Dipotšišo tše Tšwago go Babadi

Go bolela’ng go rapela Jehofa “ka môya”?

Ge a be a nea bohlatse go mosadi wa Samaria yo a bego a tlo kga meetse sedibeng sa Jakobo kgaufsi le motse wa Sikara, Jesu Kriste o itše: “Modimo ké Môya; xomme ba ba Mo rapêlaxo ba tlo Mo rapêla ka môya le ka xo rereša.” (Johane 4:​24) Borapedi bja therešo bo swanetše go dirwa ‘ka therešo’ ka gore bo swanetše go dumelelana le seo Jehofa Modimo a se utullotšego ka Beibeleng mabapi le yena ka noši le merero ya gagwe. Tirelo ya rena go Modimo gape e swanetše go ba ya phišego goba ya mafolofolo yeo e tutuetšwago ke pelo e tletšego lerato le tumelo. (Tito 2:​14) Lega go le bjalo, taba e dikologilego e bontšha gore taba ya Jesu mabapi le ‘go rapela Modimo ka moya’ e mabapi le selo seo se lego kgole kudu le tshekamelo ya monagano yeo re hlankelago Jehofa ka yona.

Poledišano yeo Jesu a bilego le yona le mosadi sedibeng e be e se mabapi le go ba gona ga phišego goba go e hloka borapeding. Gaešita le borapedi bja maaka bo ka dirwa ka phišego le ka boineelo. Go e na le moo, ka morago ga go bolela gore Tate a ka se rapelwe thabeng ya Samaria goba tempeleng ya Jerusalema​—mafelo ao bobedi e lego a kgonthe​—Jesu o ile a šupa mohuteng o mofsa wa borapedi wo o theilwego tlhagong ya kgonthe ya Modimo. (Johane 4:​21) O itše: “Modimo ke Motho wa moya.” (Johane 4:​24, Charles B. Williams) Modimo wa therešo ga se setšweletšwa gomme a ka se kgone go bonwa goba go swarwa. Borapedi bja gagwe ga se bja thewa tempeleng ya kgonthe goba thabeng. Lega go le bjalo, Jesu o ile a bolela ka sebopego sa borapedi seo se fetago dilo tše di ka bonwago.

Go tlaleletša tabeng ya gore bo dirwe ka therešo, borapedi bjo bo amogelegago gape bo tla swanelwa ke go hlahlwa ke moya o mokgethwa​—matla a sa bonagalego a šomago a Modimo. Moapostola Paulo o ngwadile gore: “Môya [o mokgethwa] o fênyêka tšohle, le ôna madiba a diphiri tša Modimo.” O okeditše ka gore: “Rena xa r’a fiwa môya wa lefase; re filwe Môya o tšwaxo xo Modimo, xore re tlê re tsebê tše Modimo a re séditšexo ka tšôna.” (1 Ba-Korinthe 2:​8-12) Gore re rapele Modimo ka mo go amogelegago, re swanetše go ba le moya wa gagwe gomme re hlahlwe ke wona. Go feta moo, go bohlokwa gore moya wa rena goba tshekamelo ya monagano o dumelelanywe le wa gagwe ka go ithuta le go diriša Lentšu la gagwe.

[Seswantšho go letlakala 28]

Rapela Modimo ka “môya le ka xo rereša”