Pregunta di Lector

Kico kier men adorá Jehova “cu spiritu”?

Ora Jesucristo a duna testimonio na un muher di Samaria cu a bin saca awa n’e pos di Jacob cerca di e stad Sícar, el a bisa: “Dios ta un Spiritu, i esnan cu ta ador’é mester adorá cu spiritu i cu berdad.” (Juan 4:24) Mester rindi adoracion berdadero “cu berdad” den e sentido cu esaki mester ta na armonia cu loke Jehova Dios a revelá den Bijbel tocante su mes i su propósitonan. Tambe nos sirbishi na Dios mester ta yen di ánimo of celo, motivá dor di un curason yen di amor i fe. (Tito 2:14) Sin embargo, e contexto ta mustra cu e declaracion di Jesus tocante ‘adorá Dios cu spiritu’ ta bai hopi mas leu cu e disposicion mental cu cua nos ta sirbi Jehova.

E combersacion cu Jesus tabatin cu e muher n’e pos no tabata tocante si e adoracion ta ferviente of laga. Hende por asta rindi adoracion falsu cu celo i debocion. Mas bien, despues cu el a declará cu e Tata lo no ser adorá ni riba ceru di Samaria ni den e tempel na Jerusalem, lugánan literal, Jesus a señalá na un método nobo di adorá cu ta basá riba e berdadero naturalesa di Dios. (Juan 4:21) El a bisa: “Dios ta un Spiritu.” (Juan 4:24, Beibel Santu) E Dios berdadero no tin un curpa físico, i nos no por mir’é ni mishi cuné. Su adoracion no ta drei rond di un tempel ni un ceru literal. P’esei, Jesus a referí na un aspecto di adoracion cu ta bai mas ayá cu cosnan cu ta ser mirá.

Fuera di cu hende mester rindi adoracion cu berdad, p’e ta aceptabel e mester ta guiá tambe pa e spiritu santu, esta, Dios su forsa activo invisibel. Apostel Pablo a skirbi: “E spiritu [santu] ta scudriñá tur cos, asta e cosnan profundo di Dios.” El a agregá: “Nos a ricibí, no e spiritu di mundu, sino e spiritu cu ta bini di Dios, pa nos conocé e cosnan cu Dios bondadosamente a duna nos.” (1 Corintionan 2:8-12) Pa Dios aceptá nos adoracion, nos mester tin su spiritu i ser guiá dor di dje. Ademas, ta esencial pa nos spiritu of disposicion mental ta na armonia cu Dios su spiritu mediante studio i aplicacion di su Palabra.

[Plachi na página 28]

Adorá Dios “cu spiritu i cu berdad”