O tla Batamela Kgaufsi le Lena”

“[Modimo] ó kxaufsi le e mongwê le e mongwê wa ba re lexo fá.”​—⁠DITIRO 17:⁠27.

1, 2. (a) Ge re lebelela legodimong leo le tletšego dinaledi, ke potšišo efe yeo re ka e botšišago mabapi le Mmopi? (b) Beibele e re kgonthišetša bjang gore batho ke ba bohlokwa kudu mahlong a Jehofa?

NA O kile wa lebelela legodimong leo le tletšego dinaledi bošegong bjo bo se nago maru gomme wa makatšwa ke seo o se bonago? Dinaledi tše dintši-ntši le bogolo bja sebaka-baka di a boifiša. Legohleng le le legolo, lefase e fo ba thorwana. Na se se bolela gore Mmopi, “Yo-xodimodimo Kukama-lefase,” o phagame kudu mo e lego gore ga a iše felo ka batho goba o kgole kudu gomme ba ka se kgone go mo tseba?​—⁠Psalme 83:⁠18.

² Beibele e re kgonthišetša gore batho ke ba bohlokwa kudu mahlong a Jehofa. Ge e le gabotse, Lentšu la Modimo le re kgothaletša go mo tsoma ge le re: “Ó kxaufsi le e mongwê le e mongwê wa ba re lexo fá.” (Ditiro 17:​27; 1 Koronika 28:⁠9) Ka kgonthe, ge e ba re gata megato ya go batamela kgaufsi le Modimo, o tla arabela maitekong a rena. Ka tsela efe? Mantšu a temana ya rena ya ngwaga ya 2003 a araba ka tsela ye e ruthetšago pelo: “O tla batamela kgaufsi le lena.” (Jakobo 4:⁠8, NW) Anke re ahla-ahleng tše dingwe tša ditšhegofatšo tše di makatšago tšeo ­Jehofa a di tšhollelago bao ba lego kgaufsi le yena.

Mpho ya Motho ka Noši ye e Tšwago go Jehofa

3. Ke mpho efe yeo Jehofa a e neago bao ba mmatamelago kgaufsi?

³ Sa pele, bahlanka ba Jehofa ba na le mpho ya bohlokwa yeo a e beetšego batho ba gagwe. Matla ka moka, mahumo le thuto tšeo tshepedišo ye ya dilo e di neago di ka se šireletše mpho ye. Ke mpho ya motho ka noši, yeo Jehofa a e neago  feela bao ba lego kgaufsi le yena. Ke eng? Lentšu la Modimo le araba ka gore: “Xe O ka . . . hlabošetša thlaloxanyô ’ntšu la xaxo, Xe O ka e tsoma byalo ka leruô, wa e nyakišiša bo-ka ’humô le le fihlilwexo, ké mo O tl’o xo tseba xo boifa Morêna, wa fihlêla xo tseba Modimo.” (Diema 2:​3-⁠6) Nagana batho ba sa phethagalago ba kgona go hwetša ‘tsebo ya go tseba Modimo’! Mpho yeo​—⁠tsebo e hwetšwago ka Lentšung la Modimo​—⁠e swantšhwa le ‘mahumo a a fihlilwego.’ Ka baka la’ng?

4, 5. Ke ka baka la’ng ‘tsebo ya go tseba Modimo’ e swantšhwa le ‘mahumo a a fihlilwego’? Bontšha.

⁴ Lebaka le lengwe ke gore tsebo ya go tseba Modimo ke ya bohlokwa kudu. E nngwe ya ditšhegofatšo tša yona ke kholofelo ya bophelo bjo bo sa felego. (Johane 17:⁠3) Eupša tsebo yeo e humiša maphelo a rena gaešita le gona bjale. Ka mohlala, ka baka la go ithuta ga rena Lentšu la Modimo ka šedi, re hweditše dikarabo dipotšišong tša bohlokwa tše di swanago le tše di rego: Leina la Modimo ke mang? (Psalme 83:​19, PK) Boemo bja kgothe bja bahu ke bofe? (Mmoledi 9:​5, 10) Morero wa Modimo ka lefase le batho ke ofe? (Jesaya 45:​18) Re tseba gape le tsela e kaone kudu ya go phela ke go diriša keletšo e bohlale ya Beibele. (Jesaya 30:​20, 21; 48:​17, 18) Ka go rialo, re na le tlhahlo e botse yeo e re thušago go lebeletšana ka katlego le mathata a bophelo le go phegelela tsela ya bophelo ye e godišago lethabo la kgonthe le kgotsofalo. Go feta moo, thuto ya rena ya Lentšu la Modimo e re thušitše go tseba dika tša Jehofa tše di makatšago le go mmatamela kgaufsi. Ke eng seo se ka bago sa bohlokwa go feta tswalano ya kgaufsi le Jehofa yeo e theilwego ‘tsebong ya go tseba Modimo’?

⁵ Go na le lebaka le lengwe leo ka lona tsebo ya go tseba Modimo e ka swantšhwago le ‘mahumo a a fihlilwego.’ Go fo swana le mahumo a mantši, ga le hwetšagale ga bonolo lefaseng le. Gare ga badudi ba lefaseng ba dimilione tše dikete tše tshelelago, ke barapedi ba Jehofa ba ka bago dimilione tše tshelelago goba o tee go ba 1 000 bao ba hweditšego ‘tsebo ya go tseba Modimo.’ E le go bontšha gore go tloga go se bonolo go tseba therešo ya Lentšu la Modimo, ela hloko potšišo e tee ya Beibele e rego: Go direga’ng ka batho lehung? Re a tseba gore go ya ka Mangwalo moya o a hwa le gore bahu ga ba kwe selo. (Hesekiele 18:​4, PK) Lega go le bjalo, tumelo ya maaka ya gore selo se sengwe ka gare ga motho se tšwela pele se phela ge a hwile e amogelwa ke madumedi a mantši a lefase. Ke karolo ya motheo ya madumedi a Bojakane. E tletše gape le go Bobuddha, Bohindu, Bojain, Bojuda, Bomoseleme, Boshinto, Bosikh le Botao. Anke o nagane​—⁠batho ba dikete tše dimilione ba forwa ka thuto ye e tee ya maaka!

6, 7. (a) Ke bomang feela bao ba ka hwetšago ‘tsebo ya go tseba Modimo’? (b) Ke mohlala ofe wo o bontšhago gore Jehofa o re šegofaditše ka temogo yeo e fetago ya ba bantši “ba bohlale le ba thlaloxanyô”?

⁶ Ke ka baka la’ng batho ba bantši ba se ba hwetša ‘tsebo ya go tseba Modimo’? Ke ka gobane motho a ka se kgone go kwešiša ka botlalo se se bolelwago ke Lentšu la Modimo ntle le thušo ya Gagwe. Gopola gore tsebo ye ke mpho. Jehofa o e nea feela bao ba ikemišeditšego go nyakišiša ka Lentšung la gagwe ka potego le ka boikokobetšo. Ba bjalo ba ka fo ba ba se “ba bohlale ka nama.” (1 Ba-Korinthe 1:​26) Ba bantši gare ga bona ba ka ba ba lebelelwa e se ‘batho ba mangwalo e bile ba sa rutega’ go ya ka boemo bja thuto ya lefase. (Ditiro 4:​13) Lega go le bjalo, seo ga se bohlokwa. Jehofa o re putsa ka ‘tsebo ya go tseba Modimo’ ka baka la dika tšeo a di hwetšago ka dipelong tša rena.

⁷ Ela hloko mohlala wo. Diithuti tše dintši Bojakaneng di tšweleditše dipuku tše di nago le dikgopolo tše dintši ka Beibele. Dipuku tše bjalo di ka hlalosa setlogo sa histori, se se bolelwago ke mantšu a Sehebere le a Segerika le tše dingwe. Ka thuto ya tšona ka moka, na diithuti tše bjalo di tloga di hweditše ‘tsebo ya go tseba Modimo’? Le gona, na di kwešiša gabotse sehlogo sa Beibele​—⁠go godišwa ga bogoši bja Jehofa ka Mmušo wa gagwe wa legodimong? Na di a tseba gore Jehofa Modimo ga se karolo ya Boraro botee? Re na le kwešišo e nepagetšego ka ditaba tše di bjalo. Ka baka la’ng? Jehofa o re šegofaditše ka temogo ya go lemoga ditherešo tša moya yeo e fetago ya ba bantši “ba bohlale le ba thlaloxanyô.” (Mateo 11:​25) Jehofa o šegofatša gakaakang ba ba mmatametšego kgaufsi!

 ‘Jehofa o Hlokomela Bohle ba ba mo Ratago’

8, 9. (a) Dafida o hlalositše bjang tšhegofatšo e nngwe ya bao ba lego kgaufsi le Jehofa? (b) Ke ka baka la’ng Bakriste ba therešo ba nyaka tšhireletšo ya Modimo?

⁸ Bao ba lego kgaufsi le Jehofa ba thabela tšhegofatšo e nngwe​—⁠tšhireletšo ya Modimo. Mopsalme Dafida, yoo a bego a tlwaetše mathata, o ile a ngwala gore: “Morêna ó kxaufsi le bohle ba mmitšaxo, le bohle ba e rexo xe ba mmitša ba rereša. O tlo dira tše di tl’o xo kxahla ba ba mmoifaxo; ó kwa dillô tša bôná, ’me ó a ba phološa. Bohle ba ba mo rataxo ó ba hlôkômetše.” (Psalme 145:​18-20) Ee, Jehofa o kgaufsi le bao ba mo ratago gomme ka go rialo a ka arabela kapejana dillo tša bona tša go llela thušo.

⁹ Ke ka baka la’ng re nyaka tšhireletšo ya Modimo? Go tlaleletša go kweng ditla-morago tša go phela ‘dinakong tše tše hlobaetšago tšeo go lego thata go lebeletšana le tšona,’ Bakriste ba therešo ke bahlaselwa ba kgethegilego ba Lenaba la Jehofa le legolo e lego Sathane Diabolo. (2 Timotheo 3:⁠1, bapiša le NW.) Lenaba leo la moradia le ikemišeditše go re “metša.” (1 Petro 5:⁠8) Sathane o a re tlaiša, o a re gatelela le go re leka. Le gona o nyaka boemo bja kgopolo le bja pelo bjo a ka ikholago ka bjona. O na le morero ka kgopolong ya gagwe: go fokodiša tumelo ya rena le go senya boemo bja rena bja moya. (Kutollo 12:​12, 17) Ka ge re na le lenaba le matla leo re swanetšego go lwa le lona, na ga se mo go kgonthišetšago go tseba gore ‘Jehofa o hlokomela bohle ba ba mo ratago’?

10. (a) Jehofa o šireletša bjang batho ba gagwe? (b) Ke tšhireletšo ya mohuta ofe yeo e lego bohlokwa-hlokwa, gomme ka baka la’ng?

¹⁰ Lega go le bjalo, Jehofa o šireletša bjang batho ba gagwe? Kholofetšo ya gagwe ya go re šireletša ga e re kgonthišetše bophelo bjo bo se nago mathata tshepedišong ye ya dilo; goba gona go bolela gore o swanetše go re direla mehlolo. Lega go le bjalo, Jehofa o šireletša batho ba gagwe e le sehlopha. Go feta moo, le ka mohla a ka se dumelele Diabolo go fediša barapedi ba therešo lefaseng! (2 Petro 2:⁠9) Ka godimo ga tšohle, Jehofa o re šireletša moyeng. O re hlama ka seo re se nyakago gore re kgotlelele diteko le go šireletša tswalano ya rena le yena. Mafelelong, tšhireletšo ya moya ke mohuta wa bohlokwa-hlokwa wa tšhireletšo. Ka baka la’ng? Ge feela re e-⁠na le tswalano le Jehofa, ga go na selo​—⁠gaešita le lehu​—⁠seo se ka re gobatšago ka mo go sa felego.​—⁠Mateo 10:⁠28.

11. Jehofa o dirile ditokišetšo dife go šireletša batho ba gagwe moyeng?

¹¹ Jehofa o dirile ditokišetšo tše dikgolo tša tšhireletšo ya moya bakeng sa bao ba lego kgaufsi le yena. O re nea bohlale bja go lebeletšana ka katlego le diteko tše di fapa-fapanego ka Lentšu la gagwe Beibele. (Jakobo 1:​2-⁠5) Go diriša keletšo e šomago yeo e hwetšwago ka Mangwalong go a thuša. Go oketša moo, Jehofa o nea ‘moya o mokgethwa go bao ba mo kgopelago wona.’ (Luka 11:​13) Moya woo ke matla a magolo kudu legohleng, ka gona o ka kgona go re hlama bakeng sa go lebeletšana ka katlego le teko le ge e le efe yeo e ka re tlelago. Jehofa o nea “dimpho tšeo e lego banna” ka Kriste. (Ba-Efeso 4:⁠8, NW) Banna ba ba swanelegago moyeng ba katana ka matla go bontšha kwelobohloko ya Jehofa e tšwago pelong ge ba thuša badumedi-gotee le bona.​—⁠Jakobo 5:​14, 15.

12, 13. (a) Jehofa o diriša’ng go re abela dijo tša moya ka nako e swanetšego? (b) O ikwa bjang ka ditokišetšo tša Jehofa bakeng sa bophelo bja rena bjo bobotse bja moya?

¹² Jehofa o nea selo se sengwe se itšego ­bakeng  sa go re šireletša: dijo tša moya ka nako e swanetšego. (Mateo 24:​45) Ka dipuku tše di gatišitšwego, go akaretša le dimakasine tša Morokami le Phafoga!, gotee le ka diboka, dikopano tše dinyenyane le tše dikgolo, Jehofa o re nea seo re se hlokago ge re se nyaka. Na o gopola tiragalo yeo go yona o ilego wa kwa selo se sengwe dibokeng tša Bokriste, kopanong e nyenyane goba kopanong e kgolo seo se ilego sa go kgoma pelo gomme sa go matlafatša goba sa go homotša? Na o kile wa bala taba e itšego go e nngwe ya dimakasine tše di boletšwego ka mo godimo gomme wa bona e be e tloga e ngwaletšwe wena?

¹³ E nngwe ya dibetša tše di atlegago tša Sathane ke go nolega moko gomme le rena re hlaselwa ke ditla-morago tša gona. O tseba gabotse gore maikwelo a lebaka le letelele a go hloka kholofelo a ka re fetša matla gaešita le go dira gore re hlaselege gabonolo. (Diema 24:​10) Ka baka la gore Sathane o leka go ikhola ka maikwelo a fošagetšego, re nyaka thušo. Dimakasine tša Morokami le Phafoga! di gatišitše gantši dihlogo tšeo di re thušago go lwa le go nolega moko. Ka morago ga go bala se sengwe sa dihlogo tše bjalo, kgaetšedi wa Mokriste o ile a ngwala gore: “Ke bala sehlogo mo e ka bago letšatši le lengwe le le lengwe, gomme megokgo e sa elela. Ke o bea kgaufsi le malao a-⁠ka gore ke kgone go o bala neng le neng ge ke ikwa ke nolegile moko. Ka dihlogo tše di swanago le tše, ke kgona go kwa matsogo a šireletšago a Jehofa a nkgokarela.” * Na ga re leboge Jehofa ka go re abela dijo tša moya ka nako e swanetšego? Gopola gore ditokišetšo tša gagwe bakeng sa bophelo bja rena bjo bobotse bja moya ke bohlatse bja gore o kgaufsi le rena le gore o re hlokometše.

Go Fihlelela “Mokwi wa Dithapêlô”

14, 15. (a) Ke ditšhegofatšo dife tša motho ka noši tšeo Jehofa a di neago bao ba lego kgaufsi le yena? (b) Ke ka baka la’ng go newa tumelelo ya go fihlelela Jehofa ka thapelo ka bolokologi e tloga e le tokelo e kgolo?

¹⁴ Na o lemogile gore ge batho ba dutše ba e-⁠ba le matla le bolaodi, gantši ga ba sa kgona go ka batamelwa ke bao ba lego ka tlase go bona? Lega go le bjalo, go thwe’ng ka Jehofa Modimo? Na o kgole kudu go ka kgahlišwa ke mantšu ao a a botšwago ke batho feela? Go tloga go fapane! Mpho ya thapelo ke tšhegofatšo e nngwe yeo ka yona Jehofa a e neago bao ba lego kgaufsi le yena. Go newa tumelelo ya go fihlelela “Mokwi wa dithapêlô” ka bolokologi e tloga e le tokelo e kgolo. (Psalme 65:⁠2) Ka baka la’ng?

¹⁵ Ka mohlala: Molaodi-mogolo wa khamphani e kgolo o na le boikarabelo bjo bogolo. Ke yena yo a dirago phetho ya gore ke ditaba dife tšeo a tlago go swaragana le tšona ka noši le gore ke dife tšeo a tlago go di gafela ba bangwe. Ka mo go swanago, Mmuši yo a Phagamego wa legohle ke yena yo a kgethago gore ke ditaba dife tšeo a tlago go swaragana le tšona le gore ke dife tšeo a tlago go di gafela ba bangwe. Nagana ka dilo tšohle tšeo Jehofa a di gafetšego Morwa wa gagwe yo a rategago, Jesu. Morwa o neilwe “matla xore Moahlodi e bê Yêna.” (Johane 5:​27) O “buša Barongwa.” (1 Petro 3:​22) Jesu o na le  moya wa Jehofa o mokgethwa o matla go mo thuša go hlahla barutiwa ba gagwe mo lefaseng. (Johane 15:​26; 16:⁠7) Ka gona Jesu o be a ka re: “Ke neilwe matla ka moka lexodimong le lefaseng.” (Mateo 28:​18) Lega go le bjalo, ge e le mabapi le dithapelo tša rena, Jehofa o kgethile go ikarabela ka noši. Ke ka baka leo Beibele e re eletšago go lebiša dithapelo tša rena go Jehofa feela, re dira bjalo ka leina la Jesu.​—⁠Psalme 69:​13; Johane 14:​6, 13.

16. Ke ka baka la’ng re ka kgodišega gore ruri Jehofa o theetša dithapelo tša rena?

¹⁶ Na ruri Jehofa o theetša dithapelo tša rena? Ge e ba a be a sa iše felo, le ka mohla o be a ka se re kgothaletše go ‘tiiša thapelong’ goba gore re lahlele merwalo le mathata a rena go yena. (Ba-Roma 12:​12; Psalme 55:​22; 1 Petro 5:⁠7) Bahlanka ba ba botegago ba mehleng ya Beibele ba be ba na le kholofelo e tletšego ya gore Jehofa o theetša dithapelo. (1 Johane 5:​14) Ka go rialo, mopsalme Dafida o ile a re: ‘Jehofa o kwa lentšu la-ka.’ (Psalme 55:​17) Le rena ka mo go swanago re na le lebaka la go kgodišega gore Jehofa o kgaufsi le rena, o ikemišeditše go kwa kgopolo le pelaelo e nngwe le e nngwe ya rena.

Jehofa o Putsa Bahlanka ba Gagwe

17, 18. (a) Jehofa o ikwa bjang ka tirelo ya potego ya dibopiwa tša gagwe tše bohlale? (b) Hlalosa kamoo Diema 19:​17 e bontšhago ka gona gore Jehofa o lemoga ditiro tša rena tša kgaugelo.

¹⁷ Boemo bja Jehofa e le Mmuši wa Legohle ga bo šitišwe ke seo batho feela ba ka se dirago goba ba gana go se dira. Lega go le bjalo, Jehofa ke Modimo yo a nago le tebogo. O tšeela godimo​—⁠ge e le gabotse, o rata​—⁠tirelo e botegago ya dibopiwa tša gagwe tše bohlale. (Psalme 147:​11) Ka gona, wo ke moputso o mongwe woo o thabelwago ke bao ba lego kgaufsi le Jehofa: O putsa bahlanka ba gagwe.​—⁠Ba-Hebere 11:⁠6.

¹⁸ Beibele e bontšha gabotse gore Jehofa o tšeela godimo seo barapedi ba gagwe ba se dirago. Ka mohlala, re bala gore: “Thlalla-badiidi ó adima Morêna ’me Yêna ó tlo mmušetša tše a di neilexo bála.” (Diema 19:​17) Go lebelela ga Jehofa badiidi ka tsela ya kgaugelo go ile gwa bonagatšwa Molaong wa Moše. (Lefitiko 14:​21; 19:​15)  Jehofa o ikwa bjang ge re ekiša kgaugelo ya gagwe ditirišanong tša rena le badiidi? Ge re nea badiidi, re sa letela go boelwa ke selo, Jehofa o lebelela se e le kadimo e dirwago go Yena. Jehofa o holofetša go lefa sekoloto seo ka botho le ka ditšhegofatšo. (Diema 10:​22; Mateo 6:​3, 4; Luka 14:​12-14) Ee, ge re bontšha kwelobohloko go morapedi-gotee le rena yo a diilago, seo se kgoma pelo ya Jehofa. Re leboga gakaakang gore re tseba gore Tatago rena wa legodimong o lemoga ditiro tša rena tša kgaugelo!​—⁠Mateo 5:⁠7.

19. (a) Ke ka baka la’ng re ka kgonthišetša gore Jehofa o tšeela godimo seo re se dirago modirong wa boboledi le wa go dira barutiwa? (b) Jehofa o putsa bjang ditiro tša tirelo yeo e direlwago go thekga Mmušo wa gagwe?

¹⁹ Jehofa o tloga a leboga kudu seo re se dirago bakeng sa Mmušo wa gagwe. Ge re batamela kgaufsi le Jehofa, ke ga tlhago gore re nyaka go diriša nako ya rena, matla le mahumo a rena go tšea karolo ka botlalo ka mo go kgonegago ka gona modirong wa go bolela ka Mmušo le wa go dira barutiwa. (Mateo 28:​19, 20) Ka dinako tše dingwe, re ka ikwa gore re fihlelela mo gonyenyane. Dipelo tša rena tše di sa phethagalago di ka ba tša re dira gore re ipotšiše ge e ba Jehofa o thabela maiteko a rena. (1 Johane 3:​19, 20) Eupša Jehofa o tšeela godimo mpho e nngwe le e nngwe​—⁠go sa šetšwe gore ke e nyenyane gakaakang​—⁠yeo e tšwago pelong ye e tutuetšwago ke lerato. (Mareka 12:​41-44) Beibele e re kgonthišetša gore: “Modimo xa a bebe motho, xa a lebale medirô ya lena, le leratô le Le itapišitšexo ka lôna ’ineng la xaxwe.” (Ba-Hebere 6:​10) Ka kgonthe, Jehofa o gopola le go putsa gaešita le tiro e nyenyane kudu ya tirelo yeo e direlwago go thekga Mmušo wa gagwe. Go oketša ditšhegofatšong tša moya gona bjale, re ka lebelela pele maipshinong a bophelo lefaseng le lefsa le le tlago, moo Jehofa a tlago go bula seatla sa gagwe gomme a kgotsofatša dikganyogo tše di lokilego tša bohle bao ba lego kgaufsi le yena!​—⁠Psalme 145:​16; 2 Petro 3:⁠13.

20. Ngwageng ka moka wa 2003, ke bjang re ka dulago re nagana ka mantšu a temana ya rena ya ngwaga, gomme ka mafelelo afe?

²⁰ Ngwageng ka moka wa 2003, anke re ipotšišeng ge e ba re dira boiteko bjo bo tšwelago pele bja go batamela kgaufsi le Tatago rena wa legodimong. Ge e ba re dira bjalo, re ka kgonthišega gore o tla arabela bjalo ka ge a holofeditše. Go feta moo, ‘Modimo ga a fore.’ (Tito 1:​2, PK) Ge e ba o batamela kgaufsi le yena, o tla batamela kgaufsi le wena. (Jakobo 4:⁠8, NW) Le gona ka mafelelo afe? Ditšhegofatšo tše di humilego gona bjale le tebelelo ya go batamela kgaufsi kudu le Jehofa ka mo go sa felego!

Jehofa o re šegofaditše ka temogo ya go lemoga ditherešo tša moya

Jehofa o nea tšhireletšo ya moya

Jehofa o kgaufsi, o ikemišeditše go kwa thapelo e nngwe le e nngwe ya rena

Na o a Gopola?

• Jehofa o nea mpho efe go bao ba batamelago kgaufsi le yena?

• Jehofa o dira ditokišetšo dife go šireletša batho ba gagwe moyeng?

• Ke ka baka la’ng go kgona go batamela Jehofa ka thapelo ka bolokologi e le tokelo e kgolo?

• Beibele e bontšha bjang gore Jehofa o leboga tirelo ya potego ya dibopiwa tša gagwe tše bohlale?