Diledibua dia Yezu mushindu wakenzekadi ne tshivuabu bamulelele

“KABIENA mua kuenzeka to!” Bantu ba bungi badi kabayi bena Kristo badi mua kuamba bualu ebu padibu bumvua muyuki wa diledibua dia Yezu. Badi bamona ne: kuitaba ne: nsongakaji mutshikale kamama uvua mua kuimita ne kulela muana kayi musangile ne mulume kakuena kumvuangana ne malu a sianse to. Kadi wewe udi wela meji kayi?

Mu tshidimu tshia 1984, tshikandakanda kampanda tshia mu tshimenga tshia Londres tshiakapatula mukanda uvua weleshisha bantu meji bikole bua bualu ebu, wamba ne: “Ki mbikumbana bua kuangata malu a sianse bu bijadiki bia kutonkola nabi bishima to. Kuitaba ne: bishima kabiena mua kuenzeka mbualu bua ditabuja anu mudi kuitaba ne: bidi mua kuenzeka.” (The Times) Balongeshi 14 ba malu a siyanse ba mu iniversite ya mu Grande-Bretagne ke bavua batue tshiala pa mukanda eu. Bakamba ne: “Tudi tuitaba ne disanka dionso ne: nsongakaji utshivua kamama wakalela, bishima bia mu Evanjeliyo ne dibika dia Kristo ku lufu mmalu avua menzeke.”

Nanku, kabiena bikemesha bua kumona muntu upapuka padiye umvua bua musangu wa kumpala muyuki wa diledibua dia Yezu kudi nsongakaji utshivua kamama. Nsongakaji muine utshivua kamama wakalua mamuende wa Yezu wakapapuka pakamuambila muanjelu wa Nzambi ne: ‘Mona, wewe newimite difu, neulele muana mulume, neumuidike ne: Yezu.’ Mariya wakamukonka ne: ‘Bualu ebu nebulue munyi, meme tshiyi muanji kumanya mulume?’ Ke muanjelu kumumvuija ne: Nzambi uvua ne bua kuenza tshishima atshi ne diambuluisha dia nyuma Wende muimpe, kumuambilaye kabidi ne: ‘Bualu bua kakuena dîyi dimue dia Nzambi didi kadiyi ne bukole.’ (Luka 1:31, 34-37) Kakuyi mpata, Eu wakafuka tshipedi tshia dikema tshia lulelu uvua kabidi mua kuenzeja bua Yezu kuledibuaye kudi nsongakaji utshivua kamama. Bikala Nzambi ke uvua mufuke tshibuashibuashi ne mikenji yatshi mijalame, uvua kabidi mua kuangata diyi dia bakaji dia munda mua Mariya bua kupatula Muana wa balume mupuangane.

Bua tshinyi bivua bikengela bua aledibue

Yosefe mutshinyi wa Nzambi uvua mubangile Mariya mu tshikondo tshivuaye ne dîmi. Mu tshilota, muanjelu wa Nzambi wakumvuija Yosefe bua tshinyi mubangila wende utshivua kamama uvua ne dîmi. Muanjelu wakamba ne: ‘Kutshinyi mua kuangata mukaji webe Mariya, bualu bua udi muimita munda muende ngua nyuma muimpe. Yeye nealele muana mulume, umuidike ne: Yezu, bualu bua yeye neasungile bantu bende ku mibi yabu.’ (Matayo 1:20, 21) Dîna dia Yezu mu tshiena-Ebelu didi diumvuija ne: “Yehowa Udi  Lupandu.” Didi dituvuluija ne: tudi tujinga bua batupikule ku mpekatu ne ku lufu ne didi dituvuluija kabidi mushindu udi Yehowa Nzambi mulongolole lupandu elu mu Yezu.

Bu muvua Adama muntu wa kumpala muenze mpekatu, ndelanganyi yende yonso yakaledibua mipange bupuangane, mikale ne meji matangija anu ku dishipa mikenji ya Nzambi. (Lomo 5:12) Mmunyi muvua ndelanganyi ya Adama mua kupanduka ku mpekatu ne kupeta bupuangane? Bivua bikengela kufila muoyo mukuabu wa muntu mupuangane, muikale ne mushinga wa muomumue ne wa Adama bua kukumbaja malu avua buakane bulomba. Ke bualu kayi Nzambi wakenzeja tshishima tshia diledibua dia muntu mupuangane Yezu, ne bua bualu ebu Yezu wakalekela baluishi bende bamushipa. (Yone 10:17, 18; 1 Timote 2:5, 6) Panyima pa Yezu mumane kubika ku lufu ne mubande mu diulu, wakamba ne dishindika ne: ‘Ngakadi mufue, ne mona, ndi ne muoyo tshiendelele, ne ndi ne mvungula ya lufu ne ya Muaba wa bafue.’​—Buakabuluibua 1:18.

Bu mudiye ne nsapi ya mu tshimfuanyi ya lufu ne Hades [lukita], Yezu udi unzuluila bantu bena mpekatu njila bua kupetululabu tshivua Adama mujimije. Yezu wakumvuija ne: ‘Ndi bianyi [dibika], ndi bianyi muoyo; udi ungitabuja, nansha biafuaye, neikale ne muoyo kabidi; muntu yonso udi ne muoyo, udi ungitabuja, kêna ufua tshiendelele.’ (Yone 11:25, 26) Ndilaya kayipu dilenga edi! Kadi, kudi bualu bukuabu bunene buvuabu balelele Yezu.

Bualu butambe bunene buvuabu bamulelele

Dimitshibua dia Yezu mu difu dia Mariya kadivua ntuadijilu wa muoyo wende nansha. Yezu wakamba patoke ne: “[Ndi] mufume mu diulu.” (Yone 6:38, Mukanda wa Mvidi Mukulu [Katolike, MMM])Yezu ukavua musombe mu muaba wa mu nyuma ne Tatuende wa mu diulu katshia anu ku ntuadijilu kua bufuki. Bushuwa, Bible udi umubikila ne: “tshibangidilu tshia bufuki bua Nzambi.” (Buakabuluibua 3:14) Patshivuaye mu diulu, Yezu wakamona buntomboji bua muanjelu mubi wakasaka bantu ba kumpala bua kutombokela bukokeshi bua Nzambi. Bualu ebu ke buakatamba kusaka Yezu bua kuitaba bua kuledibua bu Muana mupuangane wa Nzambi. Mbualu kayi abu?

Buvua bua kujadika ne: Tatuende wa mu diulu udi ne bukenji bua kukokesha bukua-bifukibua. Pa kushala ne lulamatu kumbukila ku diledibua diende too ne ku lufu luende, Yezu wakaleja ne: uvua muitabe bua kukokela ku mushindu udi Yehowa ukokesha bifukibua Biende. Kumpala kua kumushipabu kudi baluishi ba Nzambi, Yezu wakaleja patoke tshivuaye muitabile bua kufila muoyo wende bu mulambu. Wakamba ne: bua ba pa buloba bamanye ne: uvua musue Tatu. (Yone 14:31) Bu bantu babidi ba kumpala, Adama ne Eva, bikale ne dinanga dia buena edi, bavua mua kuikala bashale ne lulamatu mu diteta diabu divua dipepele bikole.​—Genese 2:15-17.

Lulamatu lua Yezu luakaleja kabidi ne: muanjelu mubi, Satana, mmuena dishima. Satana uvua mudingile Nzambi ne bantu malu pakambaye kumpala  kua banjelu mu diulu ne: ‘Bulelela, bionso bidi muntu nabi yeye neabifile bua kusungila muoyo wende.’ (Yobo 2:1, 4) Satana wakashima ne: bantu bonso bavua mua kupidia Nzambi bua kusungila mioyo yabu.

Malu aa akaleja ne: Satana uvua utontolola buakane bua bukokeshi bua Nzambi. Bua kuajikija, Yezu wakitaba bua kuledibua bu muntu ne wakashala ne lulamatu too ne ku lufu.

Nunku, bualu bunene buvuabu balelele Yezu pa buloba buvua, anu muakambaye ne: “mbua kujadikila bantu bulelela.” (Yone 18:37, MMM) Wakajadikila bantu bulelela ebu mu mêyi ne mu bienzedi bua kuleja ne: bukokeshi bua Nzambi mbuakane tshishiki ne kubukokela kudi kupetesha muntu masanka a kashidi. Yezu wakumvuija kabidi ne: uvua mulue pa buloba bua kufila muoyo wende wa bumuntu ‘bua kupikula nawu bantu ba bungi,’ bua kunzuluila bantu bena mpekatu njila wa dipeta bupuangane ne muoyo wa kashidi. (Mâko 10:45) Bua bantu kumvuabu malu a mushinga aa, bivua bikengela bafunde muyuki wa diledibua dia Yezu. Kabidi, malu adi matangile diledibua dia Yezu adi ne malongesha a mushinga mukole, anu mualeja tshiena-bualu tshidi tshilonda.

[Bimfuanyi mu dibeji 4]

Mmunyi muvua ndelanganyi ya Adama mua kupanduka ku mpekatu?