Aksi fu Leisiman

San a wani taki fu anbegi Yehovah „nanga yeye”?

Di Yesus Krestes ben e gi kotoigi na wan uma fu Samaria di ben kon teki watra na a peti fu Yakob, krosibei fu a foto Sikar, dan a ben taki: „Gado na wan Yeye, èn den sma di e anbegi en, musu anbegi en nanga yeye èn nanga waarheid” (Yohanes 4:24). A tru anbegi na wan sani di wi musu du ’nanga waarheid’. Dati wani taki dati a musu kruderi nanga Bijbel pe Yehovah Gado meki sma kon sabi suma a de èn san na den prakseri fu en. Wi musu du wi diniwroko gi Gado so srefi nanga yeye. Dati wani taki dati wi musu de fayafaya na ini wi diniwroko èn taki wan ati di furu nanga lobi èn nanga bribi, musu pusu wi fu du dati (Titus 2:14). Ma den tra tekst e sori taki a sani di Yesus ben taki fu ’na anbegi fu Gado nanga yeye’, wani taki moro leki fu abi a krakti nomo di e pusu wi fu dini Yehovah.

A takimakandra di Yesus ben abi nanga na uma na a watrapeti, no ben abi fu du nanga a faya di sma abi noso no abi, na ini na anbegi fu den. Srefi den sma na ini falsi bribi kan de fayafaya na ini na anbegi fu den èn den kan gi densrefi dorodoro na ini dati. Na presi fu dati, baka di Yesus ben taki dati sma no ben o anbegi a Tata na tapu wan bergi na ini Samaria noso na a tempel na ini Yerusalem, san ben de trutru presi pe sma ben musu go, dan Yesus ben sori go na wan nyun fasi fu anbegi. A ben sori taki sma musu anbegi Gado srefi, na a fasi fa a de trutru (Yohanes 4:21). A ben taki: „Gado de wan Jeje” (Yohanes 4:24, Da Bijbel na ini Sranantongo). A tru Gado no abi wan skin leki libisma èn wi no man si en, noso firi en. Sma no abi fu anbegi en na wan trutru tempel noso wan bergi. So bun, Yesus ben taki fu wan fasi fu anbegi pe wi no abi fu si wan sani nanga ai di musu yepi wi fu anbegi Gado.

Boiti taki a tru anbegi na wan sani di wi musu du nanga waarheid, wi musu kisi tiri so srefi fu a santa yeye — a wroko krakti fu Gado di wi no man si — efu wi wani anbegi Gado na wan fasi di a feni bun. „A [santa] yeye e ondrosuku ala sani,” na so na apostel Paulus ben skrifi, „srefi den dipi sani fu Gado.” A ben taki moro fara: „Wi no ben kisi a yeye fu grontapu, ma a yeye di e kon fu Gado, so taki wi ben sa kan sabi den sani di Gado ben gi wi nanga switifasi” (1 Korentesma 2:8-12). Efu wi wani anbegi Gado na a fasi di a feni bun, dan wi musu abi a yeye fu en èn a yeye dati musu tiri wi. Boiti dati, a de tumusi prenspari taki a yeye fu wi, noso a denki fu wi, e kruderi krinkrin nanga a yeye fu Gado èn dati de so te wi e studeri a Wortu fu en èn e gebroiki dati na ini wi libi.

[Prenki na tapu bladzijde 28]

Anbegi Gado „nanga yeye èn nanga waarheid”