“Anin A Hnaih Ang Che U”
“Anin A Hnaih Ang Che U”
“[Pathian] chuan min hlat lo ṭheuh si a.”—TIRHKOHTE 17:27.
1, 2. (a) Arsiin a bawm chiai mai vân mawi tak kan thlîr hian, Siamtu chungchâng zawhna engte nge kan inzawh theih? (b) Engtin nge Pathian mithmuha mihringte hi pawimawh lo an nih lohzia Bible-in min hrilh?
ZAN thiang taka arsi pe ûnte chu thlîrin, mak tihna leh ropui tihnain i khat tawh ngai em? Arsi chhiarsên lohte leh vân boruak zau tak maite hi thil mak tak zawng a ni. He vânlâwt zau tak maiah hian, kan lei hi chu chhut han te tak tê ang chauh a ni a. Chu chu “leilung zawng zawng chunga Chungnungber,” Siamtu chu mihringte ngaihsak lo tûr khawpin a sâng lutuk emaw, an hriat ni thei tûr chuan a awm hla lutuk emaw a, hriat thiam theih rual a ni lo tihna a ni em?—Sâm 83:18.
2 Bible chuan mihringte hi Jehova mithmuhah an pawimawh tih min hrilh a. Dik takin, Pathian Thu chuan: “Ani chuan min hlat lo ṭheuh si a,” tia sawiin amah zawng tûrin min fuih a ni. (Tirhkohte 17:27; 1 Chronicles 28:9) Ni e, Pathian hnaih tûra hma kan lâk phawt chuan, kan thawhrimna chu min chhâng lêt ngei dâwn a ni. Eng kawngin nge? Kum 2003 kum châng chuan he chhânna duhawm tak hi min hrilh a ni: “Anin a hnaih ang che u,” tiin. (Jakoba 4:8) Tûnah chuan, amah hnaihtute hnêna Jehova malsâwmna vûr ropui tak ṭhenkhat i lo sawikhâwm ang u.
Jehova Hnên Aṭanga Mi Mal Thilpêk
3. Eng thilpêk nge Jehova’n amah hnaihtute hnênah a pêk?
3 A bul berah chuan, Jehova chhiahhlawhte chuan Jehova’n a mite tân liau liauva a khêk, thilpêk hlu tak chu an dawng a. Chu thilpêk ang chu he khawvêla thiltihtheihna zawng zawng te, hausakna zawng zawng te, leh thiamna zawng zawng te pawhin a pe thei lo. Chu chu mi mal thilpêk, Jehova’n amah hnaihtute chauh a pêk chu a ni. Chu chu eng nge ni? Pathian Thu chuan: “Hriat thiam theihna . . . i auh chuan, tangkarua anga i zawn a, ro phûm rûk anga i zawn chuan, LALPA ṭih nachâng i lo hria ang a, Pathian hriatna chu i chhar chuak ang. LALPA chuan finna a pe ṭhîn,” tiin a chhânna min pe a ni. (Thufingte 2:3-6) Han ngaihtuah teh, ṭha famkim lo mihringte’n “Pathian hriatna” an chhar chhuak thei tih chu! Chu thilpêk—Pathian Thua hmuh theih hriatna—chu “ro phûm rûk” nêna tehkhin a ni. Eng nge a chhan?
4, 5. Engvângin nge “Pathian hriatna” chu “ro phûm rûk” nêna kan tehkhin theih? Sawifiah rawh.
4 A chhan pakhat chu, Pathian hriatna hian hlutna nasa tak a nei a. A lâwmman hlu berte zînga pakhat chu chatuana nun theih beiseina hi a ni. (Johana 17:3) Mahse, chu mi hriatna chuan tûna kan nun ngei pawh a tichangtlung a ni. Entîr nân, Pathian Thu uluk taka kan zirna aṭangin, hêng zawhna pawimawh tak takte chhânna kan hria a ni: Pathian hming eng nge? (Sâm 83:18) Mitthite dinhmun dik tak chu eng nge ni? (Thuhriltu 9:5, 10) Leilung leh mihringte tâna Pathian thiltum chu eng nge ni? (Isaia 45:18) Tin, nun dân kawng ṭha ber chu Bible thurâwn fing tak nunpui hi a ni tih kan lo hriat phah bawk. (Isaia 30:20, 21; 48:17, 18) Chuvângin, nun lungkhamnate tuar thei tûr leh hlimna tak tak leh lungawina tak tak thlen thei nun kawng ûm tûra min ṭanpuitu kaihhruaina ṭha tak kan nei a ni. A pawimawh berah chuan, Pathian Thu kan zirna chuan Jehova mize ropui tak takte min hriattîr a, amah min hnaihzualtîr a ni. “Pathian hriatna” chunga innghat Jehova nêna inlaichînna ṭha tak neih aia hlu zâwk eng nge awm thei ang le?
5 Pathian hriatna hi “ro phûm rûk” anga a sawi theih chhan dang pawh a awm a. Ro tam takte ang bawkin, he khawvêlah hian a vâng hle a ni. He khawvêla mihring tlûklehdingâwn rûk zîngah chuan Jehova thuhretu maktaduai ruk vêl, a nih loh leh 1,000 zêla 1 vêl chauhvin “Pathian hriatna” chu an nei a. Pathian Thu, thutak hriat chu ro hlu vâng tak a nihzia sawifiah nân, Bible zawhna pakhat chauh hi han ngaihtuah teh: Mihringte an thih hnuah an chungah eng nge lo thleng? tih hi. Mi chu a thi a, mitthite chuan engmah an hre lo tih Pathian Lehkha Thu aṭangin kan hria a ni. (Thuhriltu 9:5, 10; Ezekiela 18:4) Mahse, mi a thih hnuah thil engemaw dam zui a awm nia rinna thurin dik lo chu khawvêla sakhaw tam zâwkin a pawm a ni. Chu chu Kristianna ram sakhaw rin pui ber pawh a ni a. Tin, Buddhist sakhuaah te, Hindu sakhuaah te, Mosolman sakhuaah te, Jain sakhuaah te, Juda sakhuaah te, Shinto sakhuaah te, Sikh sakhuaah te, leh Tao sakhuaah te pawh, chu rinna chu a lâr hle bawk. Han ngaihtuah teh—he thurin dik lo pakhat mai pawh hian mi tlûklehdingâwn tam takte chu a bum a nih chu!
6, 7. (a) Tute chauhvin nge “Pathian hriatna” chhar chhuak thei? (b) Jehova chuan “mi fing leh mi bengvârte” hmuh loh hriat thiamna min pêkzia eng entîrna hian nge târ lang?
6 Engati nge mi tam zâwkte hian “Pathian hriatna” an chhar chhuah loh? A chhan chu, Pathian ṭanpuina tel lo chuan Pathian Thu hi miin a hriatthiam theih loh vâng a ni. Tin, he hriatna hi thilpêk a ni tih hre reng bawk la. Jehova chuan chu thilpêk chu rinawmna leh inngaihtlâwmna nêna a Thu zawng peihte hnênah chauh a pe ṭhîn a. Chûng mite chu “tisa lama mi fing” an ni kher lo thei. (1 Korinth 1:26) Tin, an zînga tam takte chu khawvêl tehnaah chuan “lekha thiam lo, mi mâwl tak” nia ngaih pawh an ni hial mai thei bawk. (Tirhkohte 4:13) Mahse, chûngte chu thil pawimawh a ni lo. Jehova chuan kan thinlung ṭhatnate a hmuh avângin, “Pathian hriatna” min pe a ni.
7 Entîrna pakhat ngaihtuah ta la. Kristianna rama mi thiam tam takte chuan Bible hrilhfiahna chi hrang tam tak an siam chhuak a. Chûng hrilfiahnate chuan a tûn hma thawnthu te, Hebrai leh Grik ṭawnga a awmzia te, leh thil dangte pawh a sawifiah mai thei. Mahse, chûng an zirna zawng zawngte avângin “Pathian hriatna” chu an chhar chhuak em? Aw le, anni chuan Bible thupui ber—a vân lam Lalram hmanga Jehova lal chungnunna thiam chantîrna—chu chiang takin an hre thiam em? Pathian Jehova chu Trinity pêng pakhat mai a ni lo tih an hria em? Chûng thilte chungchâng hriatthiamna dik chu kan nei tlat a ni. Engvâng nge? Jehova chuan “mi fing leh mi bengvârte” neih loh, thlarau lam thutak hriatthiamna min pêk vâng a ni. (Matthaia 11:25) Jehova chuan amah hnaihtute chu mal a va sâwm nasa êm!
“LALPA Chuan Amah Hmangaihtute Zawng Zawng Chu A Vawng Ṭha Ṭhîn”
8, 9. (a) Engtin nge Davida chuan Jehova hnaihtute tâna malsâwmna dang chu a sawifiah? (b) Engvângin nge Kristian dikte chuan Pathian vênhimna an mamawh?
8 Jehova hnaihtute chuan malsâwmna dang pawh an dawng bawk a ni—A vênhimna chu. Harsatna leh buaina tam tak tuar, fakna hla phuahtu Davida chuan heti hian a ziak: “LALPA chuan a kotu zawng zawngte chu a hnaih ṭhîn a. Tih tak zeta amah kotu zawng zawngte chu. Amah ṭihtute duh chu a hlawhtlintîr ang a; an au thâwm a hria ang a, anni chu a chhandam ang. LALPA chuan amah hmangaihtute zawng zawng chu a vawng ṭha ṭhîn,” tiin. (Sâm 145:18-20) Ni e, Jehova chuan amah hmangaihtute chu a hnaih a; chuvângin, ṭanpuina dîla an auhna chu a chhâng nghâl vat thei a ni.
9 Engvângin nge Pathian vênhimna kan mamawh? “Hun khirh takte” awm huna chêng kan nih avânga a nghawngte kan tawrh bâkah, Kristian dikte chu Jehova Hmêlma lian ber, Diabol-Setana tum berte an nih vâng a ni. (2 Timothea 3:1) Chu hmêlma verther tak chuan min “ei” a tum tlat a ni. (1 Petera 5:8) Setana chuan min tiduhdah a, min nêkchêpin, min thlêm vêl a. Tin, a kawih leh theih tûr rilru leh thinlung nei mi chu a zawng rân bawk a ni. Ani chuan thiltum a nei rân a: kan rinna tihchauh leh kan thlarau lam tihchhiat chu. (Thu Puan 12:12, 17) Chutianga hmêlma thiltithei tak hmachhawn tûr kan nih avângin, “LALPA chuan amah hmangaihtute zawng zawng chu a vawng ṭha ṭhîn” tih hriat chu a thlamuanthlâk hle lâwm ni?
10. (a) Engtin nge Jehova’n a mite a vawn ṭhat? (b) Vênhimna zînga pawimawh ber chu eng nge ni a, eng vâng nge?
10 A nih leh, engtin nge Jehova chuan a mite chu a vawn ṭhat ṭhin? Vênghim tûra thu min tiam avângin he khawvêlah hian harsatna tâwk miah lovin kan awm dâwn tihna a ni lo va; kan tân thilmak a ti dâwn tihna lah a ni hek lo. Nimahsela, Jehova chuan a mite chu a pâwlin tisa lama vênhimna a pe a ni. Tihah chuan, betu dikte he lei ata Setana nuai bo veka an awm chu a phal hauh lo vang le! (2 Petera 2:9) Kawng dang zawng aiin, Jehova chuan thlarau lamah min vênghim tlat a ni. Fiahnate tuar chhuak tûr leh amah nêna kan inlaichînna vênghim tûra kan mamawh zawng zawngte chu min pe a ni. A tâwp a tâwpah chuan, thlarau lam vênhimna chu vênhimna zawng zawng zînga pawimawh ber a ni. Engvâng nge? Jehova nêna inlaichînna kan neih chhûng chuan, eng mahin—thihna hial pawhin—chatuana min tihnat theih loh avângin.—Matthaia 10:28.
11. Eng ruahmanna nge Jehova’n a mite thlarau lama vênhim nân a buatsaih?
11 Jehova chuan amah hnaihtute thlarau lam vênhim nân ruahmanna tam tak a siam a. A Thu, Bible hmangin fiahna chi hrang hrangte hmachhawn thei tûrin finna min pe a ni. (Jakoba 1:2-5) Pathian Lehkha Thua fuihna kan hmuhte nunpuina ringawt pawh chu invênhimna a ni. Chu bâkah, Jehova chuan “a dîltute chu thlarau thianghlim” a pe ṭhîn a. (Luka 11:13) Chu thlarau chu lei leh vâna chakna thiltithei ber a ni a; chuvângin, fiahna leh thlêmna engpawh chu hlawhtling taka hmachhawn tûrin min thuam thei a ni. Jehova chuan Krista hmangin ‘mihringte hnêna thilpêkte’ a pe a. (Ephesi 4:8) Hêng thlarau lama mi puitlingte hian an chibai bûkpuite an ṭanpuinaah, Jehova khawngaihna neih ang chiah chu lantîr an tum ṭâng ṭâng a ni.—Jakoba 5:14, 15.
12, 13. (a) Eng hmangin nge Jehova’n thlarau lam chaw chu a hun apianga min pêk? (b) Kan thlarau lam ṭhatna tûra Jehova châwmnate hi engtin nge i ngaih?
12 Jehova chuan min vawn ṭhat nân thil dang pawh min pe bawk a ni: a hun apianga thlarau lam chaw chu. (Matthaia 24:45) Thu leh hla chhutchhuah, Vênnainsâng leh Awake! pawh tiamin, inkhâwmte, assembly-te, leh inkhâwmpuite hmangin, Jehova chuan kan mamawh tak thilte chu kan mamawh hun takah min pe ṭhîn a ni. Kristian inkhâwmna emaw, assembly emaw, a nih loh leh inkhâwmpui emawa i thil hriatin i rilru a khawih dân leh a tihchak dân emaw, a thlamuan dân emaw chu i hre chhuak thei em? A chunga chanchinbu târ lantea thuziak pakhat tal chu i tân liau liauva ziak niin i hre tawh ngai em?
13 Setana râlthuam hlawhtling ber mai pakhat chu lunghnualna hi a ni a, keini pawh chu mi lakah chuan vênhim kan ni bîk lo. Ani chuan hun rei tak chhûng beidawnna chuan kan chakna a tibo thei a, derthâwng takin min siam hial thei tih a hre hneh êm êm a ni. (Thufingte 24:10) Setana chuan chu lunghnualna chu remchânga lâk a tum ṭhin avângin, ṭanpui kan ngai a. Vênnainsâng leh Awake! magazine-te chuan lunghnualna kan dona kawnga min ṭanpui thei thuziak a chhuah fo a ni. Chutiang thuziak pakhat chungchângah Kristian unaunu pakhat chuan: “Chu thuziak chu nî tin deuhthaw ka chhiar a, ka chhiar apiangin ka biangah mittui a luang zawih zawih ṭhîn. Ka lunghnual châng apianga ka chhiar reng theih tûrin ka khum bulah ka dah reng ṭhîn a. Hetiang thuziakte ka chhiar hian, Jehova vênhimna bân chuan min kuah tlat niin ka inhre ṭhîn,” * tiin a ziak. A hun taka thlarau lam chaw min pêk avângin Jehova chungah chuan kan lâwm hle a ni lâwm ni? Kan thlarau lam ṭhat nâna ruahmanna a siamte hi min hnaihzia leh a vênhimna hnuaia min dahzia târ langtu a ni tih hre reng ang che.
“Ṭawngṭaina Ngaithlatu” Be Pawp Rawh
14, 15. (a) Eng mi mal malsâwmna nge Jehova’n amah hnaihtute chungah a vûr? (b) Engvângin nge a thlâwna Jehova biak pawh theihna chu thilpêk ropui tak a nih?
14 Mihringte hian thiltihtheihna leh thuneihna an lo chan hian, an thuneihna hnuaia awmte tân biak pawh an harsat phah ṭhinzia hi i hre tawh ngai em? Pathian Jehova chungchâng eng nge ni ve thung? A hnêna mihringte thu sawi ngaihthlâksak tûrin a inlahrang lutuk em? Teuh lo mai! Ṭawngṭai theihna thilpêk hi amah hnaihtute hnêna Jehova malsâwmna pêkte zînga pakhat dang a ni. A thlâwna “ṭawngṭaina ngaithlatu” biak pawh theihna hi thilpêk ropui tak a ni. (Sâm 65:2) Eng nge a chhan?
15 Entîr nân: Pâwl lian tak pakhata an hotu ber chuan mawhphurhna tam tak a nei a. Ama hna chan tûr leh mi dangte hnêna a hlan chhâwn tûrte chu a ruat fel a ni. Chutiang bawk chuan, lei leh vân Awptu Chungnungber pawhin amah ngeiin a enkawl tûr leh mi dangte hnêna a hlan chhâwn tûrte chu a ruat fel a. A Fapa, a hmangaih êm êm Isua hnêna a hlan mawhphurhna zawng zawngte han ngaihtuah teh. Fapa chu “rorêl tûrin thuneihna” pêk a ni a. (Johana 5:27, NW) Vântirhkohte chu “ama thu thua awmtîrin” an awm a ni. (1 Petera 3:22) Jehova thlarau thianghlim thiltithei tak chu Isua’n leia a zirtîrte ṭanpui nân leh kaihhruai nân a hmang thei reng a ni. (Johana 15:26; 16:7) Chuvângin a ni, Isua chuan: “Lei leh vâna thuneihna zawng zawng ka hnênah pêk a ni tawh” tiin a sawi theih ni. (Matthaia 28:18) Mahse, ṭawngṭai chungchângah chuan, Jehova chuan amah ngeia tih a duh tlat a ni. Chuvângin, Bible chuan Isua hminga Jehova hnên chauhva ṭawngṭai tûrin min zirtîr a ni.—Sâm 69:13; Johana 14:6, 13.
16. Engvângin nge Jehova chuan kan ṭawngṭainate a ngaithla tak zet a ni tih kan rin ngheh theih?
16 Jehova hian kan ṭawngṭaina a ngaithla tak zet em? Kan ṭawngṭainate a ngaihthah a, a ngaihven lo a nih chuan, “ṭawngṭai fan fan” tûr emaw, kan phurritte leh mangannate a chunga nghat tûrin emaw min ti hauh lo vang. (Rom 12:12; Sâm 55:22; 1 Petera 5:7) Bible hun laia chhiahhlawh rinawmte chuan Jehova’n ṭawngṭaina a ngaithla a ni tih an ring nghet tlat a ni. (1 Johana 5:14) Chuvângin, fakna hla phuahtu Davida chuan: “[Jehova’n] ka aw a ngaithla ang,” tiin a sawi a ni. (Sâm 55:17) Keini pawhin Jehova chuan min hnaih reng a, kan ngaihtuahna leh lungkhamna engkim ngaihthlâk a peih reng tih rinna tûr chhan kan nei a ni.
Jehova Chuan A Chhiahhlawhte Lâwmman A Pe Ṭhîn
17, 18. (a) Engtin nge Jehova chuan a thil siam finna neite rinawm taka rawngbâwlna chu a ngaih? (b) Zahngai taka kan thiltihte Jehova hmuh lovin a awm lohzia Thufingte 19:17 târ lan dân sawifiah rawh.
17 Lei leh Vâna Lal Chungnungber a nih angin, Jehova nihna chu mihringte’n an tih mai theih leh an hnâwl mai theih thilte hian a khawih buai ve lo. Nimahsela, Jehova chu lâwmna lantîr peih reng Pathian a ni a. A thil siam finna neite rinawm taka rawngbâwlna chu a hlutin, a hlimpui hle a ni. (Sâm 147:11) Chuvângin, Jehova hnaihtute’n hlâwkna dang an dawn leh chu hei hi a ni: A chhiahhlawhte lâwmman a pêk ṭhin hi.—Hebrai 11:6.
18 Jehova chuan amah betute thiltih a hlutzia Bible chuan chiang takin a târ lang a. Entîr nân, heti hian kan chhiar: “Mi rethei khawngaih chuan LALPA a pûktîr a ni a, a thiltih ṭhat chu a rûl ang,” tiin. (Thufingte 18:17) Jehova’n mi retheite chunga zahngaihna a neihzia chu Mosia Dân-ah a lang chiang hle a ni. (Leviticus 14:21; 19:15) Mi retheite kan dâwrnaa a zahngaihna kan entawn hian, engtin nge Jehova’n a ngaih ṭhin le? Beisei lêt nei hauh lo va retheite hnêna kan pêk hian, Jehova chuan Amah kan pûktîr angah a ngai a. Chu bâ chu duhsakna leh malsâwmna nêna rulh min tiam a ni. (Thufingte 10:22; Matthaia 6:3,4; Luka 14:12-14) Ni e, kan chibai bûkpui ṭanpui ngaite chunga khawngaihna kan lantîr hian, chu chuan Jehova thinlung a khawih a ni. Zahngai taka kan thiltihte kan Pa vâna mi hmuh lohvin a awm lo tih hriat chu a va lâwmawm êm!—Matthaia 5:7.
19. (a) Engvângin nge Jehova chuan thuhrilh leh zirtîr siam rawngbâwlnaa kan thiltihte a hlut tih kan rin tlat theih? (b) Engtin nge Jehova chuan a Lalram tâna rawngbâwlna chu lâwmman a pêk ṭhin?
19 Jehova chuan a Lalram tâna kan thiltihte chu a hlut lehzual a. Jehova kan hnaih phawt chuan, Lalram thuhrilh nân leh zirtîr siam nâna kan hun te, chakna te, leh sum leh paite hman chu kan duh ṭhîn a ni. (Matthaia 28:19, 20) A châng chuan, thil kan titlêm hle nia inhriat châng kan nei mai thei. Kan thinlung ṭha famkim lo hian kan thawhrimna chunga Jehova a lâwm leh lâwm lohte min ngaihtuahtîr hial mai thei. (1 Johana 3:19, 20) Mahse, Jehova chuan thilpêk rêng rêng chu—eng anga tê tham pawh nise—hmangaihnaa chêttîr thinlung aṭanga chhuak a nih phawt chuan a hlut êm êm vek a ni. (Marka 12:41-44) Bible chuan: “In hnathawh leh a hming chunga hmangaihna in lantîr . . . chu theihnghilh tûrin Pathian chu mi fel lo a ni si lo va,” tiin min tiam a ni. (Hebrai 6:10) Ni e, Jehova chuan a Lalram tâna rawngbâwlna tê ber pawh a hre reng a, mal a sâwm ṭhîn a ni. Tûna thlarau lama malsâwmna nasa tak bâkah, Jehova’n a kut a phar a, amah hnaihtu zawng zawngte châkna fel zawng zawng a phuhrûksak hun tûr, khawvêl thar lo thleng tûr chu kan beisei bawk a ni.—Sâm 145:16; 2 Petera 3:13.
20. Kum 2003 chhûng zawngin, kan kum châng chu engtin nge rilruah kan vawn reng ang a, chu chuan eng nge a rah chhuah dâwn?
20 Kum 2003 chhûng zawng hian, kan Pa vâna mi hnaih tuma ṭan kan lâk zêl leh zêl loh i inzâwt reng ang u. Ṭan kan lâk zêl chuan a thutiam angin min chhâng ngei ang tih kan chiang thei a ni. ‘Pathian chu dâwt sawi thei lova’ a ni si a. (Tita 1:1, 2) Amah i hnaih chuan, a hnaih ve ang che. (Jakoba 4:8) Chu chuan eng nge a rah chhuah dâwn? Tûna malsâwmna nasa tak leh chatuana Jehova hnaih lehzual theih beiseina chu! (w02 12/15)
[Footnote]
^ par. 13 Vênnainsâng May 1, 2002, [English] chhuak phêk 28-31-a thupui, “Jehova Chu Kan Thinlung Aiin A Ropui Zâwk,” tih chhân lêtna a ni.
I Hre Chhuak Em?
• Eng thilpêk nge Jehova’n amah hnaihtute a pêk?
• Eng ruahmanna nge Jehova’n a mite thlarau lama vênhim nân a siam?
• Engvângin nge Jehova hnêna a thlâwna ṭawngṭaia biak pawh theihna chu chanvo ropui tak a nih?
• Jehova chuan a thilsiam finna neite rinawm taka rawngbâwlna chu a hlut tih engtin nge Bible-in a târ lan?
[Zirlai Atâna Zawhnate]
[Phêk 25-naa milem]
Jehova chuan thlarau lam thutak hriatthiamnain mal min sâwm
[Phêk 27-naa milemte]
Jehova chuan thlarau lama vênhimna min pe
[Phêk 28-naa milem]
Jehova chu a hnai reng a, kan ṭawngṭai apiang ngaihthlâk a peih reng