“Enye Ayasan̄a Ekpere Mbufo”

‘Abasi iyomke usụn̄ ye baba nnyịn owo kiet.’—UTOM 17:27.

1, 2. (a) Ke ini isede ikpaenyọn̄ oro ọyọhọde ye ntantaọfiọn̄, nso mbụme ke nnyịn ikeme ndibụp mban̄a Andibot? (b) Didie ke Bible ọsọn̄ọ ọnọ nnyịn nte ke Jehovah idaha mme owo ke usụhọde?

 NDI akanam afo emese ikpaenyọn̄ oro ọyọhọde ye ntantaọfiọn̄ ke okoneyo oro enyọn̄ an̄wan̄ade ndien idem akpa fi? Nte ntantaọfiọn̄ awakde ye nte ufụm enyọn̄ atarade enyene uten̄e. Ke akaka ekondo emi, isọn̄ edi ata ekpri ntọi. Ndi emi ọwọrọ ke Andibot, kpa “Ata Edikon̄ ke ofụri ererimbot,” okon̄ akaha ndikere mban̄a mme owo, mîdịghe odu oyom usụn̄ akaha ndidi se mme owo ẹyomde ẹnyụn̄ ẹfiọkde?—Psalm 83:18.

² Bible ọsọn̄ọ ọnọ nnyịn ete ke Jehovah idaha mme owo ke usụhọde. Ke nditịm ntịn̄, Ikọ Abasi esịn udọn̄ ọnọ nnyịn ete iyom enye, ọdọhọde ete: “Enye [iyomke] usụn̄ ye baba nnyịn owo kiet.” (Utom 17:27; 1 Chronicles 28:9) Ke akpanikọ, edieke nnyịn inamde usio-ukot ndisan̄a n̄kpere Abasi, enye ayanam n̄kpọ aban̄a ukeme oro nnyịn isịnde. Ke nso usụn̄? Mme ikọ ibuotikọ nnyịn eke isua 2003 ẹnọ inem inem ibọrọ emi: “Enye ayasan̄a ekpere mbufo.” (James 4:8) Ẹyak nnyịn ineme ndusụk utịbe utịbe edidiọn̄ oro Jehovah ọnọde mbon oro ẹkperede enye.

Ọkpọkpọ Enọ Otode Jehovah

3. Nso enọ ke Jehovah ọnọ mbon oro ẹsan̄ade ẹkpere enye?

³ Akpa, mme asan̄autom Jehovah ẹnyene ọsọn̄urua enọ oro enye enịmde ọnọ ikọt esie. Kpukpru odudu, inyene, ye ifiọkn̄wed oro editịm n̄kpọ emi enyenede ndinọ ikemeke ndinam ẹnyene enọ emi. Enye edi ọkpọkpọ enọ, enye oro Jehovah ọnọde sụk mbon oro ẹkperede enye. Nso enọ idi oro? Ikọ Abasi ọbọrọ ete: “Ama . . . emenede uyo fo ọnọ mbufiọk; ama oyom enye nte silver, onyụn̄ odụn̄ọde enye nte n̄kpọ-utọ eke edịbede; ndien afo eyetịm ọfiọk uten̄e Jehovah, onyụn̄ esịme ifiọk Abasi. Koro Jehovah enyene eti ibuot.” (Mme N̄ke 2:3-6) Kere nte mme anana-mfọnmma owo  ẹnyenede ukeme ndisịm “ifiọk Abasi”! Ẹmen enọ oro—ifiọk oro ẹkụtde ke Ikọ Abasi—ẹdomo ye “n̄kpọ-uto eke edịbede.” Ntak-a?

4, 5. Ntak ẹkemede ndimen “ifiọk Abasi” ndomo ye “n̄kpọ-uto eke edịbede”? Nam an̄wan̄a.

⁴ N̄kpọ kiet edi-o, ifiọk Abasi enen̄ede ọsọn̄ urua. Kiet ke otu ọsọn̄urua edidiọn̄ esie edi idotenyịn nsinsi uwem. (John 17:3) Edi, ifiọk oro ofori uwem nnyịn idem idahaemi. Ke uwụtn̄kpọ, nte utịp editịn̄ enyịn n̄kpep Ikọ Abasi, nnyịn imedi idinyene ibọrọ inọ mme utọ akpan mbụme nte: Nso idi enyịn̄ Abasi? (Psalm 83:18) Nso inen̄ede idi idaha mme akpan̄kpa? (Ecclesiastes 9:5, 10) Nso idi uduak Abasi kaban̄a isọn̄ ye ubonowo? (Isaiah 45:18) Nnyịn n̄ko imedi idifiọk nte ke mfọnn̄kan usụn̄ ndidu uwem edi ndida ọniọn̄ ọniọn̄ item Bible nsịn ke edinam. (Isaiah 30:20, 21; 48:17, 18) Ntem, nnyịn imenyene eti ndausụn̄ oro an̄wamde nnyịn ndiyọ mme editịmede esịt eke uwem ndinyụn̄ ntiene usụn̄ uwem oro adade ata inemesịt ye uyụhọ edi. Ke akande kpukpru, edikpep Ikọ Abasi anam nnyịn idi idifiọk mme utịbe utịbe edu Jehovah onyụn̄ anam nnyịn isan̄a ikpere enye. Nso ikpọsọn̄ urua ikan edinyene n̄kpet n̄kpet itie ebuana ye Jehovah oro ọkọn̄ọde ke “ifiọk Abasi”?

⁵ Ntak efen odu oro ẹkemede ndimen ifiọk Abasi ndomo ye “n̄kpọ-uto eke edịbede.” Ukem nte ediwak n̄kpọ-uto, enen̄ede ọsọn̄ ndinyene ifiọk Abasi ke ererimbot emi. Ke otu owo biliọn itiokiet oro ẹdụn̄de ke isọn̄, n̄kpọ nte owo miliọn itiokiet oro ẹtuakde ibuot ẹnọ Jehovah m̀mê owo 1 ke otu owo 1,000, ẹsịme “ifiọk Abasi.” Ke ndinam an̄wan̄a nte edide akwa ifet ndifiọk akpanikọ eke Ikọ Abasi, kere ban̄a mbụme Bible kiet emi kpọt: Nso isitịbe inọ mme owo ke ini mmọ ẹkpade? Nnyịn imọfiọk ito N̄wed Abasi nte ke ukpọn̄ esikpa n̄kpa ye nte ke mme akpan̄kpa ifiọkke n̄kpọ ndomokiet. (Ezekiel 18:4) Edi, ata ediwak ido ukpono ererimbot ẹmenyịme nsunsu edinịm ke akpanikọ oro nte ke n̄kpọ odu owo ke esịtidem oro esikade iso odu uwem ke owo ama akakpa. Enye edi akpan ukpepn̄kpọ ido ukpono Christendom. Ẹkpep ukpepn̄kpọ emi n̄ko ke Ido Ukpono Buddha, Hindu, Islam, Jain, Ido Ukpono Mme Jew, Shinto, Sikh, ye Tao. Kere ban̄a oro—ẹda nsunsu ukpepn̄kpọ emi ẹbian̄a ediwak biliọn owo!

6, 7. (a) Mmanie kpọt ẹkeme ndinyene “ifiọk Abasi”? (b) Nso uwụtn̄kpọ iwụt nte ke Jehovah ọnọ nnyịn ikike oro ediwak “mbon eti ibuot ye mme asian” mînyeneke?

⁶ Ntak emi ediwak owo mîsịmeke “ifiọk Abasi”? Koro owo ikemeke nditịm mfiọk se Ikọ Abasi ọwọrọde ye unana un̄wam Abasi. Ti ete ifiọk emi edi enọ. Jehovah esinọ sụk mbon oro ẹnyịmede ndidụn̄ọde Ikọ esie ke ofụri esịt ye nsụhọdeidem ifiọk emi. Ekeme ndidi mme utọ owo oro ididịghe mbon oro mme owo “ẹbatde ke mbon eti ibuot.” (1 Corinth 1:26) Ke idaha ererimbot, ẹkeme ndikam nse ediwak ke otu mmọ nte “mbon emi mîkekpepke n̄wed, ẹnyụn̄ ẹdide ndisịme ke ifiọk n̄wed.” (Utom 4:13) Edi, oro idịghe akpan n̄kpọ. Jehovah anam nnyịn inyene “ifiọk Abasi” ke ntak mme edu oro enye okụtde ke esịt nnyịn.

⁷ Kere ban̄a uwụtn̄kpọ kiet. Ediwak nditọ ukpepn̄kpọ Christendom ẹmesion̄o ediwak n̄wed usiakikọ Bible. Mme utọ n̄wed ndụn̄ọde oro ẹkeme ndineme mban̄a mme idaha eke mbụk, se mme ikọ Hebrew ye Greek ẹwọrọde, ye mme n̄kpọ efen. Kpa ye ofụri se mmọ ẹkpepde, nte mme utọ nditọ ukpepn̄kpọ oro ẹnen̄ede ẹnyene “ifiọk Abasi”? Ọfọn, ndi mmọ ẹnen̄ede ẹfiọk ibuotikọ Bible—ediwụt unen itie edikara Jehovah ebe ke Obio Ubọn̄ esie eke heaven? Ndi mmọ ẹfiọk ẹte ke Jehovah Abasi idịghe ubak Abasi-Ita-ke-Kiet? Nnyịn ke akpan imenyene nnennen ifiọk iban̄a mme utọ n̄kpọ emi. Ntak-a? Jehovah ọnọ nnyịn ikike ndifiọk akpanikọ eke spirit oro ediwak “mbon eti ibuot ye mme asian” mînyeneke. (Matthew 11:25) Jehovah ọdiọn̄ mbon oro ẹkperede enye didie ntem!

“Jehovah Ekpeme Kpukpru Mmọ Eke Ẹmade Enye”

8, 9. (a) Didie ke David eketịn̄ aban̄a edidiọn̄ efen oro mbon oro ẹkperede Jehovah ẹnyenede? (b) Ntak emi mme Christian akpanikọ ẹyomde ukpeme Abasi?

⁸ Mbon oro ẹkperede Jehovah ẹsinyene edidiọn̄ efen—ukpeme Abasi. David andiwet  psalm, emi okosobode ekese afanikọn̄, ama ewet ete: “Jehovah emekpere kpukpru mmọ eke ẹsemede ẹnọ enye, kpukpru mmọ eke ẹsemede ẹnọ enye ke akpanikọ. Enye ayanam se mme andibak enye ẹmade: onyụn̄ okop eseme mmọ, onyụn̄ anyan̄a mmọ. Jehovah ekpeme kpukpru mmọ eke ẹmade enye.” (Psalm 145:18-20) Ih, Jehovah emekpere kpukpru mmọ eke ẹmade enye ndien ke ntre enye ekeme ndisọsọp nnam n̄kpọ mban̄a eseme oro mmọ ẹsemede ẹyom un̄wam.

⁹ Ntak emi nnyịn iyomde ukpeme Abasi? Ke adianade ye edisobo mme mfịna ẹtode edidu uwem ke “ndiọk eyo,” mme Christian akpanikọ ẹdi akpan iso en̄wan akwa Asua Jehovah, Satan kpa Devil. (2 Timothy 3:1) Akari-n̄kari asua emi ebiere ‘ndita’ nnyịn. (1 Peter 5:8) Satan esikọbọ, efịk, onyụn̄ odomo nnyịn. Enye n̄ko esiyom mme edu ke ekikere ye esịt nnyịn oro enye ekemede ndida nnam n̄kpọ ke idiọk usụn̄. Enye enyene uduak: ndinam mbuọtidem nnyịn emem nnyụn̄ mbiat nnyịn ke n̄kan̄ eke spirit. (Ediyarade 12:12, 17) Sia nnyịn inyenede ndin̄wana ye utọ okopodudu asua oro, nte idịghe n̄kpọ nsịnudọn̄ ndifiọk nte ke “Jehovah [esikpeme] kpukpru mmọ eke ẹmade enye”?

10. (a) Didie ke Jehovah esikpeme ikọt esie? (b) Nso idi ata akpan ukpeme, ndien ntak-a?

¹⁰ Nte ededi, didie ke Jehovah esikpeme ikọt esie? Un̄wọn̄ọ esie ndikpeme nnyịn inọhọ ubiọn̄ nte ke nnyịn iyodu uwem unana mfịna ke editịm n̄kpọ emi; m̀mê emi ndiwọrọ nte ke obiomo enye ndinam utịben̄kpọ ke ibuot nnyịn. Edi, Jehovah esikpeme ikọt esie ke ata ata usụn̄ nte otu. Kamse, tutu amama enye idiyakke Devil ọsọhi ata mme andituak ibuot efep ke isọn̄! (2 Peter 2:9) Ke akande kpukpru, Jehovah ekpeme nnyịn ke n̄kan̄ eke spirit. Enye esinọ nnyịn mme n̄kpọ oro iyomde man iyọ mme idomo inyụn̄ ikpeme itie ebuana nnyịn ye enye. Ke nditịm ntịn̄, ukpeme eke spirit edi ata akpan ukpeme. Ntak-a? Koro adan̄a nte nnyịn inyenede itie ebuana ye Jehovah, n̄kpọ ndomokiet—ọkpọkọm n̄kpa—ikemeke ndinọ nnyịn nsinsi unan.—Matthew 10:28.

11. Mme ndutịm ewe ke Jehovah anam man ọnọ ikọt esie ukpeme eke spirit?

¹¹ Jehovah anam ekese ndutịm man ọnọ mbon oro ẹkperede enye ukpeme eke spirit. Ebede ke Ikọ esie, kpa Bible, enye ọnọ nnyịn eti ibuot man iyọ nsio nsio idomo. (James 1:2-5) Ndida eti item oro ẹkụtde ke N̄wed Abasi nsịn ke edinam edi n̄ko ukpeme. Ke adianade do, Jehovah ayak “Edisana spirit ọnọ mmọ eke ẹben̄ede Enye.” (Luke 11:13) Spirit oro okop odudu akan ke ofụri ekondo, ntre enye ekeme ndinen̄ede ntịm nnyịn idem ndiyọ idomo ekededi oro ikemede ndisobo, uforo uforo. Ebede ke Christ, Jehovah ọnọ nnyịn ‘mme enọ ke owo.’ (Ephesus 4:8, NW) Iren oro ẹdotde ke n̄kan̄ eke spirit mi ẹdomo ndiwụt ntotụn̄ọ esịtmbọm Jehovah ke ndin̄wam ekemmọ mme andituak ibuot.—James 5:14, 15.

12, 13. (a) Ke nso usụn̄ ke Jehovah ọnọ udia eke spirit ke edikem ini? (b) Afo ekere didie aban̄a mme ndutịm oro Jehovah anamde kaban̄a mfọnọn̄kpọ eke spirit nnyịn?

¹² Jehovah ọnọ n̄kpọ efen man ekpeme nnyịn: udia eke spirit ke edikem ini. (Matthew 24:45) Jehovah ada mme n̄wed oro ẹmịn̄de-mịn̄, esịnede magazine Enyọn̄-Ukpeme ye Awake!, ọkọrọ ye mme mbono esop,  n̄kpri mbono, ye ikpọ mbono, ndinọ nnyịn se iyomde ye ke ini oro iyomde emi. Ndi emekeme nditi n̄kpọ oro okokopde ke mbono esop Christian, ekpri mbono, m̀mê akamba mbono oro okotụkde fi esịt onyụn̄ ọsọn̄ọde fi idem m̀mê ọdọn̄de fi esịt? Ndi akanam omokot ibuotikọ ke kiet ke otu mme n̄wed oro ẹsiakde ke enyọn̄ emi ndien etie fi ke idem nte ẹkewet ibuotikọ emi ẹnọ fi?

¹³ Kiet ke otu n̄kpọekọn̄ Satan oro okụtde unen akan edi mmemidem, ndien nnyịn imesikop mmemidem. Enye etịm ọfiọk ke ekikere unana idotenyịn oro ebịghide ekeme ndinam idem emem nnyịn, idem osiode nnyịn anyan ọnọ n̄kpọndịk. (Mme N̄ke 24:10) Sia Satan esịnde ukeme ndida mmemidem nnyịn nnam n̄kpọ ke idiọk usụn̄, nnyịn imoyom un̄wam. Ke ini ke ini, magazine Enyọn̄-Ukpeme ye Awake! ẹsineme mme ibuotikọ oro ẹn̄wamde nnyịn ndikan mmemidem. Kaban̄a utọ ibuotikọ oro kiet, Christian an̄wan kiet ekewet ete: “Mmesikot ibuotikọ emi ke ekperede ndidi kpukpru usen, ndien mmọn̄eyet esisụk ọwọwọrọ mi ke enyịn. Mmesinịm enye n̄kpere bed mi man n̄kpekeme ndikot enye ini ekededi oro idem ememde mi. Ebede ke mme ibuotikọ nte mmọ emi, mmesikeme ndikụt ukpeme Jehovah.” * Nte nnyịn iwụtke esịtekọm inọ Jehovah ke enye ndinọ nnyịn udia eke spirit ke edikem ini? Ti ete ke mme ndutịm oro Jehovah anamde kaban̄a mfọnọn̄kpọ eke spirit nnyịn ẹdi uyarade nte ke enye ekpere nnyịn onyụn̄ ekpeme nnyịn.

Ndisan̄a N̄kpere ‘Andikop Akam’

14, 15. (a) Nso ọkpọkpọ edidiọn̄ ke Jehovah ọnọ mbon oro ẹkperede enye? (b) Ntak emi edinyene ifụre ndisan̄a n̄kpere Jehovah ke akam edide n̄wọrọnda ifet?

¹⁴ Ndi akanam omokụt nte ke ini mme owo ẹnyenede itie odudu, ke esisọn̄ mbon oro ẹdude ke idak mmọ ndisan̄a n̄kpere mmọ? Nte ededi, nso kaban̄a Jehovah Abasi? Ndi enye oyom usụn̄ akaha ndinyene udọn̄ ke mme ikọ oro mme ikpîkpu owo ẹtịn̄de ẹnọ enye? Baba! Akam edi edidiọn̄ efen oro Jehovah ọnọde mbon oro ẹkperede enye. Ndinyene ifụre ndisan̄a n̄kpere ‘Andikop Akam’ enen̄ede edi n̄wọrọnda ifet. (Psalm 65:2) Ntak-a?

¹⁵ Ke ndinam an̄wan̄a: Etubom utom ke akamba usiakifia esinyene ediwak utom ndinam. Enye esibiere m̀mê mme n̄kpọ ewe ke imọ idise iban̄a ke idem imọ ndien m̀mê ewe ke imọ idiyak inọ mbon en̄wen. Ukem ntre, Akakan Andikara ekondo enyene unen ndibiere m̀mê mme n̄kpọ ewe ke imọ idise iban̄a ke idem imọ ndien m̀mê ewe ke imọ idiyak inọ mbon en̄wen ẹse ẹban̄a. Kere ban̄a kpukpru utom oro Jehovah ayakde ọnọ edima Eyen esie, Jesus. Ẹnọ Eyen “odudu ndidi ebiereikpe.” (John 5:27) Ẹnam mme angel ‘ẹdu ke idak Esie.’ (1 Peter 3:22) Ẹnọ Jesus edisana spirit Jehovah man an̄wam enye ndida mme mbet esie oro ẹdude ke isọn̄, usụn̄. (John 15:26; 16:7) Ke ntre, Jesus ama ekeme ndidọhọ ete: “Ẹnọ Mi ofụri odudu ke heaven ye ke isọn̄.” (Matthew 28:18) Edi, ke ini edide  edisịm akam nnyịn, Jehovah emek ndise mban̄a emi ke idemesie. Ntak edi oro Bible etemede nnyịn ndibọn̄ akam nnyịn nnọ Jehovah ikpọn̄-ikpọn̄, inamde ntre ke enyịn̄ Jesus.—Psalm 69:13; John 14:6, 13.

16. Ntak emi nnyịn ikemede ndinyene mbuọtidem nte ke Jehovah esinen̄ede akpan̄ utọn̄ ọnọ akam nnyịn?

¹⁶ Ndi Jehovah esinen̄ede akpan̄ utọn̄ ọnọ akam nnyịn? Edieke enye mîkpenyeneke udọn̄ m̀mê mîkpọdọn̄ke enyịn ke akam nnyịn, enye ikpedehede isịn udọn̄ inọ nnyịn ite “[ikọbọ] ke edibọn̄ akam” m̀mê itop mbiomo ye ọkpọsọn̄ ekikere eke ẹtịmerede esịt nnyịn idori imọ ke idem. (Rome 12:12; Psalm 55:22; 1 Peter 5:7) Mme anam-akpanikọ asan̄autom ke mme ini Bible ẹma ẹnyene ọyọhọ mbuọtidem nte ke Jehovah esikpan̄ utọn̄ ọnọ akam. (1 John 5:14) Ntem, David andiwet psalm ama ọdọhọ ete: “[Jehovah] oyokop uyo mi.” (Psalm 55:17) Nnyịn n̄ko imekeme nditịm nnyene mbuọtidem nte ke Jehovah ekpere nnyịn, onyụn̄ eben̄e idem ndikpan̄ utọn̄ n̄kop kpukpru ekikere ye editịmede esịt nnyịn.

Jehovah Esinọ Mme Asan̄autom Esie Utịp

17, 18. (a) Didie ke Jehovah ese utom mbuọtidem oro mme enyene-ifiọk edibotn̄kpọ esie ẹnamde? (b) Nam an̄wan̄a nte Mme N̄ke 19:17 owụtde ke Jehovah isifreke mme n̄kpọ oro nnyịn inamde nditua mme owo mbọm.

¹⁷ Se mme ikpîkpu owo ẹkpenamde m̀mê ẹtrede ndinam itụkke idaha Jehovah nte Andikara Ekondo. Nte ededi, Jehovah edi Abasi emi esiwụtde esịtekọm. Enye ama—ke nditịm ntịn̄, owụt esịtekọm aban̄a—utom mbuọtidem oro mme enyene-ifiọk edibotn̄kpọ esie ẹnamde. (Psalm 147:11) Ndien, emi edi ufọn efen oro mbon emi ẹkperede Jehovah ẹbọde: Enye esinọ mme asan̄autom esie utịp.—Mme Hebrew 11:6.

¹⁸ Bible owụt in̄wan̄-in̄wan̄ ete ke Jehovah ada se mme andituak ibuot nnọ enye ẹnamde ke ọsọn̄urua. Ke uwụtn̄kpọ, nnyịn ikot ite: “Atua-ubuene mbọm ọbuọt Jehovah n̄kpọ: ndien Enye ọyọnọ enye usiene utom esie.” (Mme N̄ke 19:17) Ẹkụt mbọm mbọm edikere  mban̄a oro Jehovah enyenede ọnọ mme ubuene ke Ibet Moses. (Leviticus 14:21; 19:15) Esitie Jehovah didie ke idem ke ini nnyịn ikpebede mbọm esie ke nte inamde n̄kpọ ye mme ubuene? Ke ini nnyịn inọde mme ubuene n̄kpọ, mînyụn̄ idorike enyịn ndibọ usiene, Jehovah esida emi nte ke nnyịn ibuọt imọ n̄kpọ. Jehovah ọn̄wọn̄ọ ndida mfọn ye edidiọn̄ n̄kpe ebuọt oro. (Mme N̄ke 10:22; Matthew 6:3, 4; Luke 14:12-14) Ih, ke ini nnyịn iwụtde ekemmọ mme andinịm ke akpanikọ oro ẹdude ke unana mbọm, emi esitụk Jehovah esịt. Edi n̄kpọ inemesịt didie ntem ndifiọk nte ke Ete nnyịn eke heaven isifreke mme n̄kpọ oro nnyịn inamde nditua mme owo mbọm!—Matthew 5:7.

19. (a) Ntak emi nnyịn ikemede ndinyene nsọn̄ọ nte ke Jehovah adara se nnyịn inamde ke utom edikwọrọ ye edinam mbet? (b) Didie ke Jehovah esinọ utịp ke utom oro ẹnamde ndinọ Obio Ubọn̄ esie ibetedem?

¹⁹ Jehovah esinen̄ede owụt esịtekọm aban̄a mme n̄kpọ oro nnyịn inamde ke ufọn Obio Ubọn̄ esie. Ke ini nnyịn isan̄ade ikpere Jehovah, esikam edi ndammana n̄kpọ ndiyom ndida ini, odudu, ye inyene nnyịn nsịn ke ndibuana ọyọhọ ọyọhọ nte ikekeme ke utom edikwọrọ Obio Ubọn̄ ye edinam mbet. (Matthew 28:19, 20) Ke ndusụk idaha, ekeme nditie nnyịn ke idem nte ke nnyịn inamke ekese. Anana-mfọnmma esịt nnyịn ekeme ndikam nnam nnyịn itọn̄ọ ndiyịk m̀mê Jehovah enem esịt ye ukeme oro nnyịn isịnde. (1 John 3:19, 20) Edi Jehovah adadara kpukpru enọ—inamke n̄kpọ m̀mê ekpri adan̄a didie—emi ẹtode esịt oro ima onụkde. (Mark 12:41-44) Bible ọsọn̄ọ ọnọ nnyịn ete: “Abasi ikwan̄ake nte efrede utom mbufo ye ima enyịn̄ Esie eke mbufo ẹwụtde.” (Mme Hebrew 6:10) Ke akpanikọ, Jehovah esiti onyụn̄ ọnọ utịp ke idem ọkpọkọm n̄kpri-n̄kan utom oro ẹnamde ke ufọn Obio Ubọn̄ esie. Ke adianade ye akpakịp edidiọn̄ eke spirit idahaemi, nnyịn imekeme ndidori enyịn ndidu uwem idatesịt ke obufa ererimbot oro edide, ebiet emi Jehovah editatde ubọk esie onyụn̄ oyụhọ nti udọn̄ kpukpru mbon oro ẹkperede enye!—Psalm 145:16; 2 Peter 3:13.

20. Ke ofụri isua 2003, didie ke nnyịn ikeme nditi mme ikọ ibuotikọ isua nnyịn, ndien ye nso utịp?

²⁰ Ke ofụri isua 2003, ẹyak ibụp idem nnyịn m̀mê nnyịn ke ika iso isịn ukeme ndisan̄a n̄kpere Ete nnyịn eke heaven. Edieke edide ke inam ntre, nnyịn imekeme ndinịm ke akpanikọ nte ke enye ayanam kpa nte enye ọn̄wọn̄ọde. Kamse, ‘Abasi ikemeke ndisu nsu.’ (Titus 1:2) Edieke afo asan̄ade ekpere enye, enye ayasan̄a ekpere fi. (James 4:8) Ndien ye nso utịp? Akpakịp edidiọn̄ idahaemi, ye idotenyịn edinen̄ede nsan̄a n̄kpere Jehovah ke nsinsi nsinsi!

[Ikọ idakisọn̄]

Nte Afo Emeti?

• Nso enọ ke Jehovah ọnọ mbon oro ẹsan̄ade ẹkpere enye?

• Mme ndutịm ewe ke Jehovah anam man ọnọ ikọt esie ukpeme eke spirit?

• Ntak emi edinyene ifụre ndisan̄a n̄kpere Jehovah ke akam edide n̄wọrọnda ifet?

• Didie ke Bible owụt nte ke Jehovah adara utom mbuọtidem oro mme enyene-ifiọk edibotn̄kpọ esie ẹnamde?

[Mme Mbụme Ukpepn̄kpọ]

[Ndise ke page 15]

Jehovah ọnọ nnyịn ikike ndifiọk mme akpanikọ eke spirit

[Mme ndise ke page 16, 17]

Jehovah esinọ ukpeme eke spirit

[Ndise ke page 18]

Jehovah ekpere onyụn̄ eben̄e idem ndikop kpukpru akam nnyịn