Soem Filing Insaed Long Famle

“!ALE, yu bonem! !Bonem foto ya!” Hemia tok we Tohru i sakem long waef blong hem Yoko. * Yoko i sakem tok i gobak se: “Yes, bambae mi bonem hem naoia nomo.” Nao Yoko i laetem mases blong bonem wan foto blong tufala mo hem i tok strong i se, “!Bambae mi bonem haos ya tu!” Nao Tohru i slavem waef blong hem, mo raorao blong tufala i finis wantaem.

Tri yia bifo long rao ya, Tohru mo Yoko, tufala i bin glad tumas taem tufala i mared mo statem laef blong tufala tugeta. ?Be wanem nao i gorong? Nating se Tohru i luk olsem wan gudfala man, be Yoko i harem se Tohru i no soem ol filing blong hem mo i no kea long ol filing blong waef blong hem. Tohru i no kea long lav we Yoko i traem soem long hem. Yoko i harem se laef olsem i had tumas, nao hem i stat blong no laekem hasban blong hem mo i kam kros bigwan. Hem i no moa slip long naet, i wari tumas, i no moa wantem kakae, i kros blong nating, tingting blong hem i foldaon bigwan mo tu, samtaem hem i wari bitim mak mekem se hem i no moa save mekem wan samting. Be, i luk olsem se Tohru i no wari nating long ol trabol we i stap insaed long famle blong hem. Long tingting blong hem, evri samting i oraet nomo.

“Laef Long Wol Ya Bambae i Kam Strong Tumas”

Tede plante famle oli gat ol problem olsem. Aposol Pol i talem finis se bambae long taem blong yumi, ol man “oli no gat filing long ol narafala man.” (2 Timoti 3:1-5, NW ) Mining blong Grik tok ya we oli tanem i kam “no gat filing” i klosap sem mak long tok we i blong talem filing we i stap insaed long wan famle. I tru se long taem blong yumi, ol man oli no gat filing long ol narafala. Mo nating sipos ol memba blong wan famle oli gat filing, plante taem oli no soemaot filing blong olgeta long ol narafala.

Tede plante papa mama oli no save olsem wanem blong soem lav mo filing blong olgeta long prapa pikinini blong olgeta. Sam papa mama oli bin gruap long wan famle we i no soem filing, nao maet oli no luksave se bambae oli haremgud moa mo oli save glad moa sipos oli harem save filing blong narafala mo sipos oli soemaot prapa filing blong olgeta tu. Ating Tohru i gruap long wan famle we i olsem. Taem hem i pikinini yet, oltaem papa blong hem i bisi long wok mo i kamhom let long naet. Papa blong Tohru i no toktok plante wetem hem, mo sipos hem i toktok, hem i blong tok strong nomo. Mama blong Tohru, hem tu i stap wok fultaem, mo i no spenem plante taem wetem Tohru. Televisin nomo i stap lukaot long Tohru. Hem i neva kasem sam naesfala tok mo i neva storian wetem papa mama blong hem.

Kalja blong ol man, hemia tu i save gat paoa long fasin blong man. Long sam kantri blong Latin Amerika, sipos wan man i talemaot filing blong hem long waef blong hem, hem i stap go agensem kalja blong kantri ya. Long plante kantri long Esia mo long Afrika, man we i soemaot filing tru long ol fasin no toktok blong hem, hem i go agensem kastom. Maet ol hasban oli faenem i had blong talem se “Mi lavem yu” long waef no long ol pikinini blong olgeta. Nating se  i olsem, yumi save kasem wan gudfala lesen from eksampol blong wan nambawan famle we i stap joengud longtaem finis.

Wan Famle We i Givim Nambawan Eksampol

Nambawan fasin fren blong Jeova God mo stret pikinini blong hem, wan nomo we hem i gat, i beswan eksampol long olgeta famle. Tufala i taltalem lav we tufala i harem long tufala long wan fasin we i stretgud olgeta. Blong plante taosen yia, spirit man ya we biaen i kam Jisas Kraes, i haremgud tumas long fasin fren we hem i gat wetem Papa blong hem. Hem i tokbaot fasin frengud blong tufala i se: “Evri dei, mi stap mekem hem i glad, mo oltaem nomo, mi harem gud blong stap wetem hem.” (Ol Proveb 8:30) Pikinini ya i sua fulwan se Papa blong hem i lavem hem tru, taswe hem i talem se evri dei hem i stap mekem Papa blong hem i glad. Hem i haremgud taem hem i stap wetem Papa blong hem oltaem.

Mo tu, taem Jisas i stap long wol olsem wan man, Papa blong hem i talem long hem se hem i lavem Pikinini blong hem. Afta we Jisas i baptaes, hem i harem voes blong Papa blong hem se: “Hemia pikinini blong mi, we mi lavem hem tumas. Mi mi glad tumas long hem.” (Matiu 3:17) !Ating naesfala tok ya i rili leftemap tingting blong Jisas bifo we hem i statem wok blong hem long wol! Yes, taem Jisas i stap rimemba laef blong hem long heven, mo i harem se Papa blong hem i glad long hem, ating tok ya i tajem hat blong hem.

Yes, Jeova i givim beswan eksampol taem hem i soemaot lav we i fulwan long famle blong hem we i stap long heven mo long wol. Sipos yumi akseptem Jisas Kraes, yumi tu yumi save harem gud long lav blong Jeova. (Jon 16:27) I tru se bambae yumi no harem wan voes i kamdaon long heven we i talem samting ya long yumi, be bambae yumi luk lav blong Jeova, tru long ol samting we Hem i wokem, tru long ransom sakrefaes blong Jisas Kraes, mo tru long sam defren rod bakegen. (1 Jon 4:9, 10) Mo tu, Jeova i stap lesin long ol prea blong yumi, mo i ansa long yumi taem hem i luk se samting ya i save givhan long yumi. (Ol Sam 145:18; Aesea 48:17) Taem yumi gohed blong frengud wetem Jeova, yumi tangkiu moa long hem from lav mo kea blong hem.

Jeova i tijim pikinini blong hem, Jisas, blong haremsave filing blong narafala, blong tingbaot narafala, gat kaen fasin mo fasin blong kea bigwan long narafala. Jisas i eksplenem se: “Ol samting we Papa blong mi i mekem, mi tu mi mas mekem. Papa blong mi, hem i lavem mi tumas, mo hem i stap soemaot long mi olgeta samting we hem i stap mekem.” (Jon 5:19, 20) Yumi tu, yumi save lanem olsem wanem blong soemaot ol filing blong yumi sipos yumi stadi long eksampol we Jisas i givim taem hem i stap yet long wol.—Filipae 1:8.

?Olsem Wanem Blong Wokem Filing Insaed Long Famle?

From we “God i lav” mo hem i wokem yumi blong yumi “tekem fasin blong hem,” yumi naf blong harem mo soem lav. (1 Jon 4:8, NW; Jenesis 1:26, 27) Nating se i olsem, i no min se bambae i isi nomo blong soemaot lav. Bifo we yumi soemaot filing blong yumi, fastaem yumi mas gat filing long hasban no waef blong yumi mo long ol pikinini blong yumi. Yumi mas gat fasin luksave mo makem ol gudfala fasin blong olgeta, nating se ol fasin ya oli no plante, mo yumi mas tingbaot ol fasin ya oltaem. Maet yu talem se: ‘I no gat wan samting nating we mi laekem long hasban [waef no pikinini] blong mi.’ Olgeta we oli mared wetem wan man no wan woman we papa mama blong olgeta nomo i bin jusum, maet oli no gat filing long hasban no waef blong olgeta. Samfala maet oli gat pikinini, be oli no bin wantem gat pikinini. Nating se i olsem, traem tingbaot ol filing we Jeova i harem long neson blong Isrel, we i olsem woman blong hem, long ol yia 900 B.K.T. Taem Elaeja, wan profet blong God, i talem se i no gat wan man blong wosipim God i stap yet long medel blong ol ten laen blong Isrel, Jeova i luklukgud long ol ten laen ya gogo i faenem se i gat plante gudfala man i stap yet—fulnamba blong olgeta i kasem 7,000—mo evriwan oli gat ol fasin we Jeova i laekem. ?Olsem wanem long yu? ?Yu save folem  eksampol blong Jeova mo traem faenem gudfala fasin long ol memba blong famle blong yu?—1 King 19:14-18.

Sipos yu wantem we ol memba blong famle blong yu oli harem save se yu yu gat filing long olgeta, yu mas traehad blong soemaot ol filing blong yu. Taem yu luk ol gudfala fasin blong olgeta, talem wan samting blong soemaot se yu laekem fasin ya. Tok blong God i storebaot wan nambawan waef. I gud yu makem wanem ol fasin blong famle blong gudfala waef ya. Baebol i talem se: “Oltaem, ol pikinini blong hem oli stap soemaot we oli glad tumas long hem, mo man blong hem tu i stap talemaot long hem we i glad tumas long hem.” (Ol Proveb 31:28) Makemgud olsem wanem ol memba blong famle ya oli no sem blong talemaot ol filing blong olgeta long narafala. Taem wan man i presem waef blong hem, hem i givim wan nambawan eksampol long boe blong hem, i leftemap tingting blong boe ya blong hem tu biaen, i save presem prapa waef blong hem taem i mared.

Mo tu, i gud we ol papa mama oli presem ol pikinini blong olgeta. Samting ya i givhan long ol pikinini blong oli no ting nogud long olgeta wan. Tru ya, wan man we i ting nogud long hem wan, bambae hem i no save ‘mekem i gud long narafala.’ (Matiu 22:39) Sipos oltaem ol papa mama oli stap tok blong daonem ol pikinini blong olgeta mo oli neva presem olgeta, ol pikinini ya bambae oli tingting nogud long olgeta wan mo bambae oli faenem i had blong soem filing blong olgeta long narafala.—Efesas 4:31, 32.

Yu Save Kasem Help

?Olsem wanem nao sipos yu gruap long wan famle we i no gat lav long hem? Nating se i olsem yu save lanem olsem wanem blong soem ol filing blong yu. Fastaem, yu mas luksave se problem i stap mo se yu nidim help blong winim problem ya. Tok blong God, Baebol, i givhan bigwan long saed ya. Hem i olsem wan glas. Taem yumi skelem ol fasin blong yumi wetem ol tijing blong Baebol, i olsem we yumi stap luk yumi wan long wan glas, ale nao yumi luk klia ol nogud fasin blong yumi wan. (Jemes 1:23) Folem ol tijing blong Baebol, yumi save stretem eni wan long ol nogud fasin ya. (Efesas 4:20-24; Filipae 4:8, 9) Yumi mas mekem samting ya oltaem, ‘yumi no mas kam slak blong mekem ol gudfala fasin.’—Galesia 6:9.

Maet sam oli faenem i had blong soem filing blong olgeta, from edukesen we oli bin kasem long famle blong olgeta no from kalja blong olgeta. Be, sam stadi we man i mekem i no longtaem oli soem se yumi save winim ol problem ya. Dokta Daniel Goleman, wan dokta we i stadi long ol trabol blong tingting, i eksplenem se: ‘Ol fasin we oli stap dip insaed long hat blong man, we man i lanem taem hem i pikinini yet, be ol fasin ya oli save jenis.’ Bitim 1,900 yia bifo, Baebol i talem finis se tabu spirit i save givhan long yumi blong winim ol nogud fasin, nating se ol fasin ya oli stap dip finis long hat blong yumi. Hem i givim advaes ya se: “Yufala i sakemaot olfala laef ya blong yufala finis, wetem ol fasin blong hem, mo yufala i putum niufala laef ya blong yufala, olsem prapa klos blong yufala.”—Kolosi 3:9, 10.

Taem olgeta long famle oli luksave problem blong olgeta, i gud we olgeta evriwan oli tingbaot problem ya taem oli stadi long Baebol. Eksampol, maet bambae i gud blong traem faenem tingting blong Baebol long saed blong “kaen fasin.” Maet bambae yu faenem wan vas olsem se: “Yufala i harem finis tok blong fasin blong Job, we hem i mekem tingting blong hem i longfala. Mo yufala i save finis ol samting we Hae God i mekem long hem biaen. Hae God i kaen tumas, mo hem i gat sore long man.” (Jemes 5:11) Nao tingbaot buk blong Job long Baebol, mo luklukgud olsem wanem Jeova i kaen tumas mo i gat sore long Job. Ating yu tu bambae yu wantem folem eksampol blong Jeova mo soem fasin we i kaen tumas mo sore long famle blong yu.

 Nating se i olsem, yumi sin man mo “plante taem, yumi evriwan i mekem i no stret” long tok blong yumi. (Jemes 3:2) Insaed long famle, maet yumi mestem nao tok blong yumi i no leftemap tingting blong narafala. Hemia nao stret taem blong prea mo blong trastem Jeova. Yumi no mas kam slak. ‘Oltaem yumi mas prea.’ (1 Tesalonaeka 5:17) Bambae Jeova i halpem olgeta we oli nidim lav, wetem olgeta ya tu we oli traehad be oli no naf blong soem filing blong olgeta.

Antap long samting ya, Jeova i halpem yumi tru long Kristin kongregesen. Jemes i raetem se: “?I gat wan long yufala we i sik [long saed blong spirit]? I gud hem i singaot ol elda blong [“kongregesen,” NW ] blong oli kam luk hem. Nao olgeta oli save prea long hem, mo oli save kafsaedem oel i go long hem long nem blong Masta blong yumi.” (Jemes 5:14) Yes, ol elda long ol kongregesen blong ol Witnes blong Jeova oli save givhan bigwan long ol memba blong famle we oli faenem i had blong soem filing long olgeta. Ol elda oli no ol dokta we oli stretem ol trabol blong tingting, be sipos oli gat longfala tingting, oli save halpem ol brata sista blong olgeta. Bambae oli no talem long ol brata sista ol samting we oli mas mekem, be oli talem bakegen tingting blong Jeova long saed blong samting ya, mo oli save prea wetem olgeta mo from olgeta.—Ol Sam 119:105; Galesia 6:1.

Ol Kristin elda oli bin givhan long Tohru mo Yoko, from we oli rere oltaem blong lesin long ol problem blong tufala mo oli leftemap tingting blong tufala. (1 Pita 5:2, 3) Sam samtaem, wan elda wetem waef blong hem tufala i go luk Tohru mo Yoko. Long rod ya, Yoko i haremgud from we hem i kampani wetem wan Kristin woman we i gat ekspiriens, mo sista ya i save ‘tijim hem long stret rod blong lavem man blong hem.’ (Taetas 2:3, 4) Taem ol elda oli soem se oli haremsave filing blong narafala, mo oli soem sore from ol trabol blong ol brata sista, nao ol elda oli kam “olsem strong sefples we man i save go haed long hem blong ronwe long hariken, no gudfala ples we i drae, we man i save go haed long hem blong ronwe long big ren.”—Aesea 32:1, 2.

Sam gudfala elda oli givhan long Tohru, nao hem i luksave problem blong hem se hem i no soemaot ol filing blong hem mo se long “ol lasdei” ya Setan i faet agensem ol famle. (2 Timoti 3:1) Tohru i tekem disisen ya se hem i mas winim problem blong hem. Hem i stat luksave from wanem hem i no save soemaot lav. Hemia from we taem hem i gruap, hem i no kasem lav long famle blong hem. Tohru i stadigud long Baebol mo i prea, nao sloslo hem i stat blong kea long ol filing blong Yoko.

Yoko i bin kros long Tohru, be taem hem i luksave se Tohru i gruap long wan famle we i no soem filing, mo taem hem i luksave ol prapa mastik blong hem wan, nao hem i traehad blong luk ol gudfala fasin blong hasban blong hem. (Matiu 7:1-3; Rom 5:12; Kolosi 3:12-14) Yoko i prea long God wetem fulhat blong hem, blong Jeova i givim paoa long hem blong hem i stap lavem hasban blong hem. (Filipae 4:6, 7) Sloslo, Tohru i stat soemaot ol filing blong hem, mo waef blong hem i haremgud tumas from.

Yes, nating se yu faenem i had blong harem mo soemaot ol filing insaed long famle, yu save winim problem ya. Tok blong God i givim ol nambawan advaes long yumi. (Ol Sam 19:7) Sipos yu luksave se i impoten tumas blong talem ol filing blong yu, yu traehad blong luk ol gudfala fasin blong ol memba blong famle blong yu, yu stadi long Tok blong God mo yu mekem hem i wok long laef blong yu, yu trastem Jeova mo yu prea long hem wetem fulhat blong yu, mo yu askem help long ol Kristin elda we oli bigman long spirit, bambae yu winim problem ya we i olsem wan bigfala samting we i seraotem yu long famle blong yu. (1 Pita 5:7) Yu tu yu save haremgud, olsem wan hasban ya long Yunaeted Stet. Ol man oli leftemap tingting blong hem blong i talem ol filing blong hem long waef blong hem. Taem tingting blong hem i kam strong naf blong talem long waef blong hem se “Mi lavem yu,” man ya i sapraes tumas long ansa blong waef blong hem. Waef blong hem i krae from glad, mo i talem long hem se: “Mi tu mi lavem yu, be tede ya, hem i fastaem long 25 yia we yu talem samting ya long mi olsem.” !Yu no mas wet we plante yia i pas bifo we yu talem ol filing blong yu long waef no hasban blong yu, mo long ol pikinini blong yu!

[Futnot]

[Tok blong pija long pej 28]

Jeova i givhan wetem Tok blong hem, Baebol