“Ona Faalatalata Mai Lea o Ia iā te Outou”
“Ona Faalatalata Mai Lea o Ia iā te Outou”
“E lē mamao [le Atua] ma i tatou taʻitoʻatasi.”—GALUEGA 17:27.
1, 2. (a) Pe a tepa aʻe i le lagi ua lilofia i fetu, o le ā le fesili tatou te ono fesiligia e uiga i Lē na Foafoaina Mea? (e) Ua faapefea ona faamautinoa mai e le Tusi Paia e amanaʻia i le silafaga a Ieova tagata?
PE UA iai se pō maninoa na e tepa aʻe ai ma maofa i le lagi o loo lilofia i fetu? E tatou te ofo i le lē mafaitaulia o fetu ma le telē o le vanimonimo. I lenei vateatea telē, ua avea ai le lalolagi o sina mea itiiti lava. Po o lona uiga ea o Lē na Foafoaina Mea, “le Silisili ese i le lalolagi uma,” e lē mafai ona manatu mai i tagata ona ua maualuga naʻuā pe ua mamao ese atu ma e lē masuʻesuʻeina?—Salamo 83:18.
2 Ua faamautinoa mai e le Tusi Paia e faapea e amanaʻia i le silafaga a Ieova tagata. O loo faamalosia i tatou e le Tusi Paia e saʻili atu iā te ia, i le faapea mai: “E lē mamao o ia ma i tatou taʻitoʻatasi.” (Galuega 17:27; 1 Nofoaiga a Tupu 28:9) Ioe, afai tatou te uia laasaga e faalatalata atu ai i le Atua, e tali mai o ia iā tatou taumafaiga. I le ā le auala? Ua aumaia e le mau o le tausaga 2003 lenei tali faamāfanafanaloto: “Ona faalatalata mai lea o ia iā te outou.” (Iakopo 4:8) Seʻi tatou talanoa i nisi o faamanuiaga matagofie ua foaʻiina mai ma le agalelei e Ieova i ē e faalatalata atu iā te ia.
Se Meaalofa Mai iā Ieova Lava Ia
3. O le ā le meaalofa e avatu e Ieova i ē e faalatalata atu iā te ia?
3 Muamua, ua iai i auauna a Ieova se meaalofa tautele ua ia taofia mo ona tagata. E lē mafai e le pule, tamaoaiga, ma aʻoaʻoga a lenei faiga o mea ona aumaia lenei meaalofa. O se meaalofa mai iā Ieova lava ia ua ia aaoina atu mo na o ē e faalatalata atu iā te ia. O le ā lenā meaalofa? Ua tali mai le Afioga a le Atua e faapea: “Afai lava e te . . . leo tele atu i le faautauta; afai e te saʻiliʻili iā te ia, e pei ona saʻiliʻili i le ario; afai e te suʻesuʻe i ai, pei ona suʻesuʻe i le oloa lilo; ona e lagona ai lea o le mataʻu iā Ieova, ma e maua ai le poto i le Atua. Auā o Ieova na te foaʻi mai le poto.” (Faataoto 2:3-6) Seʻi manatu i ai, e mafai e tagata lē lelei atoatoa ona maua le “poto i le Atua”! O loo faatusaina lenā meaalofa, le poto o loo maua i le Afioga a le Atua, i se “oloa lilo.” Aiseā?
4, 5. Aiseā e mafai ai ona faatusa le “poto i le Atua” i “oloa lilo”? Faataʻitaʻi mai.
4 E tautele le poto i le Atua. O se tasi o taui sili e maua mai ai o le faamoemoe o le ola e faavavau. (Ioane 17:3) Peitaʻi, o loo faaʻoaina o tatou olaga i lenā poto e oo lava i le taimi nei. Mo se faaaʻoaʻoga, talu ai a tatou suʻesuʻega loloto i le Afioga a le Atua, ua tatou iloa tali i fesili tāua e pei o nei: O ai le suafa o le Atua? (Salamo 83:18) O le ā moni lava le tulaga o iai ē ua maliliu? (Failauga 9:5, 10) O le ā le fuafuaga a le Atua mo le lalolagi ma le fanau a tagata. (Isaia 45:18) Ua tatou iloa foʻi o le auala sili ona lelei e ola ai, e ala lea i le faatatauina o fautuaga atamai a le Tusi Paia. (Isaia 30:20, 21; 48:17, 18) O lea la, ua tatou maua taʻiala aogā e fesoasoani ai iā i tatou ia feagai ma popolega o le olaga ma mulimuli i se ala o le soifuaga e maua ai le fiafiaga moni ma le faamalieloto. Ae o le mea e sili ona tāua, ona o a tatou suʻesuʻega i le Afioga a le Atua ua mafai ai ona tatou iloa uiga matagofie o Ieova ma faalatalata atu iā te ia. O le ā se mea e sili atu ona tāua na i lo se faiā vavalalata ma Ieova e faavae i le “poto i le Atua”?
5 O loo iai se isi māfuaaga ua mafai ai ona faatusa le poto i le Atua i le “oloa lilo.” E pei lava o le tele o oloa tāua, e seāseā maua i lenei lalolagi. Mai le ono piliona tagata o le lalolagi, e pe ā ma le ono miliona ē o tapuaʻi iā Ieova, po o le 1 mai le toʻa 1,000, ua maua le “poto i le Atua.” Ina ia faataʻitaʻia le tautele o lenei faaeaga o le iloaina o le upu moni o le Afioga a le Atua, manatu i le fesili faale-Tusi Paia lenei: O le ā e tupu i tagata pe a maliliu? Ua tatou iloa mai le Tusi Paia e faapea e oti le tagata ma e lē iloa e ē ua maliliu se mea. (Isaia 38:18) Ae, ua talia e le tele o lotu o le lalolagi le manatu e iai se mea i totonu o le tagata e faaauau pea ona ola pe a maliu. O se aʻoaʻoga faavae lenei a lotu o loo faapea mai o Kerisiano. E maua foʻi le aʻoaʻoga lenei i lotu Iutaia, Isalama, Puta, Sinitō, Sikh, Tao, Hinitū, ma Jain. Seʻi faauta i le faitau piliona o tagata ua faasesēina i lenei aʻoaʻoga sesē e tasi!
6, 7. (a) E na o ai e mafai ona maua le “poto i le Atua”? (e) O ā faaaʻoaʻoga e faaalia ai ua faamanuia e Ieova i tatou i le malamalamaga lea e lē o maua e le toʻatele o “ē popoto ma ē atamamai”?
6 Aiseā e lē o toʻatele ai tagata ua mauaina le “poto i le Atua”? Talu ai e leai se tasi e mafai ona tāea atoatoa le uiga o le Afioga a le Atua e aunoa ma Lana fesoasoani. Manatua foʻi, o le poto lenei o se meaalofa. E tuu atu e Ieova lenei poto e na o i latou e lotomalilie e saʻiliʻili faamaoni atoa ma le lotomaulalo i lana Afioga. Atonu o i latou nei e lē “popoto i la le tino.” (1 Korinito 1:26, LT) E ono manatu foʻi i ai le lalolagi o nisi ‘e leʻi aʻoaʻoina ma valelea.’ (Galuega 4:13) Ae, e lē o le mea tāua lenā. E tauia i tatou e Ieova i le “poto i le Atua” ona o uiga o loo ia silafia i o tatou loto.
7 Seʻi manatu i se faaaʻoaʻoga. E toʻatele tagata atamamai i lotu ia e faapea mai o lotu Kerisiano o loo tusia le tele o faamatalaga e faatatau i le Tusi Paia. E ono taʻua i na faamatalaga le talaaga o se mea na tupu, le uiga o upu Eperu ma Eleni, ma isi lava mea. Pe a fua i mea uma ua latou aʻoaʻoina, pe ua maua ea e nei tagata atamamai le “poto i le Atua”? Po o latou malamalama i le matua o le Tusi Paia, le faaeaeaina o le pule silisili ese a Ieova e ala i lona Malo faalelagi? Pe latou te iloa o Ieova le Atua e lē o se atua Tolutasi? O lea e iā i tatou le malamalamaga saʻo e faatatau i na mataupu. Aiseā? Ua faamanuiaina e Ieova i tatou i le malamalamaga i upu moni faaleagaga lea e lē o maua e le toʻatele o “ē popoto ma ē atamamai.” (Mataio 11:25) E faamanuiaina moni e Ieova i latou e faalatalata atu iā te ia!
‘E Tausi e Ieova Ē Uma e Alolofa iā te Ia’
8, 9. (a) Na faapefea ona faamatalaina e Tavita se isi faamanuiaga mo ē e faalatalata iā Ieova? (e) Aiseā e manaʻomia ai e Kerisiano moni le puipuiga tauatua?
8 O loo maua e i latou e faalatalata iā Ieova se isi faamanuiaga—o le puipuiga tauatua. Na tusi le faisalamo o Tavita, o lē na oo i ai le tele o puapuaga ma faafitauli, e faapea: “E latalata mai Ieova iā i latou uma o ē valaau iā te ia, o i latou uma o ē valaau iā te ia ma le faamaoni. E faia e ia le mea e manaʻo i ai o ē matataʻu iā te ia; e faafofoga foʻi o ia i la latou alaga atu, ma faaolaina i latou. E tausi Ieova i ē alolofa atu iā te ia uma lava.” (Salamo 145:18-20) Ioe, e faalatalata mai Ieova i ē alolofa iā te ia, o lona uiga la e vave ona tali mai iā latou alaga mo le fesoasoani.
9 Aiseā tatou te manaʻomia ai le puipuiga a le Atua? E faaopoopo atu i le aafia i āuga o nei “aso faigatā,” ua avea Kerisiano moni o se taulaʻiga patino a le Fili silisili o Ieova, o Satani le Tiapolo. (2 Timoteo 3:1) O loo maumauaʻi lenā fili taufaaʻoleʻole e “ʻaina” i tatou. (1 Peteru 5:8) O Satani lea e sauāina, omia, ma faaosoosoina i tatou. E tulimataʻi foʻi Satani e faaaogā ni vaivaiga o le mafaufau ma le loto e faamalaia ai i tatou. O loo iai sona sini autū: ia faavaivaia lo tatou faatuatua ma faaumatia faaleagaga i tatou. (Faaaliga 12:12, 17) Talu ai o loo tatou feagai ma se fili e sili ona malosi, pe e lē faamāfanafanaina ai ea i tatou i le iloaina ‘e tausi e Ieova ē uma e alolofa atu iā te ia’?
10. (a) E faapefea ona leoleoina e Ieova ona tagata? (e) O le ā le puipuiga e sili ona tāua, ma aiseā?
10 Ae, e faapefea ona leoleoina e Ieova ona tagata? E lē faapea o lana folafolaga mo le puipuiga o le a leai ai ni o tatou faafitauli i lenei faiga o mea; pe faapea foʻi e tatau ona ia faia ni vavega mo i tatou. Peitaʻi, e puipuia e Ieova ona tagata o se vaega atoa. E lē taitai ona ia faatagaina le Tiapolo e tafiesea ē tapuaʻi faamaoni mai le lalolagi! (2 Peteru 2:9) E sili atu i lenā, e puipuia e Ieova i tatou i le itu faaleagaga. Ua ia faaauupegaina i tatou i mea manaʻomia ina ia gafatia ai tofotofoga ma leoleomalu ai la tatou faiā ma ia. E sili atu i na mea uma, o le puipuiga faaleagaga o le puipuiga sili lea ona tāua. Aiseā? Afai e tumau pea ona iai la tatou faiā ma Ieova, e leai ma se mea o le a tumau ona tatou afāina ai, e oo lava i le oti.—Mataio 10:28.
11. O ā sauniuniga ua faia e Ieova mo le puipuiga faaleagaga o ona tagata?
11 Ua faia e Ieova le anoanoaʻi o sauniuniga ina ia puipuia ai faaleagaga i latou o loo faalatalata atu iā te ia. E ala i lana Afioga, le Tusi Paia, ua ia foaʻi mai iā i tatou le atamai e manumalo ai i tofotofoga eseese. (Iakopo 1:2-5) E avea ma puipuiga le faatatauina o fautuaga aogā o loo i le Tusi Paia. E lē gata i lenā, e foaʻiina mai e Ieova “le Agaga Paia i ē ole atu ai iā te ia.” (Luka 11:13) O lenā agaga o se malosiaga sili ona malosi i le vateatea, ma ua faaauupegaina ai i tatou ina ia taulau ona faafoeina so o se tofotofoga po o se faaosoosoga e tatou te ono faafesagaʻia. Ua saunia e Ieova e ala mai iā Keriso “mea alofa i tagata.” (Efeso 4:8) E taumafai nei tane ua agavaa faaleagaga e faaatagia atu le loloto o le alofa o Ieova pe a latou fesoasoani atu i uso tapuaʻi.—Iakopo 5:14, 15.
12, 13. (a) E faapefea ona saunia e Ieova taumafa faaleagaga i le taimi tatau? (e) O le ā sou lagona e uiga i sauniuniga a Ieova mo lo tatou lelei faaleagaga?
12 Ua aumaia e Ieova se isi mea e leoleoina ai i tatou: o taumafa faaleagaga i taimi tatau. (Mataio 24:45) O loo saunia e Ieova mea tatou te manaʻomia i taimi e manaʻomia ai e ala i lomiga ua lomia, e aofia ai mekasini o Le Olomatamata ma le Ala Mai!, atoa ma sauniga, fonotaga, ma tauaofiaga. Pe e te manatua se mea na e faalogo ai i sauniga faa-Kerisiano, se fonotaga, po o se tauaofiaga na pāʻia ai lou loto ma faamalosiau pe faamāfanafanaina ai oe? Pe na e faitau i se mataupu i se tasi o lomiga ua taʻua i luga ma manatu faapea sa tusia faapitoa lava mo oe?
13 O se tasi o auupega sili ona malosi a Satani o le lotovaivai, ma e aafia ai foʻi i tatou. Ua iloa lelei e Satani e mafai ona faavaivaia ma lamatia i tatou pe a umi ona iai lagona o le leai o se faamoemoe. (Faataoto 24:10) Talu ai o loo taumafai Satani e faaaogā lagona na e faavaivaia ai, tatou te manaʻomia la se fesoasoani. E masani ona lomia i mekasini o Le Olomatamata ma le Ala Mai! ni mataupu e fesoasoani e feagai ai ma le lotovaivai. Na faapea mai se tuafafine Kerisiano e faatatau i se tasi o na mataupu: “E toetoe lava o aso uma ou te faitau ai i lenei mataupu, ma ou te tagi lava i le taimi nei pe a ou faitau ai. E teu i autafa o loʻu moega ina ia mafai ona ou faitau i ai pe a oo iā te aʻu le lotovaivai. E ala i mataupu faapenei, ua ou lagonaina lava le puipuia o aʻu i aao o Ieova.” * Pe tatou te lē lotofaafetai ea i le saunia mai e Ieova o taumafa faaleagaga i le taimi tatau? Ia manatua, ua avea ana sauniuniga mo lo tatou lelei faaleagaga ma faamaoniga o lona faalatalata mai iā i tatou atoa ma lana puipuiga alofa.
Fesootaʻiga ma “le Faafofoga Tatalo”
14, 15. (a) O le ā le faamanuiaga ua aumaia e Ieova i ē faalatalata atu iā te ia? (e) Aiseā ua avea ai o se faaeaga matagofie le iai o le saʻolotoga e fesootaʻi ai ma Ieova i le tatalo?
14 Pe sa e mātauina faapea a maua e tagata le pule, e masani ona faigatā ona toe faalatalata atu i ai o tagata o loo i lalo o a latou pulega? Ae faapefea Ieova le Atua? Po ua ia lē ano mai ea i ʻaiʻoiga a tagata maulalo ona e mamao le nofoaga o loo ia afio ai? E matuā leai lava! Ua avea le meaalofa o le tatalo o se isi foʻi faamanuiaga ua aumaia e Ieova i ē e faalatalata atu iā te ia. O se faaeaga matagofie le iai o le saʻolotoga e fesootaʻi atu ai i “le faafofoga tatalo.” (Salamo 65:2) Aiseā?
15 O se faataʻitaʻiga: E tele avega tauave a se tagata o loo taiulu i se faalapotopotoga telē. O ia e filifilia mataupu e taulimaina lava e ia ma mataupu e faasafua atu i isi. I se auala talitutusa, e filifili foʻi e le Pule Silisili Ese o le aoao o mea mataupu o le a ia tauaaoina e ia lava ma mataupu e faasafua atu. Seʻi manatu i mea ua faasafua atu e Ieova i lona Alo pele o Iesu. Ua tuuina i le Alo le ‘pule e fai ai le faamasinoga.’ (Ioane 5:27) O agelu “ua toʻilalo iā te ia.” (1 Peteru 3:22) Ua faaavanoa atu iā Iesu le agaga paia mamana o Ieova ina ia fesoasoani iā te ia e taʻitaʻia ona soo i le lalolagi. (Ioane 15:26; 16:7) O lea la, ua mafai ai ona fetalai Iesu: “Ua tuuina mai iā te aʻu le pule uma lava i le lagi ma le lalolagi.” (Mataio 28:18) Peitaʻi, e tusa ai ma a tatou tatalo, ua finagalo Ieova ia faaaafia ai ia lava. O le pogai lenā o loo faatonuina ai i tatou e le Tusi Paia ia taulaʻi atu a tatou tatalo tau lava o Ieova, e ala i le suafa o Iesu.—Salamo 69:13; Ioane 14:6, 13.
16. Aiseā e mafai ai ona tatou mautinoa o loo faafofoga moni mai Ieova iā tatou tatalo?
16 Pe e faafofoga moni mai Ieova iā tatou tatalo? Ana faapefea e lē ano pe manatu mamafa mai o ia, semanū na te lē uunaʻia i tatou ia “finafinau i le tatalo” pe tuu atu o tatou popolega iā te ia. (Roma 12:12; Salamo 55:22; 1 Peteru 5:7) Sa mautinoa atoatoa e auauna faamaoni i taimi o le Tusi Paia e faafofoga Ieova i tatalo. (1 Ioane 5:14) O le pogai lenā na taʻua ai e le faisalamo o Tavita e faapea: ‘E faafofoga mai Ieova i loʻu leo.’ (Salamo 55:17) Ua iai foʻi iā i tatou māfuaaga uma e mautinoa ai o loo latalata mai Ieova, ma o loo nofosauni e faafofoga i o tatou popolega uma.
E Tauia e Ieova Ana Auauna
17, 18. (a) O le ā le finagalo o Ieova e uiga i le auaunaga faamaoni a ana foafoaga atamamai? (e) Faamatala le auala ua faaalia ai e le Faataoto 19:17 le amanaʻia e Ieova o a tatou galuega e faia ma le alofa mutimutivale?
17 E lē aafia le tulaga o Ieova o le Pule Silisili Ese o le Vateatea i mea e ono faia pe mumusu tagata e fai. E ui i lea, o Ieova o se Atua e faaalia le talisapaia. E tāua iā te ia ma e faapelepele i le auaunaga faamaoni a ana foafoaga atamamai. (Salamo 147:11) O le isi foʻi lenei aogā ua maua e i latou e faalatalata atu iā Ieova: E tauia e ia ana auauna.—Eperu 11:6.
18 Ua faaalia manino i le Tusi Paia le faatāuaina e Ieova o mea e fai e ona tagata tapuaʻi. Mo se faaaʻoaʻoga, tatou te faitau e faapea: “O lē ua alofa i le tagata mativa, na te avatua ana mea iā Ieova; e tauia mai foʻi e ia ana mea na avatu iā te ia.” (Faataoto 19:17) Sa atagia mai i le Tulafono na tuu atu iā Mose le alofa mutimutivale o Ieova mo tagata matitiva po o ē e lē tagolima. (Levitiko 14:21; 19:15) O le ā le finagalo o Ieova pe a tatou faataʻitaʻi i lona alofa mutimutivale i a tatou feutagaʻiga ma ē lē tagolima? A tatou foaʻi atu i lē o mativa, ma lē faatalitalia le toe aumaia o se mea, e silasila Ieova i lenei mea e pei o se aitalafu iā te Ia. Na ia folafola o le a ia toe totogi atu lenā aitalafu i mea lelei ma faamanuiaga. (Faataoto 10:22; Mataio 6:3, 4; Luka 14:12-14) Ioe, e pāʻia le finagalo o Ieova pe a mutimutivale lo tatou alofa mo lo tatou uso a tapuaʻi o loo iai se manaʻoga. Maʻeu lo tatou lotofaafetai ona o loo amanaʻia e le Tamā faalelagi a tatou galuega o loo faia ma le alofa mutimutivale!—Mataio 5:7.
19. (a) Aiseā tatou te mautinoa ai e talisapaia e Ieova mea tatou te faia i le galuega talaʻi ma le faia o soo? (e) E faapefea ona tauia e Ieova galuega o loo lagolago ai lona Malo?
19 E matuā talisapaia e Ieova mea tatou te faia mo lona Malo. A faalatalata atu iā Ieova, o se lagona masani lo tatou mananaʻo e faaaogā o tatou taimi, malosi, ma alāmanuia ina ia faia se sao atoatoa i le galuega o le talaʻia o le Malo ma le faia o soo. (Mataio 28:19, 20) E iai taimi atonu e lagona ai le itiiti o mea o loo tatou ausiaina. E ono masalosalo foʻi o tatou loto lē lelei atoatoa pe o faafiafiaina Ieova iā tatou taumafaiga. (1 Ioane 3:19, 20) Peitaʻi, e faatāuaina e Ieova meaalofa uma e faapogaia e se loto ua uunaʻia e le alofa, e tusa po o le ā le laʻitiiti. (Mareko 12:41-44) Ua faamautinoa mai e le Tusi Paia iā i tatou e faapea: “Auā e lē amiolētonu le Atua, na te lē faagalogaloina la outou galuega ma le alofa ua outou faaali mai ai i lona suafa.” (Eperu 6:10) O le mea moni, e oo lava i galuega laiti ua faia e lagolago ai le Malo, o le a manatua ma tauia e Ieova. E faaopoopo atu i faamanuiaga faaleagaga i le taimi nei, e mafai ona tatou tulimataʻia le olaga olioli i le lalolagi fou o loo fotuaʻi mai, lea o le a faamafola ai ma le agalelei e Ieova ona aao ma faamalieina faanaunauga amiotonu o i latou uma o loo faalatalata atu iā te ia!—Salamo 145:16; 2 Peteru 3:13.
20. A o faagasolo le tausaga e 2003, atonu e faapefea ona tatou manatuaina upu o le mau o le tausaga, ma o le ā le tulaga e iʻu i ai?
20 A o faagasolo le tausaga e 2003, fesili ifo iā i tatou lava pe o faaauau pea ona tatou faia taumafaiga e faalatalata atu ai i lo tatou Tamā faalelagi. Afai o le tulaga lea, e tatou te mautinoa la o le a ia tali mai e pei ona ia folafolaina, auā “o le . . . Atua e lē mafai ona tala pepelo.” (Tito 1:2) Afai e te faalatalata atu iā te ia, ona ia faalatalata mai lea iā te oe. (Iakopo 4:8) O le ā le tulaga o le a iʻu i ai? O le a maua le anoanoaʻi o faamanuiaga i le taimi nei ma le faamoemoe o le faalatalata atili atu iā Ieova seʻia oo i le faavavau!
[Faamatalaga pito i lalo]
^ pala. 13 O se tali mai lenei i le mataupu “Ua Sili Lava Ieova i o Tatou Loto,” i le lomiga o Le Olomatamata o Me 1, 2000, itulau 28-31.
Pe E te Manatua?
• O le ā le meaalofa e aumai e Ieova i ē e faalatalata atu iā te ia?
• O ā sauniuniga ua faia e Ieova mo le puipuiga faaleagaga o ona tagata?
• Aiseā ua avea ai o se faaeaga matagofie le iai o le saʻolotoga e fesootaʻi ai ma Ieova i le tatalo?
• E faapefea ona faaalia e le Tusi Paia le talisapaia e Ieova o le auaunaga faamaoni a ana foafoaga atamamai?
[Fesili mo le Suʻesuʻega]
[Ata i le itulau 15]
Ua faamanuiaina i tatou e Ieova i le malamalama i upu moni faaleagaga
[Ata i le itulau 17]
Ua saunia e Ieova le puipuiga faaleagaga
[Ata i le itulau 18]
O loo latalata mai Ieova ma nofosauni e faafofoga i a tatou tatalo uma