“E Lo Hala Serca Boso”

“[Dios] no ta leu di cada un di nos.”—ECHONAN 17:27.

1, 2. (a) Ora nos mira shelo yen di streya, ki pregunta tocante e Creador por lanta serca nos? (b) Con Bijbel ta sigura nos cu hende absolutamente no ta insignificante den Yehova su bista?

BO A yega di hisa cara mira shelo yen di streya riba un anochi cla, y keda asombra? Nos ta sinti admiracion y respet profundo ora nos pensa cuanto streya tin, y con enorme espacio ta. Tera ta manera un punta chikito den e universo inmenso aki. Esei kiermen cu e Creador, “e Haltisimo riba henter tera”, ta mucho halto pa E mustra interes den hende, of mucho distante y incomprendibel pa nos por conoc’e?—Salmo 83:18.

² Bijbel ta sigura nos cu hende absolutamente no ta insignificante den Yehova su bista. De echo, e Palabra di Dios ta anima nos pa busc’e, bisando: “E no ta leu di cada un di nos.” (Echonan 17:27; 1 Cronicanan 28:9) Si, ora nos dal paso pa hala serca Dios, E tambe ta haci di su banda. Den ki manera? E palabranan di nos texto pa aña 2003 ta duna e contesta conmovedor aki: “E lo hala serca boso.” (Santiago 4:8) Laga nos papia tocante algun bendicion maraviyoso cu Yehova ta drama riba hende cu a hala serca dje.

Un Regalo Personal di Yehova

3. Ki regalo Yehova ta duna na hende cu a hala serca dje?

³ Di prome, Yehova su sirbidonan tin un regalo precioso cu el a reserva pa su pueblo. Ni tur poder, rikesa ni educacion cu e mundo aki por ofrece nos no por garantisa nos e regalo aki. E ta un regalo personal cu Yehova ta duna unicamente na hende cu a hala serca dje. Kico e ta? E Palabra di Dios ta duna e contesta: “Si bo . . . halsa bo bos pa comprondemento, si bo busc’e manera plata, y rondi’e manera tesoro scondi, e ora ei lo bo discerni e temor di SEÑOR, y descubri e conocemento di Dios. Pasobra SEÑOR ta duna sabiduria.” (Proverbionan 2:3-6) Imagina bo: hende imperfecto por haya “e conocemento di Dios”! Bijbel ta compara e regalo ei, esta, e conocemento cu tin den e Palabra di Dios, cu “tesoro scondi.” Dicon?

4, 5. Dicon nos por bisa cu “e conocemento di Dios” ta manera “tesoro scondi”? Duna un ehempel.

 ⁴ Pa cuminsa, conocemento di Dios tin un gran balor. Un di e bendicionnan mas precioso cu nos por haya pa medio di dje ta bida eterno. (Huan 17:3) Pero for di awor e conocemento ei ta enrikece nos bida. Por ehempel, door cu nos a studia e Palabra di Dios cu atencion nos a haya contesta riba algun pregunta importante, manera: Kico Dios su nomber ta? (Exodo 3:14, 15, Beibel na papiamentu koriente) Den ki estado hende morto ta realmente? (Eclesiastes 9:5, 10) Ki proposito Dios tin pa tera y pa hende? (Isaias 45:18) Tambe nos a siña cu e miho manera pa biba ta door di aplica e consehonan sabi di Bijbel. (Isaias 30:20, 21; 48:17, 18) Pues, nos tin un bon guia cu ta yuda nos enfrenta ansiedad di bida, y biba na un manera cu ta duna nos berdadero felicidad y satisfaccion. Mas cu tur cos, door di studia e Palabra di Dios nos a siña conoce Yehova su cualidadnan maraviyoso mas miho, y nos a siña con pa hala serca dje. Kico por tin mas balor cu un relacion intimo cu Yehova basa riba “e conocemento di Dios”?

⁵ Tin un otro motibo pa bisa cu e conocemento di Dios ta manera “tesoro scondi.” E conocemento ei ta mescos cu tesoro; bo no ta hay’e unda cu ta den e mundo aki. Di tur e seis mil miyon hendenan riba tera, ta rond di seis miyon so ta adora Yehova. Esei kiermen cu ta mas o menos 1 di cada 1.000 hende so a descubri “e conocemento di Dios.” Pa yuda bo compronde con tiki hende tin e privilegio di sa e berdad di e Palabra di Dios, tuma djis un pregunta di Bijbel so como ehempel: Kico ta pasa cu un hende ora e muri? For di Bijbel nos sa cu alma ta muri y cu hende morto no sa di nada. (Ezekiel 18:4) Pero mayoria religion ta acepta e creencia falso di cu tin un cos den hende cu ta sigui biba despues di morto. E ta un parti central di religionnan di cristiandad. Den budismo, islam, shintoismo, taoismo, jainismo y religion hindu, hudiu y sikh tambe e creencia aki ta ampliamente acepta. Imagina bo: e siñansa falso aki so caba tin miles di miyones di hende gaña!

6, 7. (a) Ken so por haya “e conocemento di Dios”? (b) Ki ehempel ta mustra cu Yehova a bendiciona nos cu un nivel di comprondemento cu hopi hende ‘sabi y inteligente’ no tin?

⁶ Dicon mas hende no a descubri “e conocemento di Dios”? Pasobra sin Dios su yudansa bo no por compronde e nificacion di su Palabra completamente. Corda cu ta un regalo e conocemento aki ta. Yehova ta duna e regalo aki unicamente na esnan cu ta dispuesto pa investiga su Palabra cu honestidad y humildad. Kisas nan no ta “sabi segun carni.” (1 Corintionan 1:26) Kisas mundo ta asta haya cu hopi di nan no ta ni “educa ni siña.” (Echonan 4:13) Pero esei no ta importante. Yehova ta recompensa nos cu “e conocemento di Dios” debi na e cualidadnan cu E ta mira den nos curason.

⁷ At’aki un ehempel. Hopi experto di cristiandad a produci un cantidad di buki masha diki tocante Bijbel. Algun di e obranan ei ta splica background historico, nificacion di palabra Hebreo y Griego, y hopi mas. Pero apesar di tur nan educacion, nos por bisa cu e expertonan ei di berdad a logra haya “e conocemento di Dios”? Wel, nan ta compronde bon kico e tema di Bijbel ta, esta, cu e Reino di shelo lo confirma Yehova su derecho di goberna henter creacion? Nan sa cu Yehova Dios no ta parti di un Trinidad? Nos si ta compronde e cosnan ei bon. Dicon? Debi cu Yehova a bendiciona nos cu un comprondemento profundo di cos spiritual, algo cu hopi di e “sabinan y inteligentenan” no tin. (Mateo 11:25) Mira cuanto Yehova ta bendiciona hende cu ta hala serca dje!

‘Yehova Ta Warda Tur Hende Cu Ta Stim’e’

8, 9. (a) Con David a describi un otro bendicion cu tin pa esnan cu hala serca Yehova? (b) Dicon cristiannan berdadero tin mester di Dios su proteccion?

⁸ Un otro bendicion di hala serca Yehova ta  cu bo ta ricibi Dios su proteccion. David, e skirbido di salmo cu tawata sa bon kico kiermen pasa den temponan dificil, a skirbi: “SEÑOR ta serca di tur esnan cu ta sclama na dje, serca di tur esnan cu ta sclama na dje den berdad. E lo cumpli cu e deseo di esnan cu ta tem’e; tambe E lo tende nan sclamacion y lo salba nan. SEÑOR ta warda tur cu ta stim’e.” (Salmo 145:18-20) Si, Yehova ta serca di esnan cu ta stim’e, y E ta cla pa responde ora nan sclama pa su yudansa.

⁹ Dicon nos tin mester di Dios su proteccion? E “temponan trabahoso” aki ta afecta cristiannan berdadero tambe, y ademas nos ta un blanco special di Yehova su Adversario principal, Satanas e Diabel. (2 Timoteo 3:1) E enemigo astuto ei ta buscando manera pa “devora” nos. (1 Pedro 5:8) Satanas ta persigui nos, pone presion riba nos y hinca nos den tentacion. Tambe e ta purba haya actitud den nos mente of curason cu e por uza pa su proposito. E tin un meta: suak nos fe y caba cu nos spiritualidad. (Revelacion 12:12, 17) Ya cu nos tin cu enfrenta un enemigo asina poderoso, no ta bon pa sa cu Yehova ta “warda tur cu ta stim’e”?

10. (a) Con Yehova ta cuida su pueblo? (b) Cua tipo di proteccion ta mas importante, y dicon?

¹⁰ Pero, con Yehova ta cuida su pueblo? E echo cu E ta priminti nos su proteccion no ta un garantia cu nos lo tin un bida sin problema den e mundo actual. Tampoco e no kiermen cu Dios ta obliga di haci milager na nos fabor. Toch Yehova ta proteha su pueblo como grupo si. Al fin y al cabo, nunca lo E no permiti Diabel caba cu adoradonan berdadero for di riba mundo! (2 Pedro 2:9) Yehova ta proteha nos principalmente den sentido spiritual. E ta duna nos tur loke nos tin mester pa por soporta prueba y cuida nos relacion cu ne. Na final di cuenta, ta proteccion spiritual ta e tipo di proteccion mas importante. Dicon? Pasobra tanten cu nos tin un bon relacion cu Yehova, nada, ni sikiera morto, no por perhudica nos pa semper.—Mateo 10:28.

11. Kico Yehova a percura como proteccion spiritual pa su pueblo?

¹¹ Yehova a percura proteccion spiritual na abundancia pa hende cu ta hala serca dje. Den su Palabra, Bijbel, E ta duna nos sabiduria pa enfrenta diferente tipo di prueba. (Santiago 1:2-5) Si nos aplica e consehonan practico den e Scritura, esei mes ta sirbi como proteccion. Ademas, Yehova ta duna “spirito santo na esnan cu pidie.” (Lucas 11:13) E spirito ei ta e forsa mas poderoso di universo. Pues, ta sigur cu E por fortalece nos pa enfrenta tur prueba y tentacion cu exito. Pa medio di Cristo, Yehova ta duna ‘donnan den hende’ tambe. (Efesionan 4:8) E hombernan spiritualmente capas aki ta haci nan best pa refleha e mesun compasion profundo cu Yehova tin ora nan ta yuda nan compañeronan di adoracion.—Santiago 5:14, 15.

12, 13. (a) Via ki medio Yehova ta duna nos cuminda spiritual na e debido tempo? (b) Con abo ta sinti tocante tur loke Yehova ta percura pa nos bienestar spiritual?

¹² Otro cos cu Yehova ta percura como proteccion pa nos ta cuminda spiritual na e  debido tempo. (Mateo 24:45) Pa medio di publicacionnan manera E Toren di Vigilancia y Spierta!, y tambe pa medio di reunion, asamblea y congreso, Yehova ta duna nos loke nos tin mester, ora nos tin mester di dje. Bo por ta corda un ocasion cu bo a tende algo na un reunion cristian, un asamblea of un congreso cu a touch bo curason, fortalece bo of consola bo? Bo a yega di lesa un articulo den un di e revistanan menciona aki riba anto sinti cu e tawata skirbi specialmente pa abo?

¹³ Un di e miho armanan cu Satanas tin ta desanimacion, algo cu nos no ta immuun p’e. E sa bon cu un sintimento di desesperacion pa hopi tempo por caba cu nos forsa y haci nos vulnerable. (Proverbionan 24:10) Door cu Satanas ta purba probecha di nos sintimentonan negativo, nos tin mester di yudansa. E Toren di Vigilancia y Spierta! a yega di publica articulonan cu por yuda nos lucha contra desanimacion. Un ruman mohe cristian a skirbi lo siguiente tocante un di e articulonan ei: “Mi ta lesa e articulo casi tur dia, y mi wowo ta yena cu awa. Mi tin e revista banda di mi cama pa mi por tin e serca ora mi ta sinti mi desanima. Articulonan manera esaki ta laga mi sinti manera cu ta Yehova tin mi brasa cu su brasanan protector.” * Nos no ta contento cu Yehova ta duna nos cuminda spiritual na ora? Corda cu tur loke E ta duna nos pa nos bienestar spiritual ta duna prueba cu E ta serca di nos y cu el a pone nos bou di su proteccion.

Nos Por Papia cu e ‘Scuchador di Oracion’

14, 15. (a) Ki bendicion personal Yehova ta duna hende cu ta hala serca di dje? (b) Dicon e echo cu nos por papia cu Yehova libremente den oracion ta un privilegio sumamente grandi?

¹⁴ Bo no a ripara nunca cu mas tanto poder y autoridad un hende haya, menos disponibel e ta bira pa hende bou di su autoridad? Pero, kico di Yehova Dios? E ta mucho halto riba nos pa E tin interes den loke un simpel ser humano tin di bisa? Al contrario! E regalo di oracion ta un otro bendicion cu Yehova ta duna hende cu ta hala serca dje. E echo cu nos por papia libremente cu e ‘scuchador di oracion’ ta un privilegio sumamente grandi. (Salmo 65:2) Dicon nos ta bisa asina?

¹⁵ Considera e ehempel aki: E director di un compania grandi tin hopi responsabilidad. E ta dicidi kico e ta atende personalmente, y kico e ta laga otro hende atende p’e. E Gobernante Supremo di universo tambe por dicidi kico E mes ta atende y kico E ta delega na otronan. Corda cuanto cos Yehova a delega na su Yiu stima, Hesus. E Yiu a ricibi “autoridad pa ehecuta huicio.” (Huan 5:27) Dios a ‘somete angelnan na dje.’ (1 Pedro 3:22) Yehova a pone su poderoso spirito santo na disposicion di Hesus pa yud’e dirigi su disipelnan  riba tera. (Huan 15:26; 16:7) Pesei Hesus por a bisa: “Tur autoridad a wordo duna na mi den shelo y riba tera.” (Mateo 28:18) Sinembargo, pa loke ta toca nos oracionnan, Yehova a scohe pa atende nan personalmente. Ta pesei Bijbel ta manda nos dirigi nos oracionnan na Yehova so, den nomber di Hesus.—Salmo 69:13; Huan 14:6, 13.

16. Dicon nos por confia cu di berdad Yehova ta scucha nos oracionnan?

¹⁶ Di berdad Yehova ta scucha nos oracionnan? Si E no tawatin interes, lo E no a insisti nunca pa nos “dedica na [“persevera den”, NW] oracion” ni tira nos carga- y precupacionnan riba dje. (Romanonan 12:12; Salmo 55:22; 1 Pedro 5:7) Sirbidonan fiel den tempo di Bijbel tawatin pleno confiansa cu Yehova ta scucha oracion. (1 Huan 5:14) Pesei David e skirbido di salmo a bisa: “[Yehova] lo tende mi bos.” (Salmo 55:17) Nos tambe tin tur motibo pa confia cu Yehova ta serca di nos, cla pa scucha tur nos pensamentonan y precupacionnan.

Yehova Ta Recompensa Su Sirbidonan

17, 18. (a) Con Yehova ta sinti tocante e sirbishi fiel di su criaturanan inteligente? (b) Splica con Proverbionan 19:17 ta mustra cu Yehova no ta keda sin wak nos obranan di misericordia.

¹⁷ Nada cu simpel hende haci of nenga di haci no ta afecta Yehova su posicion como Soberano di Universo. Sinembargo, Yehova ta un Dios cu aprecio. E ta aprecia y asta tin delicia den e sirbishi fiel di su criaturanan inteligente. (Salmo 147:11) Pesei hende cu ta hala serca Yehova ta ricibi un otro beneficio: E ta recompensa su sirbidonan.—Hebreonan 11:6.

¹⁸ Bijbel ta mustra bon cla cu Yehova ta aprecia loke su adoradonan ta haci. Por ehempel nos ta lesa: “Esun cu tene misericordia di un hende pober ta fia SEÑOR, y E lo pag’e bek pa su bon obra.” (Proverbionan 19:17) E misericordia y consideracion cu Yehova ta mustra na hende pober a bini dilanti den e Lei di Moises.  (Levitico 14:21; 19:15) Con Yehova ta sinti ora nos imita su misericordia den e manera cu nos ta trata hende di condicion humilde? Ora nos duna na hende asina, sin spera nada en buelta, Yehova ta considera cu ta fia nos a fia E. Yehova ta priminti di paga nos e debe ei, cu su fabor y bendicion. (Proverbionan 10:22; Mateo 6:3, 4; Lucas 14:12-14) Si, ora nos mustra compasion na un compañero di adoracion cu ta den necesidad, esei ta touch Yehova su curason. Nos ta hopi contento di sa cu nos Tata den shelo no ta keda sin wak nos obranan di misericordia!—Mateo 5:7.

19. (a) Dicon nos por ta sigur cu Yehova ta aprecia loke nos ta haci den e trabou di predica y haci disipel? (b) Con Yehova ta recompensa nos sirbishi na fabor di su Reino?

¹⁹ Yehova ta aprecia principalmente loke nos ta haci na fabor di su Reino. Ora nos hala serca Yehova, di mes nos kier uza nos tempo, energia y recursonan pa participa mas tanto posibel den e trabou di predica e Reino y haci disipel. (Mateo 28:19, 20) Tin bes nos por sinti cu loke nos ta logrando ta masha tiki. Nos curason imperfecto por asta pone nos duda cu Yehova ta contento cu nos esfuerso. (1 Huan 3:19, 20) Pero Yehova ta balora tur regalo cu bini di nos curason, motiva door di amor, sin importa con chikito e ta. (Marco 12:41-44) Bijbel ta sigura nos: “Dios no ta inhusto pa lubida boso trabou y e amor cu boso a mustra pa su nomber.” (Hebreonan 6:10) Si, Yehova ta corda y recompensa asta e acto di sirbishi di mas chikito cu nos haci pa apoya su Reino. Ademas di ricibi bendicion spiritual abundante awor, nos por spera di disfruta di bida den e mundo nobo cu ta na caminda, ora Yehova habri su man cu generosidad pa satisface bon deseo di tur hende cu a hala serca dje!—Salmo 145:16; 2 Pedro 3:13.

20. Con nos por tene e palabranan di nos texto di aña na mente durante aña 2003, y kico lo ta e resultado?

²⁰ Durante henter aña 2003, laga nos puntra nos mes si nos ta haciendo un esfuerso continuo pa hala serca nos Tata den shelo. Si ta asina, nos por ta sigur cu E lo recompensa nos manera el a priminti. Al fin y al cabo, “Dios . . . no por gaña.” (Tito 1:2) Si bo hala serca dje, E lo hala serca bo. (Santiago 4:8) Anto kico lo ta e resultado? Bendicion na abundancia for di awor, y e speransa di sigui hala mas y mas serca di Yehova te na eternidad!

[Nota]

Bo Ta Corda?

• Ki regalo Yehova ta duna esnan cu hala serca dje?

• Kico ta algun cos cu Yehova a percura pa proteccion spiritual di su pueblo?

• Dicon e echo cu nos por papia cu Yehova libremente den oracion ta un privilegio sumamente grandi?

• Con Bijbel ta mustra cu Yehova ta aprecia e sirbishi fiel di su criaturanan inteligente?

[Preguntanan di Estudio]

[Plachi na pagina 15]

Yehova a bendiciona nos cu comprondemento profundo di berdadnan spiritual

[Plachi na pagina 16, 17]

Yehova ta duna proteccion spiritual

[Plachi na pagina 18]

Yehova ta serca di nos, cla pa scucha tur nos oracionnan