Bantu badi bambuluishe ntendelelu mulelela kale ne lelu

UDIKU muvuluke dîna dia muntu wakadila bua tshimenga tshia kale tshia Yelushalema anyi? Pamu’apa udi mua kuamba ne: ‘n’Yezu.’ Eyowa, Yezu wakadila bua tshimenga atshi. (Luka 19:28, 41) Kadi bidimu nkama mivule kumpala kua Yezu kulua pa buloba, munga musadidi wa lulamatu wa Nzambi wakadila bia muomumue bua Yelushalema. Dîna diende divua Nehemiya.​—Nehemiya 1:3, 4.

Ntshinyi tshiakabungamija Nehemiya bikole nunku, kufikaye too ne ku didila muadi bua Yelushalema? Ntshinyi tshiakenzaye bua tshimenga etshi ne bantu bavua basombelamu? Ne tshilejilu tshiende tshidi mua kutulongesha tshinyi? Bua kuandamuna nkonko eyi, tuanji kukonkonona imue mianda ivua mienzeke mu tshikondo tshiende.

Muntu wa mutshima wa kalolo ne muena dikima

Bakateka Nehemiya ngovena wa Yelushalema, kadi kumpala, uvua ne muanzu munene mu nzubu wa mukalenge wa Pelasa, mu tshimenga tshia Shushana. Nansha nanku, nsombelu wa bunême uvuaye nende kakakepesha dijinga diende dia kumona bana babu bena Yuda bavua mutantshi mule mu Yelushalema bikale bimpe to. Muanda wa kumpala wakenzaye pavua bamue

 bena Yuda bafume ku Yelushalema balue mu Shushana uvua wa ‘kubakonka bualu bua bena Yuda bakadi bashale bakumuka mu bupika ne bua Yelushalema kabidi.’ (Nehemiya 1:2) Pakandamuna benyi abu ne: bena mu Yelushalema bavua “mu dikenga dikole” ne se: lumbu lua tshimenga ‘lutshivua panshi,’ Nehemiya ‘wakashikama panshi, wakadila [matuku a bungi].’ Panyima apu wakaleja kanyinganyinga kende mu disambila diakenzaye ne muoyo mujima kudi Yehowa. (Nehemiya 1:3-11) Bua tshinyi Nehemiya uvua mubungame bikole nanku? Bualu Yelushalema uvua muaba wa ntendelelu wa Yehowa pa buloba, kadi bavua baulengulule. (1 Bakelenge 11:36) Nsombelu uvua munyanguke mu tshimenga atshi uvua uleja nsombelu mubi wa mu nyuma uvua nende bantu bavuamu.​—Nehemiya 1:6, 7.

Diditatshisha dia Nehemiya bua Yelushalema ne luse luvuaye nalu bua bena Yuda bavua basombelamu biakamusaka bua kudifila bua kubambuluisha. Diakamue pakamuanyishila mukalenge wa bena Pelasa bua kuanji kushiya midimu yende, Nehemiya wakatuadija kulongolola luendu lule lua kuya ku Yelushalema. (Nehemiya 2:5, 6) Uvua musue kufila bukole buende, dîba diende ne mamanya ende mu mudimu wa dilongolola Yelushalema. Matuku makese patupu kunyima kua difika diende, ukavua mulongolole mushindu wa kuenza mudimu wa diasulula lumbu lujima lua Yelushalema.​—Nehemiya 2:11-18.

Bu muvua mudimu wa dilongolola lumbu muikale wa bungi, Nehemiya wakautapuluila mêku mavule, buonso buawu akawenza mu buobumue. * Wakapesha bisumbu bia bantu bipite pa 40 mudimu wa kulongolola ‘tshitupa’ tshimue ku tshisumbu tshionso. Ntshinyi tshiakenzeka? Bu muvuaku benji ba mudimu ba bungi (ne baledi ne bana babu) bakafila dîba diabu ne makanda abu, mudimu uvua umueneka kauyi kutua tshiadi wakenzeka. (Nehemiya 3:11, 12, 19, 20) Mu ngondo ibidi ya mudimu wa tshisumi, bakibakulula lumbu lujima! Nehemiya wakafunda ne: nansha bantu bavua baluisha mudimu wa diasulula lumbu alu bavua benzejibue bua kuitaba ne: ‘Nzambi [wetu] nguakenzeja mudimu eu.’​—Nehemiya 6:15, 16.

Tshilejilu tshia kuvuluka

Nehemiya kakafila anu dîba diende ne mamanya to. Wakafila kabidi biuma biende bua kukuatshisha ntendelelu mulelela. Wakatula mfranga yende bua kupikula bana babu bena Yuda ku bupika. Uvua usombeshangana mfranga kayi ulomba tshia-kasombela. Kavua ‘utatshisha’ bena Yuda ne dibalomba bintu bivuabu bafunde bua kulambula ngovena, nansha muvuaye ne bukenji bua kubalombabi. Kadi nzubu wende uvua anu buashi bua kudisha bantu “lukama ne makumi atanu, [ne] bantu bavua bafuma mu matunga [avua] pepi netu.” Dituku dionso uvua ufila “ngombe umue, mikoko misungula isambombo, ne nyunyu” bua kushipelabu benyi bende. Ne kunyima kua matuku dikumi onso uvua ufila “milondo ya mvinyo ya bungi,” bionso abi bisumba anu ku makuta ende nkayende.​—Nehemiya 5:8, 10, 14-18, MMM.

Bushuwa, Nehemiya wakashila basadidi bonso ba Nzambi ba kale ne ba lelu tshilejilu tshia dikema tshia muoyo wa kalolo! Musadidi wa Nzambi eu wa dikima wakatula mpetu yende ku budisuile bua kuambuluisha benji ba mudimu bua kumona mua kutuma ntendelelu mulelela kumpala. Nanku bivua biakanyine pakalombaye Yehowa ne: ‘Nzambi wanyi, uvuluke bua kungenzela bimpe bua malu onso angakuenzela bantu aba.’ (Nehemiya 5:19) Bushuwa Yehowa neikale mua kumuenzela nanku.​—Ebelu 6:10.

Badi balonda tshilejilu tshia Nehemiya lelu

Bidi bisankisha bua kumona ne: lelu bantu ba Yehowa badi baleja pabu mutshima wa dinanga, benza malu ne muoyo wa budisuile ne baleja lungenyi lua didifila bua ntendelelu mulelela. Patudi tumvua ne: bena Kristo badi ne ntatu, tudi tuditatshisha bikole bua diakalenga diabu. (Lomo 12:15) Anu bu Nehemiya, tudi tulomba Yehowa mu masambila bua akuatshishe bana betu bena Kristo badi bakenga, tumulomba ne: ‘Ndi nkusengelela ne: teleja matshi ebe ku kulomba kua muntu webe ne ku kulomba kua bantu bebe badi ne disanka bua kutshina dîna diebe.’​—Nehemiya 1:11; Kolosai 4:2.

Kadi, diditatshisha dietu bua bana betu bena Kristo bikale ne disanka dia mu nyuma ne dia ku mubidi ne bua ntendelelu mulelela kuyaye kumpala kadiena anu bualu budi bututonde patupu to.  Didi ditusaka kabidi bua kuenza amue malu. Dinanga didi disaka aba badi ne mushindu wa kushiya nsombelu ya kuabu idiku mimpe ndambu, anu bu Nehemiya, bua kuya kuambuluisha bantu miaba mikuabu. Bena budisuile aba kabena bateketa mu mikolo bua nsombelu mishadile idibu mua kusangana mu imue miaba to, kadi badi bambuluisha bua ntendelelu mulelela aye kumpala miaba ayi, benza mudimu pamue mu buobumue ne bana babu. Mbakumbanyine kalumbandi bua lungenyi lua didifila ludibu baleja.

Tuenzayi tshietu tshitupa tshia mudimu muaba utudi basombele

Ntshia bushuwa bua se: ba bungi ba kutudi kabena ne mushindu wa kumbuka bua kuya muaba mukuabu to. Kadi tudi tuambuluisha bua ntendelelu mulelela aye kumpala muaba utudi basombele. Bualu ebu mbuleja kabidi mu mukanda wa Nehemiya. Tangila bualu budi Nehemiya wamba kabidi bua amue mêku a bena lulamatu bakenza pabu mudimu wa diasulula lumbu. Wakafunda ne: ‘Yedaya, muana wa Harumafe, uvua ulongolola tshitupa tshia tshimana tshivua kumpala kua nzubu wende. Benyamine ne Ashube bavua balongolole tshimana tshivua tshitangilangane ne nzubu yabu. Azariya, muana wa Maaseya, muikulu wa Ananya pende, uvua mulongolole tshimana, luseke luvua nzubu wende.’ (Nehemiya 3:10, 23, 28-30, MMM) Bantu aba ne mêku abu bakambuluisha bikole bua ntendelelu mulelela aye kumpala pakenzabu tshiabu tshitupa tshia mudimu wa dilongolola tshimanu tshivua pabuipi ne nzubu yabu.

 Lelu, ba bungi ba munkatshi muetu badi bambuluisha bua ntendelelu mulelela kuya kumpala miaba idibu basombele mu mishindu mishilashilangane. Tudi tuenza midimu ya diasa dia Nzubu ya Bukalenge, dikuatshisha badi makenga makuate ne tshidi nangananga ne mushinga mmudimu wa diyisha Bukalenge utudi tuenza. Kabidi, nansha tuetu bikale ne mushindu wa kuenza mudimu wa dibaka anyi wa dikuatshisha badi makenga makuate anyi katuyi nawu, tuetu bonso tudi ne dijinga dikole dia kutungunuja ntendelelu mulelela ne mpetu yetu, anu muakenza Nehemiya ne kalolo konso mu tshikondo tshiende.​—Bala malu adi mu kazubu kadi ne tshiena-bualu tshia se: “Ngikadilu idibu bafila nayi mapa a budisuile.”

Dipeta mfranga mikumbane bua kuenzeja nayi midimu yetu idi yenda ivula ya kupatula mikanda ku biamu, kukuatshisha badi makenga makuate, ne midimu kabukabu idi yenzeka pa buloba bujima didi mua kumueneka imue misangu bu bualu bukole budi bupite mutu. Kadi vuluka ne: mudimu wa dilongolola lumbu lunene lua Yelushalema uvua pawu umueneka mupite tshipimu. (Nehemiya 4:10) Kadi bakaujikija bualu bavua bawabanyangane mu mêku a bungi a bena budisuile. Bia muomumue lelu, bua kupeta bintu bidi bikengedibua bua kutungunuja midimu yetu idi yenzeka pa buloba bujima, bushuwa bidi bikengela bua yonso wa kutudi kutungunukaye ne kuenza tshiende tshitupa tshia mudimu eu.

Mu kazubu kadi ne tshiena-bualu tshia se: “Mishindu idi bamue bafila mapa” badi baleja mishindu mivule itudi mua kutungunuja mudimu wa Bukalenge ne mpetu yetu. Tshidimu tshishale,  bavule munkatshi mua bantu ba Nzambi mbambuluishe mushindu’eu, ne Kasumbu Kaludiki ka Bantemu ba Yehowa kadi kela bonso bavua muoyo wabu mubasake bua kufila pabu mapa a budisuile a nunku tuasakidila wa bungi. Tudi nangananga tuela Yehowa tuasakidila bua mudiye mubeneshe bikole bionso bidi bantu bende benza ne muoyo mujima bua kutuma ntendelelu mulelela kumpala pa buloba bujima. Bulelela, patudi tuela meji bua mushindu udi Yehowa mutulombole munkatshi mua bidimu bivule ebi, muoyo udi utusaka bua kuambulula mêyi a Nehemiya akasakidilaye nawu Nzambi a se: “Tshianza tshia Nzambi wanyi tshiakadi tshimpe kundi.”​—Nehemiya 2:18.

[Mêyi adi kuinshi]

[Kazubu/​Bimfuanyi mu mabeji 28, 29]

Mishindu idi bamue bafila mapa

MAPA BUA MUDIMU WA PA BULOBA BUJIMA

Bantu bavule batu bateka anyi balama ndambu wa mfranga itubu bela mu tushete tua mapa tudi ne miaku eyi: “Mapa bua mudimu wa pa buloba bujima wa Bantemu ba Yehowa​—Matayo 24:14.”

Ku ngondo yonso bisumbu bitu bituma mfranga eyi ku biro bia Bantemu ba Yehowa bidi ku Brooklyn mu New York bidi bilombola midimu yabu ya buloba bujima, peshi ku biro bia Bantemu bidi mu ditunga didibu basombele. Mfranga yenu ya ku budisuile eyi nudi mua kuyituma diakamue ku Biro bia Treasurer’s Office (Biro bia Mulami wa tshibutshilu) mu adrese eu: Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, anyi ku biro bia Bantemu bidi mu ditunga dinudi. Nudi mua kufila nansha bilengejilu peshi bintu bikuabu bia mushinga. Tudi tunulomba bua kutuma mapa aa pamue ne mukanda mufunda mu tshikoso udi uleja ne: aa mmapa a kashidi.

MAPA MAFILA NE DÎYI DITENTEKAPU

Muntu udi mua kupesha Société Watch Tower dipa dia mfranga ne kumvuangana nende bua se: udi mua kumupingajilayi pikalaye nayi dijinga. Bua kupeta mumvuija makuabu, suaku ufundile biro bia Treasurer’s Office (Biro bia Mulami wa tshibutshilu) mu adrese udi kuulu eku.

MAPA MALONGOLOLA

Pa kumusha mapa a mfranga mifila bua kashidi ne mapa mafila ne dîyi ditentekapu, kudi mishindu mikuabu ya kufila bintu bua kukuatshisha mudimu wa Bukalenge udi wenzeka pa buloba bujima. Mona imue mishindu:

Mfranga ya tshieya: Muntu udi mua kuenzela Société Watch Tower mikanda bua kuikalaye ne bukenji bua kuangata mfranga yende ya tshieya anyi ya pansio.

Konte ya ku banke: Muntu udi mua kufundisha konte yende ya ku banke, mikanda ya mfranga mitekesha ku banke anyi konte yende ya mfranga ya pansio mu dîna dia Société Watch Tower anyi kufunda bua kuyifutabu Société eu dîba dia lufu luende, bilondeshile mikenji ya banke ya muaba udiye.

Bukenji bua kupeta bintu ne mfranga misombesha: Badi mua kupesha Société bukenji bua kupeta bintu ne mfranga misombesha bu dipa dia kashidi.

Mpangu ne Nzubu: Muntu udi mua kupesha Société Watch Tower lupangu anyi nzubu wende pa kufila dipa dia kashidi, peshi kubishiya mu dîna dia Société kadi utungunuka ne kusombelamu patshidiye ne muoyo. Bidi bikengela kumanyisha biro bia Société bia mu ditunga dienu kumpala kua kumupesha lupangu ta nzubu.

Dipa dia kufuta ku tshidimu: Dipa dia kufuta ku tshidimu ndipa dia muntu wangata makuta anyi mikanda (idi ileja bukenji budiye nabu bua kupeta mfranga anyi bintu) ubifila kudi Société Watch Tower. Pashishe muntu eu (anyi mukuabu udiye musungule) udi utuadija kupeta difutu kampanda ku tshidimu ku tshidimu patshidiye ne muoyo. Tshidimu tshidi muntu ufila dipa dia mushindu’eu badi bamupuekeshila mushinga wa bitadi bivuaye ufuta bua lupetu luende.

Bintu bia bumpianyi ne bintu bitekesha: Muntu udi mua kufundisha dîna dia Société Watch Tower ku mikanda ya bumpianyi bua kuangataye bintu anyi mfranga yende, peshi kufundisha Société ku mikanda ya tshipungidi bua kumupa bukenji bua kuangata bintu bitekesha. Badi mua kukepesha mushinga wa bitadi padi bintu bitekesha mu dîna dia tshitendelelu.

Anu mudi miaku eyi: “mapa malongolola” ileja, mapa a mushindu’eu atu alomba bua muafidi adianjile kudilongolola. Bua kuambuluisha bantu badi bajinga kukuatshisha mudimu udi Bantemu ba Yehowa benza pa buloba bujima ne mushindu kampanda wa mapa malongolola, Société mmupatule kakanda ka mu Anglais ne mu tshiena Espagne kadi ne tshiena-bualu tshia: Charitable Planning to Benefit Kingdom Service Worldwide (Mapa malongolola bua kukuatshisha mudimu wa Bukalenge wa pa buloba bujima). Bavua bafunde kakanda aka bua kuandamuna nkonko ya bungi idibu bele Société bua mapa, bintu bia bumpianyi ne bintu bitekesha. Kadi kabidi ne mumvuija makuabu mimpe bua mpangu ta nzubu, mfranga ne bitadi. Ne nkenza bua kuambuluisha bantu ba mu États-Unis badi badilongolola bua kupesha Société dipa dia pa buadi mpindieu anyi bua kumushila bintu dîba dia lufu, bua kusungulabu mushindu udi mutambe buimpe ne muakanyine bua kufila mapa aa bilondeshile mêku abu ne nsombelu yabu. Wewe dijinga ne kakanda aka, udi mua kukalomba buludiludi ku Biro bia Mapa Malongolola (Charitable Planning Office).

Kunyima kua bantu ba bungi bamane kubala kakanda aka ne bayikile ne aba badi benza mudimu ku Biro bia Mapa Malongolola, ba bungi mbafike ku dikuatshisha Bantemu ba Yehowa mu mudimu wabu wa buloba bujima, ne mbakepeshe kabidi bungi bua makuta a bitadi padibu bafile bintu ebi. Bidi bikengela kumanyisha Biro bia Mapa Malongolola ne kubitumina mukanda wonso udi utangila tshilumbu etshi. Biwikala mulongolole bua kufila mapa, udi ne bua kufundila Biro bia Mapa Malongolola anyi kuela nshinga mu adrese udi kuinshi eku, peshi ku biro bia Bantemu ba Yehowa bidi biambuluisha mu ditunga dienu.

Charitable Planning Office

Watch Tower Bible and Tract Society of Pennsylvania

100 Watchtower Drive

Patterson, New York 12563-9204

Telefone: (845) 306-0707

[Kazubu mu dibeji 30]

Ngikadilu idibu bafila nayi mapa a budisuile

Mu mikanda ivuaye mufundile bena Kolinto, mupostolo Paulo wakatela ngikadilu isatu minene ya kufila nayi mapa. (1) Pakafundaye bua disangisha dia makuta, wakabambila ne: “Dituku dia kumpala dia lumingu luonso, yonso wa kunudi ateke ku luseke tshionso tshikalaye mupete.” (1 Kolinto 16:2a, MMM) Nunku, bua kufila mapa bidi bilomba kudianjila kudilongolola, pa tshibidilu. (2) Paulo wakafunda kabidi ne: muntu yonso udi ne bua kufila “bu muakupeteye.” (1 Kolinto 16:2b, MML) Mbuena kuamba ne: muntu udi musue kufila mapa a budisuile udi mua kufila bilondeshile bidiye nabi. Nansha muena Kristo yeye upeta anu mfranga mikese, tukese tudiye upatulamu bua kufila atu Yehowa udi utuangata ne mushinga wa bungi. (Luka 21:1-4) (3) Paulo wakafunda kabidi ne: ‘Muntu ne muntu afile bintu bu muakadisunguilaye mu mutshima wende; kafidi ne kanyinganyinga, anyi bu muenzeja ku bukole; bualu bua Nzambi udi musue muena kupa udi ufila ne disanka.’ (2 Kolinto 9:7) Bena Kristo balelela batu bafila mapa ne muoyo wabu mujima, ne disanka.

[Bimfuanyi mu dibeji 26]

Nehemiya uvua muntu wa mutshima wa kalolo ne muena dikima

[Bimfuanyi mu dibeji 30]

Mapa a budisuile adi ambuluisha mu dipatula mikanda ku biamu, dikuatshisha badi makenga makuate, diasa Nzubu ya Bukalenge ne mu midimu mikuabu idi yenzeka pa buloba Bujima