“U Ka Sutelela ku Mina”

“[Mulimu h’a] ini kwahule ni mutu ni mutu wa luna.”—LIKEZO 17:27.

1, 2. (a) Ha lu buha linaleli, lu kona ku buza puzo mañi ka za Mubupi? (b) Bibele i lu sepisa cwañi kuli ku Jehova, batu ki ba butokwa hahulu?

KANA mu kile mwa talima kwahalimu busihu bo bu ngwelukile ni ku makaliswa ki linaleli za teñi? Buñata fela bwa linaleli ni butuna bwa mbyumbyulu bwa mbwetukisa. Mwa pupo ye tuna-tuna ye, lifasi-mubu ki nto ye nyinyani hahulu. Kana taba yeo i talusa kuli Mubupi, yena “Muambakani-ya-Pahami, wa lifasi kaufela,” u pahami hahulu mi kacwalo h’a na taba ni batu, kamba kuli ha ba koni ku mu ziba kakuli kuti u kwahule hahulu mi ku mu utwisisa ha ku konahali?—Samu 83:18.

² Bibele i lu kolwisa kuli ku Jehova, batu ki ba butokwa hahulu. Mane, Linzwi la Mulimu li lu susueza ku mu bata. Li bulela kuli: “[H’a] ini kwahule ni mutu ni mutu wa luna.” (Likezo 17:27; 1 Makolonika 28:9) Kaniti, haiba lu ikataza ku sutelela ku Mulimu, u ka eza se siñwi ni yena. U ka ezañi? Liñolo la luna la silimo la 2003 li fa kalabo ye susueza ye li: “U ka sutelela ku mina.” (Jakobo 4:8) Ha lu tatubisiseñi ze ñwi za limbuyoti ze nde zeo Jehova a fa ba ba utwana ni yena.

Mpo Y’a Lu File Jehova Ka Sibili

3. Jehova u tambeka mpo mañi ku ba ba sutelela ku yena?

³ Nto ya pili kikuli, batanga ba Jehova ba na ni mpo ya butokwa y’a bulukezi batu ba hae. Mpo yeo ha i konwi ku fumanwa ka m’ata, bufumu, kamba tuto ifi ni ifi ya lifasi le. Ki mpo y’a fa ka sibili, yeo Jehova a tambeka fela ba ba utwana ni yena. Ki ifi mpo yeo? Linzwi la Mulimu li alaba kuli: “Ha u ka . . . tiisa ku biza tuto, wa i bata sina silivera, wa i pumbula sina maluo a’ patilwe mwa mubu, fo, u ka utwisisa kuli, ku saba [Muñ’a] Bupilo ki nto mañi, mi u ka fumana ku ziba za Mulimu. Kakuli [Muñ’a] Bupilo ki Yena ya fana butali.” (Liproverbia 2:3-6) Mu nahane fela, batu ba ba si ka petahala ba kona ku fumana “ku ziba za Mulimu”! Mpo yeo—yona zibo ye li mwa Linzwi la Mulimu—i bapanywa kwa “maluo a’ patilwe mwa mubu.” Libaka?

4, 5. Zibo ya “ku ziba za Mulimu” i kona ku bapanyezwañi kwa “maluo a’ patilwe mwa mubu”? Mu fe mutala.

 ⁴ Libaka le liñwi kikuli, zibo ya ku ziba za Mulimu i tusa hahulu. O muñwi wa mipuzo ya teñi ki kolo ya ku pila ku ya ku ile. (Joani 17:3) Kono zibo yeo ya lu tusa mwa bupilo nihaiba cwale. Ka mutala, ku ituta Linzwi la Mulimu ka tokomelo ku lu zibisize likalabo kwa lipuzo za butokwa ze cwale ka z’e li: Mulimu ki yena mañi libizo la hae? (Isaya 12:2) Bafu ba mwa muinelo ufi luli? (Muekelesia 9:5, 10) Mulimu u lelezi lifasi-mubu ni batu lika mañi? (Isaya 45:18) Hape lu fitile fa ku ziba kuli mupilelo sakata ki wa ku mamela likelezo ze nde za Bibele. (Isaya 30:20, 21; 48:17, 18) Kacwalo, lu na ni ketelelo ya ngana y’e lu tusa ku konana ni lipilaelo za mwa bupilo ni ku pila bupilo bo bu tahisa tabo sakata ili bo lu ikola luli. Mi sihulu, ku ituta Linzwi la Mulimu ku lu konisize ku ziba mikwa ye minde-nde ya Jehova mi ni ku sutelela ku yena. Ha ku na nto ya butokwa bo bu fita silikani sakata ni Jehova se si tomile fa zibo ya “ku ziba za Mulimu,” nji cwañi?

⁵ Ku na ni libaka le liñwi zibo ya ku ziba za Mulimu ha i kona ku bapanywa kwa “maluo a’ patilwe mwa mubu.” Sina maluo a mañata, ha i ipumanelwi fela mwa lifasi le. Batu kaufela fa lifasi ba eza 6 bilioni kwa buñata, kono ba ba fumani “ku ziba za Mulimu” ki balapeli ba Jehova ba ba bat’o kuma fa 6 milioni, kamba a li muñwi ku b’a 1,000. Kuli mu bone kuli luli ki tohonolo ye ipitezi ku ziba niti ye mwa Linzwi la Mulimu, m’u nge puzo i liñwi fela ya za Bibele: Ki sifi se si ezahala kwa batu ha ba shwa? Lwa ziba kuli Mañolo a bulela kuli mutu ki moyo mi kacwalo moyo w’a shwa, ni kuli bafu ha ku na se ba ziba. (Genese 2:7) Niteñi, buñata bwa bulapeli bwa lifasi bu lumela tuto ya buhata ya kuli nto ye ñwi ye mwahali ku mutu ya zwelangapili ku pila hamulaho wa lifu. Yeo ki ye ñwi ya lituto ze tomile mibisi mwa likeleke za Krestendomu. Hape ya ipa m’ata ni mwa bulapeli bwa Mamozilemu, bwa Shinto, bwa Sibuddha, bwa Sihindu, bwa Sijaini, bwa Sijuda, bwa Sikh, ni bwa Tao. Mu nahane fela taba ye—libilioni za batu ba kwashekilwe ka tuto i liñwi fela yeo ya buhata!

6, 7. (a) Ki bomañi fela ba ba kona ku fumana “ku ziba za Mulimu”? (b) Ki ufi mutala o bonisa kuli Jehova u lu file ku utwisisa lika z’e bolomoka “ba ba butali ni ba ba talifile” ba bañata?

⁶ Kiñi batu ba bañata ha ba si ka fumana “ku ziba za Mulimu”? Libaka kikuli ha lu koni ku utwisisa luli ze li bulela Linzwi la Mulimu a sa lu tusi. Mu hupule kuli zibo yeo ki mpo. Jehova u i tambeka fela ba ba tabela ku shwashwata mwa Linzwi la hae ka busepahali ni buikokobezo. Ba ba cwalo mwendi haki ba ba “butali ka mukwa wa batu.” (1 Makorinte 1:26) Mwa lifasi, ba bañata ku bona mane ba kona k’u ngiwa ku ba “batu ba ba si ka ituta, ili batu fela.” (Likezo 4:13) Niteñi, seo ha si bilaezi. Jehova u lu fa zibo ya “ku ziba za Mulimu” kabakala bunde bwa fumana mwa pilu ya luna.

⁷ Ki wo mutala. Bocaziba ba bañata mwa Krestendomu ba shokomozi litaba ze ñata ze talusa Bibele ka butungi. Lihatiso za teñi li talusa mo ne li inezi lika ha ne i ñolwa, li talusa manzwi a Siheberu ni a Sigerike, ni ze ñwi cwalo. Kana bocaziba ba ba itutile hahulu bao ba fumani luli zibo ya “ku ziba za Mulimu”? Pili lu buze kuli, kana b’a utwisisa hande-nde makanatelo a Bibele—a kuli puso ya Jehova i ka boniswa ku luka ka Mubuso wa hae wa kwa lihalimu? Kana ba ziba kuli Jehova Mulimu h’a yo mwa Silalu? Luna lwa utwisisa hande-nde litaba ze cwalo. Libaka? Jehova u lu file ku utwisisa hande-nde litaba za hae z’e bolomoka “ba ba butali ni ba ba talifile” ba bañata. (Mateu 11:25) Jehova luli u fuyola ba ba utwana ni yena!

‘Muñ’a Bupilo U Babalela Kamukana Ba Ba Mu Lata’

8, 9. (a) Davida n’a talusize cwañi mbuyoti ye ñwi ye ba fiwa balikani ba Jehova? (b) Bakreste ba niti ba tokwelañi silelezo ya Mulimu?

⁸ Mbuyoti ye ñwi ye ba na ni yona balikani  ba Jehova kikuli wa ba sileleza. Davida, ya n’a kandaukile hañata-ñata, n’a ñozi samu ye li: “[Muñ’a] Bupilo u fakaufi ni ba ba mu lapela kaufela, ili kaufela ba ba mu lapela ka ku eza niti. U fa ba ba mu saba se si shukezwi ki bona, hape u utwa ni mihuwo ya bona, mi wa ba lamulela. [Muñ’a] Bupilo u babalela kamukana ba ba mu lata.” (Samu 145:18-20) Ee, Jehova u fakaufi ni ba ba mu lata mi kacwalo wa kona ku pakisa ku ba tusa ha ba huweleza ku yena ku kupa tuso.

⁹ Lu tokwelañi silelezo ya Mulimu? Kwand’a ku ziyezwa ki bupilo bwa mwa “linako ze tata” ze, Bakreste ba niti ki bona b’a lelile hahulu ku shombota Satani Diabulosi, yena Sila sa Jehova se situna. (2 Timotea 3:1) Kabemba-muca-habeli y’o u itamile ku lu “ca.” (1 Pitrosi 5:8) Satani wa lu nyandisa, ku lu swalela fa kakoshi, ni ku lu lika. Hape u iteekela mihupulo ni maikuto a luna ili f’o a kona ku kenela teñi. Mulelo wa hae ki wa kuli a shekeshise tumelo ya luna ni ku lu tataula kwa moya. (Sinulo 12:12, 17) Bakeñisa kuli lu lwana ni sila se si m’ata seo, kana ha ku wisi pilu ku ziba kuli “[Muñ’a] Bupilo u babalela kamukana ba ba mu lata”?

10. (a) Jehova u babalela cwañi batu ba hae? (b) Ki ifi silelezo ya butokwa ka ku fitisisa, mi libaka ki lifi?

¹⁰ Kono Jehova u babalela cwañi batu ba hae? Silelezo y’a lu sepisize ha i talusi kuli ha lu na ku ba ni butata mwa bupilo nako ye; hape ha i talusi kuli u mwa tamo ya ku lu tusa ka makazo. Nihakulicwalo, Jehova w’a sileleza sicaba sa hae ka sikwata kwa pulao. Ha ku na za n’a ka fela Diabulosi tukelo ya ku yundisa balapeli ba niti kaufela mwa lifasi! (2 Pitrosi 2:9) Mi sihulu, Jehova u lu sileleza kwa moya. U lu fa z’e lu konisa ku tiyela miliko ni ku sileleza silikani sa luna ni yena. Kwa mafelelezo, silelezo ya kwa moya ki yona silelezo ya butokwa ka ku fitisisa. Libaka kikuli, ibile fela lwa zwelapili ku ba balikani ba Jehova, ha ku na nto ifi kamba ifi—nihaiba lifu—ye kona ku lu sinyeza ku ya ku ile.—Mateu 10:28.

11. Ki lifi z’a lukisize Jehova za ku sileleza ka zona batu ba hae kwa moya?

¹¹ Jehova u lukisize ze ñata za ku sileleza ka zona kwa moya balikani ba hae. Ka Linzwi la hae, yona Bibele, u lu fa butali bo bu lu tusa mwa miliko ye miñata. (Jakobo 1:2-5) Ku eza z’a lu eleza Mañolo ki silelezo. Hape, Jehova u fana “Moya o Kenile ku ba ba u kupa ku yena.” (Luka 11:13) Moya w’o ki ona m’ata a matuna ka ku fitisisa a’ li teñi, kacwalo ka ona lwa kona ku tula muliko kaufela o’ kana wa lu kundamela. Ka Kreste, Jehova u fana “batu ba ba li limpo.” (Maefese 4:8, NW) Banna ba ba hulile kwa moya bao ba lika ka t’ata ku likanyisa mufelañeke wa Jehova ha ba tusa balapeli ba bañwi.—Jakobo 5:14, 15.

12, 13. (a) Jehova u lu fa ka linzila lifi lico za kwa moya ka nako ye lukela? (b) Mu ikutwa cwañi ka za lika zeo Jehova a lu lukiselize kuli lu be hande kwa moya?

¹² Hape Jehova u lu babalela ka ku lu fa lico za kwa moya ka nako ye lukela. (Mateu 24:45) Jehova u lu fa ze lu tokwa ka nako ya teñi, mi u eza cwalo ka lihatiso, ze cwale ka limagazini za Tora ya ku Libelela ni Awake!, ni ka  mikopano ya puteho, ya mupotoloho, ni ya sikiliti. Kana mwa hupula fo ne mu utwezi nto ye ñwi kwa mukopano wa Sikreste o mutuna kamba o munyinyani ili ye ne i mi keni kwa pilu ni ku mi tiisa kamba ku mi omba-omba? Kana mu kile mwa bala taba ku ye ñwi ya limagazini zeo mi mwa ikutwa kuli inge ne i ñolezwi mina ka sibili?

¹³ Se siñwi sa lilwaniso za Satani ze sebeza hahulu ki zwafo, mi ha i na mwan’a moola. Satani wa ziba hande kuli ku ina nako ye telele lu si na mwangalwa kwa kona ku lu anya m’ata, mane ni ku lu bisa bunolo ku sitatala. (Liproverbia 24:10) Bakeñisa kuli Satani u bata ku lu sitatalisa ka maikuto a ku zwafa, lu tokwa tuso. Limagazini za Tora ya ku Libelela ni Awake! ka linako ze ñwi li bile ni litaba z’e lu tusa ku lwanisa zwafo. Kaizeli yo muñwi wa Sikreste n’a ñozi cwana ka taba ye ñwi ye cwalo. N’a ize: “Ne ni balanga taba yeo ibat’o ba zazi ni zazi, mi ni sa cipitanga. Ni i beyanga bukaufi ni bulobalo bwa ka ilikuli ni i balange fo ni ikutwela bumaswe kaufela. Kabakala litaba ze cwalo, ni ikutwanga inge kuli Jehova u ni kumbatile.” * Kana ha lu itebuhi ku Jehova kwa ku lu fanga lico za kwa moya ka bunako? Mu hupule kuli z’a lu lukiselize kuli li lu bise hande kwa moya ki bupaki bwa kuli u sutelezi ku luna mi wa lu bukeleza.

Ku Atumela Yena “Ya Utwa Milapelo”

14, 15. (a) Ki ifi mpo ya ka butu yeo Jehova a fa balikani ba hae? (b) Ki kabakalañi ha i li tohonolo ye tuna kuli lu filwe tukuluho ya ku atumela Jehova ka tapelo?

¹⁴ Kana mu lemuhile kuli batu ha ba nze ba ba ni m’ata ni situlo, hañata ba ba mwatas’a bona ku ba belanga t’ata ku ba atumela? Jehova Mulimu bo? Kana u kwahule hahulu kuli batu niha ba mu lapela, yena ki kw’a sa isi? Batili! Mpo ya tapelo ki mbuyoti ye ñwi hape yeo Jehova a i fa balikani ba hae. Ki tohonolo ye mbwetukisa luli ku fiwa tukuluho ya ku atumela yena “ya utwa milapelo.” (Samu 65:2) Libaka?

¹⁵ Ka mutala, yo muhulu wa kampani ye tuna u na ni buikalabelo bo buñata. Ki yena ya ketanga litaba z’a ka talima yena ka sibili ni z’a ka fa ba bañwi. Ka ku swana, Mwambakani-ya-Pahami ni yena u na ni tukelo ya ku keta litaba z’a ka talima yena ka sibili ni z’a ka fa ba sili ku li talima. Mu nahane zote zeo Jehova a kambekile fa maheta a Jesu, Mwan’a hae ya latwa. Mwana y’o u filwe “mata a ku atula.” (Joani 5:27) Mangeloi a “beilwe mwa puso ya hae.” (1 Pitrosi 3:22) Jesu u filwe ku itusisa moya o kenile wa Jehova ili o m’ata kuli ka ona a kone ku etelela balutiwa ba hae fa lifasi. (Joani 15:26; 16:7) Kacwalo  kwa swanela Jesu ha n’a ize: “Ni filwe bulena kaufela mwa lihalimu ni mwa lifasi.” (Mateu 28:18) Niteñi, ka za litapelo za luna, Jehova u ketile ku ikenya teñi yena ka sibili. Ki kabakaleo Bibele i lu laela ku lapela ku Jehova fela, ka libizo la Jesu.—Samu 69:13; Joani 14:6, 13.

16. Lu kona ku kolwelañi kuli Jehova wa teelezanga luli kwa litapelo za luna?

¹⁶ Kana Jehova wa teelezanga luli kwa litapelo za luna? Kambe kuli h’a na taba ni zona, n’a si ke a lu susueza kuli lu “tundamene mwa ku lapela” kamba ku nepela milwalo ni lipilaelo za luna ku yena. (Maroma 12:12; Samu 55:22; 1 Pitrosi 5:7) Basepahali ba ba bulezwi mwa Bibele ne ba kozwi kuli Jehova wa teelezanga luli kwa litapelo. (1 Joani 5:14) Kacwalo, Davida n’a bulezi mwa samu kuli: “[Jehova] u ka utwa linzwi la ka.” (Samu 55:17) Ni luna lwa swanela luli ku kolwa kuli Jehova u fakaufi, mi u iteekezi ku utwa mihupulo ni lipilaelo za luna kaufela.

Jehova Wa Fanga Batanga ba Hae Mupuzo

17, 18. (a) Jehova u ikutwa cwañi ka za sebelezo ye sepahala ya batu ba hae? (b) Mu taluse m’o Liproverbia 19:17 i boniseza kuli Jehova wa lemuha likezo za luna ze musa.

¹⁷ Batu ni ko ba ka eza lika ze ñwi kamba ku hana ku li eza, situlo sa Jehova sa ku ba Mwambakani-ya-Pahami ha si na ku cinca. Nihakulicwalo, Jehova ki Mulimu wa buitumelo. Wa tabela, mi mane wa katelwa sebelezo ye sepahala ya batu ba hae. (Samu 147:11) Kacwalo, litohonolo le liñwi la balikani ba Jehova ki la kuli, Wa fanga batanga ba hae mupuzo.—Maheberu 11:6.

¹⁸ Bibele i bonisa hande-nde kuli Jehova wa tabela ze ba eza balapeli ba hae. Ka mutala, lu bala kuli: “Ya tusa mubotana u cisa [Muñ’a] Bupilo sikoloti; mi [Muñ’a] Bupilo u ka mu kutiseza se si mu lukela.” (Liproverbia 19:17) Mulao wa Mushe n’o bonisize kuli Jehova u  na ni musa kwa babotana. (Livitike 14:21; 19:15) Jehova u ikutwa cwañi ha lu mu likanyisa ka ku eza babotana ka musa? Ha lu fana ku mubotana lu sa libeleli ku kutisezwa, Jehova u nga kuli seo ki sikoloti sa Hae. Jehova u sepisa ku kutisa sikoloti seo ka sishemo ni ka limbuyoti. (Liproverbia 10:22; Mateu 6:3, 4; Luka 14:12-14) Ee, ha lu eza ka mufelañeke mulapeli yo muñwi ya mwa butokwi, pilu ya Jehova ya taba. Lwa itebuha hakalo ku ziba kuli Ndat’a luna wa kwa lihalimu wa lemuha likezo za luna ze musa!—Mateu 5:7.

19. (a) Lu kona ku kolwelañi kuli Jehova u itebuha ze lu eza mwa musebezi wa ku kutaza ni ku tahisa balutiwa? (b) Jehova u fa mupuzo mañi kwa likezo za sebelezo ze ezezwa Mubuso wa hae?

¹⁹ Jehova sihulu u itebuha ze lu ezeza Mubuso wa hae. Ha lu sutelela ku Jehova, kaniti lu ka bata kuli ka nako, m’ata, ni tutu ya luna lu eze mo lu konela kaufela musebezi wa ku shaela Mubuso ni ku tahisa balutiwa. (Mateu 28:19, 20) Fokuñwi, lu kana lwa ikutwa kuli ze lu peta ha li na tuso. Pilu ya luna ye si ka petahala mwendi mane i ka lu nahanisa kuli mwendi Jehova h’a tabeli buikatazo bwa luna. (1 Joani 3:19, 20) Kono Jehova wa itebuha mpo kaufela—ibe bunyinyani i mane—ili ye fiwa ka pilu ye susumezwa ki lilato. (Mareka 12:41-44) Bibele i lu kolwisa kuli: “Mulimu hasi ya si ka luka, kuli a libale misebezi ya mina, ni lilato le mu bonisize kwa Libizo la hae.” (Maheberu 6:10) Ee, Jehova wa hupula ni ku fa mupuzo niheba kwa kezonyana ya sebelezo ye ezelizwe Mubuso wa hae. Kwand’a limbuyoti ze tuna za kwa moya cwale, lwa kona ku isepisa minati ya bupilo bwa mwa lifasi le linca le li taha, ili m’o Jehova a ka fumbutulula hahulu lizoho la hae ni ku fa balikani ba hae bote lika kaufela ze ba lakaza!—Samu 145:16; 2 Pitrosi 3:13.

20. Mwa silimo kaufela sa 2003, lu kona ku hupula cwañi manzwi a liñolo la luna la silimo, mi ze ka zwa mwateñi ki lifi?

²⁰ Mwa silimo kaufela sa 2003, lu itekule ku bona haiba lwa tundamena ku n’o sutelela ku Ndat’a luna wa kwa lihalimu. Haiba ku cwalo, lwa kona ku kolwa kuli u ka eza se siñwi sina mwa sepiselize. Esi mane “ki Mulimu ya sa koni ku puma.” (Tite 1:2) Haiba mu sutelela ku yena, ni yena u ka sutelela ku mina. (Jakobo 4:8) Ze ka zwa mwateñi ki lifi? Mu ka fuyolwa hahulu cwale ni ku ba ni tibelelo ya ku n’o sutelela hahulu ku Jehova ku ya ku ile!

[Litaluso za kwatasi]

Kana Mwa Hupula?

• Ba ba sutelela ku Jehova u ba fa mpo mañi?

• Jehova u lukisize lifi za ku sileleza ka zona batu ba hae kwa moya?

• Ki kabakalañi ha i li tohonolo ye tuna kuli lu filwe tukuluho ya ku atumela Jehova ka tapelo?

• Bibele i bonisa cwañi kuli Jehova u itebuha sebelezo ye sepahala ya batu ba hae?

[Lipuzo za Tuto]

[Siswaniso se si fa likepe 15]

Jehova u lu file ku utwisisa lituto za hae

[Maswaniso a fa likepe 16, 17]

Jehova wa sileleza kwa moya

[Siswaniso se si fa likepe 18]

Jehova u fakaufi, mi u iteekezi ku utwa tapelo kaufela ya luna