Expresa Cariño den e Circulo di Famia

“SI BO ta tribi, kim’e! Kim’e bo ta wak!” Asina Tohru a reta su esposa, Yoko. * “Mi ta kim’e tambe”, el a contesta rabia, y a sende un suafel y kima e potret di nan dos. Despues di esei el a grita rabia: “Mi ta kima e cas aki tambe!” Tohru a bula pasa su casa un wanta y pone un fin na e pleito na un manera violento.

Tres aña prome, Tohru cu Yoko a cuminsa nan bida casa como un pareha felis. Ta kico a bai robes anto? Aunke Tohru a parce di ta un homber agradabel, su casa tawata haya cu e no tawata dun’e cariño y cu e no tawata mustra masha interes den su sintimentonan. Ta parce cu e no por a trata su esposa cu e mesun cariño cu el a ricibi di dje. Door cu Yoko no por a soporta e situacion aki, el a cuminsa bira mas y mas amarga y desgusta. El a hay’e cu hopi problema. E no por a drumi anochi, e tawata sintie ansha, el a perde apetit, el a bira crepchi, deprimi y asta e tawata haya atakenan di miedo. Parce cu Tohru si no tawata precupa su cabes cu e ambiente tenso cu tawata reina den su hogar. E situacion tawata parce masha normal p’e.

“Temponan Trabahoso”

E problemanan ei ta masha comun awe. Apostel Pablo a predeci cu un caracteristica di nos tempo lo ta hende “sin amor.” (2 Timoteo 3:​1-5) E palabra original Griego traduci aki como “amor” tin relacion estrecho cu e palabra cu ta describi e cariño natural cu ta existi entre miembronan di famia. Awe den nos tempo sigur tin un falta di e cariño ei. Asta si e cariño ei t’ei mes, podise ta masha poco bes miembronan di famia ta expres’e na otro.

Awendia tin hopi mayor cu no sa con pa expresa amor y cariño na nan yiunan. Algun di nan a lanta den un famia caminda no tawatin cariño y podise nan no ta realisa cu nan bida por ta mas felis y placentero si nan djis haya cariño y tambe expres’e. Ta parce cu esaki tawata e caso cu Tohru. Ora e tawata chikito, semper su tata tawata druk cu trabou y tawata bini cas laat anochi. Masha poco e tawata papia cu Tohru, y ora e tawata papia cu ne mes, e tawata hacie di un manera bruto. Tohru su mama tambe tawata traha henter dia y e no tawata dedica masha tempo na dje. Television tawata su babysitter. No tawatin elogio ni comunicacion den e famia ei.

Cultura tambe por ta un factor. Na algun parti di Latino America no ta pas den e cultura pa un hende homber expresa cariño na su casa. Den hopi pais oriental y na Africa, no ta custumber cu hende ta expresa cariño cu palabra y echonan. Pa esposonan ta masha dificil pa nan bisa nan casa of yiunan: “Mi stima bo.” Sinembargo,  nos por siña un bon les for di e relacion di famia di mas importante y duradero.

Un Relacion di Famia Ehemplar

Nos por saca e miho ehempel pa famia for di e relacion intimo cu ta existi entre Yehova Dios y su Yiu unigenito. Nan ta expresa nan amor pa otro den un manera perfecto. Pa miles y miles di aña, e criatura spiritual cu despues a bira Hesucristo a disfruta di un relacion felis cu su Tata. El a describi nan relacion cu e palabranan aki: “Dia tras dia mi tawata su delicia, regosihando semper su dilanti.” (Proverbionan 8:30) E Yiu tawata asina sigur di e amor di su Tata cu e por a bisa otronan cu e tawata un delicia pa Yehova dia tras dia. Tur ora el a sintie felis den presencia di su Tata.

Asta ora Hesus, e Yiu di Dios, tawata riba tera como hende, su Tata a sigur’e di su amor profundo. Despues cu Hesus a batisa, el a tende e bos di su Tata bisa: “Esaki ta mi Yiu stima, den kende mi tin goso.” (Mateo 3:17) E expresion di amor ei sigur a duna Hesus curashi na principio di Hesus su mision riba tera. Ora Hesus a bolbe corda su bida den shelo, su curason lo mester a emociona ora el a tende su tata expresa su aprobacion.

Pues e manera completo cu Yehova ta expresa su amor pa su famia universal ta e miho ehempel. Si nos acepta Hesucristo, nos tambe por disfruta di Yehova su cariño. (Huan 16:27) Aunke nos no ta tende palabra for di shelo, nos ta ripara Yehova su amor expresa den naturalesa, den e percuracion di rescate di e sacrificio di Hesus y den otro maneranan. (1 Huan 4:​9, 10) Yehova ta asta scucha nos oracionnan y contesta nan na e manera cu ta beneficia nos mas. (Salmo 145:18; Isaias 48:17) Segun cu nos ta cultiva un relacion intimo cu Yehova, nos aprecio pa su cuido amoroso ta crece.

Hesus a siña for di su Tata con pa mustra empatia, consideracion, bondad y interes profundo pa otronan. El a splica: “Tur loke cu e Tata haci, e Yiu tambe ta haci mescos. Pasobra e Tata ta stima e Yiu y ta mustr’e tur cos cu E mes ta haci.” (Huan 5:​19, 20) Anto nos, na nos turno, por siña e arte di expresa cariño door di studia e ehempel cu Hesus a pone ora e tawata riba tera.​—Filipensenan 1:8.

Con pa Mustra Cariño den Famia

Siendo cu “Dios ta amor” y nos a ser crea ‘segun su imagen’, nos ta capas pa sinti y expresa amor. (1 Huan 4:8; Genesis 1:26, 27) Sinembargo, esaki no ta nifica cu automaticamente nos ta expresa amor. Pa nos por duna nos casa of yiunan cariño, nos tin cu sinti e cariño ei pa nan prome. Observa bo miembronan di famia y busca cualidadnan agradabel den nan, aunke na principio nan por parce insignificante; pensa riba e cosnan ei. Kisas bo por bisa: ‘Mi casa [of yiunan] no tin nada cu mi ta gusta.’ Esnan cu ta casa cu un persona cu otro hende a scohe pa nan, kisas no ta sinti masha cariño pa nan casa. Otro parehanan kisas no tawata kier yiu. Sinembargo, pensa riba e manera cu Yehova a sinti tocante su esposa figurativo, e nacion di Israel, den siglo 10 prome cu nos era. Aunke profeta Elias a yega na e conclusion cu no tawatin mas adorado di Yehova den e nacion di dies tribu di Israel, Yehova a scudriña nan cuidadosamente y a haya un cantidad grandi di hende—7.000 na tur—cu tawatin cualidadnan cu ta agrad’e. Bo por imita Yehova door di busca loke ta bon den e miembronan di bo famia?—1 Reinan 19:14-18.

 Sinembargo, pa otro miembronan di famia por sinti cu bo tin cariño pa nan, bo tin cu haci esfuerso sinsero pa expresa e cariño aki. Ki ora cu bo ripara algo cu merece elogio, expresa bo aprecio cu palabra. Den su descripcion di un esposa capas, e Palabra di Dios ta haci remarke di un caracteristica interesante di su famia: “Su yiunan ta lanta y ta yam’e bendiciona; su esposo tambe, y e ta gab’e.” (Proverbionan 31:28) Ripara con e miembronan di famia ta expresa nan aprecio libremente pa otro. Ora un tata ta expresa aprecio pa su casa cu palabra, e ta pone un bon ehempel pa su yiu homber y esaki ta anim’e pa ora e casa, e tambe duna su casa elogio ki ora cu mester.

Mayornan tambe mester elogia nan yiunan. Esaki por inculca respet propio den curason di e muchanan. Pasobra, con un persona por ‘stima su prohimo manera su mes’ si e no tin respet propio? (Mateo 22:39) Di otro banda, si semper mayornan ta critica nan yiunan, y no ta elogia nan nunca, ta facil pa e muchanan perde respet propio, y podise ta bira dificil pa nan mustra cariño pa otro hende.—Efesionan 4:31, 32.

Bo Por Haya Yudansa

Kico si bo a lanta den un cas caminda no tawatin amor? Toch bo por siña expresa cariño. E prome paso ta pa bo reconoce cu bo tin un problema y cu bo mester mehora. Dios su Palabra, Bijbel, ta un gran yudansa den e aspecto aki. Nos por compar’e cu un spiel. Ora nos examina nos mes den e spiel figurativo di e siñansanan di Bijbel, e ta saca na cla nos defecto of fayonan den nos manera di pensa. (Santiago 1:23) Na harmonia cu e siñansanan di Bijbel, nos por corigi cualkier inclinacion incorecto. (Efesionan 4:​20-24; Filipensenan 4:8, 9) Nos mester haci esaki regularmente, sin nunca “cansa di haci bon.”—Galationan 6:9.

Podise tin hende ta pensa cu ta dificil pa nan mustra cariño debi na nan criansa of cultura. Sinembargo, estudionan resien ta indica cu bo por vence e obstaculonan ei. Dr. Daniel Gole­man, un specialista den salu mental, ta splica cu ‘asta e custumbernan di mas profundo implanta den curason for di den infancia por ser cambia.’ Mas cu 1.900 aña pasa, Bijbel a indica cu asta e inclinacionnan di curason di mas profundo hancra, por ser transforma cu yudansa di e spirito di Dios. El a conseha nos: “Pone un banda e hende bieu cu su practicanan malbado, y . . . bisti e hende nobo.”—Colosensenan 3:9, 10.

Una bes cu nan identifica e problema, e famia por studia Bijbel cu nan necesidad na mente. Por ehempel, pakico no investiga loke Bijbel ta bisa tocante “cariño”? Lo bo por haya textonan manera esun aki: “Boso a tende di e perseverancia di Job y a mira e fin cu Señor tawatin na bista, cu Señor ta yen di compasion [“masha tierno di cariño”, NW] y ta misericordioso.” (Santiago 5:11) Despues considera e relato biblico di Job, y concentra riba e manera cu Yehova a mustra cariño y misericordia na Job. Sin duda lo bo kier imita Yehova door di ta cariñoso y misericordioso cu bo famia.

Sinembargo, door cu nos ta imperfecto, “nos tur ta trompica na hopi manera” ora nos ta uza nos lenga. (Santiago 3:2) Podise nos ta faya den nos circulo di famia door di no uza nos lenga den un manera cu ta curasha otronan.  Na momentonan asina ta necesario pa haci oracion y depende riba Yehova. No entrega. “Haci oracion sin stop.” (1 Tesalonicensenan 5:17) Yehova lo yuda hende cu ta anhela cariño di nan miembronan di famia y tambe esnan cu kier expresa cariño, pero cu tin dificultad pa haci esei.

Ademas, di un manera bondadoso Yehova a percura yudansa den congregacion cristian. Santiago a skirbi: “Tin un hende entre boso cu ta malo [spiritualmente]? Lag’e yama e ancianonan di iglesia, y laga nan haci oracion p’e, huntando e cu azeta den e nomber di Señor.” (Santiago 5:14) Si, ancianonan den congregacion por ta un gran yudansa pa famianan den cua e miembronan tin problema pa expresa cariño na otro. Aunke nan no ta psicologo, cu pasenshi e ancianonan por yuda nan compañeronan creyente, no door di bisa nan kico nan tin cu haci, ma door di recorda nan e punto di bista di Yehova y haci oracion cu nan y pa nan.—Salmo 119:105; Galationan 6:1.

Den e caso di Tohru y Yoko, semper e ancianonan cristian a scucha nan problemanan y consola nan. (1 Pedro 5:​2, 3) Tawatin ocasionnan cu un anciano y su casa a bishita nan pa asina Yoko por a beneficia di e compania di un ruman mohe cristian cu experencia cu por a ‘curasha Yoko pa e stima su esposo.’ (Tito 2:​3, 4) Door cu e ancianonan ta mustra compasion y empatia pa e sufrimento y dolornan di compañeronan cristian, nan ta bira “un refugio contra biento, y un proteccion contra tempestad.”—Isaias 32:1, 2.

Cu yudansa di ancianonan bondadoso, Tohru a realisa cu e tawatin problema pa expresa su emocionnan y cu den “e ultimo dianan” aki Satanas ta lansa atake contra e areglo di famia. (2 Timoteo 3:1) Tohru a dicidi di trata cu su problema. El a cuminsa compronde cu e no tawata expresa amor pasobra e tampoco no a haya amor ora e tawata chikito. Mediante studio di Bijbel y oracion sinsero, tiki tiki Tohru a cuminsa reacciona mas y mas riba Yoko su necesidadnan emocional.

Aunke Yoko tawata rabia cu Tohru, ora el a compronde den ki famia Tohru a lanta, y a pensa riba su propio fayonan, el a haci esfuerso sinsero pa mira e bon cualidadnan di su esposo. (Mateo 7:1-3; Romanonan 5:12; Colosensenan 3:12-14) Sinseramente el a roga Yehova pa dun’e fortalesa pa e sigui stima su casa. (Filipensenan 4:6, 7) Cu tempo, Tohru a cuminsa expresa su cariño, y su esposa a keda masha contento.

Si, asta ora bo ta pensa cu ta dificil pa bo sinti y expresa cariño den bo famia, bo por vence e problema ei sigur. Dios su Palabra ta duna nos guia saludabel. (Salmo 19:7) Door di reconoce e seriedad di e asunto, door di mira e bon cualidadnan di e miembronan di bo famia, door di studia y aplica Dios su Palabra, door di depende riba Yehova via oracion sinsero y door di busca yudansa serca ancianonan cristian maduro, bo por vence loke lo por a parce un barera grandi entre abo y bo famia. (1 Pedro 5:⁠7) Bo tambe por alegra mescos cu un homber casa na Merca. El a ser anima pa mustra cariño na su esposa. Ora cu por fin el a haya e curashi pa bisa: “Mi stima bo”, el a keda sorprendi door di e manera cu su esposa a reacciona. Cu lagrima di alegria, su esposa a bisa: “Mi tambe stima bo. Den e 25 añanan aki ta prome bes cu mi ta tend’e bo bis’e den e forma ei.” No warda asina hopi pa bo expresa bo cariño pa bo casa y yiunan!

[Nota]

[Plachi na pagina 28]

Yehova ta duna yudansa mediante su Palabra, Bijbel