Swivutiso Swa Vahlayi

Swi vula yini ku gandzela Yehovha “hi moya”?

Loko Yesu Kreste a chumayela wansati wa Musamariya loyi a a ta ka mati exihlobyeni xa Yakobe lexi nga kusuhi ni muti wa Sikari, u te: “Xikwembu i Moya, naswona lava va xi gandzelaka va fanele ku gandzela hi moya ni ntiyiso.” (Yohane 4:24) Vugandzeri bya ntiyiso byi fanele byi endliwa hi ‘ntiyiso,’ byi pfumelelana ni leswi Yehovha Xikwembu a swi paluxeke eBibeleni mayelana na yena ni swikongomelo swa yena. Nakambe ntirho wa hina eka Xikwembu wu fanele wu endliwa hi moya wa ku hiseka ni ku susumetiwa hi mbilu leyi teleke rirhandzu ni ripfumelo. (Tito 2:14) Hambiswiritano, mongo wa mhaka wu kombisa leswaku marito ya Yesu malunghana ni ‘ku gandzela Xikwembu hi moya’ a ma vuli xiyimo xa mianakanyo lexi hi tirhelaka Yehovha hi ri na xona ntsena.

Bulo leri Yesu a veke na rona ni wansati yoloye exihlobyeni a ri nga ri mayelana na ku hisekela vugandzeri kumbe ku nga byi hisekeli. Hambi ku ri vukhongeri bya mavunwa byi nga endliwa hi ku hiseka ni ku tinyiketela. Ematshan’weni ya sweswo, endzhaku ko hlamusela leswaku Tatana a a nga ta gandzeriwa entshaveni ya Samariya kumbe etempeleni ya le Yerusalema, ku nga tindhawu leti vanhu va ti tivaka—Yesu u vulavule hi maendlelo lamantshwa ya ku gandzela lama sekeriweke eka Xikwembu xa xiviri. (Yohane 4:21) U te: “Xikwembu i Xivumbiwa xa moya.” (Yohane 4:24, Charles B. Williams) Xikwembu xa ntiyiso a hi munhu wa nyama naswona a xi nge voniwi kumbe ku khumbiwa. Vugandzeri bya xona a byi endleriwi etempeleni ya xiviri kumbe entshaveni. Hikwalaho, Yesu a a vulavula hi xivumbeko lexi nga vonakiki xa vugandzeri.

Handle ka ku va byi endliwa hi ntiyiso, vugandzeri lebyi amukelekaka a byi ta tlhela byi kongomisiwa hi moya lowo kwetsima—ku nga matimba ya Xikwembu lama tirhaka lama nga vonakiki. Muapostola Pawulo u tsarile: “Moya [lowo kwetsima] wu lavisisa swilo hinkwaswo, hambi swi ri swilo leswi enteke swa Xikwembu.” U engeterile: “A hi amukelanga moya wa misava, kambe hi amukele moya lowu humaka eka Xikwembu, leswaku hi ta tiva swilo leswi Xikwembu xi hi nyikeke swona hi musa.” (1 Vakorinto 2:8-12) Leswaku hi ta gandzela Xikwembu hi ndlela leyi amukelekaka, hi fanele hi va ni moya wa xona hi tlhela hi kongomisiwa hi wona. Ku tlula kwalaho, i swa nkoka leswaku moya wa hina, kumbe mianakanyo ya hina yi pfumelelana ni moya wa xona hi ku dyondza ni ku tirhisa leswi hi swi dyondzeke eRitweni ra xona.

[Xifaniso eka tluka 28]

Gandzela Xikwembu “hi moya ni ntiyiso”