Ang Pagkabun-ag ni Jesus—Kon Paano kag Kon Ngaa Natabo Ini

“IMPOSIBLE!” Amo sini ang mahimo isiling sang madamo nga mga di-Cristiano kon mabatian nila ang sugilanon tuhoy sa pagkabun-ag ni Jesus. Indi sientipiko para sa ila ang pagpati nga manamkon kag magbun-ag sing anak nga lalaki ang isa ka birhen nga babayi nga wala sing seksuwal nga pagpakigrelasyon sa isa ka lalaki. Ano sa banta mo?

Sang 1984, ang The Times sang London nagbalhag sing sulat nga nagpangatarungan sa sini, nga nagasiling: “Indi makatarunganon nga gamiton ang siensia subong argumento batok sa mga milagro. Isa ka buhat sang pagtuo ang pagpati nga ang mga milagro indi mahimo matabo subong sang pagpati nga mahimo ini matabo.” Ginpirmahan ang sulat sang 14 ka propesor sa siensia sa mga unibersidad sa Britanya. Sila nagsiling: “Malipayon namon nga ginabaton ang pagbun-ag sang birhen, ang mga milagro sa mga Ebanghelyo, kag ang pagkabanhaw ni Jesus subong maragtason nga mga hitabo.”

Apang, natural lamang nga maligban ang isa kon mabatian niya sa una nga tion ang sugilanon tuhoy sa pagbun-ag sang isa ka birhen kay Jesus. Ang birhen nga iloy mismo ni Jesus naligban sang ang anghel nagsiling: “Yari karon! magapanamkon ka sa imo taguangkan kag magaanak sing isa ka anak nga lalaki, kag tawgon mo ang iya ngalan nga Jesus.” Sa pagsabat, si Maria namangkot: “Paano ini matabo, kay wala ako nagahulid sa isa ka lalaki?” Ang anghel nian nagpaathag nga himuon sang Dios ini nga milagro paagi sa Iya balaan nga espiritu, kag nagdugang: “Sa Dios, wala sing kapahayagan nga imposible.” (Lucas 1:​31, 34-37) Pat-od gid nga mahimo sang Isa nga nagtuga sa makatilingala nga proseso sang pagbuad sang tawo ang pagpanamkon kag pagbun-ag sang isa ka putli nga birhen kay Jesus. Kon natuga sang Dios ang uniberso kag ang sibu gid nga mga kasuguan sini, mahimo man niya gamiton ang itlog sa obaryo ni Maria agod mabun-ag ang isa ka himpit tawhanon nga Anak.

Kon Ngaa Kinahanglan Ini

Kalaslon si Maria sa diosnon nga tawo nga si Jose sang nagpanamkon sia. Sa isa ka damgo, ang anghel sang Dios nagpaathag kay Jose sang makatilingala nga rason kon ngaa nagbusong ang iya birhen nga nobya. Ang anghel nagsiling: “Indi ka magkahadlok nga dalhon sa balay si Maria nga imo asawa, kay nagapanamkon sia paagi sa balaan nga espiritu. Magaanak sia sing lalaki, kag tawgon mo ang iya ngalan nga Jesus, kay luwason niya ang iya katawhan gikan sa ila mga sala.” (Mateo 1:​20, 21) Ang ngalan nga Jesus nagakahulugan sa Hebreo sing “Si Jehova ang Kaluwasan.” Nagapahanumdom ini sa aton sang kinahanglanon nga  maluwas sa sala kag kamatayon kag sang kahimusan ni Jehova nga Dios para sa sining kaluwasan paagi kay Jesus.

Bangod ang una nga tawo nga si Adan nakasala, ang tanan niya nga mga kaanakan natawo nga di-himpit, nga may huyog sa paglapas sa mga sugo sang Dios. (Roma 5:12) Paano maluwas sa sala ang mga kaliwatan ni Adan kag maangkon liwat ang kahimpitan? Isa pa ka himpit tawhanon nga kabuhi, nga katumbas sa balor sang kabuhi ni Adan, ang dapat ibayad agod magbalanse sa timbangan sang hustisya. Amo ini kon ngaa ginpahanabo sang Dios ang milagruso nga pagbun-ag sa isa ka himpit nga tawo, nga si Jesus, kag amo ini kon ngaa ginpahanugutan ni Jesus nga patyon sia sang iya mga kaaway. (Juan 10:​17, 18; 1 Timoteo 2:​5, 6) Pagkatapos nga mabanhaw kag magkayab si Jesus sa langit, nakahambal sia nga may pagsalig: “Napatay ako, apang, yari karon! nagakabuhi ako tubtob sa walay katubtuban, kag yari sa akon ang mga yabi sang kamatayon kag Hades [kinaandan nga lulubngan sang katawhan].”​​—⁠Bugna 1:⁠18.

Paagi sa malaragwayon nga mga yabi sang kamatayon kag Hades, ginabuksan ni Jesus ang dalan sa makasasala nga katawhan agod maangkon liwat ang nadula ni Adan. Nagpaathag si Jesus: “Ako ang pagkabanhaw kag ang kabuhi. Sia nga nagapakita sing pagtuo sa akon, bisan mapatay pa sia, magakabuhi; kag ang tanan nga nagakabuhi kag nagapakita sing pagtuo sa akon indi na gid mapatay.” (Juan 11:​25, 26) Makalilipay gid nga saad! Apang, may daku pa nga rason kon ngaa natawo si Jesus.

Ang Labing Importante nga Rason

Ang kabuhi ni Jesus wala mag-umpisa sang ginpanamkon sia sa taguangkan ni Maria. “Nagkari ako gikan sa langit,” maathag nga ginsiling niya. (Juan 6:38) Nagkabuhi na si Jesus sa duog sang mga espiritu upod sa iya langitnon nga Amay sa pamuno sang pagpanuga. Sa pagkamatuod, ginalaragway sia sa Biblia subong “ang pamuno sang pagpanuga sang Dios.” (Bugna 3:14) Sa langit, nasaksihan ni Jesus ang pagrebelde sang malaut nga anghel nga naghaylo sa unang mga tawo nga sikwayon ang paggahom sang Dios. Naghatag ini sing labing importante nga rason agod pakamaayuhon ni Jesus nga matawo subong isa ka himpit tawhanon nga Anak sang Dios. Ano ini nga rason?

Amo ang pamatud-an nga may kinamatarong sa paggahom sa uniberso ang iya langitnon nga Amay. Paagi sa pagpabilin nga matutom halin sa iya pagkatawo tubtob sa iya kamatayon sa duta, ginpakita ni Jesus nga handa sia magpasakop sa paagi ni Jehova sa paggahom sa Iya mga tinuga. Antes sia mapatay sa kamot sang mga kaaway sang Dios, maathag nga ginsiling ni Jesus ang rason kon ngaa handa sia sa paghalad sang iya kabuhi. Nagsiling sia nga ini amo agod mahibaluan sang kalibutan nga ginahigugma niya ang Amay. (Juan 14:31) Kon ang nahaunang duha ka tawo, nga si Adan kag si Eva, nagpalambo sini nga gugma, napakita kuntani nila ang katutom sa idalom sang ila mas mahapos nga pagtilaw.​​—⁠Genesis 2:​15-​17.

Napamatud-an sang katutom ni Jesus nga butigon si Satanas, ang malaut nga anghel. Ginpasipalahan ni Satanas ang Dios kag ang tawo paagi sa pagsiling sa atubangan sang mga anghel sa langit: “Ang tanan nga iya sang tawo ihatag niya tungod  sa iya kabuhi.” (Job 2:​1, 4, Tanakh​​—⁠The Holy Scriptures) Si Satanas sayop nga nagsumbong nga lapason sang tanan nga tawo ang Dios kon mabutang sa katalagman ang ila kabuhi.

Ang ginsambit nga mga isyu naghangkat sa pagkamatarong sang paggahom sang Dios. Agod mahusay ini, handa si Jesus nga mabun-ag subong isa ka tawo kag pamatud-an ang iya katutom tubtob sa kamatayon.

Gani, ang panguna nga rason kon ngaa natawo si Jesus sa duta amo, subong nga ginhambal niya mismo, ‘agod magpanaksi sia sa kamatuoran.’ (Juan 18:37) Nahimo niya ini paagi sa pagpakita sa hambal kag sa buhat nga matarong sing bug-os ang paggahom sang Dios kag ang pagpasakop sa sini nagahatag sing kalipay nga dayon. Ginpaathag man ni Jesus nga nagkari sia sa kalibutan agod ihatag ang iya himpit tawhanon nga kabuhi nga “gawad kabaylo sang madamo,” sa amo nagbukas sang dalan agod nga ang makasasala nga katawhan makaagom sing kahimpitan kag kabuhi nga walay katapusan. (Marcos 10:45) Agod mahangpan sang katawhan ining importante nga mga butang, kinahanglan ang rekord tuhoy sa pagkabun-ag ni Jesus. Dugang pa, ang mga hitabo may kaangtanan sa pagkabun-ag ni Jesus nagalakip sang iban pa importante nga mga leksion, subong sang ipakita sang masunod nga artikulo.

[Mga retrato sa pahina 4]

Paano maluwas sa sala ang mga kaliwatan ni Adan?