“Magapalapit Sia sa Inyo”

‘Ang Dios indi malayo sa tagsatagsa sa aton.’—BINUHATAN 17:27.

1, 2. (a) Kon nagatangla kita sa mabituon nga kalangitan, ano ang mahimo ipamangkot naton tuhoy sa Manunuga? (b) Paano kita ginapasalig sang Biblia nga ang mga tawo indi walay kabilinggan sa mga mata ni Jehova?

NAEKSPERIENSIAHAN mo na bala nga magtangla sa mabituon nga kalangitan sa isa ka matin-aw nga gab-i kag nahalawhaw ka? Makapulunaw gid ang madamo nga kabituunan kag ang malapad nga kahawaan. Sa sining malapad kaayo nga uniberso, daw isa lamang ka diutay nga pintok ang duta. Nagakahulugan bala ini nga ang Manunuga, “ang Labing Mataas sa bug-os nga duta,” tuman kataas amo nga indi sia interesado sa mga tawo ukon tuman kalayo kag indi matungkad amo nga indi sia makilala?​​—⁠Salmo 83:18.

² Ginapasalig kita sang Biblia nga ang mga tawo indi walay kabilinggan sa mga mata ni Jehova. Sa katunayan, ginapalig-on kita sang Pulong sang Dios nga pangitaon sia, sa pagsiling: “Indi sia malayo sa tagsatagsa sa aton.” (Binuhatan 17:27; 1 Cronica 28:⁠9) Sa pagkamatuod, kon maghimo kita sing mga tikang sa pagpalapit sa Dios, magabalos man sia. Sa anong paagi? Ang mga pulong sang aton tuigan nga teksto para sa 2003 nagahatag sining makalilipay nga sabat: “Magapalapit sia sa inyo.” (Santiago 4:⁠8) Hambalan naton ang pila sang dalayawon nga mga pagpakamaayo nga ginahatag ni Jehova sa mga suod sa iya.

Isa ka Personal nga Dulot Gikan kay Jehova

3. Ano nga dulot ang ginahatag ni Jehova sa mga nagapalapit sa iya?

³ Una, may ginatigana si Jehova nga isa ka hamili nga dulot para sa iya katawhan. Ini nga dulot indi mahatag sang tanan nga gahom, manggad, kag edukasyon sining sistema sang mga butang. Isa ini ka personal nga dulot nga ginahatag lamang ni Jehova sa mga suod sa iya. Ano ini? Ang Pulong sang Dios nagasabat: “Kon . . . magbayaw [ka] sang imo tingog para sa paghantop, kon padayon mo ini nga pangitaon subong sang pilak kag padayon mo ini nga pangitaon subong sang tinago nga mga bahandi, nian mahangpan mo ang kahadlok kay Jehova, kag masapwan mo ang ihibalo gid sa Dios. Kay si Jehova nagahatag sing kaalam.” (Hulubaton 2:​3-6) Hunahunaa lamang nga masapwan sang di-himpit nga mga tawo “ang ihibalo gid sa Dios”! Ini nga dulot​​—⁠ang ihibalo nga  masapwan sa Pulong sang Dios⁠​—⁠ginapaanggid sa “tinago nga mga bahandi.” Ngaa?

4, 5. Ngaa ang “ihibalo gid sa Dios” sarang mapaanggid sa “tinago nga mga bahandi”? Iilustrar.

⁴ Bangod ang ihibalo sa Dios may daku nga balor. Ang isa sang hamili gid nga mga pagpakamaayo sini amo ang ginalauman nga kabuhi nga walay katapusan. (Juan 17:⁠3) Apang ini nga ihibalo nagahatag sing katuyuan sa aton kabuhi bisan sa karon. Halimbawa, bangod gintun-an naton sing tul-id ang Pulong sang Dios, nasabat naton ang importante nga mga pamangkot subong sang: Ano ang ngalan sang Dios? (Salmo 83:18) Ano ang matuod nga kahimtangan sang mga patay? (Manugwali 9:​5, 10) Ano ang katuyuan sang Dios para sa duta kag sa katawhan? (Isaias 45:18) Napamatud-an man naton nga ang labing maayo nga paagi sang pagkabuhi amo ang pag-aplikar sang maalamon nga laygay sang Biblia. (Isaias 30:​20, 21; 48:​17, 18) Gani, ginatuytuyan kita kon paano malandas ang aton mga ginakabalak-an sa kabuhi kag tinguhaan ang pagkabuhi nga nagahatag sing matuod nga kalipay kag kaayawan. Labaw sa tanan, bangod sang aton pagtuon sa Pulong sang Dios, natun-an naton ang dalayawon nga mga kinaiya ni Jehova kag kon paano magpalapit sa iya. Ano pa bala ang mas bilidhon sangsa isa ka suod nga kaangtanan kay Jehova nga napasad sa “ihibalo gid sa Dios”?

⁵ May isa pa ka rason kon ngaa ang ihibalo sa Dios sarang mapaanggid sa “tinago nga mga bahandi.” Kaangay sang madamo nga mga bahandi, medyo maiwat ini sa kalibutan. Sa anom ka bilyon nga mga pumuluyo sang duta, anom ka milyon nga mga sumilimba ni Jehova, ukon mga 1 sa 1,000, ang nakasapo sang “ihibalo gid sa Dios.” Sa pag-ilustrar kon daw ano ka tumalagsahon nga bahandi ang mahibaluan ang kamatuoran sang Pulong sang Dios, binagbinaga ang isa lamang ka pamangkot sa Biblia: Ano ang nagakatabo sa mga tawo sa kamatayon? Natun-an naton gikan sa Kasulatan nga ang kalag nagakapatay kag ang mga patay wala sing pangalibutan. (Ezequiel 18:⁠4) Apang, ang sayop nga pagpati nga ang isa ka butang sa sulod sang isa ka tawo padayon nga nagakabuhi sa tapos sang kamatayon ginabaton sang kalabanan nga mga relihion sang kalibutan. Isa ini ka sadsaran nga bahin sang mga relihion sang Cristiandad. Ginapatihan man ini sang Budhismo, Hinduismo, Islam, Jainismo, Judaismo, Shinto, Sikhismo, kag Taoismo. Hunahunaa lamang​​—⁠binilyon ka tawo ang ginalimbungan sining isa ka butig nga doktrina!

6, 7. (a) Sin-o lamang ang makasapo sang “ihibalo gid sa Dios”? (b) Ano nga halimbawa ang nagapakita nga ginpakamaayo kita ni Jehova sing paghantop nga wala sa madamo nga ‘mga maalam kag mga may kinaalam’?

⁶ Ngaa diutay lamang ang nakasapo sang “ihibalo gid sa Dios”? Bangod indi mahangpan sing bug-os sang isa ang kahulugan sang Pulong sang Dios kon wala ang Iya bulig. Dumduma, ini nga ihibalo isa ka dulot. Ginahatag lamang ini ni Jehova sa mga handa magpanalawsaw sa iya Pulong sing bunayag kag mapainubuson. Mahimo nga indi sila “maalam sa undanon nga paagi.” (1 Corinto 1:26) Madamo sa ila ang mahimo ginakabig pa gani nga “wala sing tinun-an kag kinaandan lamang” suno sa mga talaksan sang kalibutan. (Binuhatan 4:13) Apang, indi ini importante. Ginapadyaan kita ni Jehova sing “ihibalo gid sa Dios” bangod sang mga kinaiya nga nasapwan niya sa aton tagipusuon.

⁷ Binagbinaga ang isa ka halimbawa. Madamo nga mga iskolar sa Cristiandad ang nakahimo sing maid-id nga mga komentaryo tuhoy sa Biblia. Mahimo nga ginapaathag sini nga mga reperensia ang maragtason nga impormasyon, ang kahulugan sang Hebreo kag Griegong mga tinaga, kag madamo pa. Bangod sang tanan nga tinun-an nila, nasapwan gid bala sining mga iskolar ang “ihibalo gid sa Dios”? Nahangpan bala nila ang tema sang Biblia​​—⁠ang pagbindikar sa pagkasoberano ni Jehova paagi sa iya langitnon nga Ginharian? Nahibaluan bala nila nga si Jehova nga Dios indi bahin sang isa ka Trinidad? Nahangpan naton sing sibu ini nga mga butang. Ngaa? Ginpakamaayo kita ni Jehova sing paghantop sa espirituwal nga mga kamatuoran nga wala sa madamo nga ‘mga maalam kag mga may kinaalam.’ (Mateo 11:25) Ginapakamaayo gid ni Jehova ang mga suod sa iya!

“Ginabantayan ni Jehova ang Tanan nga Nagahigugma sa Iya”

8, 9. (a) Paano ginlaragway ni David ang isa pa ka pagpakamaayo sa mga suod kay Jehova? (b) Ngaa nagakinahanglan ang matuod nga mga Cristiano sing pag-amlig sang Dios?

⁸ May dugang pa nga pagpakamaayo ang mga suod kay Jehova​​—⁠ginaamligan sila sang Dios. Si  salmista David, nga nakaeksperiensia sing kapipit-an, nagsulat: “Si Jehova malapit sa tanan nga nagapanawag sa iya, sa tanan nga nagapanawag sa iya sa kamatuoran. Tumanon niya ang handum sang mga nagakahadlok sa iya, kag pamatian niya ang ila pagpangayo sing bulig, kag luwason niya sila. Ginabantayan ni Jehova ang tanan nga nagahigugma sa iya.” (Salmo 145:18-​20) Huo, malapit si Jehova sa mga nagahigugma sa iya amo nga maabtik sia maghulag kon nagapangayo sila sing bulig.

⁹ Ngaa kinahanglan naton ang pag-amlig sang Dios? Wala labot nga mabatyagan nila ang mga epekto sang pagkabuhi sa sining “makahalanguyos nga mga tion nga mabudlay pakigbagayan,” ang matuod nga mga Cristiano amo pa ang pinasahi nga puntariya sang panguna nga Kaaway ni Jehova, si Satanas nga Yawa. (2 Timoteo 3:⁠1) Determinado ining malalangon nga kaaway sa ‘pagtukob’ sa aton. (1 Pedro 5:⁠8) Ginahingabot, ginaipit, kag ginasulay kita ni Satanas. Ginapangita man niya ang panimuot sang hunahuna kag tagipusuon nga mahingalitan niya. Ang iya katuyuan amo: paluyahon ang aton pagtuo kag laglagon kita sa espirituwal. (Bugna 12:​12, 17) Bangod gamhanan ang aton kaaway, indi bala makapasalig ang mahibaluan nga “ginabantayan ni Jehova ang tanan nga nagahigugma sa iya”?

10. (a) Paano ginabantayan ni Jehova ang iya katawhan? (b) Ano ang labing importante nga sahi sang proteksion, kag ngaa?

¹⁰ Apang, paano ginabantayan ni Jehova ang iya katawhan? Ang iya ginasaad nga proteksion wala nagagarantiya sa aton sing isa ka kabuhi sa sining sistema nga wala gid sing problema; ukon nagakahulugan ini nga obligado sia nga maghimo sing mga milagro para sa aton. Apang, subong isa ka grupo, ginaamligan ni Jehova ang iya katawhan. Indi gid niya pagtugutan ang Yawa nga dulaon ang matuod nga mga sumilimba sa duta! (2 Pedro 2:⁠9) Labaw sa tanan, ginaamligan kita ni Jehova sa espirituwal nga paagi. Ginasangkapan niya kita sang aton kinahanglanon agod mabatas naton ang mga pagtilaw kag maamligan ang aton kaangtanan sa iya. Sa ulihi, ang espirituwal nga proteksion amo ang labing importante nga sahi sang proteksion. Ngaa? Kay tubtob ginahuptan naton ang aton kaangtanan kay Jehova, wala sing bisan ano ang makatuga sa aton sing permanente nga halit, bisan ang kamatayon.​​—⁠Mateo 10:28.

11. Ano nga mga aman ang ginhanda ni Jehova agod maamligan sa espirituwal ang iya katawhan?

¹¹ Naghanda si Jehova sing madamo nga mga aman agod maamligan sa espirituwal ang mga suod sa iya. Paagi sa iya Pulong, ang Biblia, ginahatagan niya kita sing kaalam sa paglandas sa nanuhaytuhay nga mga pagtilaw. (Santiago 1:​2-5) Ang pag-aplikar sang praktikal nga laygay sang Kasulatan isa gid ka proteksion. Dugang pa, nagahatag si Jehova sing “balaan nga espiritu sa mga nagapangayo sa iya.” (Lucas 11:13) Ini nga espiritu amo ang labing gamhanan nga puwersa sa uniberso, gani makabulig gid ini sa aton agod maatubang sing madinalag-on ang bisan anong pagtilaw ukon pagsulay nga masumalang naton. Paagi kay Cristo, nagahatag si Jehova sing “dulot nga mga lalaki.” (Efeso 4:⁠8) Ginatinguhaan sining kalipikado sa espirituwal nga mga lalaki nga ipakita ang pagkamaluluy-on ni Jehova kon ginabuligan nila ang ila mga masigkasumilimba.​​—⁠Santiago 5:​14, 15.

12, 13. (a) Sa anong mga paagi ginaamanan kita ni Jehova sing espirituwal nga pagkaon sa nagakaigo nga tion? (b) Ano ang ginabatyag mo tuhoy sa mga aman ni Jehova para sa aton espirituwal nga kaayuhan?

¹² May ginaaman pa si Jehova agod maamligan kita: amo ang espirituwal nga pagkaon sa nagakaigo nga tion. (Mateo 24:45) Paagi sa naimprinta nga mga publikasyon, lakip ang mga magasin nga Ang Lalantawan kag Magmata!, subong man  ang mga miting, mga asambleya, kag mga kombension, ginaamanan kita ni Jehova sang aton mga kinahanglanon kon ginakinahanglan naton ini. May madumduman ka bala nga isa ka okasyon nga nakabati ka sa isa ka Cristianong miting, asambleya, ukon kombension sing isa ka punto nga nagtandog sang imo tagipusuon kag nagpalig-on ukon nagpaumpaw sa imo? Nakabasa ka na bala sing isa ka artikulo sa isa sang nasambit nga mga magasin kag nagsiling ka nga ginsulat gid ini para sa imo?

¹³ Ang isa sang epektibo gid nga mga hinganiban ni Satanas amo ang pagluya sang aton buot, kag indi kita hilway sa mga epekto sini. Nakahibalo gid sia nga kon madulaan kita sing paglaum sa malawig nga tion, magaluya kita kag madali mapukan. (Hulubaton 24:10) Bangod ginatinguhaan ni Satanas nga hingalitan ang aton negatibo nga mga balatyagon, nagakinahanglan kita sing bulig. Kon kaisa, may mga artikulo nga nagaguwa sa Lalantawan kag Magmata! nga mga magasin nga nagabulig sa aton agod pakigbatuan ang pagluya sang buot. Tuhoy sa isa sini nga artikulo, ang isa ka Cristianong utod nga babayi nagsulat: “Ginabasa ko ang artikulo halos kada adlaw, kag nagahibi gihapon ako. Ginabutang ko ini malapit sa akon katre agod mabasa ko ini kon magluya ang akon buot. Bangod sang mga artikulo kaangay sini, mabatyagan ko gid ang maamligon nga mga butkon ni Jehova nga nagahakos sa akon.”⁠ * Indi bala nga dapat naton pasalamatan si Jehova bangod ginaamanan niya kita sing sibu sa tion nga espirituwal nga pagkaon? Dumduma, ang iya mga aman para sa aton espirituwal nga kaayuhan isa ka ebidensia nga malapit sia sa aton kag ginaamligan niya kita.

Pagpalapit sa “Nagapamati sa Pangamuyo”

14, 15. (a) Anong personal nga pagpakamaayo ang ginahatag ni Jehova sa mga suod sa iya? (b) Ngaa ang hilway nga pagpalapit kay Jehova sa pangamuyo isa ka talalupangdon nga pribilehiyo?

¹⁴ Natalupangdan mo bala nga samtang nagadaku ang gahom kag awtoridad sang mga tawo, masami nga daw mabudlay na sila palapitan sang mga ginadumalahan nila? Apang, kamusta naman si Jehova nga Dios? Tuman bala sia ka layo amo nga indi sia interesado sa ginapabutyag sang mga tawo lamang? Kabaliskaran gid ang nagakatabo! Ang dulot nga pangamuyo isa pa ka pagpakamaayo nga ginahatag ni Jehova sa mga suod sa iya. Ang hilway nga pagpalapit sa “Nagapamati sa pangamuyo” isa gid ka talalupangdon nga pribilehiyo. (Salmo 65:⁠2) Ngaa?

¹⁵ Sa pag-ilustrar: Ang pangulo nga ehekutibo sang isa ka daku nga korporasyon may madamo nga mga salabton. Ginadesisyunan niya kon ano nga mga butang ang iya himuon kag kon ano ang ipahimo niya sa iban. Sing kaanggid, ang Soberanong Manuggahom sang uniberso may kinamatarong sa pagdesisyon kon ano nga mga butang ang iya pakigbahinan kag kon ano ang itulin niya sa iban. Binagbinaga ang tanan nga gintulin ni Jehova sa iya hinigugma nga Anak nga si Jesus. Ginhatagan ang Anak sing “awtoridad sa paghukom.” (Juan 5:27) Ang mga anghel “ginpasakop sa iya.” (1 Pedro 3:22) Ang gamhanan nga balaan nga espiritu ni Jehova gin-aman agod magamit ni Jesus sa pagpanguna sa iya mga disipulo sa duta. (Juan 15:26; 16:⁠7) Gani nakasiling si Jesus:  “Ang bug-os nga awtoridad ginhatag na sa akon sa langit kag sa duta.” (Mateo 28:18) Apang, tuhoy sa aton mga pangamuyo, nagdesisyon si Jehova nga sia mismo ang magapamati sa sini. Amo kon ngaa ginasugo kita sang Biblia nga ipatuhoy ang aton mga pangamuyo kay Jehova lamang, nga ginahimo ini sa ngalan ni Jesus.​​—⁠Salmo 69:13; Juan 14:​6, 13.

16. Ngaa makasalig kita nga nagapamati gid si Jehova sa aton mga pangamuyo?

¹⁶ Nagapamati gid bala si Jehova sa aton mga pangamuyo? Kon sia walay interes ukon walay pag-ulikid, indi niya kita pagpalig-unon nga ‘magpadayon sa pagpangamuyo’ ukon ihaboy ang aton mga lulan kag mga kabalaka sa iya. (Roma 12:12; Salmo 55:22; 1 Pedro 5:⁠7) Ang matutom nga mga alagad sang panahon sang Biblia nagsalig sing bug-os nga nagapamati si Jehova sa pangamuyo. (1 Juan 5:14) Sa amo, si salmista David nagsiling: “Ginapamatian [ni Jehova] ang akon tingog.” (Salmo 55:17) May rason man kita sa pagsalig nga si Jehova malapit sa aton kag handa sa pagpamati sa aton tanan nga panghunahuna kag kabalaka.

Ginapadyaan ni Jehova ang Iya mga Alagad

17, 18. (a) Ano ang ginabatyag ni Jehova tuhoy sa matutom nga pag-alagad sang iya intelihente nga mga tinuga? (b) Ipaathag kon paano ginapakita sang Hulubaton 19:17 nga ang aton maluluy-on nga mga buhat ginatalupangod ni Jehova.

¹⁷ Ang posisyon ni Jehova subong Bug-os Uniberso nga Soberano indi apektado sang mahimo himuon ukon ginapangindian nga himuon sang mga tawo lamang. Walay sapayan, si Jehova isa ka mainapresyahon nga Dios. Ginapabaloran niya​​—⁠sa katunayan, ginapakabahandi niya⁠​—⁠ang matutom nga pag-alagad sang iya intelihente nga mga tinuga. (Salmo 147:11) Gani, isa pa ini ka kaayuhan nga ginaagom sang mga suod kay Jehova: Ginapadyaan niya ang iya mga alagad.​​—⁠Hebreo 11:6.

¹⁸ Maathag nga ginapakita sang Biblia nga ginapabaloran ni Jehova ang ginahimo sang iya mga sumilimba. Halimbawa, aton mabasa: “Sia nga nagapakita sing kaluoy sa imol nagapahulam kay Jehova, kag bayaran Niya sia sa iya ginabuhat.” (Hulubaton 19:17) Ang pagkamaluluy-on ni Jehova sa mga kubos ginpakita sa Mosaikong Kasuguan. (Levitico 14:21; 19:15) Ano ang ginabatyag ni Jehova  kon ginailog naton ang iya kaluoy sa aton pagpakig-angot sa mga kubos? Kon nagahatag kita sa isa nga kubos, nga wala nagapaabot sing balos, ginatamod ini ni Jehova subong ginpahulam sa Iya. Nagasaad si Jehova nga bayaran niya ini nga utang sing pabor kag mga pagpakamaayo. (Hulubaton 10:22; Mateo 6:​3, 4; Lucas 14:12-​14) Huo, kon nagapakita kita sing kaluoy sa isa ka masigkasumilimba nga nagakinahanglan sing bulig, ginatandog sini ang tagipusuon ni Jehova. Nagapasalamat gid kita bangod nahibaluan naton nga ang aton maluluy-on nga mga buhat ginatalupangod sang aton langitnon nga Amay!​​—⁠Mateo 5:7.

19. (a) Ngaa makasalig kita nga ginaapresyar ni Jehova ang ginahimo naton sa pagbantala kag paghimo sing disipulo nga hilikuton? (b) Paano ginapadyaan ni Jehova ang mga buhat sang pag-alagad nga ginahimo sa pagsakdag sa iya Ginharian?

¹⁹ Labi na nga ginaapresyar ni Jehova ang ginahimo naton para sa iya Ginharian. Kon nagapalapit kita kay Jehova, natural lamang nga luyag naton gamiton ang aton tion, kusog, kag manggad sa pagpakigbahin sa aton bug-os nga masarangan sa pagbantala sang Ginharian kag paghimo sing disipulo nga hilikuton. (Mateo 28:​19, 20) Kon kaisa, mahimo ginabatyag naton nga diutay lamang ang aton hinimuan. Bangod sang aton di-himpit nga tagipusuon mahimo pa gani kita magpalibog kon bala nahamuot si Jehova sa aton mga panikasog. (1 Juan 3:​19, 20) Apang ginapakabahandi ni Jehova ang tanan nga dulot​​—⁠bisan ano man ka diutay⁠​—⁠nga nagagikan sa isa ka tagipusuon nga ginapahulag sang gugma. (Marcos 12:41-​44) Ginapasalig kita sang Biblia: “Ang Dios indi di-matarong nga malimot sang inyo binuhatan kag sang gugma nga ginpakita ninyo tungod sa iya ngalan.” (Hebreo 6:10) Sa pagkamatuod, ginadumdom kag ginapadyaan ni Jehova bisan ang pinakadiutay nga buhat sang pag-alagad nga ginahimo sa pagsakdag sa iya Ginharian. Dugang sa bugana nga espirituwal nga mga pagpakamaayo karon, mapaabot naton ang malipayon nga pagkabuhi sa nagapakari nga bag-ong kalibutan, diin maalwan nga humlaron ni Jehova ang iya kamot kag paayawan ang matarong nga mga handum sang tanan nga suod sa iya!​​—⁠Salmo 145:16; 2 Pedro 3:⁠13.

20. Sa bug-os nga tuig sang 2003, paano naton dumdumon sing padayon ang mga pulong sang aton tuigan nga teksto, kag ano ang mangin resulta?

²⁰ Sa bug-os nga tuig sang 2003, pamangkuton naton ang aton kaugalingon kon bala dalayon kita nga nagapanikasog agod mangin suod sa aton langitnon nga Amay. Kon ginahimo naton ini, mapat-od naton nga tumanon niya ang iya ginsaad. Kay ang “Dios . . . indi makabutig.” (Tito 1:⁠2) Kon magpalapit ka sa Dios, magapalapit man sia sa imo. (Santiago 4:⁠8) Kag ano ang mangin resulta? Bugana nga mga pagpakamaayo karon kag ang paglaum nga mangin suod pa kay Jehova tubtob sa walay katubtuban!

[Nota]

Madumduman Mo Bala?

• Ano nga dulot ang ginahatag ni Jehova sa mga nagapalapit sa iya?

• Ano nga mga aman ang ginahanda ni Jehova agod maamligan sa espirituwal ang iya katawhan?

• Ngaa isa ka talalupangdon nga pribilehiyo ang hilway nga pagpalapit kay Jehova sa pangamuyo?

• Paano ginapakita sang Biblia nga ginaapresyar ni Jehova ang matutom nga pag-alagad sang iya intelihente nga mga tinuga?

[Mga Pamangkot sa Pagtinuon]

[Retrato sa pahina 15]

Ginpakamaayo kita ni Jehova sing paghantop sa espirituwal nga mga kamatuoran

[Mga retrato sa pahina 16, 17]

Nagaaman si Jehova sing espirituwal nga proteksion

[Retrato sa pahina 18]

Si Jehova malapit sa aton kag handa sa pagpamati sa aton tagsa ka pangamuyo