Wi sa man meki vrede nanga trawan te wi e aksi den pardon

„WI KAN du furu bun te wi e aksi trawan pardon. Wi sa man tyari wan kaba kon na trobi sondro taki wi e feti nanga trawan, sma sa man lusu problema na mindri kondre leki bakapisi fu dati, èn a sa yepi tirimakti fu kon si taki den kondreman fu den e pina. Boiti dati a kan meki taki a banti di sma abi nanga makandra no e pori.” Na so Deborah Tannen, ben skrifi. Na uma disi na wan pôpi skrifiman èn sosrefi wan sabiman na a universiteit fu Georgetown na ini Washington, D.C., èn a studeri fu kon sabi fa a libimakandra abi krakti tapu a fasi fa sma e taki nanga makandra.

Bijbel e sori taki te wan sma e aksi pardon nanga en heri ati, dan dati furu tron e yepi fu meki taki tu sma di ben kisi trobi e meki en bun baka nanga makandra. Fu gi wan eksempre, na ini na agersitori fu a manpikin di ben lasi, dan a manpikin dati ben aksi en papa pardon nanga en heri ati di a ben drai kon baka na oso. A sani dati meki taki a papa ben de klariklari srefisrefi fu teki en baka na ini en osofamiri (Lukas 15:17-24). Iya, wan sma noiti no musu meki heimemre tapu en fu aksi wan trawan pardon, so taki en nanga a sma dati kan meki en bun baka nanga makandra. A no de fu taki, dati sma di trutru abi sakafasi de klariklari ala ten fu aksi pardon.

A bun di wi e du te wi e aksi pardon

Abigail, wan koni uma na ini Israel fu owruten, ben sori wi sortu bun wan sma kan du te a e aksi pardon. Na uma disi ben aksi pardon gi wan ogri di a masra fu en ben du. Wan pisi ten bifo David ben tron kownu fu Israel, dan en nanga den mansma fu en ben e tan na ini a gran sabana, èn den ben sorgu taki noti no ben pasa nanga den skapu fu Nabal, a masra fu Abigail. Ma di den yonkuman fu David aksi Nabal fu gi den brede nanga watra, dan a kosi den èn a yagi den gowe. Fu di a sani disi ben afrontu David, meki a go makandra nanga 400 mansma fu feti nanga Nabal nanga en osofamiri. Di Abigail kon sabi fu dati, dan a gowe  go miti David. Di a si David, dan a boigi dipi na David en futu. Ne a taki: „Na tapu misrefi, o mi masra, meki a fowtu kon; èn grantangi meki yu umasrafu taki na yu fesi, èn arki den wortu fu yu umasrafu.” Ne Abigail fruklari san ben pasa, èn a gi David nyanyan nanga dringi. Fu di a ben du dati, meki David taki: „Go na yu oso na ini vrede. Luku, mi arki yu sten so taki mi kan sori bun-ati gi yu.”—1 Samuel 25:2-35.

Fu di Abigail ben abi sakafasi èn fu di a ben aksi pardon gi a grofu fasi fa a masra fu en ben tyari ensrefi, meki David no ben du na osofamiri fu en ogri. David taki en tangi srefi fu di a ben tapu en fu no kisi brudu-paiman. Aladi a no Abigail ben handri grofu nanga David èn nanga den mansma fu en, toku a teki a fowtu fu en famiri na en tapu, èn a meki en bun baka nanga David.

Ete wan sma di ben sabi o ten a ben de fanowdu fu aksi pardon, na a apostel Paulus. Wan leisi, a ben musu opo taki gi ensrefi na fesi a Sanhedrin, namku a hei krutubangi fu den Dyu. Fu di a granpriester ben atibron nanga den sani di Paulus ben taki nanga wan krin ati, meki a komanderi den sma di ben tanapu krosibei fu Paulus fu naki en na tapu en mofo. Di a taki dati, dan Paulus taigi en: „Gado o naki yu, yu skotu di den karki weti. Yu e sidon drape fu krutu mi akruderi a Wet èn toku yusrefi e pasa a Wet, fu di yu e komanderi trawan fu naki mi?” Di den sma di ben de drape taigi Paulus taki a ben kosi a granpriester, dan na apostel wantewante agri taki a sani di a ben du no ben bun. A taki: „Brada, mi no ben sabi taki en na a granpriester. Bika a skrifi ’Yu no musu taki takru fu wan tiriman fu yu pipel’.”—Tori fu den Apostel 23:1-5.

Paulus ben taki dati a krutuman no ben musu naki en, èn a ben abi leti fu di a ben taki dati. Toku a aksi pardon fu di a no ben taki na wan lespeki fasi nanga a granpriester, èn dati ben kon fu di a no ben sabi suma na en. * Fu di Paulus ben aksi pardon, meki a Sanhedrin ben de klariklari fu arki san a ben abi fu taki. Paulus ben sabi sortu kesekese den memre fu a krutubangi ben abi nanga makandra, èn fu dati ede a taigi den taki sma ben e krutu en fu di a ben e bribi na ini na opobaka. Leki bakapisi fu dati, a kesekese kon moro bigi, èn den Fariseiman teki a sei fu Paulus.—Tori fu den Apostel 23:6-10.

San wi kan leri fu den tu eksempre disi di skrifi na ini Bijbel? Ala tu eksempre e sori wi taki fu di wan sma ben aksi pardon nanga en heri ati, meki trawan ben wani arki moro fara san den ben abi fu taki. Sobun, te wi e aksi pardon, dan dati kan yepi wi fu meki en bun baka nanga trawan. Iya, te wi e agri taki wi meki wan fowtu èn te wi e aksi pardon gi a sani di wi du, dan dati e gi wi okasi fu taki nanga a sma di wi afrontu fu man puru a problema na pasi.

’Ma mi no du nowan ogri’

Te wi e kon sabi taki wi afrontu wan sma nanga a sani di wi ben taki noso ben du, dan wi ben kan feni taki a sma dati muilek, noso taki a e atibron tumusi esi. Ma Yesus ben gi den disipel fu en a rai disi: „Fu dati ede, te yu e tyari yu presenti go na a altari èn drape yu e memre taki a brada fu yu abi  wan sani nanga yu, dan libi yu presenti drape na fesi na altari èn gowe; suku vrede fosi nanga a brada fu yu, èn baka dati, te yu drai kon baka, òfer a presenti fu yu.”—Mateyus 5:23, 24.

Fu gi wan eksempre, wan brada ben kan feni taki yu du en wan ogri. Te so wan sani miti yu, dan Yesus e taki dati yu musu go fu „suku vrede nanga a brada fu yu” a no abi trobi efu yu ben du en ogri, noso efu yu no ben du en ogri. Soleki fa a Griki tekst e sori, dan a wortu di Yesus gebroiki dyaso ’wani taki dati te tu sma abi trobi, dan ala tu sma musu suku fu meki vrede’ (A buku: Vine’s Expository Dictionary of Old and New Testament Words). Iya, te tu sma no man feni en nanga makandra, dan a kan taki ala tu sma abi fowtu, fu di ibriwan fu den na sondu sma di e meki fowtu. Fu di dati de so, meki a de fanowdu furu tron taki ala tu sma e suku fu meki en bun baka nanga makandra.

San prenspari moro furu, a no suma abi leti noso suma abi fowtu, ma suma sa suku fosi fu meki en bun baka nanga a trawan. Na apostel Paulus ben kon si taki den Kresten na ini Korente ben e tyari tra futuboi fu Gado go na grontapu krutubangi, fu di den no ben man feni en nanga makandra na ini sani soleki moni afersi. Fu dati ede a gi den piri-ai: „Fu san ede unu no e meki wan ogri pasa nanga unu na presi fu dati? Fu san ede unu no e meki sma handri takru nanga unu, na presi fu dati?” (1 Korentesma 6:7). Aladi Paulus ben taki a sani disi fu tapu Kresten fu tyari den kesekese fu den go na grontapu krutubangi, toku a sani disi e leri wi wan prenspari sani. Wi e leri leki Kresten taki a moro prenspari fu meki en bun baka nanga trawan, na presi taki wi e suku suma abi leti èn suma abi fowtu. Te wi e tan hori a sani disi na prakseri, dan dati e meki en moro makriki gi wi fu aksi wan sma pardon te a sma dati feni taki wi du en wan ogri.

Wi musu aksi pardon nanga wan krin ati

Ma den wortu di sma e gebroiki fu aksi trawan pardon de fu yere tumusi furu na ini son sma mofo. Fu gi wan eksempre, na ini Yapan, a wortu sumimasen, na wan wortu di sma gwenti fu gebroiki te den e aksi trawan pardon, èn den e gebroiki a wortu disi bun furu sosrefi. Sma kan gebroiki a wortu disi sosrefi fu sori taki den de nanga tangi na ati, dati wani taki, te den e firi fruferi taki den no man pai wan sma gi wan bun di a sma dati ben du gi den. Fu di a wortu sumimasen wani taki so furu difrenti sani, meki son sma feni taki sma e gebroiki a wortu tumusi furu, èn fu dati ede wan sma ben kan aksi ensrefi efu den sma di e gebroiki a wortu dati trutru e du dati nanga wan krin ati. A ben kan de so tu, taki sma fu tra kulturu sosrefi e gebroiki den wortu tumusi furu di sma gwenti fu taki te den e aksi trawan pardon.

A de prenspari fu taki pardon nanga wan krin ati, awansi sortu tongo wi e taki. Den wortu di wi e gebroiki, èn a fasi fa wi e taki den wortu musu sori taki wi e sari trutru fu a sani di wi du. Yesus Krestes ben leri den disipel fu en na ini a Bergitaki: „Ma te unu taki Iya, dan meki a tan Iya; te unu taki Nôno, dan meki a tan Nôno; bika ala tra sani di yu e taki ete, e kon fu na ogriwan” (Mateyus 5:37). Te yu e aksi wan sma pardon, dan yu musu du dati nanga yu heri ati! Fu gi yu wan eksempre: Na wan opolanipresi, wan man ben e tanapu na ini wan rei na a bangi pe den douane amtenari e luku den papira nanga den bagasi fu sma di musu go na ini na opolani. Di a bagasi fu en pusu wan uma di ben tanapu na en baka, dan a aksi na uma disi pardon. Wan syatu pisi ten baka dati den sma na ini a rei bigin waka go na fesi, èn a kofru fu a man pusu na uma ete wan tron. A man aksi na uma pardon na wan lespeki fasi baka. Di a srefi sani disi pasa ete wan leisi, dan a sma di ben de nanga na uma taigi a man taki efu a ben aksi pardon nanga wan krin ati, dan a ben musu sorgu taki a bagasi fu en no ben e pusu na uma moro. Iya, te wi e aksi pardon nanga wan krin ati, dan wi musu sorgu taki wi no e meki a srefi fowtu moro.

Te wi e aksi pardon nanga wan krin ati, dan wi sa agri taki wi ben du wan sani di no bun, wi sa suku fu meki en bun baka nanga a sma, èn wi sa du ala san wi man fu sorgu taki a sma no e hori wi na ati. A sma di feni taki wan trawan afrontu en musu de klariklari tu fu gi a sma dati pardon, te a sma e aksi en pardon nanga en heri ati (Mateyus 18:21, 22; Markus 11:25; Efeisesma 4:32; Kolosesma 3:13). Fu di ala tu sma na sondu sma, meki a no makriki ala ten fu meki en bun baka nanga trawan. Toku a de so taki te wi aksi pardon, dan dati e yepi bun furu kaba fu meki en bun baka nanga trawan.

 Te a no fiti fu aksi pardon

Te wi e aksi wan sma pardon fu di wi ben du wan sani di no bun, dan dati kan meki taki a sma no e hori wi na ati, èn a kan yepi wi sosrefi fu meki en bun baka nanga a sma dati. Toku wan koni sma no e aksi pardon te a no fiti fu du dati. Kon meki wi taki dati na afersi abi fu du nanga a tan di wi musu tan dini Gado na a fasi di a feni bun. Di Yesus Krestes ben de na grontapu, dan „a saka ensrefi èn a gi yesi te na dede, iya, dede na wan pina-udu” (Filipisma 2:8). Ma a no ben aksi pardon gi den sani di a ben bribi, soso fu man tyari wan kaba kon na a pina di a ben e pina. Yesus no ben aksi pardon tu di a granpriester ben konmanderi: „Nanga a nen fu a libi Gado, mi e fruplekti yu fu sweri taki yu na Krestes, a Manpikin fu Gado!” Yesus no ben aksi pardon fu di a ben e syen, ma na presi fu dati, a piki nanga deki-ati: „Yusrefi taki so. Ma mi e taigi unu: A yuru doro now taki unu o si a Manpikin fu libisma e sidon na a reti-anusei fu a sma di abi krakti èn taki a o kon na tapu den wolku fu hemel” (Mateyus 26:63, 64). Yesus noiti no ben wani du wan sani di no ben e kruderi nanga a wani fu en Tata, Yehovah Gado, soso fu man tan abi vrede nanga a granpriester.

Kresten e sori lespeki gi den tiriman, èn den e gi grani na den sma disi sosrefi. Ma den no musu aksi den sma disi pardon fu di den e gi yesi na Gado èn fu di den lobi den brada nanga sisa fu den.—Mateyus 28:19, 20; Romesma 13:5-7.

A ten te nowan sani sa tapu wi fu abi vrede nanga trawan

Na ini a ten disi, wi e meki fowtu fu di wi kisi sondu fu wi tata Adam (Romesma 5:12; 1 Yohanes 1:10). Adam ben tron wan sondari fu di a ben opo ensrefi teige a Mekiman. Ma na ini a bigin, Adam nanga Efa ben de sma sondro sondu, èn Gado pramisi fu meki libisma kon de sondro sondu baka. A sa figi sondu puru èn sosrefi ala bakapisi fu sondu.—1 Korentesma 15:56, 57.

Prakseri nomo san dati sa wani taki! Yesus en afu brada Yakobus ben gi wi rai fa fu gebroiki wi tongo. A ben taki: „Efu wan sma no e sondu nanga en mofo, dan a sma dati na wan volmaakti sma, di man dwengi en heri skin tu” (Yakobus 3:2). Wan volmaakti sma kan basi en tongo so taki a no abi fu aksi pardon fu di a ben taki wan sani di no fiti. A man ’dwengi en heri skin’. A sa de wan prisiri trutru te wi e tron volmaakti sma! Na a ten dati, noti no sa tapu sma moro fu abi vrede nanga trawan. Ma na a srefi ten a de so taki, te wi aksi trawan pardon nanga wan krin ati gi na ogri di wi du den, dan dati sa yepi furu kaba fu meki en bun baka nanga den.

[Futuwortu]

[Prenki na tapu bladzijde 5]

San wi kan leri fu na eksempre fu Paulus?

[Prenki na tapu bladzijde 7]

Te ala sma sa de volmaakti, dan nowan sani sa tapu wi moro fu abi vrede nanga trawan