Domandar scusa giuta a far la pace

“DOMANDAR scusa porta a boni resultadi. Par esémpio, risolve i problemi sensa violensa, fà che i governi i veda el sofrimento dele persone, fà che le sìpie pi unide e che le se cate ben intrà de lore”. Cossita el ga scrito Deborah Tannen, una scritora e studiosa dela università de Georgetown, Stati Unidi.

La Bìblia la insegna che domandar scusa de cuor la ze una bona maniera de star in pace con una persona nantra volta. Par esémpio, Gesù el ga contà una stòria de un fiol che l’è ndato via de casa, el ga fato tante robe sbaliade ma dopo l’è tornà. Alora, el ga domandà scusa a so pare de tuto el cuor e so pare lo ga ricevesto de volentiera nantra volta nela fameia. (Luca 15:17-24) No ghemo mai de assar che el orgòlio el ne intrighe de domandar scusa. Sicuro che par i ùmili domandar scusa no la ze mia una roba difìcile de far.

Domandar scusa pol portar a un bel resultà

Varda una situassion che ga sucedesto. Intanto che l’era de star nel deserto, Davi el protegea le bèstie de Nabal, so omo de Abigail. Quando Davi el ga dito ai so òmini de domandar pan e àqua a Nabal, lu el ghe ga dito su e el ghe mandà via de là. Alora, Davi l’è restà cativo e el ga ciapà 400 òmini par lotar contra Nabal e la so fameia. Quando Abigail la ga savesto de quel che ga sucedesto, ela la ze ndata catar Davi. Quando lo ga visto, la se ga indenocià par tera davanti de lu e la ghe ga dito: “Me signor, che la colpa la vegna sora mi. Assa la to schiava parlar e scóltame.” Alora, Abigail la ga spiegà la situassion e la ghe ga dato magnar e vin. Davi el ga acetà i so presenti e el ghe ga dito: ‘Và in pace. Go scoltà quel che te ghè dito e vao far quel che te me ghè domandà.’ (1 Samuel 25:2-35) Abigail la ga dato un bel esémpio de domandar scusa, anca se fusse par una roba che el so omo el gavea fato, nò ela. Cossa imparemo? Imparemo che domandar scusa pol portar a un bel resultà.

Abigail la ga salvà la vita dela so fameia parché la ze stata ùmile. Stesso che no la gavesse colpa, la ga domandà scusa a Davi par le brute robe che el so omo el gavea fato. Davi el ghe ga fin ringrassià parché senò el gavaria copà tanta gente che no le gavea colpa.

Nantro esémpio de una persona che la savea quando domandar scusa l’è stà el apòstolo Paolo. Un giorno lu el se ga difendesto davanti el Sinèdrio, un tribunal importante dei giudei. El somo sasserdote Anania l’è restà cativo con quel che Paolo el ghe ga dito e el ga mandà che quei che i era darente de lu i ghe desse sberloni nela fàcia. Alora, Paolo el ghe ga dito: “Dio el te baterà, muro imbiancà. Ti te senti do par giudicarme secondo la Lege e al medèsimo tempo te vè contra la lege comandando de darme bote?” Quando quei che i era lì i ga acusà Paolo de ofender el somo sasserdote, suito lu el ga dito che el gavea sbalià: “Fradei, mi no savea che lu l’era el somo sasserdote. Parché l’è scrito: ‘No te ghè de parlar mal de un lìder del to pòpolo.’” — Ati 23:1-5.

Paolo el gavea rason de dir che el giuìs no’l gavea de mandar darghe bote. Ma ancora cossita, lu el ghe ga domandà scusa parché l’era stà dispetoso col somo sasserdote sensa saverlo. a Quei che i era nel Sinèdrio i ga scoltà Paolo parché lu el ghe ga domandà scusa. Paolo el savea che arquanti de lori no i era intesi sora quel che i credea e el ghe ga dito che l’era drio esser giulgà parché el credea nela ressuresion. Alora, quele persone le ga barufà tanto e i farisei i ze restadi dela banda de Paolo. — Ati 23:6-10.

Cossa che podemo imparar de Paolo e Abigail? In tute due situassion, ghemo visto che domandar scusa pol giutar a risolver un problema e a esser in pace cole persone. Alora, l’è tanto importante ricognosser che ghemo sbalià e domandar scusa.

‘Ma mi no go fato gnente sbalià’

Quando savemo che una persona la se ga ofendesto con quel che ghemo dito o ghemo fato, fursi pensemo che ela la ze massa parmolosa. Ma Gesù el ga dito ai so dissìpoli: “Alora, se te porti la to oferta al altar e te te ricordi che el to fradel el ga qualcossa contra ti, assa la to oferta davanti del altar e va via. Prima te ghè de far la pace col to fradel, e dopo torna al altar par far la to oferta.” — Mateo 5:23, 24.

Par esémpio, pol esser che un fradel el pense che te ghè fato un pecato contra lu. Quando questo sucede, Gesù el ga dito che ti te ghè de ndar e “far la pace col to fradel” stesso che te pensi che no te ghè fato gnente sbalià. La parola che Gesù el ga doperà in greco la vol dir ‘tuti i due che i ga barufà i ga de ricognosser che i ga sbalià’ (Vine’s Expository Dictionary of Old and New Testament Words [Dissionàrio che Spiega le Parole del Novo Testamento]). Come tuti noantri semo imperfeti, quando due persone le barufa una col’altra, tute due le ga un pochetin de colpa. Par quela che le ga de ricognosser che tute due le ga sbalià.

El pi importante no l’è chi che ga la rason o che el ga sbalià, ma chi che sarà el primo a far la pace. Par esémpio, i cristiani in Corinto i ndea al tribunal un contra el altro par causa dei soldi. Alora el apòstolo Paolo el ghe ga dito: “No saria meio sofrir ingustìssia? No saria meio sofrir un dano?” (1 Corinti 6:7) Paolo el ga assà ciaro che esser in pace un colaltro l’e pi importante che provar chi che ga la rason o chi che el ga sbalià. Ricordarse de questo prinsìpio ne giuta a domandar scusa par un sbàlio che la persona la pensa che ghemo fato contra ela.

Ghemo de domandar scusa de cuor

Arquante persone le domanda scusa tuto el tempo. Par esémpio, nel Giapon, i dopera tanto la parola sumimasen par domandar scusa. Questa parola la pol esser doperada anca quando una persona la fà una roba bona e quel’altra la ghe ga piasesto ma no la pol far qualcossa par mostrar che la ze grata. Come questa parola la pol esser doperada in diverse situassion, tanti no i sà se quei che i la dopera i ze drio dirla de tuto el cuor. No l’è sol nel Giapon, anca in altre culture questo sucede.

La roba pi importante l’è domandar scusa de cuor. Te pol far questo par meso dela maniera che te parli e de cossa te parli. Gesù el ga insegnà ai so dissìpoli nel Discorso dela Montagna: “Basta che el vostro ‘si’ el sìpia si, e el vostro ‘nò’ el sìpia nò. Parché tuto quel che parlé de pi de queste parole el vien del Perverso.” (Mateo 5:37) Par capir, varda questo esémpio: un omo l’è drio spetar par ndar rento el avion. Sensa voler, lu el bate cola so mala nte una dona e ghe domanda scusa. Pochi minuti dopo, lu lo fà nantra volta e ghe domanda scusa con educassion. Quando questo sucede par la tersa volta, la persona che la era insieme cola signora la ga dito al omo che se lu el despiasea pròpio el gavea de tender par no farlo ancora e nò sol domandar scusa. Alora, imparemo che una scusa de cuor vol dir che ndemo sforsarse par no far quel sbàlio nantra volta.

Se noantri ghemo domandà scusa de tuto el cuor, ndemo ricognosser che ghemo fato quel sbàlio, ndemo domandar scusa e sforsarse par risolver la situassion cola persona. Quel che el se ga ofendesto el ga de perdonar quel che el se ga ciamà gramo. (Mateo 18:21, 22; Marco 11:25; Efesi 4:32; Colossensi 3:13) Come tuti due i ze imperfeti, fursi no l’è mia fàcile far la pace. Ma sarà pi fàcile risolver el problema se un o quel altro el domanda scusa.

Quando no ghemo de domandar scusa

Ancora che domandar scusa ne asse pi tranquili e ne giute a gaver pace, una persona sàbia no la domanda scusa sempre. Come cossita? Par esémpio, Gesù el ga infrontà una situassion che la ga metesto a prova la so lealtà a Dio. La Bìblia la dise che quando lu l’era ntela Tera, lu “el se ga umilià e l’è restà obediente fin ala morte, si, la morte nte un pal de tortura”. (Filipensi 2:8) Ma no’l ga mai domandà scusa par quel che el credea sol par no sofrir tanto. Gesù no’l ga domandà scusa quando el somo sasserdote el ghe ga mandà dir a tuti che lu l’era el Cristo, el Fiol de Dio. Invesse, el ghe ga rispondesto con coraio: ‘Ti che te lo ghè dito. Ma mi ve digo: de adesso avanti valtri ndaré veder el Fiol del omo sentà do ala drita de poder e nel cielo’. (Mateo 26:63, 64) Gesù no’l ga mai pensà de assar de esser leal a so Pare, Geovà, par mantegner la pace col somo sasserdote.

I servi de Geovà i rispeta le autorità. Ancora cossita, no i ga de domandar scusa parché i obedisse a Dio e i ama i so fradei. — Mateo 28:19, 20; Romani 13:5-7.

Tuti i sarà in pace

Ancoi noantri sbaliemo parché semo imperfeti e ghemo eredità el pecato de Adon. (Romani 5:12; 1 Gioani 1:10) Nel scomìnsio, Adon e Eva no i fea pecati. Ma dopo che i se ga rebelà contra el Creador, i ze deventadi imperfeti. Alora, Dio el ga prometesto finir col pecato e le so brute consequense e far le persone deventar perfete nantra volta. —1 Corinti 15:56, 57.

Tiago, fradel de Gesù, el ga dato consìlio sora come doperar la léngua. Lu el ga dito: “Tuti noantri sbaliemo tante volte. Se qualchedun no’l fà sbali quando el parla, l’è una persona perfeta, che la pol controlar tute le parte del so corpo.” (Tiago 3:2) Una persona perfeta la ze bona de tegner la léngua, alora no la ga bisogno de domandar scusa par quel che la parla. La ze bona de “controlar tute le parte del so corpo”. Imagina che bel! Quando saremo perfeti, gnente ndarà intrigar la pace intrà persone. Ma par intanto, domandar scusa quando femo un sbàlio ndarà giutarne a far la pace coi altri.

[Nota]

[Stampa]

Cossa che podemo imparar del esémpio de Paolo?

[Stampa]

Quando saremo perfeti, gnente ndarà intrigar la pace intrà persone.