Porlu do Minta Maaf Asa Boi Mardame

SONGON on ma na disurat si Deborah Tannen sahalak pengarang bukku terlaris dohot sosiolinguis di Universitas Georgetown di Washington, D.C, “Godang do manfaat ni minta maaf. Boi do i pasaehon parbadaan ni akka halak dohot parbadaan ni akka bangso. Jala molo olo pamaretta minta maaf tu rakyatna, boi ma gabe moru arsak ni roha ni rakyatna i.”

Didok di Bibel molo olo sasahalak minta maaf sian ias ni rohana, boi ma muse dipadenggan ibana hubunganna tu donganna. Contohna, di perumpamaan ni Jesus taringot anak na mago. Dung mulak anakna i lao minta maaf tu bapakna sian ias ni rohana, olo ma muse bapakna i manjalo ibana. (Lukas 15:17-24) Jadi molo mambahen kesalahan sasahalak, unang ma dipasombu ibana ginjang ni rohana mambahen ibana gengsi lao minta maaf. Molo serep do roha ni sasahalak, pasti dang maol ibana lao minta maaf.

Manfaat ni Minta Maaf

Di jaman ni halak Israel najolo, adong sahalak borua na marbisuk goarna si Abigail. Olo do ibana minta maaf alani kesalahan ni suamina. Tikki i, dang gabe raja ni Israel dope si Daud jala gabe pelarian dope ibana dohot akka tentarana di padang gurun. Dijaga ibana dohot akka tentarana do binatang na dipiaro si Nabal, i ma suami ni si Abigail. Alai tikki dipangido akka tentara ni si Daud saotik sipanganon tu si Nabal, diusir ibana do akka tentara ni si Daud i jala dileai. Gabe muruk ma si Daud jala diajak ibana ma 400 tentarana lao pamatehon si Nabal dohot keluargana. Dung diboto si Abigail na masa i, borhat ma ibana manjuppangi si Daud. Dung diida ibana si Daud, marsomba ma ibana tu jolo ni patna, pola sappe dais bohina tu tano. Dung i didok ibana ma, “Ale tuan, tu au ma baloshon pambahenanna i. Loas ma naposomon makkatai jala tangihon ma hatakkon.” Dung i dipatorang si Abigail ma situasina jala dilehon ma tu si Daud sipanganon dohot siinumon. Alani i gabe didok si Daud ma, “Mulak ma ho tu jabum di bagasan dame. Nungnga hutangihon hatam jala huoloi pe pangidoanmi.”—1 Samuel 25:2-35.

Ala serep roha ni si Abigail, gabe olo ma ibana minta maaf alani kesalahan ni suamina jala gabe dang saut keluargana dipamate. Mandok mauliate do tong si Daud tu si Abigail, ala dang gabe marutang hosa ibana alani i. Nang pe dang si Abigail na mangaleai si Daud dohot akka tentarana, alai olo do ibana minta maaf asa selamat keluargana jala asa boi ibana mardame dohot si Daud.

Contoh na asing taringot halak na olo minta maaf, i ma Apostel Paulus. Di sada tikki, ikkon jongjong do ibana di jolo ni Sanhedrin, i ma Mahkamah Agung ni halak Jahudi. Ala muruk sintua malim Ananias mambege hata ni si Paulus na terus terang, disuru ibana ma halak na jongjong di labbung ni si Paulus mamastap baba ni si Paulus. Gabe didok si Paulus ma tu ibana, “Pastapon ni Debata ma ho, e halak na munafik! Hundul do ho nuaeng mangadili au mamakke Patik i. Alai boasa gabe dilanggar ho Patik i? Ai disuru ho do halak mamastap au?” Didok akka halak na disi ma si Paulus mangaleai sintua ni malim. Dung diboto si Paulus kesalahanna, didok ibana ma, “Hamu akka haha anggikku, dang huboto na sintua ni malim ibana. Ai tarsurat do, ‘Unang ma leai pamimpin ni bangsomuna.’”—Ulaon ni Apostel 23:1-5.

Sebenarna toho do hata ni si Paulus, dang boi seharusna sahalak hakim manuru halak mamastap ibana. Nang pe songon i olo do ibana minta maaf, alana dang sengaja ibana hurang sangap makkatai tu sahalak sintua ni malim. Ala olo si Paulus minta maaf, gabe olo ma Sanhedrin i manangihon aha na lao dokkonon ni si Paulus. Gabe diboto si Paulus ma tarbagi do hape sude anggota ni mahkamah i. Dung i didok ibana ma tu nasida, ala na porsea do ibana tu janji ni Debata taringot haheheon makana gabe dihakimi ibana. Akibatna, gabe tubu ma parbadaan di tonga-tonga ni Sanhedrin i jala gabe marpihak tu si Paulus do halak Parise na disi.—Ulaon ni Apostel 23:6-10.

Aha na boi taparsiajari sian dua contoh na disurat di Bibel i? Ala olo si Paulus dohot si Abigail minta maaf, gabe adong ma dalan di nasida lao makkatai muse jala gabe boi ma nasida mardame. Jadi molo olo hita mangakkui kesalahanta jala olo minta maaf, boi ma i gabe dalan di hita lao masipatoguan.

‘Alai Dang Au na Sala’

Molo taboto adong donganta na tersinggung alani hatanta dohot pambahenatta, olo do ra gabe tahilala terlalu sensitif ibana. Alai songon on ma na didok Jesus tu akka siseanna, “Molo diboan ho silehon-lehonmu tu langgatan, jala dung sahat ho disi gabe diingot ho adong donganmu na marsogo ni roha tu ho tadikkon ma silehon-lehonmi di jolo ni langgatan i. Lao ma ho mardame dohot donganmi. Dung pe i, asa ro ho muse pasahatton silehon-lehonmi.”—Mateus 5:23, 24.

Misalna, adong dongan sahaporseaon na mandok adong kesalahanmuna tu ibana. Molo songon i situasina, didok Jesus ikkon ‘lao do hamu mardame dohot donganmuna i’, dang soal hamu do na sala manang ibana. Menurut teks bahasa Junanina, hata na dipakke Jesus di ayat on lapatanna ‘dang marsipabali-balian dung marmusu.’ (Vine’s Expository Dictionary of Old and New Testament Words) Memang molo adong dua halak na marsalisi, biasana duassa do nasida marsala. Alana sarupa na so sempurna do nasida jala sering mambahen na sala. On ma alasan na mambahen nasida dang boi masipabali-balian.

Jadi na uppetting dang ise na sittong manang ise na sala. Alai ise do na olo berinisiatif lao mardame. Tikki diida Apostel Paulus adong halak Kristen di Korint na mamboan dongan sahaporseaonna tu pengadilan, ala adong parsalisian alani hepeng, didok ibana ma tu nasida, “Boasa dang sabar hamu tikki adong donganmuna mambahen na jahat tu hamu? Kan dumenggan do dipasombu hamu ibana mambuat na adong di hamu?” (1 Korint 6:7) Didok si Paulus pe hatana on, asa unang adong be halak Kristen na mamboan dongan sahaporseaonna tu pengadilan. Alai takkas do prinsipna: Uppenting do mardame tu dongan sahaporseaon sian apala mambuktihon ise na sittong dohot ise na sala. Molo torus taingot prinsip on, pasti olo ma hita minta maaf molo didok donganta adong na sala tabahen tu ibana.

Ikkon sian Ias ni Roha

Di piga-piga inganan adong do hata na biasana dipakke lao minta maaf na paseringku dipakke akka halak. Contohna di Jepang, dipakke akka halak do hata sumimasen tikki naeng minta maaf. Alai olo do sappe marribu hali hata on dipakke akka halak ganup ari lao patuduhon perasaan segan ala dang boi mambalos haburjuon ni na asing. Ala paseringku hata on dipakke akka halak, olo do gabe sukkun-sukkun roha ni halak molo minta maaf donganna, toho do ibana minta maaf sian ias ni rohana manang na dang.

Jadi di bahasa manang aha pe, porlu do sian ias ni roha molo minta maaf hita tu donganta. Jala biasana tarida do i sian hatanta dohot nada suaranta. Songon on ma na didok Jesus tu akka siseanna tikki paboahon Jamita na di Dolok, “Molo olo dok ma ‘Olo’, molo dang dok ma ‘Dang’. Lobi sian i, sian Sibolis do i.” (Mateus 5:37) Jadi unang ma holan di pamangan hita molo minta maaf. Contohna, adong ma sahalak bawa na lagi antri di loket check-in di bandara. Minta maaf ma ibana tu sahalak borua na antri di labbungna ala hona koperna tu borua i. Piga-piga menit dukkon i dung marhusor antrian i, hona ma muse koperna tu borua i. Jala minta maaf ma muse bawa i. Alai dukkon i, hona ma muse koperna tu borua i. Gabe didok dongan ni borua i ma tu bawa i, molo toho do minta maaf bawa i seharusna unang be nian hona koperna tu borua i. Jadi molo sian ias ni roha do hita minta maaf tu sasahalak, ikkon berusaha do hita asa dang taulangi muse kesalahanta i tu ibana.

Jala molo sian ias ni roha do hita minta maaf tu sasahalak, pasti olo do hita mangakkui kesalahanta jala olo mangganti harugian ni donganta i molo porlu. Jala molo minta maaf halak tu hita, ikkon olo ma hita memaafhon ibana sian ias ni rohatta. (Mateus 18:21, 22; Markus 11:25; Epesus 4:32; Kolosse 3:13) Ala sarupa dang sempurna do halak na marsalisi, dang sai mura nasida lao mardame. Nang pe songon i, molo adong do sian nasida na olo minta maaf, pasti boi do nasida mardame.

Dang Porlu Minta Maaf

Memang boi do gabe mardame halak na marsalisi molo adong sian nasida na olo minta maaf. Alai adong do sipata tikkina hita dang porlu minta maaf. Misalna, molo adong masalah ala tasomba Debata. Tikki di tano on Jesus, “dipatutoru do dirina jala mangoloi sahat tu na mate, mate di hau partinaonan”. (Pilippi 2:8) Dang olo Jesus minta maaf ala manomba Debata lao mangorui sitaononna. Jala dang olo Jesus minta maaf tu sintua ni malim na mandok, “Marsumpa ma ho di bagasan goar ni Debata na mangolu i, paboa ma tu hami, tutu do ho Kristus anak ni Debata?” Dang na maila Jesus lao minta maaf. Alai justru barani do ibana mandok, “Songon na nidokmi ma tutu. Alai, hupaboa ma tu hamu: Mulai sian tikki on, idaonmuna ma Anak ni jolma i hundul di sabola kanan ni Debata na marhuaso i. Jala na lao ro ma ibana idaonmuna di atas ni ombun na di langit.” (Mateus 26:63, 64) Dang olo Jesus mengorbanhon hubunganna tu Bapakna holan asa boi mardame dohot sintua ni malim i.

Dihormati halak Kristen do pamaretta. Alai dang porlu nasida minta maaf ala mangoloi hata ni Debata dohot makkaholongi dongan sahaporseaonna.—Mateus 28:19, 20; Rom 13:5-7.

Pasti Boi do Hita Mardame

Ala dang sempurna hita, pasti olo do hita mambahen kesalahan. (Rom 5:12; 1 Johannes 1:10) Ala dialo si Adam Debata, gabe mardosa ma ibana. Alai di mulana, sempurna do si Adam dohot si Hawa jala dang mardosa. Nungnga marjanji Debata lao bahenonna do jolma sempurna muse. Bahenonna do dang adong be dosa dohot sude akibat ni dosa i.—1 Korint 15:56, 57.

Bayangkon ma songon dia ngolutta haduan. Hea do ditaringoti si Jakobus anggi ni Jesus taringot dila. Didok ibana, “Molo adong halak na so hea sala di pakkataion, halak na so mardosa do i, na boi mangarajai saluhut dagingna.” (Jakobus 3:2) Molo nungnga sempurna sude jolma, boi ma nasida mangarajai dilana jala dang porlu be nasida minta maaf ala sala makkatai. Jala boi ma nasida “mangarajai saluhut dagingna”. Pasti las do rohatta di tikki i ala nungnga gabe sempurna be hita jala sude ma jolma marsada ala sude do mardame. Alai saleleng dang sempurna dope hita, porlu do hita minta maaf sian ias ni rohatta asa boi mardame dohot donganta.

[Surat na di Toru]

Olo do ra ala hurang takkas pamerengan ni si Paulus gabe dang ditanda ibana sintua ni malim i.

[Gambar]

Aha do na boi taparsiajari sian sitiruon na dibahen si Paulus?

[Gambar]

Molo nungnga sempurna sude jolma, boi ma hita sude mardame