Ol Man We Oli Sapotem Trufala Wosip Bifo Mo Tede

?YU YU save rimemba nem blong man ya we i krae from taon blong Jerusalem bifo? Maet yu yu ansa se ‘Jisas,’—mo, i tru se, Jisas i krae from Jerusalem. (Luk 19:28, 41) Be, plante handred yia bifo we Jisas i wokbaot long wol, wan narafala man we i stap tru long God i krae from Jerusalem, olsem we Jisas i mekem. Nem blong man ya, Nehemaea.—Nehemaea 1:3, 4.

?Wanem i mekem Nehemaea i harem nogud tumas, nao hem i krae from Jerusalem? ?Hem i mekem wanem blong givhan long taon ya mo ol man blong hem? ?Mo yumi save lanem wanem long eksampol blong hem? Blong ansarem ol kwestin ya, bambae yumi luk sam samting we i hapen long taem blong Nehemaea.

Wan Man We i Gat Strong Filing Mo We i Tekem Aksin

Ol man oli putumap Nehemaea olsem distrikejen long Jerusalem. Be bifo long hemia, Nehemaea i wan haeman long haos blong king blong Pesia long bigfala taon ya Susa. Nating se hem i gat plante samting long laef blong hem, hem i stap tingbaot ol nid blong ol brata blong hem, hemia ol man Jiu we oli stap farawe long taon blong Jerusalem. Yes, taem wan grup blong ol man Jiu oli aot long Jerusalem oli kam long Susa, faswan samting we Nehemaea  i mekem, hem i “askem long olgeta se, ‘Olgeta. ?Ol laen ya blong yumi we bifo oli stap wok slef long kantri ya be oli aot, oli gobak long Jerusalem bakegen, naoia oli stap olsem wanem? ?Mo taon ya Jerusalem, naoia i olsem wanem?’ ” (Nehemaea 1:2) Taem ol man ya oli talem se ol man Jerusalem oli “stap trabol tumas yet” mo ol stonwol blong taon ya “we i brokdaon bifo, i stap olsem nomo yet,” Nehemaea i ‘sidaon, i krae.’ Biaen hem i prea long Jeova wetem fulhat blong hem mo i talemaot filing blong hem we i harem nogud. (Nehemaea 1:3-11) ?From wanem Nehemaea i harem nogud tumas? From we Jerusalem i stamba ples blong wosip blong Jeova long wol, mo ol man oli no moa lukaot gud long Jerusalem. (1 King 11:36) Taon ya Jerusalem i brobrok, mo samting ya i soemaot se ol man blong hem oli kam slak long saed blong spirit.—Nehemaea 1:6, 7.

Nehemaea i tingting plante long Jerusalem mo hem i sore long ol man Jiu we oli laef long ples ya. Fasin sore ya i pusum hem blong mekem wan samting blong givhan long olgeta. King blong Pesia i agri se Nehemaea i tekem spel long wok, mo kwiktaem nomo Nehemaea i stat blong mekem plan blong go long Jerusalem. (Nehemaea 2:5, 6) Hem i wantem yusum paoa, taem, mo save blong hem blong sapotem impoten wok ya blong fiksimap Jerusalem bakegen. Smoltaem nomo afta we hem i kamtru long Jerusalem, hem i mekemrere plan blong stanemap stonwol blong taon ya bakegen.—Nehemaea 2:11-18.

Nehemaea i seraotem bigfala wok ya blong stanemap stonwol long plante famle, mo olgeta evriwan oli wok gud tugeta. * Bitim 40 defren grup oli joen long wok ya. Wanwan long ol grup ya oli kasem wok blong stanemap wan ‘haf blong wol ya.’ ?Wanem i kamaot from? Fastaem i luk olsem se wok ya i bigwan tumas. Be, plante man oli givim taem mo paoa blong olgeta long wok ya, ol papa mama mo ol pikinini tu, taswe oli naf blong finisim bigfala wok ya. (Nehemaea 3:11, 12, 19, 20) !Bifo we tu manis i pas, wok blong stanemap stonwol i finis! Mo plante samting i bin hapen long tufala manis ya. Nehemaea i talem se, ol man we oli bin agensem wok ya oli mas luksave se “God blong yumi i stap givhan long mifala blong mekem wok ya, gogo i finis.”—Nehemaea 6:15, 16.

Wan Eksampol We i Gud Blong Tingbaot

Nehemaea i no jes givim taem mo save blong hem nomo long wok ya. Hem i yusum ol samting we hem i gat blong sapotem trufala wosip. Hem i yusum mane blong hem blong pemaot ol brata blong hem, hemia ol man Jiu we oli kam slef. Hem i givim mane blong hem olsem lon, be i no mekem man i pem intres long hem. Hem i neva “mekem i strong tumas” long ol man Jiu. Hem i no fosem olgeta blong givim ol samting we hem i gat raet blong kasem olsem distrikejen. Defren olgeta, oltaem hem i welkamem ol man oli kam long haos blong hem. I gat ‘wan handred fifti man Juda we oltaem oli stap kakae wetem hem mo ol man blong ol narafala kantri tu oli stap kakae wetem hem.’ Evri dei hem i “stap kilim wan buluk, mo sikis sipsip we i beswan, mo plante faol,” blong kakae wetem ol man we oli kam luk hem. Mo oltaem, long evri ten dei, hem i givim “plante waen long ol man ya blong oli no sot”—yes, olgeta samting ya Nehemaea nomo i pem.—Nehemaea 5:8, 10, 14-18.

!Nehemaea i soem nambawan eksampol long fasin blong givim wetem gladhat! Olgeta man blong God long taem ya bifo, mo tede tu, oli save lan long eksampol blong hem. Nehemaea i no fraet blong mekem wok blong God. Hem i rere mo glad blong yusum olting we hem i gat blong givhan long ol man we oli wok blong sapotem trufala wosip. Taswe hem i save askem long Jeova se: “Prea blong mi we God blong mi i tingbaot mi, i mekem i gud long mi from ol samting we mi mi mekem long ol man.” (Nehemaea 5:19) I sua se bambae Jeova i mekem olsemia.—Hibrus 6:10.

Ol Man We Oli Folem Eksampol Blong Nehemaea Tede

I gud tumas blong luk we ol man blong Jeova tede tu oli soemaot kaengud fasin, oli rere blong wok mo blong lego plante samting long laef blong olgeta blong sapotem trufala wosip. Taem yumi harem nius we ol brata blong yumi oli stap fesem hadtaem, yumi wari long olgeta. (Rom 12:15) Olsem Nehemaea, yumi prea long Jeova from ol brata  blong yumi we oli trabol, mo yumi askem Jeova se: ‘Plis yu harem prea blong mifala wetem ol prea blong ol narafala man blong yu tu, we olgeta oli wantem leftemap nem blong yu.’—Nehemaea 1:11; Kolosi 4:2.

Be, trufala wosip, mo ol samting we ol Kristin brata sista blong yumi oli nidim long saed blong spirit mo bodi oli no ol samting we yumi tingbaot nomo. !Nogat! Yumi mas tekem aksin tu. Olsem Nehemaea bifo, lav i pusum sam Kristin we oli naf, blong oli lego naesfala haos blong olgeta blong go long ol narafala ples we oli nidim moa man blong prij. Nating se long sam haf blong wol ol man ya oli save fesem hadtaem, oli glad blong muv i go long ol kantri ya blong wok tugeta wetem ol Kristin brata blong olgeta blong mekem wosip. Yumi save presem olgeta from gudfala fasin ya we oli rere blong lego plante samting blong mekem wok blong God i gru moa long ol ples ya.

Joen Long Wok Ya Long Ples Blong Yumi

I tru se, bighaf blong yumi i no save muv i go long wan narafala ples. Yumi sapotem trufala wosip long ples blong yumi nomo. Nehemaea i tokbaot samting ya tu long buk blong hem. Makem wanem we hem i talem long saed blong sam gudfala famle we oli joen long wok blong stanemap bakegen stonwol blong Jerusalem. Hem i se: ‘Jedaea we papa blong hem Harumaf, hem i wokem haf ya we i klosap long haos blong hem. . . . Benjamin mo Hasub, tufala i wokem haf ya we i stap stret long fes blong tufala haos blong tufala. Mo nekis haf blong hem, pris ya Asaria we papa blong hem Mahasea mo bubu blong hem Anania, hem i wokem haf ya we i  stap stret long fes blong haos blong hem.’ (Nehemaea 3:10, 23, 28-30) Ol man ya oli joen long wok blong stanemap bakegen stonwol stret long fes blong haos blong olgeta. Yes, tugeta wetem ol famle blong olgeta oli givhan bigwan blong mekem trufala wosip i gru moa.

Tede, plante long yumi i stap sapotem trufala wosip long ol defren rod long ples blong yumi nomo. Yumi joen long wok blong bildim ol Haos Kingdom, yumi givhan long taem blong disasta mo, samting we i impoten moa, yumi joen long wok blong talemaot Kingdom. Mo nating se maet yumi wanwan i no save joen long wok ya blong bildim Haos Kingdom no help long ples blong disasta, be yumi evriwan i wantem tumas blong yusum olting we yumi gat blong sapotem trufala wosip, olsem we Nehemaea i glad blong mekem long taem blong hem.—Lukluk bokis “Fasin Blong Givim Presen Mane.”

I no isi blong faenem inaf mane blong gohed long wok blong prentem ol buk, halpem ol brata long taem blong disasta, mo mekem ol narafala wok blong givhan long ol man raonabaot long wol. Be, tingbaot wok ya blong fiksimap bigfala stonwol blong Jerusalem. Wok ya tu i luk olsem se i bigwan tumas. (Nehemaea 4:10) Be, from we plante defren famle oli glad blong joen long wok ya, oli naf blong finisim wok ya. I olsem tede tu. Sipos yumi wanwan i gohed blong lukaot long wan haf blong wok ya, bambae yumi gat inaf mane mo samting we yumi nidim blong wok ya i gohed long olgeta ples blong wol.

Bokis ya “Ol Rod We Samfala Oli Folem Blong Givim Presen Mane” i soem ol defren rod we yumi  save folem blong givim mane blong sapotem wok blong Kingdom. Long yia we i pas, plante long ol man blong God oli givim presen mane blong sapotem wok ya. Hed Kampani blong ol Witnes blong Jeova i wantem tekem janis ya blong talem bigfala tangkiu long olgeta we hat i pusum olgeta blong givim presen mane. Antap moa, yumi talem tangkiu long Jeova from we hem i blesem bigwan traehad blong ol man blong hem we oli leftemap trufala wosip long evri ples blong wol wetem fulhat blong olgeta. Yes, taem yumi tingbaot olsem wanem Jeova i lidim yumi long ol yia we oli pas, yumi wantem talem bakegen ol tok blong Nehemaea, we i talem tangkiu se: ‘God i stap wetem mi, mo hem i bin givhan long mi.’—Nehemaea 2:18.

[Futnot]

[Bokis/Foto blong pija long pej 28, 29]

Ol Rod We Samfala Oli Folem Blong Givim Presen Mane

BLONG SAPOTEM WOK LONG OLGETA PLES LONG WOL

Plante man oli makemaot, no mekem plan, blong hamas mane we bambae oli putum long bokis blong presen mane, we oli raetem long hem se: “Presen Mane Blong Sapotem Wok Blong Prij Long Ful Wol—Matiu 24:14.”

Evri manis, ol kongregesen oli sanem mane ya i go long hedkwota blong ol Witnes blong Jeova no long ofis we i lukaot long wok blong kantri blong olgeta. Yu yu save sanem presen mane i go long branj ofis we i lukaot long kantri blong yu. Ol gol jen, sas ston mo ol narafala sas samting yu save givim tu olsem presen. Yu mas sanem wan sotfala leta i go wetem ol presen ya blong talemaot se yu givim samting ya olsem wan presen nomo.

PRESEN MANE WE MAN I SAVE KASEMBAK SIPOS I NIDIM

Man i save givim mane blong oli kipim go kasem we man ya i nidim mane ya, bambae sosaeti i givimbak long hem. Blong kasem moa save long saed ya, plis yu raet i go long branj ofis we i lukaot long kantri blong yu.

PLAN WE MAN I FOLEM BLONG GIVIM PRESEN MANE

Antap long ol presen we man i save givim stret, mo mane we hem i save kasembak sipos i nidim, i gat sam narafala rod blong givim presen we oli save givhan long wok blong Kingdom long olgeta ples long wol. Sam long olgeta ya hemia:

Insurens: Man i save mekem se Watch Tower Sosaeti i kasem mane blong wan laef insurens, no mane blong pem yia blong hem taem i ritae long wok, no mane we sam kampani oli givim long ol olfala.

Ol Bang Kaon: Folem ol rul blong bang long ples blong hem, man i save mekem se mane we bang i holem long kaon blong hem, mane we hem i putum long wan spesel kaon go kasem wan stret taem, no mane we hem i kasem taem hem i ritae, i go long han blong Watch Tower Sosaeti no i givim long olgeta taem hem i ded.

Ol Stok Mo Bon: Man i save givim stok mo bon oli go fulwan long Watch Tower Sosaeti olsem presen nomo.

Graon Mo Haos: Man i save givim graon no haos blong hem i go long Watch Tower Sosaeti, blong oli salem biaen. Sipos no, man i save folem plan se Sosaeti i kasem haos no graon ya taem hem i ded, be man ya i save gohed blong stap long haos ya long fulwan laef blong hem. Yu mas toktok wetem branj ofis we i lukaot long kantri blong yu bifo we yu givim graon no haos long Sosaeti.

Lastok Blong Man Bifo We Hem i Ded Mo Plan Blong Holem Mane i Stap Kasem Ded: Man i save givim graon no haos no mane blong hem long Watch Tower Sosaeti taem hem i raetem wan pepa folem loa, we i olsem lastok blong hem bifo we hem i ded. Sipos no, bang i save holem mane blong man ya i stap, blong i go long Watch Tower Sosaeti taem man ya i ded. Mane we bang i holem blong givhan long wan skul, maet man ya i no nidim blong pem takis long hem.

Ol man we oli intres long eniwan long olgeta plan ya blong givim presen, oli mas raetem leta i go long ofis blong Sosaeti we i lukaot long kantri blong olgeta.

[Bokis blong pija long pej 30]

Fasin Blong Givim Presen Mane

Long leta blong hem long ol man Korin, aposol Pol i tokbaot tri gudfala fasin blong givim presen mane. (1) Taem Pol i tokbaot wan kleksin blong mane, hem i givim advaes se: “Evri wik, long Sande, yufala evriwan i mas putumgud sam mane blong yufala i stap.” (1 Korin 16:2a) Taswe, man we i wantem givim presen mane, hem i mas mekem plan fastaem, mo hem i mas folem plan ya oltaem. (2) Pol i talem tu se “man we i kasem bigwan i save givim bigwan, mo man we i kasem smol i save givim smol.” (1 Korin 16:2b). Yes, man we i wantem givim presen mane, i save skelem hamas mane we hem i save givim wetem mane we hem i stap kasem long wok blong hem. Nating se wan Kristin i no kasem bigfala mane, Jeova i glad tumas long smol mane we hem i naf blong givim. (Luk 21:1-4) (3) Pol i gohed i talem se: “Nao evri man oli mas givim sam samting, olsem we olgeta wanwan oli jusumaot. I nogud man i givim samting long sore nomo, no from we hem i harem olsem we olgeta oli fosem hem, from we God i lavem man we i save givim samting long gladhat blong hem.” (2 Korin 9:7) Ol presen mane we ol trufala Kristin oli givim i kamaot long hat—yes oli givim long gladhat blong olgeta.

[Tok blong pija long pej 26]

Nehemaea i wan man we i gat strong filing mo we i tekem aksin

[Tok blong pija long pej 30]

Ol presen mane oli sapotem wok blong prentem ol buk, help long taem blong disasta, bildim ol Haos Kingdom, mo ol narafala wok we oli givhan long ol man raonabaot long wol