“Sia Marani sa Saindo”

“[An Dios] bakong harayo sa lambang saro sa sato.”​—GIBO 17:27.

1, 2. (a) Kun tinatangad an mabitoon na kalangitan, ano an tibaad ihapot niato mapadapit sa Kaglalang? (b) Paano kita inaasegurar kan Biblia na an mga tawo bakong daing halaga nanggad sa pagheling ni Jehova?

 NAPROBARAN na daw nindong tumangad sa mabitoon na kalangitan sa sarong daing panganoron na banggi asin nakamate kamo nin pagngalas? An kadakoldakol na bitoon asin mahiwason na espasyo nakapupukaw nin may pagkangirhat na paggalang. Sa grabe kadakulang unibersong ini, an daga saro sanang tuldok. Nangangahulogan daw ini na an Kaglalang, “an Kaharohalangkawe sa bilog na daga,” halangkawon na marhay tanganing magin interesado sa mga tawo o harayoon asin dai marorop tanganing mamidbid ninda?​—Salmo 83:18.

² Inaasegurar kita kan Biblia na an mga tawo bakong daing halaga nanggad sa pagheling ni Jehova. Sa katunayan, ineenkaminar kita kan Tataramon nin Dios na hanapon sia, na sinasabi: “Sia bakong harayo sa lambang saro sa sato.” (Gibo 17:27; 1 Cronica 28:9) Tunay nanggad, kun magibo kita nin mga lakdang na rumani sa Dios, babalosan nia an satong mga paghihingoa. Sa anong paagi? An mga tataramon sa satong teksto kan taon para sa 2003 nagtatao kan nakaoogmang simbag na ini: “Sia marani sa saindo.” (Santiago 4:8) Pag-olayan niato an nagkapira sa makangangalas na mga bendisyon na abundang itinatao ni Jehova sa mga harani sa saiya.

Sarong Personal na Balaog Hale ki Jehova

3. Anong balaog an itinatao ni Jehova sa mga minarani sa saiya?

³ Enot, yaon sa mga lingkod ni Jehova an sarong mahalagang marhay na balaog na itinagama nia para sa saiyang banwaan. An gabos na kapangyarihan, kayamanan, asin edukasyon na iinaalok kan sistemang ini nin mga bagay dai makagagarantiya sa balaog na ini. Iyan sarong personal na balaog, na itinatao ni Jehova duman sana sa mga harani sa saiya. Ano iyan? An Tataramon nin Dios minasimbag: “Kun . . . ika magkurahaw sa pakamansay, kun ika padagos na maghahanap kaiyan siring baga sa pirak, asin siring baga sa natatagong kayamanan ika padagos na magsusungkat kaiyan, sa siring masasabotan mo an pagkatakot ki Jehova, asin makukua mo an mismong kaaraman nin Dios. Huli ta si Jehova mismo nagtatao nin kadonongan.” (Talinhaga 2:3-6) Imahinara nanggad, nakukua kan bakong sangkap na mga tawo “an mismong kaaraman nin Dios”! An balaog na iyan​—an kaaraman  na yaon sa Tataramon nin Dios​—ibinabaing sa “natatagong kayamanan.” Taano?

4, 5. Taano ta ikababaing sa “natatagong kayamanan” “an mismong kaaraman nin Dios”? Iilustrar.

⁴ Sarong dahelan, an kaaraman dapit sa Dios igwa nin dakulang halaga. An saro sa pinakamahalagang bendisyon kaiyan iyo an paglaom na buhay na daing katapusan. (Juan 17:3) Alagad pinaparahay na kan kaaraman na iyan an kualidad kan satong buhay dawa ngonyan. Halimbawa, bilang resulta kan satong maingat na pag-adal sa Tataramon nin Dios, naaraman niato an simbag sa importanteng mga hapot na arog kan: Ano an ngaran nin Dios? (Salmo 83:18) Ano an totoong kamugtakan kan mga gadan? (Eclesiastes 9:​5, 10) Ano an katuyohan nin Dios para sa daga asin katawohan? (Isaias 45:18) Naaraman man niato na an pinakamarahay na paagi nin pamumuhay iyo an pag-aplikar kan madonong na hatol kan Biblia. (Isaias 30:​20, 21; 48:​17, 18) Sa siring, igwa kita nin tamang giya na nakatatabang sa sato na makayang atubangon an mga kahaditan sa buhay asin mamuhay sa paagi na nagpapaoswag sa tunay na kaogmahan asin pagkakontento. Orog sa gabos, an pag-adal niato sa Tataramon nin Dios nagpangyari sa sato na maaraman an makangangalas na mga kualidad ni Jehova asin rumani sa saiya. May mas mahalaga pa daw kisa haraning relasyon ki Jehova na basado sa “mismong kaaraman nin Dios”?

⁵ May saro pang dahelan kun taano ta ikababaing sa “natatagong kayamanan” an kaaraman nin Dios. Arog nin dakol na kayamanan, iyan medyo bihira na sa kinaban na ini. Sa anom na bilyon na nag-eerok sa daga, mga anom na milyon na parasamba ki Jehova, o mga 1 sa 1,000, an nakanompong kan “mismong kaaraman nin Dios.” Sa pag-ilustrar kun gurano kabihirang pribilehio an makaaram kan katotoohan sa Tataramon nin Dios, estudyare an saro sanang hapot sa Biblia: Ano an nangyayari sa mga tawo pagnagadan? Aram niato base sa Kasuratan na an kalag nagagadan asin na an mga gadan mayo nin pag-aram. (Ezequiel 18:4) Pero, an salang paniniwala na may sarong bagay sa laog nin tawo na padagos na nabubuhay pagkagadan inaako kan kadaklan na relihion sa kinaban. Iyan pundamental nang kabtang kan mga relihion nin Kakristianohan. Nangingibabaw man iyan sa Budismo, Hinduismo, Islam, Jainismo, Judaismo, Sintoismo, Sikismo, asin Taoismo. Isip-isipa nanggad​—binilyon na tawo an nadaya kan sarong falsong doktrinang ini!

6, 7. (a) Siisay sana an makakukua kan “mismong kaaraman nin Dios”? (b) Anong halimbawa an nagpapaheling na binendisyonan kita ni Jehova nin pakarorop na dai nakukua kan dakol na “madonong asin may inadalan”?

⁶ Taano ta bakong dakol na tawo an nakanompong kan “mismong kaaraman nin Dios”? Huli ta dai lubos na masasabotan nin saro an kahulogan kan Tataramon nin Dios kun mayo kan Saiyang tabang. Girumdomon, an kaaraman na ini sarong balaog. Itinatao iyan ni Jehova duman sana sa mga andam na magsiyasat sa saiyang Tataramon na may pagkaonesto asin kapakumbabaan. An mga siring tibaad bako man na “madonong sa laman.” (1 Corinto 1:26) An dakol sa sainda tibaad ibinibilang nganing “daing inadalan asin ordinaryo” kun ibabasar sa mga pamantayan kan kinaban. (Gibo 4:13) Pero, bako iyan na importante. Itinatao sato ni Jehova bilang balos “an mismong kaaraman nin Dios” huli sa mga kualidad na naheheling nia sa satong puso.

⁷ Helinga an sarong halimbawa. An dakol na intelektuwal sa Kakristianohan nakagibo nin kadakol na komentaryo sa Biblia. An mga reperensiang iyan tibaad ipinapaliwanag an kasaysayan, an kahulogan nin mga termino sa Hebreo asin Griego, asin dakol pa. Apisar kan gabos nindang inadalan, talaga daw na nanompongan kan mga intelektuwal na iyan “an mismong kaaraman nin Dios”? Bueno, nasasabotan daw ninda nin malinaw an tema kan Biblia​—an pagbindikar sa soberaniya ni Jehova paagi sa saiyang langitnon na Kahadean? Aram daw ninda na si Jehova Dios bakong kabtang nin Trinidad? Kita talagang igwa nin tamang kaaraman sa siring na mga bagay. Taano? Binendisyonan kita ni Jehova nin pakarorop sa espirituwal na mga katotoohan na dai nakukua kan dakol na “madonong asin may inadalan.” (Mateo 11:25) Binebendisyonan nanggad ni Jehova an mga harani sa saiya!

“Binabantayan ni Jehova an Gabos na Namomoot sa Saiya”

8, 9. (a) Paano ilinadawan ni David an saro pang bendisyon para sa mga harani ki Jehova? (b) Taano ta kaipuhan kan tunay na mga Kristiano an proteksion nin Dios?

⁸ An mga harani ki Jehova nagkakamit nin saro  pang bendisyon​—an proteksion nin Dios. Si salmista David, na dai nagin libre sa kasakitan, nagsurat: “Si Jehova harani sa gabos na nag-aarang sa saiya, sa gabos na nag-aapod sa saiya sa katotoohan. Ootobon nia an mawot kan mga natatakot sa saiya, asin dadangogon nia an agrangay ninda na tabangan, asin sinda saiyang ililigtas. Binabantayan ni Jehova an gabos na namomoot sa saiya.” (Salmo 145:18-20) Iyo, si Jehova harani sa mga namomoot sa saiya asin kun siring marikas niang maaatenderan an mga agrangay ninda na tabangan.

⁹ Taano ta kaipuhan niato an proteksion nin Dios? Apuera sa pakamate kan mga epekto nin pamumuhay sa “delikadong mga panahon [na ini] na masakit pakibagayan,” an tunay na mga Kristiano partikularmenteng pinupunteriya kan pangenot na Kaiwal ni Jehova, si Satanas na Diablo. (2 Timoteo 3:1) An tusong kaiwal na iyan desididong ‘sibaon’ kita. (1 Pedro 5:8) Linalamag, ginigipit, asin sinusugotan kita ni Satanas. Hinahanap man nia an mga aktitud nin isip asin puso na puede niang aprobetsaran. May nasa isip siang obheto: paluyahon an satong pagtubod asin gadanon kita sa espirituwal. (Kapahayagan 12:​12, 17) Huling igwa kita nin siring kamapuersang kalaban na dapat labanan, bako daw na nakaaasegurar giraray na maaraman na “binabantayan ni Jehova an gabos na namomoot sa saiya”?

10. (a) Paano binabantayan ni Jehova an saiyang banwaan? (b) Ano an pinakamahalagang klase nin proteksion, asin taano?

¹⁰ Pero paano binabantayan ni Jehova an saiyang banwaan? An saiyang panugang proteksion dai naggagarantiya sato nin buhay na daing problema sa sistemang ini; ni nangangahulogan man iyan na obligado siang gumibo nin mga milagro para sa sato. Minsan siring, si Jehova talagang nagtatao nin pisikal na proteksion sa saiyang banwaan bilang grupo. Total, nungka niang totogotan an Diablo na paraon sa daga an tunay na mga parasamba! (2 Pedro 2:9) Orog sa gabos, pinoprotehiran kita ni Jehova sa espirituwal. Sinasangkapan nia kita kan satong kinakaipuhan tanganing matagalan an mga pagbalo asin maingatan an satong relasyon sa saiya. Sa katapustapusi, an espirituwal na proteksion an pinakamahalagang klase nin proteksion. Taano? Sagkod na yaon an satong relasyon ki Jehova, mayo nin ano man​—dawa pa kagadanan​—na makadadanyar sa sato nin permanente.​—Mateo 10:28.

11. Anong mga probisyon an ginibo ni Jehova para sa espirituwal na proteksion kan saiyang banwaan?

¹¹ Naggibo si Jehova nin abundang probisyon para sa espirituwal na proteksion kan mga harani sa saiya. Paagi sa saiyang Tataramon, an Biblia, tinatawan nia kita nin kadonongan tanganing makaya an laen-laen na pagbalo. (Santiago 1:2-5) An pag-aplikar kan praktikal na hatol na manonompongan sa Kasuratan nakatatabang na mismo. Dugang pa, si Jehova nagtatao nin “banal na espiritu sa mga naghahagad sa saiya.” (Lucas 11:13) An espiritung iyan an pinakamakosog na puersa sa uniberso, kaya puede nanggad kitang sangkapan kaiyan na mapangganahan an ano man na pagbalo o sugot na tibaad mapaatubang sa sato. Paagi ki Cristo, si Jehova may itinaong “balaog na mga lalaki.” (Efeso 4:8) An mga lalaking ini na may kualipikasyon sa espirituwal nagmamaigot na ipabanaag an mismong odok sa pusong pagkaludok ni Jehova sa pagtabang sa mga kapwa parasamba.​—Santiago 5:​14, 15.

12, 13. (a) Sa anong paagi kita tinatawan ni Jehova nin espirituwal na kakanon sa igong panahon? (b) Ano an saboot nindo manongod sa mga probisyon ni Jehova para sa espirituwal na ikararahay niato?

¹² May iba pang itinatao si Jehova tanganing protehiran kita: espirituwal na kakanon sa igong panahon. (Mateo 24:45) Paagi sa imprentadong mga publikasyon, kabale an mga magasin  na An Torrengbantayan asin Awake!, saka paagi sa mga pagtiripon, asamblea, asin kombension, itinatao sa sato ni Jehova kun ano an kaipuhan niato sa panahon na kaipuhan niato iyan. May nagigirumdoman daw kamong sarong okasyon na may nadangog kamo sa sarong Kristianong pagtiripon, asamblea, o kombension na nakatudok sa saindong puso asin nakapakosog o nakaranga sa saindo? May nabasa na daw kamong artikulo sa saro sa mga magasin na nasambitan sa enotan asin inisip nindo na isinurat iyan para sa saindo?

¹³ An saro sa pinakaepektibong armas ni Satanas iyo an panluluya nin boot, asin bako kitang libre sa mga epekto kaiyan. Aram niang gayo na an halawig na pagkadesesperar puedeng makawara kan satong kosog, na nagigin dahelan ngani na madali kitang maapektaran. (Talinhaga 24:10) Huling hinihingoa ni Satanas na aprobetsaran an negatibong mga saboot, kaipuhan niato an tabang. An magasin na Torrengbantayan asin Awake! sa panapanahon nagtatampok nin mga artikulo na tinatabangan kitang labanan an panluluya nin boot. Mapadapit sa saro kan siring na artikulo, an sarong tugang na Kristiana nagsurat: “Haros aroaldaw kong binabasa an artikulo, asin napapaluha pa man giraray ako. Yaon iyan sa may higdaan ko tanganing mabasa ko iyan ano man na oras na pinanluluyahan ako nin boot. Paagi sa arog kaining mga artikulo, namamatean ko nanggad na kinukugos ako kan nagpoprotehir na takyag ni Jehova.” a Bako daw na nagpapasalamat kita ki Jehova sa pagtao sa sato nin napapanahon na espirituwal na kakanon? Girumdomon, an mga probisyon nia para sa espirituwal na ikararahay niato ebidensia na sia harani sa sato asin na yaon kita sa saiyang nagpoprotehir na pangangataman.

Paagi nin Pagdolok sa “Paradangog nin Pamibi”

14, 15. (a) Anong personal na mga bendisyon an itinatao ni Jehova sa mga harani sa saiya? (b) Taano ta sarong pambihirang pribilehio an tawan kita nin daing olang na paagi nin pagdolok ki Jehova sa pamibi?

¹⁴ Narisa daw nindo na mantang nagkakaigwa nin kapangyarihan asin autoridad an mga tawo, sa parate sinda nagigin bako nang gayong madaling dolokon kan mga sakop ninda? Pero kumusta man si Jehova Dios? Sia daw harayoon tanganing magin interesado sa mga sinasabi sa saiya nin mga tawo? Dai nanggad! An balaog na pamibi saro pang bendisyon na itinatao ni Jehova sa mga harani sa saiya. An bagay na kita tinawan nin daing olang na paagi nin pagdolok sa “Paradangog nin pamibi” tunay nanggad na sarong pambihirang pribilehio. (Salmo 65:2) Taano?

¹⁵ Sa pag-ilustrar: An hepe de ehekutibo nin sarong dakulang korporasyon igwa nin dakol na responsibilidad. Nasa desisyon nia kun arin an mga bagay na sia an personal na maasikaso asin kun arin an idedelegar nia sa iba. Kaagid kaiyan, an Soberanong Namamahala sa uniberso igwa nin opsion na magdesisyon kun arin an mga bagay na aasikasohon nia mismo asin kun arin an idedelegar nia. Isipa nindo an gabos na idinelegar ni Jehova sa saiyang namomotan na Aki, si Jesus. An Aki tinawan nin “autoridad na maghokom.” (Juan 5:27) An mga anghel “ipinasakop na sa saiya.” (1 Pedro 3:22) An mapuersang banal na espiritu ni Jehova ipinagagamit ki Jesus ano man na oras tanganing tabangan siang giyahan an saiyang mga disipulo  digdi sa daga. (Juan 15:26; 16:7) Sa siring makasasabi si Jesus: “An gabos na autoridad sa langit asin sa daga itinao na sa sako.” (Mateo 28:18) Pero, pag-abot sa satong mga pamibi, gusto ni Jehova na sia mismo an personal na mag-asikaso. Iyan an dahelan na pinagbobotan kita kan Biblia na ki Jehova sana sambiton an satong mga pamibi, na ginigibo iyan sa ngaran ni Jesus.​—Salmo 69:13; Juan 14:​6, 13.

16. Taano ta makakokompiar kita na si Jehova talagang naghihinanyog sa satong mga pamibi?

¹⁶ Talaga daw na hinihinanyog ni Jehova an satong mga pamibi? Kun sia indiperente o daing labot, nungka nia kitang sasadolon na ‘magmaigot sa pamimibi’ o na itao sa saiya an mga kagabatan asin kahaditan niato. (Roma 12:12; Salmo 55:22; 1 Pedro 5:7) An fiel na mga lingkod kaidtong mga panahon kan Biblia igwa nin bilog na kompiansa na si Jehova naghihinanyog sa pamibi. (1 Juan 5:14) Sa siring, si salmista David nagsabi: “Dinadangog [ni Jehova] an sakong tingog.” (Salmo 55:17) Yaon man sa sato an gabos na dahelan na magkompiar na si Jehova harani, andam na dangogon an lambang nasa isip asin kahaditan niato.

Binabalosan ni Jehova an Saiyang mga Lingkod

17, 18. (a) Ano an namamatean ni Jehova manongod sa fiel na paglilingkod kan saiyang intelihenteng mga linalang? (b) Ipaliwanag kun paano ipinaheheling kan Talinhaga 19:17 na namamasdan ni Jehova an satong mga gibo nin pagkaherak.

¹⁷ An posisyon ni Jehova bilang an Unibersal na Soberano dai apektado kan ginigibo o habong gibohon nin mga tawo. Minsan siring, si Jehova mapag-apresyar na Dios. Inaapresyar nia​—sa katunayan, pinahahalagahan niang marhay​—an fiel na paglilingkod kan saiyang intelihenteng mga linalang. (Salmo 147:11) Kun siring, saro pa ining pakinabang na nakakamtan kan mga harani ki Jehova: Binabalosan nia an saiyang mga lingkod.​—Hebreo 11:6.

¹⁸ Malinaw na ipinaheheling kan Biblia na inaapresyar ni Jehova an ginigibo kan mga nagsasamba sa saiya. Halimbawa, mababasa niato: “An nagpapaheling nin pabor sa hamak nagpapautang ki Jehova, asin an saiyang pagtratar Saiyang babayadan sa saiya.” (Talinhaga 19:17) An maheherakon na konsiderasyon ni Jehova sa mga hamak nabanaag sa Ley ni Moises. (Levitico 14:21; 19:15) Ano  an namamatean ni Jehova kun inaarog niato an saiyang pagkaherak sa pagtratar niato sa mga hamak? Kun kita nagtatao sa mga hamak, na dai nag-aasa nin ano man bilang balos, minamansay ini ni Jehova bilang pautang sa Saiya. Nanunuga si Jehova na babayadan nia nin pabor asin bendisyon an utang na iyan. (Talinhaga 10:22; Mateo 6:​3, 4; Lucas 14:12-14) Iyo, kun kita nagpapaheling nin pagkaludok sa sarong kapwa parasamba na nangangaipo, napapahiro kaiyan an puso ni Jehova. Kanigoan an pagpasalamat niato na an satong mga gibo nin pagkaherak namamasdan kan satong langitnon na Ama!​—Mateo 5:7.

19. (a) Taano ta makaseseguro kita na inaapresyar ni Jehova an ginigibo niato sa paghuhulit asin paggibo nin disipulo? (b) Paano binabalosan ni Jehova an mga akto nin paglilingkod na ginibo bilang pagsuportar sa saiyang Kahadean?

¹⁹ Espesyalmenteng inaapresyar ni Jehova an ginigibo niato para sa saiyang Kahadean. Kun kita minarani ki Jehova, natural sana na boot niatong gamiton an satong panahon, kosog, asin mga kayamanan sa pakikikabtang sagkod sa pinakalubos na paaging mahihimo sa paghuhulit kan Kahadean asin paggibo nin disipulo. (Mateo 28:​19, 20) Kun beses, tibaad magsaboot kita na dikit an nagigibo niato. Tibaad papag-isip-isipon pa ngani kita kan satong bakong sangkap na puso kun baga nasosonoan ni Jehova an satong mga paghihingoa. (1 Juan 3:​19, 20) Alagad pinahahalagahan ni Jehova an lambang balaog​—gurano man kasadit​—na gikan sa puso na motibado nin pagkamoot. (Marcos 12:41-44) Inaasegurar kita kan Biblia: “An Dios bakong biko na malingawan an saindong ginibo asin an pagkamoot na saindong ipinaheling para sa saiyang ngaran.” (Hebreo 6:10) Tunay nanggad, ginigirumdom asin binabalosan ni Jehova an dawa kasaditsaditing akto nin paglilingkod na ginigibo bilang pagsuportar sa saiyang Kahadean. Apuera sa nagsosopay na espirituwal na bendisyon ngonyan, puede niatong antisiparon an mga kagayagayahan sa buhay sa madatong na bagong kinaban, kun saen buka an palad na bubukahon ni Jehova an saiyang kamot asin paninigoan an matanos na mga mawot kan gabos na harani sa saiya!​—Salmo 145:16; 2 Pedro 3:13.

20. Durante kan taon 2003, paano niato mapagdadanay sa isip an mga tataramon sa satong teksto kan taon, asin may anong resulta?

²⁰ Durante kan taon 2003, hapoton niato an satong sadiri kun baga kita padagos na naghihingoa na rumani sa satong langitnon na Ama. Kun iyo, makasisierto kita na mahiro sia segun sa saiyang ipinanuga. Total, an “Dios . . . dai makakapagputik.” (Tito 1:2) Kun kamo marani sa saiya, sia marani sa saindo. (Santiago 4:8) Asin may anong resulta? Nagsosopay na mga bendisyon ngonyan asin an paglaom na makarani pirme nin orog pa ki Jehova sa bilog na panahon na daing sagkod!

[Nota sa Ibaba]

Nagigirumdoman daw Nindo?

• Anong balaog an itinatao ni Jehova sa mga minarani sa saiya?

• Anong mga probisyon an itinatao ni Jehova para sa espirituwal na proteksion kan saiyang banwaan?

• Taano ta sarong pambihirang pribilehio an tawan kita nin daing olang na paagi nin pagdolok ki Jehova sa pamibi?

• Paano ipinaheheling kan Biblia na inaapresyar ni Jehova an fiel na paglilingkod kan saiyang intelihenteng mga linalang?

[Mga Hapot Para sa Pag-adal]

[Ritrato sa pahina 15]

Binendisyonan kita ni Jehova nin pakarorop sa espirituwal na mga katotoohan

[Mga ritrato sa pahina 16, 17]

Si Jehova nagtatao nin espirituwal na proteksion

[Ritrato sa pahina 18]

Si Jehova harani, andam na dangogon an lambang pamibi niato