Sma di horibaka gi a tru anbegi fosi èn sma di e du dati now

YU E memre a nen fu wan man di ben krei gi a foto Yerusalem fu owruten? ’Yesus’, yu ben o taki kande, èn dati de tru, fu di Yesus ben du dati (Lukas 19:28, 41). Ma hondrohondro yari bifo Yesus ben libi na grontapu, dan wan tra getrow futuboi fu Gado ben krei tu gi Yerusalem. A man disi ben nen Nehemia.—Nehemia 1:3, 4.

San ben meki taki Nehemia ben sari so te taki a ben krei gi Yerusalem? San a ben du fu a bun fu a foto èn sosrefi fu a bun fu den sma di ben e libi na ini a foto dati? Èn san wi kan leri fu na eksempre fu en? Fu man piki na aksi dati, dan meki wi luku wan tu fu den sani baka di ben pasa na a ten di a ben de na libi.

Wan man di ben e broko en ede nanga sani èn di ben e teki bun bosroiti

Den ben poti Nehemia leki tiriman fu Yerusalem, ma bifo den ben poti en leki tiriman, a ben de wan heiman na ini a kownu-oso fu Persia di ben de na ini a foto Susan. Ma a bun libi di a ben abi no ben tapu en fu broko en ede nanga den Dyu brada fu en na ini a farawe Yerusalem. Fu taki en leti, a fosi sani di a ben du di wan grupu fu Dyu fu Yerusalem ben kon na Susan, na taki a „aksi den fa a ben de nanga den Dyu, den wan di ben lowe gowe, den wan di ben de na libi ete baka di a  pipel ben go na ini katibo, èn sosrefi fa a ben de nanga Yerusalem” (Nehemia 1:2). Di den fisitiman taigi en taki a pipel fu Yerusalem ben de „na ini wan tumusi takru situwâsi” èn taki a skotu fu a foto ben „broko”, dan Nehemia „go sidon èn a bigin krei èn a ben e sari furu dei langa”. Baka dati a begi Yehovah nanga en heri ati so taki Yehovah ben kan sabi fa a ben e firi (Nehemia 1:3-11). Fu san ede Nehemia ben e sari so? Fu di a tempel fu Yehovah ben de na ini Yerusalem, èn fu di sma no ben e poti prakseri na en (1 Kownu 11:36). Boiti dati, a foto di ben de leki wan brokopresi ben e prenki o swaki a yeye fasi fu den sma fu Yerusalem ben de.—Nehemia 1:6, 7.

Fu di Nehemia ben e broko en ede nanga Yerusalem èn fu di a ben abi sari-ati nanga den Dyu di ben e libi drape, meki a ben de klariklari fu yepi den. Di a Kownu fu Persia gi Nehemia primisi fu libi a wroko fu en gi wan pisi ten, dan a bigin sreka sani wantewante fu go na Yerusalem di ben de so farawe (Nehemia 2:5, 6). A ben wani gebroiki en krakti, en ten, nanga den koni fu en fu yepi nanga a wroko di ben musu du fu seti a tempel kon bun baka. Di a ben de drape wan tu dei nomo, dan a ben sreka sani kaba fu meki a heri skotu fu Yerusalem kon bun baka.—Nehemia 2:11-18.

Nehemia ben prati a tumusi bigi wroko disi na mindri furu famiri, èn den alamala ben e wroko makandra sei nanga sei. * Moro leki 40 difrenti grupu ben poti na wroko, so taki ibriwan fu den ben kan meki wan „spesrutu pisi” kon bun baka. San ben de a bakapisi? Bun furu wrokoman ben de, sosrefi papa nanga mama nanga den pikin fu den, èn den ben gi den ten nanga den krakti fu du a wroko disi. A sani disi ben meki taki a wroko disi ben man du, aladi a ben gersi leki a ben furu tumusi (Nehemia 3:11, 12, 19, 20). Den sma disi wroko bun tranga tu mun langa, èn na ini den tu mun dati a wroko ben klari! Nehemia ben skrifi taki srefi den sma di ben gens a wroko disi ben musu agri taki „a wroko disi ben du fu wi Gado ede”.—Nehemia 6:15, 16.

Wan eksempre di wi no musu frigiti

Nehemia no ben gebroiki en ten nanga den koni fu en wawan fu horibaka gi a tru anbegi. A ben gebroiki sosrefi den gudu fu en fu du dati. A ben pai moni fu puru den Dyu brada fu en na ini katibo. A ben leni sma moni sondro taki den ben abi fu pai en rente baka. Noiti a „ben meki en muilek” gi den Dyu fu di a ben fruwakti taki den ben musu pai en fu di a ben de tiriman, aladi a ben abi reti tapu a sani dati. Na presi fu dati, a ben de klariklari fu gi nyanyan na „wán hondro feifitenti” mansma, èn sosrefi den wan di ben kon na wi fu den kondre di ben de na wi lontu”. Ibri dei a ben gi „wan mankaw, siksi fu den moro bun skapu nanga fowru” fu a bun fu den fisitiman fu en. Boiti dati, wán leisi ibri tin dei a ben e gi den „bogobogo fu ibri sortu win”, èn ensrefi ben pai gi ala den sani disi.—Nehemia 5:8, 10, 14-18.

Fu di Nehemia ben lobi fu gi, meki a ben de wan tumusi bun eksempre gi ala den futuboi fu Gado na a ten dati, èn sosrefi gi den wan na ini a ten disi! A futuboi disi fu Gado di ben abi deki-ati, ben de klariklari fu gebroiki den gudu fu en fu yepi den wrokoman, so taki a tru anbegi ben kan go na fesi. Fu dati ede a ben kan aksi Gado: „Grantangi memre . . . o mi Gado, ala den sani di mi du fu a bun fu a pipel disi” (Nehemia 5:19). A no de fu taki dati Yehovah sa du dati.—Hebrewsma 6:10.

Sma e teki na eksempre fu Nehemia na ini a ten disi

A e naki wi ati fu si taki a pipel fu Yehovah na ini a ten disi e sori tu taki den lobi a tru anbegi, èn boiti taki den de klariklari fu horibaka gi en, den e gi densrefi tu fu a bun fu na anbegi disi. Te wi e yere taki tra bribiman e pina, dan wi e broko wi ede trutru nanga den (Romesma 12:15). Neleki Nehemia, wi e begi Yehovah fu yepi den Kresten brada fu wi di e kisi kwinsi, èn wi e aksi en: „Grantangi meki yu yesi arki a begi fu yu futuboi èn sosrefi a begi fu yu futuboi di e prisiri fu di den e frede yu nen.”—Nehemia 1:11; Kolosesma 4:2.

 Ma te wi wani taki wi Kresten brada tan abi wan bun yeye fasi, taki sani waka bun nanga den, èn taki a tru anbegi e go na fesi, dan dati no de wan winsi nomo di wi abi. Wi sa du san de fanowdu sosrefi fu yepi den. Den wan di man gowe libi a tanpresi fu den pe den ben abi wan bun libi, e teki na eksempre fu Nehemia èn den e go tan na tra presi fu yepi den wan di de na nowtu. Den sma disi e du dati fu di den lobi trawan. Na son presi fu grontapu, a libi fu den sortu sma disi di de klariklari fu gi densrefi, no makriki moro soleki fa a ben de fosi. Toku den e horibaka gi a tru anbegi drape so taki a kan go na fesi, èn den e dini sei nanga sei makandra nanga den Kresten brada fu den. Den musu kisi prèise trutru fu di den de klariklari fu gi densrefi fu yepi trawan.

Wi kan yepi trawan na ini wi eigi libimakandra

A no de fu taki, dati furu fu wi no man froisi go tan na wan tra presi. Wi e horibaka gi a tru anbegi na ini wi eigi libimakandra. A buku fu Nehemia e taki fu a tori dati tu. Luku san Nehemia e taki fu wan tu getrow famiri di ben yepi nanga a wroko di ben musu du fu meki a skotu kon bun baka. A ben skrifi: „Yedaya a manpikin fu Harumaf ben e wroko na fesi fu en eigi oso.  . . Benyamin nanga Hasub ben e wroko na fesi fu den eigi oso. Di den ben kaba, dan Asarya a manpikin fu Maseya a manpikin fu Ananya ben e wroko krosibei fu en eigi oso” (Nehemia 3:10, 23, 28-30). Den mansma dati nanga den osofamiri fu den ben du furu fu sorgu taki a tru anbegi ben go na fesi. Den  ben yepi nanga a wroko di ben de fu du krosibei fu pe den ben e tan.

Na ini a ten disi, furu fu wi e horibaka gi a tru anbegi na ini wi eigi libimakandra, èn wi e du dati na difrenti fasi. Wi e yepi fu bow Kownukondre zaal, wi e yepi sma di de na nowtu, èn san moro prenspari, wi e teki prati na a Kownukondre preikiwroko. Boiti dati, kande wisrefi man yepi nanga bow-wroko noso nanga a wroko di musu du fu yepi sma di de na nowtu. Awansi fa a no fa, toku wi alamala e angri trutru fu horibaka gi a tru anbegi nanga yepi fu den gudu fu wi, neleki fa Nehemia ben angri fu dati na ini a ten fu en.—Luku a faki „Den fasi fa wi kan gi bijdrage”.

Son leisi a gersi leki nofo moni no de fu pai gi den someni publikâsi di wi e meki, fu man yepi sma di de na nowtu, èn fu man du den someni tra wroko di wi e du na heri grontapu. Ma memre taki a wroko di sma ben musu du fu meki a bigi skotu fu Yerusalem kon bun baka, ben gersi wan tumusi bigi wroko tu (Nehemia 4:10). Ma fu di a wroko ben prati na mindri osofamiri di ben de klariklari fu yepi, meki a wroko ben man du. Na ini a ten disi, wi sa man feni san de fanowdu fu du a wroko fu wi na heri grontapu, te iniwan fu wi e tan du a pisi di a man du na ini a wroko disi.

A faki di nen „Den fasi fa sma e bosroiti fu gi” e sori wan tu fu den fasi fa wi kan gebroiki wi moni fu horibaka gi a Kownukondre wroko fu wi. Na ini a yari di pasa, furu memre fu Gado pipel horibaka gi a Kownukondre wroko na a fasi disi, èn a  Tiri Skin fu Yehovah Kotoigi ben sa wani teki na okasi disi fu taki dati den de nanga tangi na ati trutru fu di ala den sma disi ben de klariklari fu gi nanga den heri ati. San de moro prenspari, na taki wi e taki Yehovah tangi fu di a blesi a pipel fu en bogobogo fu di den du muiti fu meki a tru anbegi go na fesi na heri grontapu. Iya, te wi e luku fa Yehovah en anu tiri wi na ini den yari di pasa, dan dati e meki wi taki den srefi wortu di Nehemia ben taki nanga tangi na ati: „Na anu fu mi Gado, a trutru ben bun gi mi.”—Nehemia 2:18.

[Futuwortu]

[Faki/​Prenki na tapu bladzijde 28, 29]

Den fasi fa sma e bosroiti fu gi bijdrage

BIJDRAGE GI A WROKO DI E DU NA HERI GRONTAPU

Furu sma e poti moni na wan sei, èn den e poti a moni dati na ini den boksu di nen „Bijdrage gi a wroko di e du na heri grontapu—Mateyus 24:14”.

Ibri mun gemeente e seni den moni disi go na a edekantoro fu Yehovah Kotoigi, noso na a bijkantoro ini den eigi kondre. Sma di de klariklari fu gi moni kan poti dati na bangi tapu nen fu a Wachtower Society, rekeningnr. 11.14.225 DSB Bank. Sma kan gi sosrefi gowtu sani noso tra gudu. Makandra nanga den bijdrage disi den musu seni wan syatu brifi di e sori krinkrin taki den gi den sani disi leki bijdrage.

MONI DI SMA KAN KISI BAKA, TE DENSREFI ABI DATI FANOWDU

Wan sma kan gi moni leki bijdrage akruderi wan spesrutu seti di e gi sma okasi fu kisi a moni fu den baka, te densrefi abi dati fanowdu. Fu man kon sabi moro fu a tori disi, grantangi kontakti a bijkantoro ini yu kondre.

SANI DI SMA KAN SETI FU MAN GI BIJDRAGE

Boiti taki sma kan bosroiti fu gi presenti èn sosrefi moni di den kan kisi baka, te densrefi abi dati fanowdu, tra fasi de tu fa wan sma kan gi bijdrage fu horibaka gi a Kownukondre diniwroko di e du na heri grontapu. Disi na:

Verzekering: Wan sma ben kan poti wan levensverzekering tapu nen fu Gemeente Paramaribo van Jehovah’s Getuigen.

A moni di sma abi na bangi: Wan sma kan poti iniwan moni di den abi na bangi tapu nen fu Gemeente Paramaribo van Jehovah’s Getuigen, so taki te a sma dede a bangi pe a moni disi de kan gi Gemeente Paramaribo van Jehovah’s Getuigen a frantwortu fu a moni dati akruderi den wet fu a bangi disi.

Aandeel nanga Obligatie: Sma kan gi Gemeente Paramaribo van Jehovah’s Getuigen, aandeel nanga obligatie leki wan presenti.

Gron nanga oso: Te sma abi gron nanga oso di man seri, dan den kan gi dati na Gemeente Paramaribo van Jehovah’s Getuigen. Den kan gi den sani dati leki presenti wantewante, noso den kan bosroiti fu tan libi na ini na oso, noso na tapu a gron dati teleki den dede, èn baka dati Gemeente Paramaribo van Jehovah’s Getuigen kan kisi a gron noso na oso. Taki nanga a bijkantoro bifo yu e bosroiti fu gi wan pisi gron noso wan oso leki bijdrage.

Testamenti nanga machtiging papira: Wan sma kan gi Gemeente Paramaribo van Jehovah’s Getuigen den gudu noso a moni di a abi. A kan du dati nanga yepi fu wan testamenti di skrifi akruderi wet.

Soleki fa den wortu „sani di sma kan seti fu gi bijdrage” e sori dan wan sma di wani gi den sortu bijdrage disi musu sreka wan tu sani fosi. Fu man yepi sma di wani gi bijdrage na wan fu den fasi disi, so taki den kan horibaka gi a wroko fu Yehovah Kotoigi di e du na heri grontapu, dan Yehovah Kotoigi sreka wan brochure na ini Ingrisitongo nanga Spanyorotongo. A brochure disi nen: Charitable Planning to Benefit Kingdom Service Worldwide (Sani di sma kan seti fu gi bijdrage fu horibaka gi a Kownukondre wroko di e du na heri grontapu). A brochure disi ben skrifi fu gi wan piki tapu den furu aksi ini a tori fu presenti, testamenti, nanga machtiging papira. A brochure e taki fu tra tori sosrefi di kan yepi sma fu sreka sani di abi fu du nanga gudu, moni afersi, nanga belasting. A brochure e fruteri sma fu den difrenti sortu fasi fa sma kan gi presenti wantewante, noso nanga yepi fu wan testamenti, so taki Gemeente Paramaribo van Jehovah’s Getuigen kan kisi a presenti, baka te a sma dede. Sma kan aksi a bijkantoro a brochure disi.

Furu sma di leisi a brochure disi èn di aksi rai na a bijkantoro, ben man yepi Yehovah Kotoigi na heri grontapu, èn na a srefi ten, a sani disi meki taki den no ben abi fu pai tumusi furu belasting. Te sma bosroiti fu gi bijdrage na iniwan fu den fasi disi, dan den musu taigi a bijkantoro dati, èn den musu gi a bijkantoro wan kopi fu a dokumenti di e sori taki den gi sowan bijdrage. Efu yu wani kon sabi moro fu den sortu fasi disi fu gi bijdrage, dan yu musu skrifi go na a adres fu a bijkantoro fu Yehovah Kotoigi, noso bel go na a nomru di skrifi dyaso na ondrosei.

Jehovah’s Getuigen

Garnizoenspad 239

Distrikt Wanica

Suriname

Telefoon: 0328054/0328019

[Faki na tapu bladzijde 30]

Den fasi fa wi kan gi bijdrage

Na ini den brifi di na apostel Paulus ben skrifi gi den Korentesma, a kari dri prenspari fasi fa wi kan gi bijdrage: (1) Di Paulus ben skrifi fu a moni di ben musu tyari kon makandra, dan a gi a rai disi: „Ibri fosi dei fu a wiki, meki ibriwan fu unu poti wan sani na wan sei na ini en eigi oso” (1 Korentesma 16:2a). Sobun, te wi wani gi bijdrage, dan wi musu sreka sani na fesi, èn wi musu du dati doronomo. (2) Paulus ben skrifi tu taki ibri sma ben musu gi „so meni leki hem kan” (1 Korentesma 16:2b, Nyun Testamenti). Iya, wan sma di wani gi moni fu horibaka gi a tru anbegi, kan gi so furu leki ensrefi man gi. Srefi efu wan Kresten e meki pikinso moni nomo, toku Yehovah e warderi a pikin bijdrage di a e gi fu horibaka gi a tru anbegi (Lukas 21:1-4). (3) Paulus ben skrifi moro fara: „Meki ibriwan sma du soleki fa a bosroiti na ini en ati, no nanga a firi fu no wani du en noso na ondro dwengi, bika Gado lobi wan sma di e gi nanga prisiri” (2 Korentesma 9:7). Trutru Kresten e gi nanga den heri ati, dati wani taki dati den e gi nanga prisiri.

[Prenki na tapu bladzijde 26]

Nehemia ben de wan sma di ben e broko en ede nanga sani, èn a ben du sosrefi san ben de fanowdu

[Prenki na tapu bladzijde 30]

Sma kan bosroiti fu gi bijdrage fu horibaka gi a wroko di e du fu meki publikâsi, fu yepi sma di de na nowtu, fu bow Kownukondre zaal, èn fu du tra bun wroko na heri grontapu