwi mwa Samaria kamba kwa tempele ya mwa Jerusalema, ili libaka tota, Jesu n’a talusa mulapelelo o munca o tomile fa muinelo wa niti wa Mulimu. (Joani 4:21) N’a ize: “Mulimu ki Mutu wa moya.” (Joani 4:24, toloko ya Charles B. Williams) Mulimu wa niti haki wa nama mi h’a konwi ku bonwa kamba ku swaliwa. Bulapeli bwa hae ha bu si ka toma fa tempele kamba lilundu la fa lifasi. Kacwalo, Jesu n’a talusa kalulo ya bulapeli ya ze sa bonwi.

Kwand’a ku eziwa ka niti, bulapeli bo bu amuheleha hape bu lukelwa ku zamaiswa ka moya o kenile, ona m’ata a sebeza a Mulimu ili a sa bonwi. Muapositola Paulusi n’a ñozi kuli: “Moya [o kenile u] batisisa linto kaufela, mane ni ze tungile za Mulimu.” N’a ekelize kuli: “Ha lu si ka amuhela moya wa lifasi, kono lu amuhezi Moya o zwa ku Mulimu; kuli lu zibe limpo z’a lu file Mulimu ka sishemo.” (1 Makorinte 2:8-12) Kuli lu lapele Mulimu ka ku amuheleha, lu lukela ku ba ni moya wa hae ni ku etelelwa ki ona. Hape, ki kwa butokwa kuli maikuto a luna, kamba moya wa luna, u lumelelane ni moya wa hae ka ku ituta Linzwi la hae ni ka ku li sebelisa.

[Siswaniso se si fa likepe 28]

Mu lapele Mulimu “ka Moya ni ka niti”