Isua Pian A Lo Thlen Dân leh A Thlen Chhan

“A NI thei thlâwt lo!” Kristian ni lo mi tam takte chuan Isua pian dân chanchin an hriatin, heti hian an sawi ngei ang. An tân chuan nula thianghlimin mipa tel lova rai a, fapa hrin chu thil theih a ni lo. Eng nge i ngaih ve dân?

Kum 1984 khân, London chanchinbu pakhat The Times chuan he mi chungchâng sawina lehkha pakhat a chhuah a, chu chuan: “Thilmak tihte hnial kalh nâna science hman chu thil dik a ni lo. Thilmak tihte a thleng thei lo tih rin chu a thleng thei tih rinna târ lanna nên a thuhmun deuh reng a ni,” tiin. British university-tea science professor 14-te chuan, chu lehkhaah an hming an ziak a ni. Anni chuan: “Nula thianghlimin fa a hrin thu te, Chanchin Ṭha ziaka thilmak tih te, leh Krista thawhlehna te chu thil thleng dik tak angin kan pawm thlap a ni,” an ti bawk.

Amaherawhchu, nula thianghlimin Isua a hring tih a hriat hmasak ber ṭuma miin mak a ti chu a hriatthiamawm hle. Isua nu, nula thianghlim ngei pawh khân Pathian vântirhkohvin: “Ngai rawh, i rai ang a, fapa i hring ang a, a hmingah chuan Isua i sa tûr a ni,” a tih khân mak a ti hle a. Mari chuan: “Chûng chu engtin nge ni ang? mipa ka nei si lo,” tiin a zâwt hial a ni. Vântirhkoh chuan Pathianin A thlarau thianghlim hmangin chu thilmak chu a tih tûr thu hrilhfiahin: “Pathian thu chhuak rêng rêng thil tithei lovin a awm lo vang,” a ti a. (Luka 1:​31, 34-37) A ni, mihring inthlah pun dân mak tak siamtu chuan nula thianghlim aṭangin Isua chu a piantîr thei ngei a ni. Pathianin lei leh vân leh a thununtu dânte chipchiar taka a siam si chuan, Mari chi bâwma hmeichhe chî hmangin a Fapa mihring ṭha famkim chu a siam thei ngei bawk ang.

Chutianga Pian A Ngaih Chhan

Mari’n nau a pai lai chuan Pathian ngaihsak mi Josefa nêna an inhual reng tawh a. Pathian vântirhkoh chuan Josefa mumangah a nupui hual nula thianghlimin nau a pai chhan mak tak mai chu a hrilhfiah a. Vântirhkoh chuan: “I nupui hual Mari chu neih hlau suh; a naupai chu thlarau thianghlim laka mi a ni asin. Fapa a hring ang a, a hmingah ISUA i sa ang: ani chuan a mite an thil tihsual lakah a chhandam dâwn si a,” a ti a. (Matthaia 1:​20, 21) Hebrai ṭawnga Isua hming awmzia chu “Jehova Chu Chhandamna A Ni” tihna a ni. Chu chuan sual leh thihna aṭanga chhandam kan ngaihzia leh Pathian Jehova’n  Isua hmanga chu chhandamna a ruahmanzia min hriattîr a ni.

Mihring hmasa ber, Adama, a sual avângin, a thlahte zawng zawng chu ṭha famkim lo leh Pathian dânte bawhchhiat duhna neiin an piang a. (Rom 5:12) Engtin nge Adama thlahte chu sual aṭanga chhandam niin, ṭha famkim an nih theih ang? Rorêl dikna tilungawi tûr chuan, Adama nunna nêna intluk chiah hlutna nei, mi ṭha famkim dang nunna chu pêk a ngai a ni. Chuvângin a ni, Pathianin Isua chu mak takin mihring ṭha famkimah a piantîr a, Isua pawh a hmêlmate tihhluma a awm ni. (Johana 10:​17, 18; 1 Timothea 2:​5, 6, NW) Isua chu a thawhleha vâna a lâwn chhoh hnuah chuan, inring takin: “Ka lo thi a, nimahsela ngai teh, kumkhua atân ka nung leh ta a ni. Thihna leh Mitthi Khaw [mihringte thlân pângngai] chabite chu ka nei bawk a,” a ti thei a ni.​—Thu Puan 1:18.

Entîr nei thihna leh Mitthi Khaw chabite hmangin, Isua chuan sual nei mihringte tân Adama hloh tâk hmuh leh theihna kawng a hawng a ni. Isua chuan: “Kei hi thawhlehna leh nunna chu ka ni; tupawh mi ring chu thi mah sela a nung reng ang; nung apiangin mi ring chu kumkhuain an thi lo vang,” tiin a hrilhfiah a ni. (Johana 11:​25, 26) Thutiam ropui tak a va ni êm! Mahselangin, Isua’n pian chhan pawimawh zâwk a la nei cheu a ni.

A Chhan Pawimawh Ber

Mari chhûla pai ṭanna chu Isua nun inṭanna a ni lo. Amah ngeiin: “Vân aṭanga lo chhuk ka ni,” a ti a ni. (Johana 6:38) Isua chu siam a nih aṭangin, a Pa vâna mi nên thlarau ramah an awm dûn reng tawh a. Dik takin, Bible chuan ani chu “Pathian thil siam bula” tiin a ko a ni. Vân aṭangin, Isua chuan mihring hmasa berte Pathian awpna kalhtîrtu vântirhkoh sual helna chu a hmu a ni. Chu chuan Isua chu Pathian Fapa mihring ṭha famkim anga lo piang duh tûrin chhan pawimawh ber a pe a ni. Chu chu eng nge ni?

Chu chu a Pa vâna miin lei leh vâna rorêl tûra dikna a neihzia târ lan hi a ni. Leia a lo pian aṭanga a thih thlenga Isua rinawmna chuan, A thil siamte chunga Jehova rorêlnaah intukluh a duhzia a tilang a ni. Pathian hmêlmate kuta a thih hma khân, Isua chuan inthawina atâna a nun a pêk duh chhan chiang takin a sawi a. Ani chuan Pa a hmangaihzia khawvêlin an hriatna tûr a nih thu a sawi a ni. (Johana 14:31) Mihring hmasa ber pahnih, Adam leh Evi khân, chutiang hmangaihna chu nei se zawng an tawh fiahna awlsam zâwk lakah chuan an rinawm thei tûr.​—Genesis 2:​15-17.

Isua rinawmna chuan vântirhkoh sual, Setana chu dawthei a nihzia a hailang bawk a ni. Setana chuan vâna vântirhkohte hmaah: “Miin a neih zawng zawng a nunna atân a pe phal ang chu!” tiin Pathian leh mihringte chu a sawichhia a ni. (Joba 2:​1, 4) Setana chuan mi  zawng zawngin an nun theihna tûr a nih pawt chuan Pathian thu pawh âwih lo tûrah dik lo takin a puh a ni.

Kan sawi tâk thu buaite chuan Pathianin rorêl tûra dikna a neih chu a cho va. Chûng thu buaite chingfel tûrin, Isua chuan mihring anga lo pianga rinawm taka thih chu a duh a ni.

Chuvângin, Isua leia a lo pian chhan ber chu, ama sawi ang ngeiin “thutak hriattîr hi” a ni. (Johana 18:37) Pathian rorêlna fel famkimzia leh chu rorêlnaa intukluhna chuan hlimna tluantling a thlenzia ṭawngkam leh thiltiha lantîrin thutak chu a hriattîr a ni. Isua chuan khawvêla a lo kal chhan chu sual nei mihringte tâna ṭhat famkimna leh chatuana nunna kawng hawng tûra a hringnun chu ‘mi tam tak tlan nâna pêk’ a nihzia a sawifiah bawk. (Marka 10:45) Mihringte’n he thu pawimawh tak hi an hriatthiam nân, Isua pian chanchin chhinchhiahna neih chu a ngai a ni. Chu bâkah, thuziak dawta miin a târ lan angin, Isua pian hun laia thilthleng dangte chuan kan tân zir tûr tam tak a keng tel a ni. (w02 12/15)

[Phêk 4-naa milemte]

Adama thlahte chu sual ata eng anga chhanchhuah tûr nge ni?