Au Uianga a te Aronga Tatau

Eaa ra te Pipiria i tuatuai e kia kapiki ua tetai me tamatakuia no te tauati?

Ko tetai ua atu kare i kite i te kino me takinokinoia e tetai tangata tauati kare roa e marama tikai e akapeea te reira me akakino i to tetai oraanga. E kino pakari tikai taua tupu anga no tetai vaine e penei ka tamanamanata iaia no te katoaanga o tona oraanga. * Kua akakite mai tetai vaine mapu Kerititiano tei takinokinoia e tetai tangata tauati i etai mataiti i topa e: “Kare e rauka i te au tuatua i te akakite i toku mataku i taua po ra me kare i toku autu anga i te mamae mei taua taime maira.” Tei maramaia, e manganui te inangaro ra kia kore e akamanako i taua tumu tuatua matakuia. Inara, e tika tikai te tamataku anga no te tauati i roto i teia ao kino.

Kare te Pipiria e kopae ana i te akakite mai i etai au tupu anga tauati e te tauta anga i te rave i te tauati tei tupu ana i te tuatau i topa. (Genese 19:4-11; 34:1-7; 2 Samuela 13:1-14) Inara te oronga katoa maira te reira i te ako anga no runga i ta tetai ka tau kia rave me takinoia no te tauati. Ko ta te Ture e akakite ra no runga i taua manako te kiteaia ra ia Deuteronomi 22:23-27. Te akara ra teia i nga akatauanga e rua. I roto i te akatauanga mua, kua kitea e tetai tangata tetai vaine mapu i roto i tetai oire e kua moe atura kiaia. Noatu rai, kare te vaine i kapiki ana me kare i ava ana no te tauturu. Tei tupu, kua akatakaia mai e kua apa aia “no te mea i roto aia i te oire e kare rai aia i kapiki.” Naringa aia i kapiki ua, penei ka rauka i te au tangata i te pae mai i te oro mai i te tauturu iaia. I roto i te rua o te akatauanga, kua kite atu tetai tangata i tetai vaine mapu i te ngai motutaa, i reira kua ‘opu [aia] iaia, kua moe iora kiaia.’ Ei paruru anga, kua ‘kapiki ua [te vaine], e kare e tangata  i te akaora iaia.’ Kare mei te vaine i roto i te akatauanga mua, te taka meitaki ra kare teia vaine i ariki ana i te au angaanga a te tangata takino ra. Kua patoi maroiroi aia iaia, te kapikianga no te tauturu, inara kua autuia aia. Kua akapapu tana kapikianga e kare aia i te vaine puareinga; kare aia i apa no te rave anga kino.

Noatu kare te au Kerititiano i teia tuatau i raro ake i te Ture a Mose, ko te au kaveinga tei taikuia i roto i te reira te oronga maira kia ratou i te arataki anga. Te akakite maira te tataanga i runga akenei i te puapinga maata o te patoi anga e te kapikianga no te tauturu. Te kapikianga me takinoia no te tauati te manakoia ra rai ei aerenga tau. Kua akakite tetai tangata kite no runga i te kopae anga i te rave anga kino: “Me takinoia tetai vaine, ko tana apinga meitaki ka taangaanga ko tona reo.” Penei ka akakeu ta tetai vaine kapikianga i tetai atu kia aere mai, e penei ka rauka i reira i te tauturu iaia, me kare penei ka tamataku i tei rave kino e ka akakeu iaia kia akaruke. Kua tuatua tetai vaine mapu tei takinoia e tetai tangata tauati e: “Kua kapiki maata tikai au, e kua aere ke atu aia. I te akavaitata anga mai aia kiaku, kua kapiki maata au e kua oro. I te tuatau i topa kua manako putuputu ana au, ‘Akapeea te kapikianga i te tauturu anga mai iaku me opu mai tetai tangata maatamaata iaku ma te akakoroanga okotai i roto i tona manako?’ Inara kua kite mai au e te angaanga ra te reira!”

Noatu i roto i te akatauanga e kua autuia tetai vaine e kua tauatiia, kare i puapinga kore tana opara anga e te kapikianga i te tauturu. Ei tuke anga, te akanoo maira te reira e kua rave aia i tei rauka iaia no te patoi i tei takino iaia. (Deuteronomi 22:26) Noatu kua o atu ki roto i teia tupu anga, ka rauka rai iaia tetai akava ngakau viivii kore, te tu ngateitei uaorai, e te akapapu anga e kua ma aia i roto i nga mata o te Atua. Penei ka akaruke mai taua tupu anga mataku i te au mamae ngakau, inara te kiteanga e kua rave aia i tei rauka iaia no te patoi atu i tei takino mai ka tauturu maata atu iaia kia meitaki marie ra.

Te maramaanga i te aite anga o Deuteronomi 22:23-27, ka tau tatou kia kite e kare teia tataanga poto ua e akara pouroa ana i te au turanga te rauka ra. Ei akatauanga, kare te reira e akakite mai ana no runga i te turanga me takinoia tetai vaine kare e rauka i te kapiki no te mea e vaine murare, kare i kite, me kore kua ngoruia no te mataku me kare kua araiia tona vaa e te rima me kare e tetai apinga tapiri kia kore e rauka i te kapiki atu. Inara, i te mea ka rauka ia Iehova i te akara i te au tumu manako pouroa, kapiti mai te au akakoroanga, te akono ra aia ma te maramaanga e te tuatua tau i roto i taua au turanga, no te mea e “tau katoa tona au aerenga.” (Deuteronomi 32:4) Kua kite oki aia i tei tupu tikai e no te au tauta anga a te vaine i rave i te patoi anga i tei takinokino iaia. No reira, ko tetai vaine kare e rauka i te kapiki mari ra kua rave i tei rauka iaia i roto i taua au turanga ka rauka i te akaruke i te au mea ki roto i nga rima o Iehova.​—Salamo 55:22; 1 Petero 5:7.

Noatu rai, te mamae putuputu ra tetai au vaine Kerititiano tei takinoia e tei akaviiviiia e te au manako ngakau apa. No reira, te manako ra ratou e kia maata atu ta ratou kia rave no te arai i taua atianga mei te tupuanga. Inara, koi kore ei e akaapa ua ia ratou uaorai, ka rauka i taua aronga i te pure kia Iehova, te pati anga i tana tauturu, e te papu anga i tona aroa takinga meitaki.​—Exodo 34:6; Salamo 86:5.

No reira, ko te au vaine Kerititiano te autu ra i teianei ma taua au mamae anga ngakau tei tupu mai no te tauati kia papu e te marama tika maira a Iehova i te au manako ngakau mamae te akono ra ratou. Te akapapu maira te Tuatua a te Atua kia ratou e: “Te vaitata nei a Iehova i te aronga ngakau paruparu ra; e te akaora nei aia i te aronga ngakau taitaia.” (Salamo 34:18) Ka rauka tetai atu tauturu kia autu i tei tupu kia ratou mei te arikianga i te tauturu anga maru e te maramaanga ngakau tae o te au taeake irinaki i roto i te putuputuanga Kerititiano. (Iobu 29:12; 1 Tesalonia 5:14) Pera katoa, ka tauturu te au tauta anga a tetai tei takinoia no te akamanako i te au manako papu ia ratou kia kite i “te au o te Atua, ko tei maata ua atu i te kite tangata.”​—Philipi 4:6-9.

[Tataanga Rikiriki i Raro]