Sostenedónan di Adorashon Berdadero Ántes i Awor

BO TA kòrda nòmber di un hòmber ku a yora pa motibu di e stat Yerúsalèm di pasado? Kisas bo ta bisa ‘Hesus,’ i ta bèrdat, pasobra Hesus a yora pa motibu di e stat. (Lukas 19:28, 41) Sin embargo, siglonan promé ku Hesus a kana riba tera, un otro fiel sirbidó di Dios tambe a yora pa motibu di Yerúsalèm. Esei tabata Nehemías.—Nehemías 1:3, 4.

Kiko a hasi Nehemías asina tristu ku el a yora pa motibu di Yerúsalèm? Kiko el a hasi p’e benefisio di e stat i su habitantenan? I kiko nos por siña for di su ehèmpel? Pa kontestá e preguntanan ei, laga nos repasá algun suseso di su tempu.

Un Hòmber di Sintimentu i Akshon

Nehemías tabata nombrá komo gobernadó di Yerúsalèm, pero promé ku esei, e tabata un ofisial di rango haltu den e palasio perso den e stat di Susa. Tòg, su bida konfortabel no a mengua su interes den e bienestar di su rumannan hudiu ku tabata leu aya na Yerúsalèm. De echo, promé kos ku el a hasi ora un delegashon di hudiu for di Yerúsalèm a bishitá Susa tabata di ‘puntra nan pa e hudiunan, esnan ku a skapa i ku a sobrebibí e koutiverio, i pa Yerúsalèm.’ (Nehemías 1:2)  Ora e bishitantenan a respondé ku e hendenan di Yerúsalèm tabata “den gran aflikshon” i ku e muraya di e stat tabata “bashá abou,” Nehemías “a kai sinta i a yora, i a tene rou pa hopi dia.” Despues di esei el a ekspresá su sintimentunan di tristesa den un orashon sinsero na Yehova. (Nehemías 1:3-11) Dikon Nehemías tabata asina tristu? Esei ta pasobra Yerúsalèm tabata e sentro di adorashon di Yehova riba tera, i el a ser neglishá. (1 Reinan 11:36) Ademas, e mal estado di e stat tabata un refleho di e mal kondishon spiritual di su habitantenan.—Nehemías 1:6, 7.

Nehemías su interes den Yerúsalèm i su kompashon pa e hudiunan ku tabata biba einan a impuls’é pa hasi su mes disponibel pa sirbi nan. Asina ku e rei di Persia a duna Nehemías un tempu liber di su enkargonan, el a kuminsá plania su biahe largu pa Yerúsalèm. (Nehemías 2:5, 6) E kier a duna su tempu, energia i abilidatnan pa apoyá e trabounan di reparashon nesesario. Djis un par di dia despues ku el a yega, e tabatin un plan prepará pa drecha henter e muraya di Yerúsalèm.—Nehemías 2:11-18.

Nehemías a dividí e inmenso trabou di drecha e muraya entre e hopi famianan. Nan tur a yuda otro. * Kada un di e mas ku 40 diferente gruponan a haña e tarea di drecha un “sekshon.” Kiko tabata e resultado? Ku asina tantu trahadó—inkluso mayornan kompañá pa nan yunan—dunando di nan tempu i energia, un tarea inmenso ku a parse imposibel a bira posibel. (Nehemías 3:11, 12, 19, 20) Den dos luna di hopi trabou, henter e muraya a keda drechá! Nehemías a skirbi ku asta esnan ku a bai kontra e trabou di reparashon a haña nan obligá ta rekonosé ku “e trabou aki a wòrdu kumplí ku e yudansa di nos Dios.”—Nehemías 6:15, 16.

Un Ehèmpel pa Nos Kòrda

No ta ku su tempu i kapasidat di organisá kosnan so Nehemías a kontribuí. Tambe el a usa su rekursonan material pa sostené adorashon berdadero. El a usa su mes plaka pa kumpra su rumannan hudiu bèk for di sklabitut. El a fia otro hende plaka sin kobra interes. E nunka a “pone karga” riba e hudiunan dor di eksigí un kompensashon komo gobernadó, ounke e tabatin derechi riba dje. Mas bien, semper su kas tabata habrí pa alimentá “shent’i sinkuenta hudiu i ofisial, fuera di esnan ku a bin serka nos for di e nashonnan ku tabata rònt di nos.” Tur dia el a perkurá “un buey, seis karné di e mihónan ku tin” i tambe “paranan” pa su invitadonan. Ademas, kada dies dia el a duna nan “tur sorto di biña na abundansia”—tur riba su propio gastu.—Nehemías 5:8, 10, 14-18.

Ki un ehèmpel sobresaliente di generosidat Nehemías a pone pa tur sirbidó di Dios dje tempu ei i awor! E balente sirbidó di Dios aki a usa su rekursonan material di un manera liberal i boluntario pa sostené e trahadónan pa asina promové e adorashon berdadero. Ku rason bèrdè e por a pidi Yehova: “Kòrda di mi, o mi Dios, pa bon, segun tur loke mi a hasi pa e pueblo aki.” (Nehemías 5:19) Yehova sigur lo hasi nèt esei.—Hebreonan 6:10.

Awe Hopi Ta Sigui e Ehèmpel di Nehemías

Ta masha alentador pa mira kon Yehova su pueblo djawe ta manifestá e mesun sintimentu tierno, deseo di traha i un spiritu di sakrifisio propio na fabor di adorashon berdadero. Ora nos tende ku nos kompañeronan di fe ta pasa difikultat, nos ta sinti nos profundamente preokupá pa nan bienestar. (Romanonan 12:15) Meskos ku Nehemías, komo sosten pa nos rumannan den fe ku ta afligí nos ta akudí na Yehova den orashon i pidié: “Laga bo orea ta atento na e orashon di bo sirbidó i na e orashon di bo sirbidónan, kende nan delisia ta pa tin temor di bo nòmber.”—Nehemías 1:11; Kolosensenan 4:2.

Sin embargo, nos interes den e bienestar spiritual i físiko di nos rumannan kristian i den e adelanto di adorashon berdadero no tin di haber ku nos sintimentunan so. E ta move nos na  akshon tambe. Amor ta impulsá e personanan kende nan sirkunstansianan ta permití nan, pa bandoná e relativo komodidat di nan kasnan, i kasi meskos ku Nehemías, muda bai otro lugá pa duna yudansa na esnan ku ta den nesesidat. E boluntarionan ei no ta laga e kondishonnan di bida ménos konfortabel den algun parti di mundu stroba nan. Nan ta apoyá adorashon berdadero den lugánan asina, sirbiendo lado a lado ku nan rumannan kristian. E spiritu di sakrifisio propio ku nan ta manifestá ta berdaderamente elogiabel.

Hasiendo Nos Parti Banda di Kas Mes

Ta di komprendé ku mayoria di nos lo no por muda bai un otro sitio. Nos ta apoyá adorashon berdadero den nos mes komunidat. Esaki ta loke e buki di Nehemías ta ilustrá tambe. Tuma nota di e detaye ku Nehemías ta agregá tokante algun dje famianan fiel ku a partisipá den e trabounan di reparashon. El a skirbi: “Jedaias, yu hòmber di Harumaf, a hasi reparashon enfrente di su kas . . . Benjamin i Hasub a hasi reparashon dilanti di nan kas. Despues di nan Azarias, yu hòmber di Maaseias, yu hòmber di Ananias, a hasi reparashon banda di su kas.” (Nehemías 3:10, 23, 28-30) E hòmbernan ei huntu ku nan famianan a kontribuí grandemente n’e avanse di adorashon berdadero dor di partisipá den e trabounan di reparashon banda di nan kas.

 Awe, hopi di nos ta sostené adorashon berdadero den nos mes komunidat den vários manera. Nos ta partisipá den proyektonan di konstrukshon di Salon di Reino, esfuersonan pa trese alivio den tempu di desaster, i mas importante, e obra di prediká e Reino. Ademas, sea ku nos por partisipá personalmente den konstrukshon òf trabounan di alivio òf nò, nos tur tin un deseo sinsero pa sostené adorashon berdadero ku nos rekursonan material, meskos ku Nehemías a hasi generosamente den su tempu.—Mira e kuadro “Karakterístikanan di Dunamentu Boluntario.”

Tin biaha por parse kasi imposibel pa haña e fondonan nesesario pa finansiá nos kresiente trabounan di imprimí literatura, di duna ousilio i numeroso otro servisionan efektuá rònt mundu. Sin embargo, kòrda ku e tarea di drecha e inmenso muraya di Yerúsalèm tambe a parse imposibel pa realisá. (Nehemías 4:10) Tòg, dor ku ta hopi famia boluntario a yuda hasi e trabou, nan a komplet’é. Awe ta meskos. Si kada un di nos sigui duna nos aporte na e obra, lo ta posibel pa sigui haña e hopi rekursonan nesesario pa realisá nos aktividatnan rònt mundu.

E kuadro “Maneranan Ku Algun Hende Ta Skohe pa Duna” ta mustra vários manera den kua nos por sostené e obra di Reino finansieramente. Aña pasá, hopi sirbidó di Dios a duna e sosten ei, i e Kuerpo Gobernante di Testigunan  di Yehova lo kier probechá di e oportunidat aki pa ekspresá nan profundo gradisimentu na tur esnan kende nan kurason a impulsá nan pa partisipá den e donashonnan boluntario aki. Mas importante ainda, nos ta gradisí Yehova pa su bendishon riku riba e esfuersonan ku su pueblo ta hasi di henter kurason pa promové adorashon berdadero rònt mundu. Sí, ora nos reflekshoná riba kon e man di Yehova a guia nos den transkurso di añanan, nos ta sinti nos impulsá pa resoná e palabranan di Nehemías, kende a bisa ku gratitut: “E man di mi Dios tabata bon riba mi.”—Nehemías 2:18.

[Nota]

[Kuadro/Plachinan na página 28, 29]

Maneranan Ku Algun Hende Ta Skohe pa Duna

KONTRIBUSHON PA E OBRA MUNDIAL

Hopi hende ta apartá, òf presupuestá, un montante ku nan ta pone den e kahanan di kontribushon marká: “Kontribushon p’e Obra Mundial—Mateo 24:14.”

Tur luna kongregashonnan ta manda e montantenan aki sea p’e sede mundial di Testigunan di Yehova òf n’e sukursal lokal. Tambe por manda donashon boluntario di plaka direktamente na e Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, òf n’e ofisina di sukursal ku ta sirbi bo pais. Tambe por hasi donashon di hoya òf otro kos di balor. Un karta breve ku ta deklará ku esakinan ta un regalo inkondishonal mester kompañá e kontribushonnan aki.

AREGLO DI DONASHON KONDISHONAL

Por hasi donashon di plaka via un areglo special den kua, si e dunadó hañ’é den un nesesidat personal, lo debolbé e donashon na dje. Pa mas informashon, por fabor, tuma kontakto ku e Treasurer’s Office na e adrès menshoná ariba.

DONASHON PLANEÁ

Ademas di regalo inkondishonal di plaka i donashon kondishonal di plaka, tin otro métodonan di duna na benefisio dje sirbishi di Reino rònt mundu. Esakinan ta inkluí:

Seguro: Por nombra Sosiedat Watch Tower komo benefisiario di un pólisa di seguro di bida òf un plan di penshon.

Kuenta di Banko: Por duna Sosiedat Watch Tower derecho di usa kuenta di banko, ‘time deposit’ òf kuenta di penshon personal, òf derecho di kobra nan despues di morto di nan doño, na armonia ku rekisitonan bankario lokal.

Akshon i Bono: Por hasi donashon di akshon i bono na Sosiedat Watch Tower komo un regalo inkondishonal.

Propiedat: Por hasi donashon na Sosiedat Watch Tower di propiedat ku por ser bendé, sea komo regalo inkondishonal òf bou dje kondishon ku e dunadó por sigui biba den dje te na su morto. Tuma kontakto ku e ofisina di sukursal di bo pais promé ku traha e akta pa traspasá kualkier propiedat.

Tèstamènt i ‘Trust’: Por nombra Sosiedat Watch Tower komo heredero di propiedat òf plaka via un tèstamènt legal, òf por nombra Sosiedat Watch Tower komo benefisiario di un areglo di trust. Un trust ku ta benefisiá un organisashon religioso por duna sierto bentahanan di belasting.

Sukursal mester ser informá, i mester risibí un kopia di tur dokumento relevante di kualkier un di e areglonan aki. Si bo ta interesá den un di e areglonan aki di donashon planeá, bo mester tuma kontakto ku Sosiedat, via karta òf telefon, na e adrès indiká aki bou, òf na e ofisina di Testigunan di Yehova ku ta sirbi bo pais.

Charitable Planning Office

Sosiedat Watch Tower

P.O. Box 4708 Seroe Loraweg 142A

Curaçao, N.A.

Telefon: (599-9) 461-7528

[Kuadro na página 30]

Karakterístikanan di Dunamentu Boluntario

Den su kartanan n’e Korintionan, apòstel Pablo a menshoná tres karakterístika importante den dunamentu boluntario. (1) Ora Pablo a skirbi tokante kolekshon di plaka, el a duna e instrukshon: “Riba e promé dia di siman laga kada un di boso pone algu un banda.” (1 Korintionan 16:2a) Pues, mester plania delantá kon i di ki manera ta duna, i mester hasi esei sistemátikamente. (2) Tambe Pablo a skirbi ku kada persona mester duna ‘segun su forsa.’ (1 Korintionan 16:2b, Beibel na papiamentu koriente) Ku otro palabra, un persona ku kier duna boluntariamente mester hasi esei proporshonalmente, segun su rekursonan ta permití. Asta ora un kristian ta gana tiki, Yehova ta duna hopi balor na e tiki ku lo e por kontribuí kuné. (Lukas 21:1-4) (3) Pablo a skirbi mas aleu: “Laga kada un hasi manera el a proponé den su kurason; no kontra su gustu òf obligá; pasobra Dios ta stima esun ku ta duna ku alegria.” (2 Korintionan 9:7) Kristiannan sinsero ta duna di kurason—ku alegria.

[Plachinan na página 26]

Nehemías tabata un hòmber di sintimentu i akshon

[Plachinan na página 30]

Kontribushonnan boluntario ta sostené e trabounan di imprimí literatura, di duna ousilio, konstrukshon di Salon di Reino i otro servisionan rònt mundu